1 Iřaɣa Yasuɛ x tenɛac n imeḥḍaren nnes, iwca asen ṣṣulṭa ḥima ad ssuffɣen řaryaḥ imengas u ḥima ad ssgenfan marra řeɛyubat d řehřacat. [a] 2 Ismawen n tenɛac n rrusul d yina: amezwaru nsen Cimɛun umi qqaren Buṭrus, isem wanita ixs ad yini ‘Aẓru’, d umas Andrawus, d Yaɛqub, mmis n Zabdi, d umas Yuḥanna, [b] 3 d Filippus d Bar-Tulumawus, Tuma d Matta, wenni d bu-ḍḍariba, d Yaɛqub, mmis n Ḥalfa, d Labbawus, umi qqaren Tadday, 4 d Cimɛun, wenni d Amɛessab, d Yahuda Isxariyuṭi wenni t isellmen. 5 Yasuɛ issekk tenɛac-a, yumur i-ten, inna: “War ttruḥem ca x webrid n lkuffar, war ttadfem ca ɣar tendint n Isamariyyen, 6 maca ḥsen ad traḥem ɣar wuǧi iweddaren n taddart n Israil. [c] 7 Xmi ɣa traḥem, barrḥem am teqqarem: ‘Tageldit n ijenwan aqa tiweḍ-dd!’ [d] 8 Sgenfam imehřac, sizdgem inni di iǧa řbarṣ, suffɣem ccwaṭen. Kenniw teksim břa ca, xenni wcem tt břa ca. [e] 9 War kessim ca wureɣ uřa d nnuqart uřa d nnḥas deg ibuyas nwem, [f] 10 war kessim ca ttesṭim i webrid řa d tnayen n tcamirat řa d sandaliyat uřa d taɣɣarct nneɣni, minzi axeddam isdaheǧ macca nnes. [g] 11 Man tandint niɣ dcar i ɣa tadfem, arzum wi dayes isdaheǧ, uca qqimem din ař d traḥem. [h] 12 Mařa tudfem ɣar taddart, seǧmem x aytbab n taddart s řehna. 13 Mařa taddart tesdaheǧ, jjem xas řehna nwem, mařa war t tesdiheǧ, xenni řehna nwem ad ɣarwem dd-iɛqeb. 14 Mařa tufim ca n yijjen war kenniw iqebbeř u war ittesři i wawařen nwem, ffɣem zi taddart nni niɣ zi dcar nni, zzerzem taɛejjajt zeg iḍaren nwem. [i] 15 S tidett, Necc ad awem iniɣ: Ad yiři řḥař i temmurt n Sadum d Ɛamurra ihwen zi tendint nni deg wass n lḥisab.” [j]

16 “Xzarem, řexxu ad kenniw ssekkeɣ am uǧi di řwesṭ n wuccanen. Iřim tfettnem amecnaw ifiɣran u ɣeffřem amecnaw idbiren. [k] 17 Maca ḥḍam ixef nwem zeg iwdan, minzi nitni ad kenniw sellmen i taddart n ccreɛ, ad kenniw hettken s urekkuḍ di temzidawin nsen. [l] 18 Ad kenniw nedhen zzat i řḥukkam d zzat i ijeǧiden di ssibbet inu, ḥima ad tiřim d cchadet i nitni uřa i řegnus. [m] 19 Mařa sellmen kenniw, war kessim ca s wemnus mammec d min ɣa tessiwřem, minzi ad awem immewc di tsaɛɛet nni min ittxeṣṣa ad tinim. [n] 20 Maɣar war iǧi d kenniw inni issawařen, maca d Arruḥ n Babatwem d Netta i daywem issawařen.

21 Umas ad isellem umas ḥima ad itwaneɣ u babas mmis, uca ad kkaren tarwa d aɣezdis i lwalidin nsen, ad ten nɣen. [o] 22 Ad kenniw carhen marra idsen x ssibbet n Yisem inu, maca wenni i ɣa iṣbaren ař aneggaru ad ittwassenjem. [p] 23 Mařa darrcen xawem di tendint-a, arewřem ɣar tenneɣnit. S tidett, Necc ad awem iniɣ: kenniw war tᵉttekkem ca x marra tineddam n Israil ař dd ɣa yas Mmis n bnadem.” [q]

24 “War iǧi umeḥḍar yuɛřa x umseřmad nnes, uřa d amsexxar x bab nnes. [r] 25 Ikfa i umeḥḍar ad yiři am umseřmad nnes u amsexxar am bab nnes. Mařa řaɣan as i Bab n taddart ‘Bᵉɛalzabul’, ixs ad yini ‘ibřis’, mecḥař ɛad i aytbab n taddart nnes! [s] 26 War tteggʷedem ca zzaysen. Minzi war din min idřin ad iqqim war ittwaɛarri, uřa war din min inuffaren ad iqqim war ittwissen.” [t]

27 “Min d awem qqareɣ di taǧest, inim t di tfawt, min tesřim, qqaren t deg imezzuɣen nwem, barrḥem zzayes x tzeɣwin. 28 War tteggʷedem ca zeg inni ineqqen arrimet, maca war zemmaren ad nɣen řeɛmar. Ggʷedem d amezwaru zeg Wenni izemmaren ad isshellek řeɛmar d arrimet di jᵉhennama. [u] 29 Ma war ttmenzin tnayen n ẓẓawec s yijj n uṣuldi n nnḥas? Uřa d ijj zzaysen war dd-iweṭṭi ca x temmurt břa Babatwem, 30 maca uřa d iẓuṭṭan n ucuwwaf n uzeǧif nwem ttwaḥessben marra. [v] 31 S uyenni war tteggʷedem ca, aqa kenniw teɛdum ẓẓawec aṭṭas. 32 S uya kuř ijjen wenni zzayi i ɣa icehden zzat i iwdan, uřa d Necc ad zzayes cehdeɣ zzat i Baba i iǧan deg ijenwan. [w] 33 Maca wenni d ayi ɣa inkaren zzat i iwdan, uřa d Necc ad t nkareɣ zzat i Baba i iǧan deg ijenwan.”

34 “War ttɣiřem ca belli usiɣ-dd ḥima ad awyeɣ řehna i ddunect. Necc war dd-usiɣ ca ḥima ad awyeɣ řehna, maca ssif. [x] 35 Usiɣ-dd ḥima ad bḍiɣ aryaz x babas, d yeǧis x yemmas, d tesřit x řallas. [y] 36 Aytbab n taddart n bnadem ad iřin d řɛedyan nnes. [z] 37 Wenni ittexsen babas niɣ d yemmas xafi, war d ayi isdiheǧ ca, uca wenni ittexsen mmis niɣ d yeǧis xafi, war d ayi isdiheǧ ca. [aa] 38 Wenni war ikessin ṣṣalib nnes uca ad ayi dd-iḍfar, aqa netta war d ayi isdiheǧ ca. [bb]  [cc] 39 Wenni i ɣa yafen tudart nnes ad tt ixsar, d wenni i ɣa ixsaren tudart nnes di ṭṭweɛ inu ad tt yaf. [dd]

40 Wenni kenniw i ɣa iqebřen, iqebbeř ayi, u wenni d ayi ɣa iqebřen, iqebbeř wenni d ayi dd-issekken. [ee]

41 Wenni i ɣa iqebřen anabi minzi netta d anabi, ad iṭṭef řmunet n unabi, d wenni i ɣa iqebřen amseggad s minzi netta d amseggad, ad iṭṭef řmunet n umseggad. [ff] 42 Wenni i ɣa iwcen i yijjen zeg ina imeẓyanen ijj n řkas n waman d asemmaḍ, mɣir minzi netta d ameḥḍar inu, s tidett, Necc ad awem iniɣ, war d as tᵉttriḥ řmunet nnes ɛemmarṣ.” [gg]