1 Xenni isweḍ Yasuɛ ɣar aytbab n wagřa ssrusan ṣṣdaqi nsen di ssenduq. [a] 2 Iẓra ɛawed ict n tajjač tamezřuḍt tessars dayes tnayen n uqiyyat, semman tent ‘camunat’. 3 Inna asen: “S tidett, Necc ad awem iniɣ, aqa tajjač-a řmeskina tenḍar dayes ktar zzaysen marra. [b] 4 Minzi marra nitni nḍaren zi zziyada n wagřa nsen ict n ṣṣedqet deg wexxam n ṣṣdaqi n AREBBI, maca nettat zi řexṣeṣ nnes aqa tenḍar dayes marra min ɣares.”

5 Ařami tuɣa ca n iwdan ssawařen x Zzawect Tameqqrant, tenni tzewweq s iẓra iṣebḥen d ṣṣdaqi, inna asen Yasuɛ: [c] 6 “Ma tᵉttwařam timesřayin-a? Ad dd-asen wussan war ittɣimi uřa d ijj n weẓru x weẓru nneɣni i war ittareddǧen.” [d] 7 Sseqsan t, nnan: “A Amseɣɣar, meřmi i ɣa yiři uya d man řeɛřamet aqa timesřayin-a udsent-i-dd?” 8 Inna asen: “Ɛessem, war tᵉttwaɣarrem, minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’ u: ‘Řweqt aqa tiweḍ-dd!’, maca war ggurem awarni asen. [e] 9 Mařa tesřim x řbaruḍ d iɣewwɣen, war ttnexřiɛem ca, minzi s uɣiř ad yiři uya d amezwar, maca war ittiři ɛad deɣya uneggar.

10 Maɣar ijj n řgens ad dd-igeɛɛed ḍidd n ijj n řgens nneɣni u ict n tgeldit ḍidd n ict n tgeldit nneɣnit. [f] 11 Ad iřin inhezziyyen n temmurt mɣaren di ɛřam kuř imucan d řaẓ d jjrayeḥ d tiggʷudi d usnexřiɛ. Uca ad dd-banent řeɛřamat mɣarent zeg ujenna u ad din iřint tḥaryaḍin ijehden. 12 Maca qbeř man aya marra ad xawem ssarsen ifassen, ad kenniw sellmen ɣar temzidawin d řeḥbusat, uca ad kenniw nedhen zzat i ijeǧiden d řḥukkam x ssibbet n Yisem inu. [g] 13 Maca man aya ad yarra kenniw ad tcehdem. [h] 14 Ggem deg wuřawen nwem maḥend war tarezzum ad třemdem mammec i dd ɣa tarrem. [i] 15 Minzi Necc ad awem wceɣ aqemmum d tiɣit i war zemmaren ad ten ssbedden marra řɛedyan nwem. [j] 16 Ad kenniw sellmem lwalidin nwem d tawmat nwem d řaǧ nwem d imeddukkař nwem uca ad nɣen ca zzaywem, [k] 17 u kenniw ad tᵉttwacarhem zi marra s ssibbet n Yisem inu. [l] 18 Waxxa amenni uřa d ijj n uẓeṭṭu n ucuwwaf n uzeǧif nwem war ittweddari ca, [m] 19 maca s ṣṣbar nwem ad tarebḥem řeɛmur nwem.”

20 “Xmi ɣa tẓarem Urcalim aqa inneḍ as-dd řɛeskar, xenni snem belli aqa iqarreb-dd wareddeǧ nnes. [n] 21 Xenni ittxeṣṣa ad arewřen inni iǧan di Yahudiyya ɣar idurar, ejj inni iǧan di řwesṭ nnes ad zzayes ffɣen, ad arewřen, d yinni iǧan di dcurat, war tt ttidfen, 22 minzi ina d ussan n nneqmet ḥima ad ittwakemmeř marra min yurin. [o]  [p] 23 Uct x temɣarin nni s ddeyset d tinni issuṭṭuḍen deg wussan nni, minzi ad din tiři řmeḥnet d tameqqrant x temmurt d weɣḍab x řgens-a. 24 Nitni ad wḍan s řeqḍeɛ n ssif, ad ttwaḥebbsen am ttwanedhen jar marra řegnus, uca Urcalim ad xas ɛefsen řegnus ař ɣa kemmřent zzmanat n řegnus.” [q]

25 “Ad din iřint řeɛřamat di tfuct, di tziri u deg itran, uca x temmurt ad din tiři řmeḥnet di řegnus, ař d asen iweddar min ɣa ggen zeg unexřiɛ n zzhir ameqqran n řebḥar, [r] 26 u zeg wenhezzi n temmurt d ameqqran ad issnexřiɛ řeɛmar n iwdan zi tiggʷudi zi min i dd ɣa yasen x temmurt, u ṣṣulaṭat n ijenwan ad ttwanhezzent. 27 Řexdenni ad ẓaren Mmis n bnadem, xmi dd ɣa yas deg iseynuten, s jjehd d uɛuǧi aṭṭas. [s] 28 Xmi ɣa bdant tmesřayin-a, ggem taryast, sgeɛɛdem izeǧifen nwem minzi asenjem nwem aqa yiweḍ-dd.” [t]

29 Iɛawed asen ijj n umedya: “Xzarem ɣar wartu n tazart u ɣar marra ticejjura. [u] 30 Xmi ɣa ssneḍyent, ad tessnem s man aya aqa anebdu yiweḍ-dd. 31 Ammu ittxeṣṣa ɛawed kenniw, xmi ɣa tᵉttwařam timesřayin-a ttemsarant, snem xenni belli Tageldit n AREBBI tudes-dd. 32 S tidett ad awem iniɣ, aqa war iɛeddu jjiř-a ař ɣa yiři uya kuřci. 33 Ajenna d temmurt ad ɛeddun, maca awařen inu war ɛeddun ɛemmarṣ. [v]

34 Ḥḍam ixef nwem ḥima war tteḍqiřen wuřawen nwem zeg ufucceḥ d wescar d imunas n ddunect-a, u war xawem dd-iwḍi wass nni deɣya. [w] 35 Minzi ad dd-yas ass nni am řfex x marra inni iqqimen x uɣembub n temmurt. [x] 36 Ḥḍam xenni řebda, ẓaǧem ḥima ad tiřim tesdaheǧem maḥend ad tnejmem zi marra min ɣa imsaren, uca ad tbeddem zzat i Mmis n bnadem.” [y]

37 S uziř tuɣa isseřmad di Zzawect Tameqqrant, maca s ǧiřet tuɣa itteffeɣ, ittɣima ittnusa x wedrar umi qqaren: ‘Taddart n Zzitun’. [z] 38 Di ṣṣbeḥ zic tuɣa marra iwdan ttasen-dd ɣares di Zzawect Tameqqrant ḥima ad sřen Awař nnes.