1 Awarni man aya tuɣa Yasuɛ iggur di Ljalil, war ixs ad yuyur di Yahudiyya, minzi Udayen tuɣa arezzun ad t nɣen. 2 Iqarreb-dd Řɛid n Iɛuccuten n Wudayen. [a] 3 Nnan as aytmas: “Ffeɣ ssanita, ruḥ ɣar temmurt n Yahudiyya ḥima uřa d imeḥḍaren nnec ad ẓaren řexdayem nni tᵉttegged. 4 Uřa d ijj war ittegg ca n tmesřact s tnuffra, mařa yarezzu ad isseḍhar ixef nnes s bṭayṭay. Mařa teggid timesřayin-a, scen Ixef nnec i ddunect.” 5 Minzi uřa d aytmas war dayes uminen ca. [b] 6 Inna asen Yasuɛ: “Řweqt inu ɛad war dd-tiwiḍ, maca řweqt nwem aqa-tt řebda akidwem. 7 Ddunnit war tzemmar ad kenniw tcarh, maca nettat tcarh ayi, minzi Necc cehhdeɣ xas belli řexdayem nnes d tiɛeffanin. [c] 8 Ruḥem kenniw ɣar Řɛid-a. Necc war ttriḥeɣ ca ɣar Řɛid-a, minzi řweqt inu ɛad war tkemmeř.” [d] 9 Awarni řami inna ammu, iqqim di Ljalil.

10 Maca umi geɛɛden aytmas ɣar Řɛid, iruḥ uřa d Netta ɣar Řɛid, war iǧi s bṭayṭay, maca igga axmi innufar. 11 Udayen arezzun xas di Řɛid, nnan: “Mani iǧa Wanita?” [e] 12 Aṭṭas zi řɣaci temtumen xas. Ca zzaysen nnan: “Netta d aṣebḥan” Maca inneɣni nnan: “Lla, maɣar issxarriq x řɣaci!” [f] 13 Maca uřa d ijj war xas issiweř s bṭayṭay zi ssibbet n tiggʷudi zeg Wudayen. [g]

14 Maca ařami iɛdu wezyen n Řɛid, igeɛɛed Yasuɛ ɣar Zzawect Tameqqrant, isseřmad din. 15 Udayen dehcen, nnan: “Mammec igga Weryaz-a issen Idlisen am war iɣri ca?” 16 Yasuɛ yarra-dd, inna: “Taɣuri inu war teǧi ca inu, maca n Wenni d ayi dd-issekken. [h] 17 Mařa ijjen ixs ad igg min ixs Netta, ad issen ma aqa taɣuri-ya zi AREBBI niɣ aqa ssawařeɣ ɛlaḥsab řxaḍar inu. 18 Wenni issawařen zeg uxarreṣ n řxaḍar n yixef nnes, yarezzu aɛuǧi nnes, maca Wenni yarezzun aɛuǧi n wenni t-i-dd issekken, aqa Netta d tidett, war dayes bu řɣecc. 19 Ma war iǧi d Musa i d awem iwcin Ccariɛa? Maca uřa d ijj zzaywem war ittegg Ccariɛa? I mayemmi xenni tarezzum ad ayi tenɣem?” [i]

20 Řɣaci yarra-dd, nitni nnan: “Dayek ijj n cciṭan, wi yarezzun ad Cek nɣen?” [j] 21 Yasuɛ yarra-dd, inna asen: “Ggiɣ ict n řxedmet uca kenniw tᵉttbehtem marra. 22 I uya Musa iwca awem-dd axtan, war iǧi minzi axtan zi Musa i yeǧa, maca minzi axtan iǧa zi řejdud nwem, u xenni txettnem i bnadem di ssebt. [k] 23 Mařa iqbeř bnadem ad ittwaxten deg wass n ssebt, ḥima war tᵉttwareẓẓi Ccariɛa n Musa, mammec i xafi i ɣa tcetcam řami ssgenfiɣ bnadem ikmeř deg wass n ssebt? 24 War ḥekkmem x teqcurt n bnadem, maca ḥekmem s yijj n řḥukm iseggden.” [l]

25 Nnan iryazen zi Urcalim: “Ma war iǧi d Wa i yarezzun ad t nɣen? 26 Maca xzar, issawař s bṭayṭay, war d as qqaren walu. Ad taɣ aqa ssnen imɣaren n řgens nican belli s tidett Wanita d Lmasiḥ? 27 Maca nessen Wa, manis Netta, maca xmi dd ɣa yas Lmasiḥ, uřa d ijj war issin manis Netta.” [m] 28 Řami tuɣa isseřmad di Zzawect Tameqqrant, issgeɛɛed Yasuɛ tmijja nnes s jjehd, inna: “Kenniw tessnem ayi u tessnem manis Necc. Necc war dd-usiɣ s řxaḍar n Yixef inu, maca Wenni d ayi dd-issekken aqa-t d tidett, kenniw war t tessinem ca. [n] 29 Maca Necc ssneɣ t, minzi Necc zzayes u Netta d wenni d ayi-dd issekken.” [o]

30 Xenni arezzun ad t ṭṭfen, maca uřa d ijj war xas issars afus, minzi tasaɛɛet nnes war dd-tiweḍ ɛad. [p]

31 Aṭṭas zi řɣaci umnen zzayes, nnan: “Xmi dd ɣa yas Lmasiḥ, ma ad igg řeɛřamat ktar zi tina i igga Wa?” [q]

32 Sřin Ifarisiyyen marra min xas itemten řɣaci. Uca nitni d imeqqranen n ikehhanen ssekken-dd iɛessasen ḥima ad t ṭṭfen. 33 Yasuɛ inna: “Necc ad kidwem qqimeɣ drus n řweqt ɛad, xenni ad raḥeɣ ɣar Wenni d ayi dd-issekken. [r] 34 Ad xafi tarzum, war dayi tᵉttifem, u mani ɣa iřiɣ Necc, war tzemmarem ad dd-tadfem.” [s] 35 Nnan Wudayen jar asen: “Mani ɣa iraḥ Netta ařami war nzemmar ad t naf. Ma xenni ixs ad iraḥ ɣar temmura n řegnus? Ma ixs ad isseřmed i lkuffar? 36 Min iɛna wawař-a i inna: ‘Ad xafi tarzum, war dayi tᵉttᵉṭṭifem!’, u ‘Mani ɣa iřiɣ Necc, war tzemmarem ad dd-tadfem’?”

37 Deg wass ameqqran, ass aneggaru n Řɛid, ikkar ibedd-dd Yasuɛ, iřaɣa, inna: “Mařa ifud ḥed, ejj i-t ad ɣari dd-yas, ad isu. [t] 38 Wenni dayi i ɣa yamnen, am mammec nnant Tira Iqeddsen: Ad zzayes azzřen iɣezran n Waman Iddaren!” [u] 39 Inna man aya x Arruḥ i ɣa qebřen inni dayes ittamnen. Minzi Arruḥ Iqeddsen war d asen immewc ɛad, minzi Yasuɛ war ittwassɛuǧi ɛad. [v]

40 Aṭṭas zi řɣaci, umi sřin awař-a, nnan: “D Wa d Anabi s tidett!” [w] 41 Inneɣni nnan: “Wa d Lmasiḥ!”, maca ca nneɣni zzaysen nnan: “Ma ad dd-yas Lmasiḥ zi Ljalil? [x] 42 Ma war qqarent Tira Iqeddsen, aqa Lmasiḥ ad dd-yas zi zzariɛet n Dawud, zi Bayt-Laḥm, zi dcar n Dawud?” [y] 43 Uca imsar umsebḍi n řɣaci di ssibbet nnes. 44 Ca zzaysen xsen ad t ṭṭfen, maca uřa d ijj war xas issars ifassen.

45 Xenni dewřen-dd iɛessasen nni ɣar imeqqranen n ikehhanen d Ifarisiyyen. Ikehhanen nnan asen: “Mayemmi war t-i-dd-tiwyem?” 46 Arrin-dd xasen iɛessasen: “Ɛemmarṣ war issiweř uřa d ijj n bnadem am mammec issawař Weryaz-a!” 47 Nnan asen Ifarisiyyen: “Ma uřa d kenniw ttwaxedɛem zzayes? 48 Ma xenni din ca n ijjen zeg imeqqranen n řgens niɣ zeg Ifarisiyyen yumen zzayes? [z] 49 Maca řɣaci-ya i war issinen ca Ccariɛa, aqa ittwanɛeř.” 50 Nikudimus, wenni tuɣa d ijjen zzaysen u wenni dd-yusin ɣar Yasuɛ s ǧiřet, inna asen: [aa] 51 “Ma ad teḥkem Ccariɛa nneɣ x ijj n bnadem, břa ma ad zzayes sřen, ad ssnen min igga?” [bb] 52 Arrin-dd, nnan as: “Ma uřa d cek ad taɣ zi Ljalil? Arzu, xzar, uřa d ijj n unabi war dd-ittekk ca zi Ljalil.” 53 Xas uca iruḥ kuř ijjen ɣar taddart nnes. Maca Yasuɛ iruḥ ɣar wedrar n Zzitun.