1 Awarni man aya yiweḍ-dd Řɛid n Wudayen uca igeɛɛed Yasuɛ ɣar Urcalim. [a] 2 Ɣar Tewwart n Wuǧi di Urcalim tuɣa din ict n tyeřmamt n useɣḍeṣ umi qqaren s Tɛibranit ‘Bayt-Xisda’, tuɣa ɣares xemsa n iseqqifen ak-d ikulwaren d ipilaren. 3 Daysen tuɣa iqqim ijj n řɣaci d ameqqran n imehřac d idarɣařen d iqejdaḥen d ineɛḍaben, ttrajan anhezzi n waman. 4 Minzi zi řweqt ɣar řweqt ihekkwa-dd ijj n lmalak ɣar tyeřmamt-a n useɣḍeṣ, issenhezza aman, u wenni i dd ɣa ihwan d amezwaru awarni anhezzi n waman, ad ittwassgenfa, mammec ma iǧa řehřac nnes.

5 Tuɣa din ijj n bnadem dayes řehřac i yijj n řmijař n tmenya u-třatin n iseggʷusa. 6 Iẓra Yasuɛ aryaz-a isenned dinni, issen belli tuɣa iḥřec ammu aṭṭas zeg wami. Inna as: “Ma texsed ad teggenfid?” 7 Yarra-dd xas umehřuc, inna: “Wah, a Sidi, maca war ɣari ijjen wenni d ayi ɣa yiwyen ɣar tuyeřmamt n useɣḍeṣ xmi ɣa ttwassenhezzen waman. Xmi ttraḥeɣ necc, ihekkwa-dd wenneɣni zzati.” 8 Yasuɛ inna as: “Kkar, teksid tassut nnec, tuyured!” [b] 9 Deɣya iggenfa bnadem nni uca iksi tassut nnes, yuyur. Man aya tuɣa deg wass n ssebt. [c]

10 Nnan Wudayen i wenni tuɣa ittwassgenfan: “Wa d ssebt, war ɣarek bu ttesriḥ maḥend ad teksid tassut nnec!” [d] 11 Yarra-dd, inna asen: “Wenni d ayi issgenfan, inna: ‘Ksi tassut nnec, traḥed!’ ” 12 Xenni sseqsan t: “Min iɛna Bnadem-a i d ac innan: ‘Ksi tassut nnec, traḥed’?” 13 Wenni ittwassgenfan war issin min iɛna Yasuɛ, minzi innejra minzi aqa din aṭṭas n řɣaci deg wemcan nni.

14 Awarni man aya yufa i-t Yasuɛ di Zzawect Tameqqrant, inna as: “Xzar, aqa teggenfid, war ttegg bu ddnub ɛad, ḥima war d ac ittemsar min iǧan d aɛeffan zi min iǧan qbeř.” [e]

15 Aryaz iruḥ, ixebbar Udayen belli d Yasuɛ i-t issgenfan.

16 S uyenni darrcen Wudayen x Yasuɛ, arezzun ad t nɣen, minzi igga man aya di ssebt. 17 Maca Yasuɛ yarra-dd, inna asen: “Aqa Baba ixeddem ař yiḍa u xenni Necc ɛawed aqa xeddmeɣ.” [f] 18 Di ssibbet-a arezzun Wudayen ɛad ktar ḥima ad t nɣen, war iǧi waha minzi ixařef ssebt, maca uřa minzi Netta inna aqa AREBBI d Babas, issqudda Ixef nnes ak-d AREBBI. [g] 19 Yarra-dd Yasuɛ, inna asen: “S tidett, s tidett, Necc ad awem iniɣ, Mmis war izemmar ad igg uřa d ict n tmesřact s Yixef nnes, mɣir mařa iẓra Babas ittegg i-tt. Min ma ittegg Babas uřa d Mmis ittegg amenni. [h] 20 Babas ittexs Mmis, isscen as marra min ittegg, uca ad as isscen řexdayem timeqqranin x tina, ḥima ad tdehcem. [i] 21 Am mammec d issnekkar Babas imettinen uca ittic tudart, amenni uřa d Mmis ittic tudart i wenni ixs. 22 Babas war ittḥasab uřa d ijj, maca iwca lḥisab marra i Mmis [j] 23 ḥima ad weqqaren marra Mmis am ttweqqaren Babas. Wenni war ittweqqaren Mmis war ittweqqar ca uřa d Baba wenni i-t-i-dd-issekken. [k]

24 S tidett, s tidett, Necc ad awem iniɣ: Wenni ittesřan i wawař inu uca yumen deg wenni d ayi dd-issekken, ɣares Tudart ittduman, war dd-ittis ca ɣar lḥisab, maca netta aqa immuṭṭi zi řmewt ɣar Tudart. [l] 25 S tidett, s tidett, Necc ad awem iniɣ: Ad dd-tas tsaɛɛet, aqa-tt řexxu, i di imettinen ad sřen tmijja n Mmis n AREBBI u inni i tt ɣa isřen, ad ddaren. [m] 26 Maɣar am mammec Babas ɣares Tudart di ṭṭbiɛet n Yixef nnes, ammu i iwca uřa i Mmis ḥima ad ɣares tiři Tudart di ṭṭbiɛet n Yixef nnes, 27 uca iwca as ṣṣulṭa ḥima ad iḥaseb, minzi Netta d Mmis n bnadem. 28 War ttɛejibem ca s man aya, aqa ad dd-tas tsaɛɛet i di marra inni iǧan deg imeḍřan ad sřen tmijja nnes, [n] 29 uca ad dd-ffɣen zeg imeḍřan: inni iggin taṣebḥant ad kkaren ad raḥen ɣar tnukra i tudart, u inni iggin tuɛeffna ad kkaren, ad raḥen ɣar tnukra i lḥisab. [o]

30 Necc war zemmareɣ ad ggeɣ ca zeg Ixef inu, maca am mammec ttesřiɣ, ad ḥasbeɣ u lḥisab inu d řḥeqq, minzi Necc war arezzuɣ min xseɣ, maca min ixs Wenni d ayi dd-issekken. [p] 31 Meɛlik cehhdeɣ i ixef inu, iři aqa cchadet inu war teǧi ca nican. [q] 32 Aqa din Ijjen nneɣni wi xafi icehhden, u Necc ssneɣ belli cchadet i xafi icehhed, aqa d tidett i teǧa. [r] 33 Kenniw tessekkem-dd ca n ireqqasen ɣar Yuḥanna uca netta iched i tidett. [s] 34 Maca Necc war qebbřeɣ ca cchadet n bnadem, maca Necc qqareɣ marra man aya ḥima ad teddarem. 35 Tuɣa Netta d řefnar yareqqen, ittlillicen, u kenniw texsem ad tfarḥem s tfawt nnes ɣar ict n tsaɛɛet. 36 Maca Necc ɣari ict n cchadet d tameqqrant x tenni n Yuḥanna, minzi řexdayem i d ayi iwca Baba, ḥima ad tent kemmřeɣ, řexdayem nni i tteggeɣ cehhdent simant nsent aqa d Baba d Netta i d ayi dd-issekken. [t] 37 Baba, wenni d ayi-dd issekken, d Netta i xafi icehhden. Kenniw ɛemmarṣ war tesřim tmijja nnes uca war teẓrim ca udem nnes, [u] 38 uca awař nnes war daywem ittɣimi ca řebda, minzi kenniw war tᵉttimnen ca deg wenni i-t-i-dd-issekken. 39 Arzum di Tira Iqeddsen, minzi ittɣiř awem aqa daysent Tudart ittduman, u aqa atent d inni i xafi icehhden. [v] 40 Waxxa amenni kenniw war tᵉttexsem ad ɣari dd-tasem ḥima ad ɣarwem tiři Tudart ittduman.

41 War qebbřeɣ ca aɛuǧi n iwdan, 42 maca ssneɣ kenniw, aqa kenniw war ɣarwem bu tayri n AREBBI deg ixef nwem. 43 Necc usiɣ-dd s Yisem n Baba, kenniw war d ayi tqebbřem ca. Mařa yusa-dd ca n yijjen s yisem nnes, ad t tqebřem. 44 Mammec tzemmarem ad tamnem, mařa kenniw tᵉttexsem aɛuǧi n wayawya, maca war tarezzum ca x uɛuǧi n uyenni n AREBBI d Ijjen? [w] 45 Ma ittɣiř awem ad zzaywem cetciɣ ɣar Baba? Wenni zzaywem i ɣa icetcan d Musa x wenni tessrusam asitem nwem. 46 Minzi meɛlik tumnem zi Musa, iři tumnem dayi ɛawed, minzi netta yura xafi. [x] 47 Mařa kenniw war tuminem ca deg Idlisen nnes, mammec ɣa teggem ad tamnem deg wawařen inu?”