1 “NECC d Tazayart n tidett, Baba d bab n weḥwic n tzayart. 2 Kuř taseṭṭa dayi i war itticen řɣiǧet, ad tt ikkes, uca kuř taseṭṭa i dd-ittawyen řɣiǧet, ad tt issizdeg, ḥima ad tarni di řɣiǧet. [a] 3 Kenniw aqa tᵉttwassizedgem zi ssibbet n wawař i d awem nniɣ. [b] 4 Qqimem dayi, am mammec Necc aqa ayi daywem. Am tseṭṭa i war izemmaren ad dd-tawyi řɣiǧet zeg ixef nnes mařa war teqqim di tzayart, amya uřa d kenniw, mɣir mařa teqqimem dayi. 5 NECC d Tazayart, kenniw d tiseḍwin. Wenni dayi i ɣa iqqimen u Necc dayes, netta ad dd-yawi řɣiǧet aṭṭas, minzi břa zzayi war tzemmarem ad teggem walu. 6 Mařa ca n yijjen war dayi iqqim, ad immenḍar ɣar barra am tseṭṭa tuẓeɣ, xenni ad tt yarwen, ad tt nḍaren di tmessi, ad yareɣ. [c] 7 Maca mařa teqqimem dayi uca awařen inu ad daywem qqimen, ttarem min texsem uca ad ɣarwem yiři. [d] 8 Zi man aya ad ittwassɛuǧ Baba, xmi i dd ɣa tawyem aṭṭas n řɣiǧet uca ad tiřim d imeḥḍaren inu.

9 Am mammec Baba tuɣa ittexs ayi, ammu uřa d Necc tuɣa ttexseɣ kenniw. Qqimem di tayri inu. 10 Mařa tᵉṭṭfem di tweṣṣa inu, ad teqqimem di tayri inu, am mammec Necc tuɣa ttᵉṭṭfeɣ di tweṣṣa n Baba uca ttɣimeɣ di tayri nnes. [e]

11 Nniɣ awem man aya, ḥima ad daywem tiři řefraḥet inu uca ḥima ad tᵉttwakemmeř řefraḥet nwem. 12 Tawṣeyyet inu d tanita: aqa ad texsem ijjen wenneɣni am mammec Necc tuɣa xseɣ kenniw. [f] 13 Uřa d ijj war ɣares bu tayri tameqqrant x tanita: belli ca n yijjen ad iwc tudart nnes i imeddukkař nnes. [g] 14 Kenniw d imeddukkař inu, mařa teggim marra min kenniw weṣṣiɣ. [h] 15 War ttɛiwideɣ ad awem semmiɣ ‘imsexxaren’, minzi amsexxar war issin min ittegg sidis. Maca Necc tuɣa ttřaɣiɣ awem d ‘imeddukkař inu!’, minzi Necc ssecneɣ kenniw marra min sřiɣ zi Baba. [i] 16 War iǧi d kenniw i d ayi ixḍaren, maca d Necc i kenniw ixḍaren uca Necc ggiɣ kenniw ḥima ad traḥem, ad dd-tawyem řɣiǧet u ḥima ad teqqim řɣiǧet nwem, ḥima marra min ɣa tᵉttarem zi Baba s Yisem inu, ad awem t iwc Netta. [j] 17 D man aya i zi kenniw umureɣ, ḥima ad texsem ijjen wenneɣni.”

18 “Mařa ddunect ad kenniw tcarh, snem aqa tcarh ayi qbeř kenniw. [k] 19 Mařa aqa kenniw zi ddunect, iři aqa ddunect tuɣa tᵉttexs inni zzayes. Maca minzi kenniw war teǧim ca zi ddunect, maca Necc ixḍareɣ kenniw zi ddunect, s uyenni tcarreh ddunect kenniw. [l] 20 Ɛeqřem awař i d awem nniɣ: ‘Amsexxar war yuɛři x sidis!’ Mařa darracen ayi, ad kenniw darrcen ɛawed. Mařa ṭṭfen deg wawař inu, ad ṭṭfen ɛawed deg wawař nwem. [m] 21 Maca ad zzaywem ggen man aya marra di ssibbet n Yisem inu, minzi nitni war ssinen ca Wenni d ayi dd-issekken. [n] 22 Mařa war dd-usiɣ u war kisen ssiwřeɣ, ad yiři war ɣarsen bu ddnub. Maca řexxu war ɣarsen bu smaḥet x ddnub nsen. [o] 23 Wenni d ayi icarrhen, ad icarh uřa d Baba. 24 Mařa war ggiɣ zzat i tiṭṭawin nsen řexdayem i war tent yeggi uřa d ijj bnadem nneɣni, ad yiři war ɣarsen bu ddnub. Maca řexxu ẓrin tent, carhen ayi Necc uřa d Baba. [p] 25 S uya ad ittwakemmeř wawař i yuran di Ccariɛa nsen: ‘Carhen ayi x walu’. [q]

26 Xmi dd ɣa yas Umseṣřaḥ, wenni ɣarwem dd ɣa ssekkeɣ zi Baba, Arruḥ n tidett i dd-yusin zi ɣar Baba, xenni wanita ad ayi iched. [r] 27 Uca ad tcehdem uřa d kenniw, minzi tuɣa kenniw akidi zeg umezwaru.” [s]