1 Setta n wussan qbeř Řɛid n Tɣarṣt n Useɛdu, yusa-dd Yasuɛ ɣar Bayt-Ɛanya, mani tuɣa iǧa Aliɛazar, wenni dd-issnekkar Yasuɛ zi taddart n imettinen. [a] 2 Ggin as din ijj n umensi. Marta tuɣa tsexxar, u Aliɛazar tuɣa d ijjen zeg inni akides iqqimen ɣar ṭṭabřa. 3 Teksi-dd Maryam ijj n uɣarraf n zzect i wedhan zi řeɛṭur n ṣṣenbel teṣfa tiɣřa, tedhen iḍaren n Yasuɛ, xenni temseḥ iḍaren nnes s ucuwwaf nnes. Taddart teccur s řefwaḥet n zzect n wedhan. 4 Ijjen zeg imeḥḍaren nnes wenni umi qqaren Yahuda Isxariyuṭi wenni t i ɣa iɣdaren, inna: 5 “Mayemmi war temmenz ca řefwaḥet-a n ṣṣenbel s teřt mya n dinar, ḥima ad temmewc i imezřaḍ?” [b] 6 Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ssenduq, uca yarbu min dayes immarsen. [c] 7 Yasuɛ inna: “Jjem tt, aqa txemmeř i-tt i wass n wenḍeř inu. [d] 8 Minzi imezřaḍ aqa aten řebda akidwem, maca Necc war kidwem ǧiɣ i řebda.” [e]

9 Aṭṭas n řɣaci zeg Wudayen sřin belli Yasuɛ aqa-t dinni. Usin-dd nitni, war iǧi ḥaca zi ssibbet n Yasuɛ, maca ɛawed ḥima ad ẓaren Aliɛazar, wenni dd-issnekkar zi taddart n imettinen. [f] 10 Mcawaren imeqqranen n ikehhanen, ḥima ad nɣen uřa d Aliɛazar, 11 minzi aṭṭas n Wudayen ffɣen-dd zi ssibbet nnes uca umnen di Yasuɛ.

12 Tiwecca nnes, umi sřin aṭṭas n řɣaci inni dd yusin ɣar Řɛid belli Yasuɛ yusa-dd ɣar Urcalim, [g] 13 ksin ifetwan n tini uca ffɣen, ḥima ad t řqan, řaɣan:

“Uṣanna!

Sseɛd n Wenni dd-yusin

s Yisem n SIDI,

Ajeǧid n Israil!” [h]

14 Yufa Yasuɛ ijj n wesnus uca inya xas, am mammec tura:

15 “War tteggʷed ca, a yeǧis n Ṣihyun,

xzar, Ajeǧid nnem ad dd-yas,

iqqim x wesnus, aḥenjir n teɣyuč.” [i]

16 Imeḥḍaren nnes war fhimen ca timesřayin-a di řweqt nni. Maca awarni řami ittwassuɛřa Yasuɛ, řexdenni ɛeqřen belli man aya tura xas uca belli nitni ggin zzayes man aya. 17 Řɣaci i tuɣa iǧan akides, tuɣa iched aqa Netta iřaɣa-dd x Aliɛazar zeg wenḍeř uca issnekkar i-t-i-dd zi taddart n imettinen. 18 S man aya iffeɣ řɣaci ameqqran maḥend ad t mmeřqan, minzi nitni sřin belli igga řeɛřamet-a. 19 Ifarisiyyen nnan jar asen: “Tᵉttwařam mliḥ belli kenniw tᵉttakkwaḍem ɣar walu, xzarem, aqa qaɛ ddunect teḍfar i-t-i-dd.” [j]

20 Tuɣa din ca n iwdan zi řegnus jar asen inni dd-igeɛɛden ɣar Urcalim ḥima ad ɛebden di Řɛid. [k] 21 Ina ruḥen ɣar Filippus, wenni zi tendint n Bayt-Ṣayda di Ljalil. Sseqsan t, nnan: “A Sidi, nexs ad nẓar Yasuɛ.” [l] 22 Yusa-dd Filippus, inna tt i Andrawus, uca Andrawus d Filippus nnan tt i Yasuɛ. 23 Yasuɛ yarra-dd, inna asen: “Aqa tiweḍ-dd tsaɛɛet i di i ɣa ittwassɛuǧ Mmis n bnadem. [m] 24 S tidett, s tidett, Necc ad awem iniɣ: Mařa war dd-iwḍi řḥebb n yirden di temmurt, ad immet, xenni ad iqqim weḥḥdes, maca mařa immut, xenni ad dd-yawi řɣiǧet aṭṭas. [n] 25 Wenni ittexsen tudart nnes, ad tt ixsar, maca wenni i ɣa icarhen tudart nnes di ddunect-a, ad tt ixemmeř i Tudart ittduman. [o] 26 Mařa ca n yijjen isexxar ayi, ejj i-t ad ayi iḍfar. Mani ɣa iřiɣ Necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Baba. [p] 27 Řexxu uř inu innehweř, min ɣa iniɣ? A Baba, senjem ayi zi tsaɛɛet-a? Maca x uyenni i dd-usiɣ ɣar tsaɛɛet-a. [q] 28 A Baba, sɛuǧi Isem nnec.” Xenni tusa-dd ict n tmijja zeg ujenna, tenna: “Sɛuǧeɣ t uca ad t sɛuǧeɣ ɛawed!” 29 Řɣaci i tuɣa ibedden din isřa i-tt, nitni nnan: “Aqa imsar wajjaj.” Inneɣni nnan: “Aqa issiweř-dd ijj n lmalak akides.”

30 Yarra-dd Yasuɛ, inna asen: “Tmijja-ya war teǧi ca di ṭṭweɛ inu maca di ṭṭweɛ nwem. [r] 31 Řexxu ad yiři řḥukm x ddunect-a, řexxu ad immenḍar umeqqran n ddunect-a ɣar barra. [s] 32 U Necc, x minni i ɣa ttwassgeɛɛdeɣ zi temmurt, ad ɣari dd-jebdeɣ marra.” [t] 33 Inna man aya ḥima ad isscen ɣar man řmewt i ɣa immet.

34 Řɣaci yarra-dd xas: “Neccin nesřa zi Ccariɛa aqa Lmasiḥ ad iqqim i řebda. I mammec teqqared Cek belli ittxeṣṣa i Mmis n bnadem ad ittwassgeɛɛed? Min iɛna Mmis-a n bnadem?” [u] 35 Yasuɛ inna asen: “Tafawt ad tiři akidwem drus n řweqt ɛad. Uyurem, řami ɣarwem Tafawt, ḥima war kenniw tᵉttᵉṭṭef taǧest. Wenni igguren di taǧest, war issin mani iggur. [v] 36 Amnem di Tfawt maḥend Tafawt ɛad aqa-tt ɣarwem, ḥima kenniw ad tiřim tarwa n Tfawt.” Ammu i tuɣa issawař Yasuɛ. Řexdenni yuyur uca innufar zzaysen.

37 Waxxa tuɣa Netta ittegg marra řeɛřamat-a zzatsen, nitni war zzayes uminen ca, 38 ḥima ad ittwakemmeř wawař n unabi Icaɛya i innan:

“A Sidi, wi yumnen s řexbar nneɣ

u i umi ittwassargeb ufus n SIDI?” [w]

39 S uyenni war zemmaren ad amnen, minzi Icaɛya inna ɛawed:

40 “Nitni ssdarɣřen tiṭṭawin n yixef nsen,

sseqseḥen uřawen nsen,

ḥima war ttᵉtwiřin s tiṭṭawin nsen,

war fehhmen s wuř nsen,

ad tuben uca Necc ad ten ssgenfiɣ.” [x]

41 Inna Icaɛya ammu, umi iẓra aɛuǧi nnes uca tuɣa issawař xas. [y] 42 Umnen zzayes ɛawed aṭṭas n imeqqranen n řgens, maca s ssibbet n Ifarisiyyen war zzayes cehden ca s bṭayṭay, ḥima war ten ssuffuɣen zi temzida. [z] 43 Minzi nitni tuɣa xsen aɛuǧi zeg iwdan x uɛuǧi zi AREBBI. [aa]

44 Maca Yasuɛ iřaɣa, inna: “Wenni dayi ittamnen, war dayi ittimen ca, maca deg Wenni d ayi dd-issekken. 45 Wenni d ayi iẓrin, iẓra wenni d ayi dd-issekken. [bb] 46 Necc d Tafawt i dd-yusin ɣar ddunect, ḥima kuř ijjen wenni dayi ittamnen, war ittɣimi ca di taǧest. [cc] 47 Mařa ca n yijjen isřa i wawařen inu, maca war daysen ittᵉṭṭef, Necc war xas ḥekkmeɣ ca. Necc war dd-usiɣ ca, ḥima ad ḥekmeɣ x ddunect, maca ḥima ad wceɣ Tudart i ddunect. [dd] 48 Wenni d ayi isseḥqaren uca war iqbiř awařen inu, ɣares wenni xas i ɣa iḥekmen: awař i nniɣ, ad xas iḥkem deg wass aneggaru. [ee] 49 Minzi Necc war ssiwřeɣ ca zi ɣari, maca Baba Wenni d ayi-dd-issekken iwca ayi ict n tewṣeyyet x min ɣa iniɣ d min xef ɣa ssiwřeɣ,[ff] 50 u Necc ssneɣ tiweṣṣa nnes, aqa atent d Tudart ittduman. S uya, min ssawařeɣ, ssawařeɣ t am mammec d ayi inna Baba.”