1 “Mařa ggiɣ ad carrɛeɣ akidek, a SIDI, Cek ad tbaned d amsegged. Qaɛ amenni ttexseɣ ad siwřeɣ akidek x ibriden n řḥeqq: Mayemmi abrid n iɛeffanen iseggem, u mayemmi iɣeddaren řebda di arraḥet? [a] 2 Cek teẓẓud ten u nitni wtin iẓewran, nitni ɣemyen-dd u iwyen-dd řɣiǧet. Cek aqa tudsed aqemmum nsen, maca tiggʷejed x tiẓẓař nsen.” [b]  [c]

3 “Cek, a SIDI, tessned ayi, tᵉttwarid ayi u tqeǧbed uř inu, ma aqa-t akidek. Jbed i-ten am wuǧi i tɣarṣt u ɛzeř i-ten i wass n wenɣay. [d]  [e] 4 Mecḥař ɛad i ɣa tekk temmurt tecḍen u afsu aziza ad yaẓeɣ deg iyyar marra? S tuɛeffna n yinni din izeddɣen ḍeyyɛen řmař d yejḍaḍ, maɣar nitni qqaren: ‘Netta war ittwiři aneggar nneɣ.” [f]

5 “Mařa tuzzřed ak-d inni ittazzřen x iḍaren, nitni ssaḥařen cek, mammec texsed ad tegged xenni ḥamat ak-d iysan? Mařa tᵉttacid aqa cek di řaman mɣir di temmurt n řehna, mammec ɣa tegged xenni di cbarq iqqnen n yeɣzar n L’Urdun? 6 Maɣar uřa d aytmac d taddart n babac, uřa d nitni ɣeddaren cek, uřa d nitni sɣuyyun s jjhed awarni ac. War ten ttiqqem, waxxa ssawařen akidek mliḥ.” [g]

7 “Necc semḥeɣ di taddart inu, Necc nḍareɣ tasɣart inu. Tenni issɛizz řeɛmar inu sellmeɣ tt deg ufus n řɛedyan nnes. 8 Tasɣart inu tedweř-dd akidi am yijj n wayrad deg wezɣar. Tessgeɛɛed-dd akidi tmijja nnes, x uya Necc dewřeɣ carrheɣ tt. [h] 9 Tasɣart inu i Necc am ujḍiḍ ibeqqḍen ittkeccaḍen. Ttennḍen as ijḍaḍ ikeccḍen. Kkarem, smunem-dd marra řmař n yeyyar, ejj i-ten ad dd-asen ḥima ad ccen!” [i]

10 “Imeksawen aṭṭas xarrben amarjeɛ inu n uḍiř, ɛefsen x yeyyar inu, aqa arrin iyyar iɛizzen inu d ijj n řexřa ixwa. [j]  [k] 11 Arrin iyyar d ict n temmurt ittwareddǧen, aqa ittwaxarreb yeyyar, izzeř zzati icḍen. Marra tammurt txarreb minzi uřa d ijj war d as yecqi. 12 X marra tiwririn iqeccaren di řexřa usin-dd imteḥḥayyen, maɣar ssif isarḍ zi ṭṭarf n temmurt ař ṭṭarf nneɣni n temmurt. War din iqqim řehna i marra ddat. 13 Nitni zarɛen irden, maca mjaren isennanen, nitni uḥřen, maca břa nnfaɛ. Nitni ad seḍḥan x ṣṣabet nwem zi ssibbet n řḥaduq n weɣḍab n SIDI.” [l]

14 “Ammu i iqqar SIDI: Marra ajjaren inu iɛeffanen nni ittḥadan tasɣart inu i wciɣ i řgens inu Israil d tasɣart, xzar, Necc ad ten qeřɛeɣ zi temmurt, maca taddart n Yahuda ad tt qeřɛeɣ zi řwesṭ nsen. [m] 15 Awarni řami ten qeřɛeɣ, ad dd-dewřeɣ u ad xasen ḥinneɣ uca Necc ad ten arreɣ ad ɛeqben, kuř ijj ɣar tesɣart nnes u kuř ijj ɣar temmurt nnes. 16 Xmi ɣa řemden s tidett ibriden n řgens inu maḥend ad jjaǧen ɣar Yisem inu: ‘S tidett am iddar SIDI!’, am mammec nitni ssřemden řgens inu maḥend ad jjaǧen ɣar Baɛl, xenni ad ttwassbedden nitni di řwesṭ n řgens inu. 17 Maca mařa nitni war ttexsen ad sřen, xenni Necc ad qeřɛeɣ řgens nni uca ad ten areddǧeɣ, ammu i iqqar SIDI.” [n]