Irmiya

1 Awařen n Irmiya, mmis n Ḥilqiya, zeg ikehhanen nni iǧan di Ɛanatut, di temmurt n Binyamin, 2 wenni ɣar dd-yusa wawař n SIDI deg wussan n ujeǧid Yuciya, mmis n Amun, ajeǧid n Yahuda, deg useggʷas wiss třeṭṭac n řeḥkamet nnes. [a] 3 Yusa-dd wawař n SIDI ɣares uřa deg wussan n Yahuyaqim, mmis n Yuciya, ajeǧid n Yahuda, ař mani ikemmeř useggʷas wiss ḥiṭac n Ṣidqiya, mmis n Yuciya, ajeǧid n Yahuda, ařami dd-iwyen Urcalim ɣar lmenfa deg uyur wiss xemsa. [b]

4 Yusa-dd ɣari wawař n SIDI, inna: 5 “Qbeř ma ggiɣ cek d aseymi deg uɛeddis n yemmac, tuɣa ssneɣ cek, u qbeř ma dd-teffɣed zi řemřawet, aqa ssqeddseɣ cek. Necc areccḥeɣ cek d anabi i řegnus.” [c] 6 Xenni nniɣ: “Ah, Sidi inu, SIDI! Xzar, necc war zemmareɣ ad ssiwřeɣ, necc ɛad d aḥudri.” [d] 7 Maca SIDI yarra-dd xafi: “War qqar: ‘Necc ɛad d aḥudri!’, maɣar mani ma cek i ɣa ssekkeɣ ad din traḥed, u marra min d ac ɣa umureɣ, ad t tinid. 8 War zzaysen tteggʷed, maɣar Necc akidek, ḥima ad cek fekkeɣ!”, ammu i iqqar SIDI. [e] 9 Isswiẓẓeḍ SIDI afus nnes, iḥada aqemmum inu uca inna ayi SIDI: “Xzar, Necc ggiɣ ac awařen inu deg uqemmum nnec.[f] 10 Xzar, deg wass-a ad cek areccḥeɣ x řegnus u x tgeldawin, ḥima ad tqeřɛed u ad thedmed, ḥima ad tareddǧed u ḥima ad tɣeḍřed, ḥima ad tebnid u ad teẓẓud.” [g]

11 Yusa-dd ɣari wawař n SIDI, inna: “Min tᵉttwařid, Irmiya?” Necc arriɣ-dd: “Necc ttwařiɣ ict n tseṭṭa n ǧewz.” 12 Inna ayi SIDI: “Cek teẓrid nican, maɣar Necc ttɛesseɣ x wawař inu ḥima ad t ggeɣ.”

13 Yusa-dd ɣari wawař n SIDI i twařa wiss tnayen, inna: “Min tᵉttwařid?” Necc arriɣ-dd: “Ttwařiɣ taydart ittnennan, abuḍ nnes imeyyeř ɣar da zi ccamal.” 14 Xenni inna ayi SIDI: “Zi ccamal i dd ɣa ihwa řɣar-a x marra imezdaɣ n temmurt. [h] 15 Maɣar, xzar, Necc ad řaɣiɣ x marra řaǧat n tgeldiwin n camal, ammu i iqqar SIDI, uca nitni ad dd-asen uca ad ssbedden řekrasi nsen ɣar wadaf n tewwura n Urcalim u ḍidd i marra řeḥyuḍ nnes i d as dd-innḍen u ḍidd i marra tineddam n Yahuda. [i] 16 Necc ad xasen neṭqeɣ marra řeḥkamat inu, x marra tuɛeffna nsen: aqa semḥen dayi uca bexxaren i irebbiten nneɣni uca sejden i min ggin ifassen nsen. 17 Cek xenni, ḥezzem tijɛinnatin nnec uca kkar, barreḥ asen marra min d ac ɣa umureɣ. War ttnexřiɛ zzaysen niɣ ad cek ssnexřɛeɣ zzat i tiṭṭawin nsen. 18 Xzar, Necc ad cek ggeɣ d tandint ifaryen, d ijj n upilar n wuzzař d řeḥyuḍ n nnḥas ḍidd i marra tammurt: ḍidd i ijeǧiden n Yahuda, ḍidd i řḥukkam nnes, ḍidd i ikehhanen nnes u ḍidd i řgens n temmurt. [j] 19 Nitni ad kidek mmenɣen, maca war cek arennyen, maɣar Necc akidek, ḥima ad cek fekkeɣ, ammu i iqqar SIDI.”