1 Minzi tuɣa Ccariɛa d tiři n řxar i dd ɣa yasen waha, war ɣares ṭṭbiɛet n tmesřayin simant nsent. S uyenni war zemmarent tɣarṣa nni, waxxa iwyen tent-i-dd kuř aseggʷas, ad awyent řekmaret x yinni tent dd-ittqarraben. [a] 2 Minzi mařa iban-dd aqa tᵉttawyent ɣar řekmaret, ad tiři ttwassbedden nitni zeg uwehheb n tɣarṣa nsen aṭṭas zeg wami, minzi war tᵉttwakkʷur ɛad tnefsect nsen s ddenb awarni řami ttwassizedgen ict n twařa. 3 Maca s man aya ttwassfekkaren asen-dd ddnub nsen kuř aseggʷas, 4 minzi idammen n ifunasen imeẓyanen d iɣayḍen war zemmaren ad ssizdegen zi ddnub. [b] 5 S uyenni řami dd-yudef ɣar ddunect, inna:

“Tiɣarṣa niɣ tiwhibin war tent texsed,

maca aqa tessyarḍed ayi ict n arrimet. [c]

6 Tiɣarṣin n wecmaḍ

ak-d tiɣarṣa n řehna i ddnub

war tent tᵉttared.”

7 Řexdenni nniɣ:

“Xzar, ad dd-aseɣ!

- minzi yura xafi deg Wedlis ittwanḍen -

ḥima ad ggeɣ min texsed Cek, a AREBBI!” [d]

8 Tuɣa inna qbeř: “Tiɣarṣin d tewhibin d tɣarṣin s tmessi d tɣarṣin i ddnub war tent texsed!”, waxxa aqa atent ttwaqeddment ɛlaḥsab Ccariɛa. 9 Awarni man aya inna: “Xzar, usiɣ-dd ḥima ad ggeɣ min texsed Cek, a AREBBI.” S uya ikkes amezwar, ḥima ad issgeɛɛed wiss tnayen. 10 Maɣar s man aya, s řxaḍar nnes, aqa nettwaqeddes deg ict n twařa s tɣarṣt n Arrimet n Yasuɛ Lmasiḥ. [e]

11 Maɣar kuř akehhan i tuɣa ittsexxar kuř ass, aqa iwehheb aṭṭas n twařawin simant n tɣarṣa, tinni war izemmaren ad ssizedgent zi ddnub. 12 Maca Wanita iqeddem ict n tɣarṣt x ddnub, uca xenni iqqim x yefus n AREBBI i řebda. [f] 13 Zi řexdenni ittraja ař d as ttwaggen řɛedyan nnes d tanebdat sadu iḍaren nnes. 14 Minzi s ict n tɣarṣt aqa yiwi inni zzayes ittwaqeddsen ɣar řekmaret i řebda.

15 Maca Arruḥ Iqeddsen ɛawed iched i neccin, iqqar:

16 “D wa d Řɛahd i d asen ɣa wceɣ

awarni i wussan nni, iqqar SIDI:

‘Ad ggeɣ Ccariɛa inu di řeɛqeř nsen,

ad tt ariɣ ɛawed deg wuřawen nsen, [g]

17 uca ddnub nsen d ixeṭṭan nsen,

ɛemmarṣ ad daysen fekkareɣ ɛad.’ ” [h]

18 Mani ittiři xenni weɣfar i ddnub, war din iqqim ɛad tɣarṣt x ddnub. 19 S uyenni, a aytma, aqa ɣarneɣ ttiqqet maḥend ad nadef ɣar Zzawect Iqeddsen s Idammen n Yasuɛ, [i] 20 x Webrid n jdid iddaren i d aneɣ issewjed am Webrid n jdid i dd-ittadfen ɣar daxeř n uřeḥḥaf n tewwart, wenni d weysum nnes, 21 uca aqa ɣarneɣ ɛawed Arrays n ikehhanen x Taddart n AREBBI. [j] 22 Ejj aneɣ xenni ad dd-nqarreb s wuř n tidett, di ttiqqet n l’iman, am ttwaruccen wuřawen nneɣ u ttwassizdegen ɛawed zi tnefsect taɛeffant, u am tᵉttwassird ɛawed arrimet nneɣ s waman iṣfan. [k] 23 Ejj aneɣ ad ncebbar di cchadet n usitem nneɣ břa ma ad narjij, minzi d Wenni d aneɣ iwcin lwaɛd, dayes řaman. 24 Ejj aneɣ ad neḥḍa ijj i wenneɣni ḥima ad negg uř deg wayawya ɣar tayri u ɣar řexdayem tiṣebḥanin. 25 War nᵉttejji ca tamesmunt nneɣ am mammec nnumen ca, maca ad nessemḥeḍ ijjen wenneɣni, mahu ɛad xmi ɣa tẓarem aqa ass nni yiweḍ-dd.

26 Minzi mařa ixḍa ca n ijj neɛmada awarni ma iṭṭef tussna n tidett, xenni war teqqim ɛad tɣarṣt x ddnub, [l] 27 maca mɣir araji n lḥisab issnexřɛen d řɛabuq n tmessi nni i ɣa iccen řɛedyan. 28 Mařa ixḍa ḥed ak-d Ccariɛa n Musa, ittxeṣṣa ad immut břa arreḥmet x uqemmum n tnayen niɣ třata n řechud. [m] 29 Mecḥař ktar ittxeṣṣa ad ihwa lɛiqab x uzeǧif n wenni iɛeffsen x Mmis n AREBBI, d wenni iḥessben Idammen n Řɛahd nnes i zi tuɣa ittwaqeddes amecnaw idammen n marra iwdan, d wenni isseḥqaren ɛawed Arruḥ n arḍa? 30 Minzi nessen d Wenni innan:

“Antaqem i Necc umi iǧa,

Necc ad t xeǧṣeɣ!”

Uca ɛawed:

“SIDI ad iḥkem řgens nnes.” [n]

31 Sseɛd d abarcan i wenni i ɣa iwḍan deg ifassen n AREBBI iddaren. 32 S uya fekkarem deg wussan imezwura řami tᵉttwassɣeḍṣem u tuɣa tarebbum amenɣi ameqqran am mammec xawem tekka řefḍiḥet d řmeḥnet. 33 Tdewřem d ijj n afurrej u tcarcem ak-d inneɣni umi daysen ittwagg ammu kifkif. 34 Minzi teksim amnus x yinni ittwaḥebbsen, uca tqebřem akecceḍ n wagřa nwem s řefraḥet, tessnem belli ɣarwem agřa imɣar i war ifennin deg ijenwan. [o] 35 War neṭṭarem ca taryast nwem nni ɣar teǧa ict n řmunet temɣar. 36 Minzi ittxeṣṣa kenniw ṣṣbar ḥima ad teggem min ixs AREBBI u maḥend ad tᵉṭṭfem lwaɛd. [p]

37 “Minzi drus n řweqt i dinni, wah drus,

ař Wenni dd ɣa yasen ad ixecc,

war ittɛeṭṭař ca. [q]

38 Maca amseggad s l’iman inu ad iddar,

maca mařa ismeḥ,

war dayes yareṭṭi řeɛmar inu.” [r]

39 Maca neccin war ɣarneɣ min ɣa negg s tarexxut i ittawyen ɣar txessart, maca ɣarneɣ l’iman i ittawyen ɣar usenjem n řeɛmar nneɣ.