Amezwaru
1
Taxeřqit n ijenwan d temmurt
1 Deg umezwaru ixřeq-dd AREBBI ijenwan d temmurt. [a]
2 Tuɣa tammurt texřa, am mammec war tt ittḥidi ḥed u x wudem n waman ihewřen taǧest, u Arruḥ n AREBBI tuɣa ittraḥ ittas-dd x wudem n waman.
3 Uca inna AREBBI: “Ad tiři tfawt”, uca tusa-dd tfawt! [b] 4 Iẓra AREBBI belli tafawt teṣbeḥ uca ibḍa AREBBI jar tfawt d taǧest. 5 Iřaɣa AREBBI tafawt ‘aziř’ u ‘taǧest’ iřaɣa as ‘ǧiřet’. Tedweř d tameddit u idweř d ṣṣbeḥ: d ass amezwaru.
6 Uca inna AREBBI: “Ad tiři ict n řqubbet di řwesṭ n waman, ad tebḍa aman x waman!” [c] 7 AREBBI igga řqubbet n ujenna uca ibḍa aman i iǧan swadday i řqubbet x waman i iǧan sennej i řqubbet. Uca ammu i temsar. [d] 8 Iřaɣa AREBBI i řqubbet ‘ajenna’. Uca tedweř d tameddit u idweř d ṣṣbeḥ: d ass wiss tnayen.
9 Uca inna AREBBI: “Ad munen waman i iǧan swadday i ujenna ɣar ijj n wemcan maḥend ad dd-iban řbarr!” Uca ammu i temsar. [e] 10 Iřaɣa AREBBI i řbarr ‘tammurt’ u amuni n waman iřaɣa as ‘řebḥur’. Uca iẓra AREBBI belli man aya iṣbeḥ. [f]
11 Uca inna AREBBI: “Ad dd-tesseɣmi temmurt aɣemmuy aziza: afsu aziza i izarrɛen zzariɛet d tcejjura s fruta i dd itticen frutat ɛlaḥsab marka nsent s zzariɛet nsent dayes x wudem n temmurt!” Uca ammu i temsar. 12 Tesseɣmi-dd temmurt aɣemmuy aziza: afsu aziza i izarrɛen zzariɛet ɛlaḥsab marka nnes d tcejjura i dd itticen řɣiǧet ɛlaḥsab marka nsent s zzariɛet nsent dayes. Uca iẓra AREBBI belli man aya iṣbeḥ. 13 Uca tedweř d tameddit u idweř d ṣṣbeḥ: d ass wiss třata.
14 Uca inna AREBBI: “Ad din iřint tfawin di řqubbet n ujenna ḥima ad bḍant jar wass d ǧiřet, ad iřint d řimarat, d wussan ittwaggen, d wussan, d iseggʷusa [g] 15 uca ad iřint d tifawin di řqubbet n ujenna ḥima ad wcent tafawt x temmurt!” Uca ammu i temsar. [h] 16 Igga AREBBI tnayen n tifawin mɣarent, tafawt tameqqrant, ḥima ad teḥkem x uziř, u tafawt tameẓyant ḥima ad teḥkem x ǧiřet, uca uřa d itran. 17 Issars i-tent AREBBI di řqubbet n ujenna ḥima ad wcent tafawt x temmurt 18 u ḥima ad ḥekment x wass d ǧiřet u ḥima ad bḍant jar tfawt d taǧest. Uca iẓra AREBBI belli man aya iṣbeḥ. 19 Uca tedweř d tameddit u idweř d ṣṣbeḥ: d ass wiss arebɛa.
20 Uca inna AREBBI: “Ad dd-ssefyen waman s waṭṭas n marra min di iǧa buḥbeř iddaren uca ad ḍwen ijḍaḍ sennej i temmurt ɣar mani teǧa řqubbet n ujenna!” [i] 21 Ixřeq-dd AREBBI imuddaren imeqqranen di řebḥar u marra buḥbeř iddaren ittenhezzan, inni zi dd-ssefyen waman, ɛlaḥsab marka nsen uca marra ijḍaḍ s wafriwen ɛlaḥsab marka nsen. Uca iẓra AREBBI belli man aya iṣbeḥ.
22 Ibark i-ten AREBBI, inna: “Jjem-dd řɣiǧet, ktarem, ɛemmarem aman n řebḥur, uca ad ktaren ijḍaḍ di temmurt.” [j]
23 Uca tedweř d tameddit u idweř d ṣṣbeḥ: d ass wiss xemsa.
24 Uca inna AREBBI: “Ejj temmurt ad tessuffeɣ marra min ɣares buḥbeř iddaren ɛlaḥsab marka nnes: řebhayem d imuddaren nni ittbuɛen d řmař n řexřa ɛlaḥsab marka nsen!” Uca ammu i temsar. [k] 25 Igga AREBBI řmař n řexřa n temmurt ɛlaḥsab marka nsen, u řebhayem ɛlaḥsab marka nsent u marra imuddaren nni ittbuɛen x wudem n temmurt ɛlaḥsab marka nsen. Uca iẓra AREBBI belli man aya iṣbeḥ.
26 Uca inna AREBBI: “Ejj aneɣ ad negg Adam, bnadem di ṣṣifet nneɣ, deg warwas nneɣ, uca ad ɣares yiři jjehd x iseřman n řebḥar u x ijḍaḍ n ujenna u x řebhayem u x marra tammurt u x marra imuddaren nni ittbuɛen x temmurt!” [l] 27 Ixřeq-dd AREBBI Adam di ṣṣifet nnes. Ixřeq i-t-i-dd di ṣṣifet n AREBBI, ixřeq i-ten-dd awtem d tewtemt. [m]
28 Ibark i-ten AREBBI uca inna asen AREBBI: “Jjem-dd řɣiǧet, ktarem, ɛemmarem tammurt uca arrem tt sadu ufus nwem, ḥekmem x iseřman n řebḥar u x ijḍaḍ n ujenna u x marra imuddaren nni ittbuɛen x temmurt!” [n]
29 Inna AREBBI: “Xzarem, ad awem wceɣ marra afsu aziza i izarrɛen zzariɛet x marra wudem n temmurt, uřa d marra ticejjura s řɣiǧet nni izarrɛen zzariɛet. Man aya ad awem yiři d macca. ◼1:29 tacejjart - niɣ ‘aseklu’ (‘isekla’) niɣ ‘taddagt’ (‘tiddagin’). afessar - bnadem tuɣa ittett aysum di řweqt nni. Awarni i ṭṭufan ibda bnadem ad yecc aysum (xzar Amz. 9:2-4). [p] 30 U i marra řmař n řexřa n temmurt, u i marra ijḍaḍ n ujenna u i marra min ittbuɛen x temmurt i di iǧa buḥbeř iddaren, ad asen yiři marra afsu aziza d macca i nitni.” Uca ammu i temsar. [q] 31 Uca iẓra AREBBI marra min igga, u xzar, tuɣa iṣbeḥ aṭṭas. Tedweř d tameddit u idweř d ṣṣbeḥ: d ass wiss setta. [r]
- a 1:1 Ayub 38:4; Izhd. 33:6; 89:12; 136:5; Řex. 14:15; 17:24; Ɛbr. 11:3;
- b 1:3 tafawt - aqa din ijj n řfarq jar tfawt ɣar ijj n uɣezdis u tfuct d itran ɣar ijj n uɣezdis nneɣni. Tafuct d yetran aqa-ten arebbun tafawt, maca war ggin ca tafawt s yixef nsen. Tira iqeddsen qqarent aqa Arebbi d Tafawt, war dayes bu taǧest (xzar 1 Yḥ. 1:5). S uyenni teḍhar-dd tfawt deg wass d amezwaru n txeřqit, maca war tᵉttwaxřeq zi Arebbi minzi Netta s Yixef nnes d Tafawt.
- c 1:6 Izhd. 33:6; 104:2; 136:5; Awřn. 8:28; Ica. 42:5; Irm. 10:12; 51:15
- d 1:7 Izhd. 33:7; 136:6; Awřn. 8:24; Izhd. 148:4.
- e 1:9 Ayub 26:10; 38:8; Izhd. 24:2; 136:6.
- f 1:10 řebḥur - niɣ ‘il’ d ‘ilawen’.
- g 1:14 Izhd. 136:7.
- h 1:15 Aɛwd. 4:19; Irm. 31:35
- i 1:20 ɣar mani teǧa řqubbet n ujenna - s Tɛibranit ‘x wudmawen n řqubbet n ujenna’.
- j 1:22 Amz. 8:17.
- k 1:24 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur.
- l 1:26 ad ɣares yiři - s Tɛibranit ‘ad ɣarsen yiři’, min ixs ad yini ‘ad yiři ɣar iwdan ...’.
- m 1:27 Amz. 5:1; 9:6; 1 Kur. 11:7; Afa. 4:24; Kul. 3:10.
- n 1:28 Amz. 8:17; 9:1, 2, 7.
- o 1:29 tacejjart - niɣ ‘aseklu’ (‘isekla’) niɣ ‘taddagt’ (‘tiddagin’). afessar - bnadem tuɣa ittett aysum di řweqt nni. Awarni i ṭṭufan ibda bnadem ad yecc aysum (xzar Amz. 9:2-4).
- p 1:29 Amz. 9:3; Izhd. 104:14, 15.
- q 1:30 Izhd. 104:14.
- r 1:31 Aɛwd. 32:4; Mk. 7:37.