1 Igga Baṣaliyil Ttabut n ukeccuḍ n tcejjart n ukasiya. Tuzzeggart nnes tuɣa-tt tnayen n iɣaǧen d wezyen u tiru nnes ijj n uɣiř d wezyen uca řuɛřa nnes ijj n uɣiř d wezyen. [a] 2 Iɣeǧef i-t zi daxeř d barra s wureɣ iṣfan uca igga as ijj n zzwaq n wureɣ i d as dd-innḍen. 3 Issefsi as arebɛa n texrazin i arebɛa n tɣemmura nnes: tnayen n texrazin ɣar yijj n uɣezdis d tnayen n texrazin ɣar uɣezdis nneɣni. 4 Igga iɛumad i tarebbut zeg ukeccuḍ n ukasiya uca iɣeǧef i-ten s wureɣ. 5 Igga iɛumad i tarebbut di texrazin ɣar tnayen n iɣezdisen n Ttabut, maḥend ad zzaysen arbun Ttabut. 6 Igga taqebbart n weṣřaḥ n wureɣ iṣfan s tuzzeggart nnes n tnayen n iɣaǧen d wezyen u tiru nnes n ijj n uɣiř d wezyen. 7 Igga tnayen n ikiruben n wureɣ. Iɛdeř i-ten am řxedmet n wemziř i dd-itteffɣen zi tnayen n ixfawen n tqebbart n weṣřaḥ. 8 Ijj n ukirub iffeɣ zeg ijj n ixef ɣar uɣezdis-a u akirub nneɣni zeg ixef nneɣni ɣar uɣezdis nneɣni. Igga ikiruben zi tnayen n ixfawen n tqebbart n weṣřaḥ. [b] 9 Ikiruben sswiẓẓḍen afriwen nsen sennej uca s wafriwen nsen dřin taqebbart n weṣřaḥ. Iɣembab nsen tuɣa ijjen qibač i wenneɣni uca di řweqt d icten tuɣa iɣembab n ikiruben ɣar tqebbart n weṣřaḥ. [c]

10 Igga tazewḍa n ukeccuḍ n tcejjart n ukasiya. Tuɣa tuzzeggart nnes tnayen n iɣaǧen u tiru nnes ijj n uɣiř d řuɛřa nnes ijj n uɣiř d wezyen. [d] 11 Iɣeǧef i-tt s wureɣ iṣfan uca igga as ijj n zzwaq n wureɣ i d as dd-innḍen. [e] 12 Igga ɛawed ict n tma i d as dd-innḍen n ijj n cbar n ufus uca igga ijj n zzwaq n wureɣ ɣar tmewwa nnes i d as dd-innḍen. [f] 13 Issefsi as arebɛa n texrazin n wureɣ uca igga tixrazin ɣar arebɛa n tɣemmura nni iǧan ɣar arebɛa n iḍaren nnes. [g] 14 Tuɣa tixrazin zzat n tma, maḥend ad daysent ssidfen iɛumad i tarebbut, ḥima ad zzaysen arbun tazewḍa. [h] 15 Igga iɛumad i tarebbut zeg ukeccuḍ n ukasiya uca iɣeǧef i-ten s wureɣ, maḥend ad zzaysen arbun tazewḍa. 16 Igga řeqcuɛ i ɣa yiřin x tzewḍa s wureɣ iṣfan: ṭṭbaṣi nnes d tɣenjayin nnes d řkisan nnes d iɣarrafen, maḥend ad zzaysen kebben. [i]

17 Igga řqendiř n wureɣ iṣfan. Iɛdeř řqendiř s wefḍis n wemziř: afud x uḍar nnes d iɣaǧen nnes d řkisan nnes d tɛebbuzin nnes i dd-ittasen ak-d nnuwarat nnes, aqa-ten marra tuɣa zzayes dd-itteffɣen. [j] 18 Zeg iɣezdisen nnes ffɣen-dd setta n iɣaǧen, třata n iɣaǧen n řqendiř zeg ijj n uɣezdis d třata n iɣaǧen n řqendiř zeg uɣezdis nneɣni. [k] 19 Ɣar ijj n uɣiř tuɣa din třata n řkisan am nnewwac n ǧewz s tɛebbuzt d nnewwac uca x uɣiř nneɣni ɛawed třata n řkisan am nnewwac n ǧewz s ict n tɛebbuzt i dd-ittasen ak-d ijj n nnewwac. Ammu i yeǧan marra setta n iɣaǧen nni dd-itteffɣen zi řqendiř. [l] 20 Ɣar řqendiř simant nnes tuɣa din arebɛa n řkisan am nnuwarat n ǧewz ak-d tɛebbuzin nsen i dd-ittasen ak-d nnuwarat nsen. [m] 21 Sadu tyuya n iɣaǧen i zzayes dd-iffɣen d amezwaru aqa din ict n tɛebbuzt uca amenni i din ict n tɛebbuzt sadu tyuya n iɣaǧen i zzayes dd-iffɣen awarni as uca ɛawed din ict n tɛebbuzt sadu tyuya n iɣaǧen i zzayes dd-iffɣen d aneggaru. Man aya iǧa amenni i setta n iɣaǧen i zzayes dd-iffɣen. 22 Tuɣa tiɛebbuzin nsen d iɣaǧen nsen ffɣen-dd zzayes. Marra aya tuɣa d ict n řxedmet n wemziř s wureɣ iṣfan. [n] 23 Igga setta n řefnarat nnes ak-d tjeqqaḍin n teftič nnes d tmejmarin nnes, marra s wureɣ iṣfan. [o]  [p] 24 Igga řqendiř ak-d marra řeqcuɛ nnes zeg ict n talint n wureɣ iṣfan. [q]

25 Igga aɛalṭar n řebxur zeg ukeccuḍ n tcejjart n ukasiya s tuzzeggart nnes n ijj uɣiř u tiru nnes n ijj n uɣiř. Tuɣa-t s arebɛa n tɣemmura. Řuɛřa nnes tuɣa-t tnayen n iɣaǧen. Zzayes tuɣa accawen nnes d ijj akides. [r]  [s] 26 Iɣeǧef i-t s wureɣ iṣfan, udem nnes n sennej d iɣezdisen nnes i d as dd-innḍen u ɛawed accawen nnes. Igga as ijj n zzwaq n wureɣ i d as dd-innḍen. [t] 27 Igga as tnayen n texrazin n wureɣ sadu zzwaq nnes i tnayen n tɣemmura nnes, ɣar tnayen n iɣezdisen nnes, ḥima ad daysent ssidfen iɛumad, maḥend ad zzaysen arbun aɛalṭar n řebxur. [u] 28 Igga iɛumad i tarebbut zeg ukeccuḍ n ukasiya uca iɣeǧef i-ten s wureɣ. [v]

29 Igga ɛawed zzect tamqeddest i wedhan d řebxur iṣfan ittfuḥen, ɛlaḥsab ṣṣenɛet n uɛeṭṭař. [w]