1 “Mařa ittwaf uceffar ɛad am ittacar, uca iwta i-t uca immut, war ttiřin idammen x wenni t yufin. 2 Mařa tenqar-dd xas tfuct, ad xas iřin idammen di ssibbet-a. Ad as ixeǧeṣ uceffar marra. Mařa war ɣares ca, ad immenz di ssibbet n tucceffra nnes. 3 Mařa tᵉttwaf tucceffart teddar deg ufus nnes, ma d afunas i tt tuɣa niɣ d aɣyuř niɣ d ijjen zeg wuǧi, ittxeṣṣa as ad ixeǧeṣ tnayen n tseqqar.

4 Mařa ijja ḥed ad heddan řmař iyyar niɣ amarjeɛ n uḍiř uca yarwes dayes taḥimart nnes uca ad asen iḍřeq ařami ad heddan di temmurt n wenneɣni, xenni ad tt ixeǧeṣ zi řemxeyyer n yeyyar nnes u zi řemxeyyer n umarjeɛ n uḍiř nnes.

5 Mařa teffeɣ-dd tmessi uca teřqef asennan uca tecca tiqebbiḍin n imendi niɣ imendi ibedden niɣ iyyar, xenni wenni iqqden timessi ad ixeǧeṣ marra min ittwacemḍen.

6 Mařa iḥḍa ḥed i wajjar nnes nnuqart niɣ řeqcuɛ u man aya ittwacar as zi taddart n weryaz nni, xenni aceffar, mařa ufin t, ad ixeǧeṣ tnayen n tseqqar. 7 Mařa war ittwif uceffar, řexdenni ad ssqarrben bab n taddart ɣar AREBBI maḥend ad ssnen ma war isswiẓẓeḍ ufus nnes ɣar wagřa n wajjar nnes.

8 Kuř aɛeddi zi jjihet n ufunas niɣ n weɣyuř niɣ n ijj zeg wuǧi niɣ n warruḍ niɣ n min iweddaren i zzayes inna ḥed: ‘Aqa-t d wa!’, ad dd-tas tmesřact i iǧan jar asen s tnayen zzat i řquḍat uca wenni ad xas ḥekmen řquḍat ad ixeǧeṣ i wajjar nnes tnayen n tseqqar.

9 Mařa iwca ḥed i wajjar nnes aɣyuř niɣ afunas niɣ ijj n zeg wuǧi, niɣ mammec ma tegga řebhimet, ḥima ad t iḥḍa uca immut niɣ yarreẓ niɣ ucaren t, am war iẓri ḥed, 10 xenni ad tiři tjaǧit ɣar SIDI jar asen s tnayen belli war isswiẓẓeḍ afus nnes ɣar wagřa n wajjar nnes. Bab nnes ad iqbeř tajaǧit nnes uca ad taf břa ma ad t ittxeǧeṣ wenneɣni. 11 Maca mařa ittwacar nican zzayes, di lḥala-ya ad ixeǧeṣ i bab nnes. 12 Mařa iban aqa ittwamezzeq nican, ad t yawi d burhan uca war ittxeǧiṣ min ittwamezzqen.

13 Mařa yarḍeř ḥed ca x wajjar nnes uca tarreẓ niɣ temmut di řɣayeb n bab nnes, ittxeṣṣa as ad tt ixeǧeṣ marra. 14 Maca mařa bab nnes tuɣa iḥḍar, war tt ittxiǧaṣ. Mařa tuɣa icra tt xas, ad dd-yas x řexřaṣ nnes.”

15 “Uca mařa immarḍen ḥed x ca n teɛzařect, tuɣa war tt ixḍib ḥed ɛad, uca iṭṭeṣ akides, ittxeṣṣa as ad as iwc ṣṣadaq imun maḥend ad tt yawi d tamɣart. 16 Mařa babas war ixs ad as tt iwc, ad as iwzen ɛad ṣṣadaq n teɛzuray s nnuqart.

17 War ttejji taseḥḥart ad teddar. [a]

18 Man wen i ɣa iṭṭṣen ak-d ijj n řmař, ad t nɣen nican. [b]

19 Wenni i ɣa iwehhben ca n tɣarṣt i irebbiten, war iǧi mɣir i SIDI waha, ittxeṣṣa ad ittwaḥarrem i uteḥḥi. [c]

20 War ddeǧem abarrani u war xas ttzeyyarem, minzi tuɣa uřa d kenniw d ibarraniyyen di temmurt n Miṣra. [d]

21 War ttdeǧi ca ict n tajjač niɣ ijj n uyujiř. [e] 22 Mařa tiwḍed ad t tesseḥqared aṭṭas uca netta isɣuy-dd ɣari, aqa Necc s uɣiř ad sřeɣ i tɣuyyit nnes. 23 Ad yareɣ weɣḍab inu uca Necc ad kenniw nɣeɣ s ssif, timeṭṭa nwem ad dewřent d tijjař d tarrawt nwem d iyujiřen.

24 Mařa tareḍřed nnuqart i řgens inu, i umezřuḍ i din ɣarek, xenni war kides ttegged am ittegg bab n umarwas: war xas ttegg ca arriba. [f]

25 Mařa teksid arruḍ n wajjar nnec d aḍman, arr as t qbeř ma ad teɣři tfuct. [g] 26 Minzi war ɣares mɣir ařeḥḥaf wanita, aqa-t d arruḍ x teřmect nnes. Min di ɣa iṭṭeṣ xenni? Xmi ɣari dd ɣa isɣuy, řexdenni ad as sřeɣ, minzi Necc aqa d aḥnin!

27 War ttceqqif di AREBBI u war ttekkʷar řḥakem n řgens nnec. [h]

28 War sɛeṭṭařa taccuret n tmeyra nnec niɣ aḥřay n teysart nnec. Ad ayi tewced uřa d amenzu n iḥenjiren nnec. [i] 29 Ammu i ɣa tegged ɛawed s ifunasen nnec d wuǧi nnec. Sebɛa n wussan ad iřin ak-d yemmatsen uca ɣar wass wiss tmenya ad ayi ten tewced. [j]

30 Ad ayi tiřim d imqeddasen u war ttᵉttem aysum i ittwamezzqen di řexřa. Ad t tenḍarem i yiṭan.” [k]  [l]