1 Arrays n ikehhanen inna: “Ma man aya d tidett?” 2 Xenni inna Stifanus:

“A kenniw, a iryazen, aytmatneɣ d ibabaten nneɣ, sřem! AREBBI n uɛuǧi iḍhar i jedditneɣ Ibrahim am tuɣa ɛad di Misuputamya, tenni d tammurt jar tnayen n iɣezran, qbeř ma ad izdeɣ di Ḥaran. 3 Netta inna as: ‘Ffeɣ zi temmurt nnec u zi řaǧ nnec, ruḥ ɣar temmurt tenni i d ac ɣa ssecneɣ.’ [a] 4 Řexdenni iffeɣ Ibrahim zi temmurt n Ikaldaniyyen uca izdeɣ di Haran. Awarni řami immut babas, issmuṭṭiy i-t-i-dd AREBBI ɣar temmurt-a i di tzeddɣem ass-a. 5 Netta war d as iwci ca dayes řwart uřa d ijj n uṣurif n uḍar, maca iwaɛd ad as tt iwc d řwart, i netta u i zzariɛet nnes awarni as, am war tuɣi ɣares ɛad mmis. [b] 6 Issiweř AREBBI akides, inna as: ‘Ad tiři zzariɛet nnec d amɛezzeb deg ict n temmurt teɣribt, uca nitni ad ten arren d isemɣan, ad daysen ɣezzan arebɛa-mya n iseggʷusa. [c] 7 Uca řgens i d as ɣa ɛebden am yisemɣan, ad t ḥasbeɣ.’ Uca yarni AREBBI deg wawař nnes, inna: ‘Awarni man aya ad ffɣen, ad ayi ɛebden deg wemcan-a’. [d] 8 Netta iwca as řɛahd n wextan. Xas uca ijja-dd Isḥaq uca ixten i-t deg wass wiss tmenya uca Isḥaq ijja-dd Yaɛqub, Yaɛqub ijja-dd tenɛac n řejdud imezwura. [e]

9 Řejdud imezwura ɣarren zi Yusuf uca zzenzen t ɣar Miṣra. Maca AREBBI tuɣa-t akides, [f] 10 issenjem i-t zi marra řemḥayem nnes. Netta iwca as arḍa d tiɣit qibač i firɛun, ajeǧid n Miṣra, uca wanita igga i-t d azeǧif x Miṣra u x marra taddart nnes. [g] 11 Maca yusa-dd řaẓ d ict n řmeḥnet temɣar di marra tammurt n Miṣra u di temmurt n Kenɛan, war tuɣi i řejdud nneɣ ḥima ad jiwnen. [h] 12 Maca umi isřa Yaɛqub belli aqa din ɛad min iqqimen n řḥebb di Miṣra, issekk řejdud nneɣ dinni i umur amezwaru. [i] 13 Řami din ruḥen i umur wiss tnayen isseḍhar Yusuf ixef nnes i yaytmas uca yargeb firɛun x řaǧ n Yusuf. [j] 14 Issekk Yusuf, yumur maḥend ad dd-yas babas Yaɛqub d marra řaǧ nnes: xemsa u-sebɛin n řeɛmur. 15 Ihwa-dd Yaɛqub ɣar Miṣra, immut netta d řejdud nneɣ. [k] 16 Iwyen t ɣar Cakim, ssarsen t deg wenḍeř nni isɣa Ibrahim s yijj n ttaman n nnuqart zeg ayt n Ḥamur, babas n Cakim. [l]

17 Maca ařami dd-tiweḍ řweqt i tuɣa iwaɛd zzayes AREBBI i Ibrahim s ict n tjaǧit, tuɣa igam řgens, idweř ijhed di Miṣra, [m] 18 ařami dd-ikkar ijj n ujeǧid nneɣni x Miṣra i tuɣa war issinen Yusuf. [n] 19 Wanita tuɣa ittegg s řeɣdar ak-d jjadira nneɣ uca iɣezza x řejdud nneɣ. Yumur i-ten maḥend ad nḍaren iseyman nsen ḥima war ttɣimin ad ddaren.

20 Di řweqt nni ixřeq-dd Musa, yusa as-dd x řxaḍar i AREBBI. Sseymen t di taddart n babas třata n iyuren. [o] 21 Řami ittwammenḍar zeg yemmas deg iɣzar, tufa i-t yeǧis n firɛun, tesseyem i-t am mammec iǧa d mmis n yixef nnes. 22 Ittwassɣar Musa di marra tiɣit n Imiṣriyyen uca tuɣa ittqedda x wawař u x min tuɣa ittegg.

23 Ařami ɣares arebɛin n iseggʷusa, iḍar-dd xas deg wuř nnes maḥend ad yarzef aytmas, ayt n Israil. [p] 24 Umi iẓra aqa ḍeǧen ijjen zeg aytmas zi teqbič nnes, ixřef zzayes di ṭṭweɛ nnes, igga ixef nnes d řqaḍi di ssibbet nnes uca inɣa Amiṣri nni t iḍeǧen. 25 Tuɣa ittraja belli tawmat nnes, ayt n Israil, ad fehmen aqa AREBBI ad asen issiwiḍ asenjem s ufus nnes, maca nitni war fhimen.

26 Deg wass awarni as iḍhar asen-dd ɛawed, řami tuɣa ttmenɣan. Iɛřem asen maḥend ad messeṣřaḥen, iqqar: ‘A iryazen, kenniw d awmaten, mayemmi tɛeddam ijjen x wenneɣni?’ 27 Wenni tuɣa ittɛeddan x umeddukkeř nnes, iɛarren i-t, iqqar: ‘Wi cek iggin xaneɣ d azeǧif d řqaḍi? [q] 28 Ma ad taɣ ad texsed ad ayi tenɣed am mammec tenɣid iḍennaḍ Amiṣri?’ [r] 29 Řexdenni yarweř Musa di ssibbet n wawař-a uca idweř d amɛezzeb di temmurt n Midyan mani dd-yejja tnayen iḥenjiren.

30 Awarni řami ɛdun i netta arebɛin n iseggʷusa, iban as-dd lmalak n SIDI di řexřa n wedrar n Sina di tmessi itteḥduduqen di cbarq ak-d isennanen. [s] 31 Umi iẓra Musa man aya, itebhet s řewḥiy i iẓra, uca umi dd-iqarreb ḥima ad iẓar, inna as SIDI s ict n tmijja: 32 ‘Aqa d NECC, AREBBI n řejdud nwem, AREBBI n Ibrahim, n Isḥaq u n Yaɛqub!’ Ibda Musa ittarjiji aṭṭas, war izɛim ad ixzar ɣar řewḥiy. [t] 33 Inna as SIDI: ‘Kkes sandaliyat nnec zeg iḍaren nnec, minzi tammurt mixef tbedded tqeddes i teǧa.’ [u] 34 Aqa ẓriɣ řmeḥnet n řgens inu di Miṣra uca sřiɣ i uzehhar nsen, hwiɣ-dd ḥima ad ten ssnejmeɣ. Uca řexxu, as-dd da, ad dd cek ssekkeɣ ɣar Miṣra.’ [v]

35 Musa wanita, wenni inḍaren nitni umi nnan: ‘Wi cek iggin xaneɣ d azeǧif d řqaḍi?’, wanita issekk i-t i-dd AREBBI ɣarsen d azeǧif d umsenjem s ufus n lmalak nni d as dd-iḍharen di cbarq ak-d isennanen. 36 Wanita issuffeɣ i-ten zi Miṣra am igga řeɛřamat d řeɛjayeb d tmegga timeqqranin di temmurt n Miṣra, ɣar Řebḥar n Uɣanim u di řexřa řmijař n arebɛin n iseggʷusa. [w] 37 Wa d Musa wenni innan i ayt n Israil: ‘SIDI, AREBBI nwem, ad awem dd-issgeɛɛed ijj n Unabi am necc zi tawmat nwem. I Netta umi ittxeṣṣa ad tesřam!’ [x] 38 Wanita tuɣa-t di tmesmunt n řgens di řexřa ak-d lmalak wenni tuɣa akides issawařen x wedrar n Sina uřa ak-d řejdud nneɣ. Aqa netta tuɣa itteṭṭef awařen n Tudart ḥima ad aneɣ ten yewc. [y] 39 Maca řejdud nneɣ war xsen ad as mmarsen ixef nsen, maca sstewwjen t xasen uca ɛeqben ɣar Miṣra deg wuřawen nsen. 40 Maɣar nnan i Harun: ‘Egg aneɣ irebbiten inni d aneɣ i ɣa izwaren, minzi Musa wanita wenni d aneɣ igewwden zi temmurt n Miṣra, war nessin min d as imsaren.’ [z] 41 Ggin ijj n ufunas n ṣṣanam i yixef nsen deg wussan nni, ssgeɛɛden tiɣarṣa i l’aṣnam uca farḥen s min ggin ifassen nsen. 42 AREBBI iwca asen s weɛrur uca yarra i-ten ad ɛebden řɛeskarat n ujenna am mammec tuɣa tura deg wedlis n inabiyyen:

‘Mayemmi tiwyem ayi-dd

zeɛma immudaren d tiɣarṣa

arebɛin n iseggʷusa di řexřa,

a ayt n Israil? [aa]

43 Aqa tiwyem-dd tazeddiɣt n Malkum,

d itri n arebbi Rimfan,

řexyařat i teggim ḥima ad tent tɛebdem.

Necc ad kenniw ssbeɛɛdeɣ

aɣirin qaɛ i Babil.’ [bb]

44 Tazeddiɣt n Cchadet n řejdud nneɣ tuɣa-tt di řexřa am mammec tuɣa yumur Netta wenni tuɣa issawař ak-d Musa maḥend ad tt igg x umedya i d as isscen. [cc] 45 Řejdud nneɣ ak-d Yacuwa ssidfen Tazeddiɣt-a ɣar temmurt nni d asen iwca AREBBI d řwart zi řegnus, řegnus nni issuffeɣ i-ten AREBBI qibač i uɣembub nsen, u nitni arbun tt ař wussan n Dawud. [dd] 46 Wanita yufa arḍa ɣar AREBBI uca ittar as ad yaf ict n Tzeddiɣt i AREBBI n Yaɛqub. [ee] 47 Maca Suliman ibna as Taddart. [ff] 48 Maca Amɛuǧi x kuřci war izeddeɣ deg ict n tzeddiɣt i ittwaggen s ifassen n iwdan am mammec iqqar unabi: [gg]

49 ‘Ajenna d řɛarc inu

u temmurt d tanebdat sadu iḍaren inu.

Mani taddart i d ayi ɣa tebnam,

iqqar SIDI,

niɣ mani amcan n arraḥet inu? [hh]

50 Ma war iggi ufus inu man aya marra?’ [ii]

51 A kenniw inni ittɣennan d yinni war ittwaxetnen n wuř d utesři, řebda tᵉttemɛařam x Arruḥ Iqeddsen. Am mammec ggin řejdud nwem, ammu i tᵉtteggem uřa d kenniw. [jj] 52 Man wen zeg inabiyyen war ten marrten u war ten nɣin řejdud nwem, aqa inni izwaren barrḥen x twasit n Umseggad, wenni tsellmem, tenɣim t kenniw, [kk] 53 kenniw inni iksin Ccariɛa s řumur n lmalakat maca war dayes tᵉṭṭifem.” [ll]

54 Umi sřin aya, dduqqzen nitni s uxeyyeq, ɣeẓẓen tiɣmas nsen ɣares. 55 Maca am tuɣa iccur s l’iman d Arruḥ Iqeddsen, ikessi netta tiṭṭawin nnes deg ujenna, iẓra aɛuǧi n AREBBI, d Yasuɛ ibedd ɣar yefus n AREBBI, 56 inna: “Xzar, ttwařiɣ ijenwan arzmen u Mmis n bnadem ibedd ɣar yefus n AREBBI.” 57 Maca nitni, am sɣuyyun s ict n tmijja d tameqqrant, qqnen imejjan nsen uca hejmen xas marra. 58 Tṭfen t, ssuffɣen t barra i tendint, bdan ttḥejjaren t u řechud ssarsen arruḍ nsen ɣar iḍaren n ijj n ubřiɣ qqaren as Cawul. [mm] 59 Tuɣa ttḥejjaren Stifanus am ittřaɣa, iqqar: “A Siditneɣ Yasuɛ, ṭṭef arruḥ inu.” [nn] 60 Xenni iwḍa x ifadden nnes, isɣuy s ict n tmijja tejhed, inna: “A Siditneɣ, war d asen ttḥasab ddnub-a!” Awarni řami inna aya, iṭṭeṣ s yiḍes n řmewt. [oo]