Řexdayem n rrusul

1 Adlis amezwaru i uriɣ, a Tiyufilis, uriɣ t x marra min ibda Siditneɣ Yasuɛ Lmasiḥ ad igg u ad isseřmed, 2 ař ass i di immeksi ɣar ujenna, awarni řami iweṣṣa i rrusul i tuɣa yixḍar Netta s Arruḥ Iqeddsen, [a]  [b] 3 inni umi, awarni řami tuɣa iweddeb, isscen asen Ixef nnes s waṭṭas n řeɛřamat belli aqa iddar, am d asen dd-iḍhar arebɛin n wussan, issawař x Tgeldit n AREBBI. [c]

4 Řami akidsen icca aɣrum, iweṣṣa ten ḥima war dd-tteffɣen ca zi Urcalim, maca ad qqimen ad rajan lwaɛd n Baba i tuɣa kenniw, ammu i inna, “tesřim zzayi, [d] 5 minzi Yuḥanna tuɣa isseɣḍaṣ deg waman, maca kenniw ad ttwassɣeḍṣem di Arruḥ Iqeddsen awarni drus n wussan.” [e]

6 Xenni sseqsan t inni tuɣa din imunen, nnan: “A Siditneɣ, ma di řweqt-a ad dd-tarred Tageldit i Israil ɛawed?” [f] 7 Inna asen: “War d awem dd-yusi ad taregbem x zzman d zzmanat i igga Baba di ṣṣulṭa n Yixef nnes. [g] 8 Maca kenniw ad teksim jjehd xmi xawem dd ɣa ihwa Arruḥ Iqeddsen uca kenniw ad tiřim d řechud di Urcalim, di marra Yahudiyya, di Samarya, wah, ař ineggura n ddunect.” [h]

9 Awarni řami inna aya, immeksi uca, am t ẓrin nitni, iksi t ijj n useynu, idweř inuffar x tiṭṭawin nsen. [i] 10 Am d as sseḍfaren s tiṭṭawin nsen am iruḥ ɣar ujenna, xzar, aqa bedden ɣarsen tnayen n yeryazen arḍen arruḍ d acemřař, [j] 11 uca nnan asen: “A, iryazen zi Ljalil, min kenniw ideɛwen tᵉttbeddam txezzarem ɣar ujenna? Aqa Yasuɛ wanita, wenni immeksin xawem ɣar ujenna, ad dd-iɛqeb am mammec t teẓrim igeɛɛed ɣar ujenna!” [k]

12 Xenni ɛeqben ɣar Urcalim zeg wedrar umi qqaren ‘Taddart n Zzitun’ i iǧan zzat i Urcalim, iggʷej xas ɛřaḥař sebɛa ‘istadiyyen’, ixs ad yini ɛřaḥař ijj n kilumitr u třata meyya mitr. 13 Awarni řami dd-udfen ɣar tendint, geɛɛden ɣar tɣurfet sennej mani tuɣa ttɣiman nitni: Buṭrus, Yuḥanna, Yaɛqub, Andrawus, Filippus, Tuma, Matta, Bar-Tulumawus, Yaɛqub mmis n Ḥalfa, Cimɛun umi qqaren ‘Amɛessab’, d Yahuda, mmis n Yaɛqub. 14 Ina marra idsen tuɣa ṣbaren s yijj n dmam x tẓaǧit, ak-d temɣarin u ak-d Maryam, yemmas n Yasuɛ, u ak-d aytmas. [l]

15 Deg wussan nni ikkar Cimɛun Buṭrus jar asen, di řwesṭ n imeḥḍaren. Tuɣa din munen ɛřaḥař mya u-ɛicrin n iwdan, u netta inna: [m]

16 “A iryazen tawmat, tuɣa ittxeṣṣa nican ad ittwakemmeř awař n Tira Iqeddsen i ittwannan qbeř s Arruḥ Iqeddsen s uqemmum n Dawud x Yahuda, wenni idewřen d amgewwed n yinni iḥebbsen Yasuɛ, [n] 17 minzi netta tuɣa ittwaḥseb zzayneɣ, zi tenɛac, u tuɣa iṭṭef tasɣart di tsexxart-a. [o] 18 Aqa wa tuɣa ikesseb ijj n iyyar i yixef nnes s řmunet n ddenb nnes uca umi iwḍa x uɣembub nnes ɣar temmurt, aqa ifeǧeq ɣar tejɛinnatin nnes uca ffɣen-dd marra adan nnes ɣar barra. [p] 19 Aqa man aya idweř ittwassen ɣar marra imezdaɣ n Urcalim ařami semman iyyar nni deg iřes n temmurt nsen ‘Ḥaql-Dama’, min ixs ad yini ‘Iyyar n idammen’. [q] 20 Minzi tura deg wedlis n Izehhiden n Dawud:

‘Ad tedweř taddart nnes d řxarbet,

uřa d ijj war dayes izeddeɣ!’

uca:

‘Ad iksi wenneɣni tasexxart nnes.’ [r]

21 S uyenni ittřiq, aqa ijjen zeg yeryazen inni tuɣa d imɛacaren akidneɣ kuř řweqt i di tuɣa Siditneɣ Yasuɛ ittadef u itteffeɣ jar aneɣ - [s] 22 zeg useɣḍeṣ n Yuḥanna ař ass i di immeksi xaneɣ - ad idweř d acehhad akidneɣ x tnukra nnes.”

23 Areccḥen tnayen: Yusuf, umi qqaren Bar-Saba wenni umi ttkennan Yustus, d Mattiya. [t] 24 Am tuɣa ttẓaǧan, nnan: “A SIDI, Cek tessned uřawen n marra, scen aneɣ man wen zi tnayen-a i tixḍared, [u] 25 ḥima ad icarc di tsexxart-a u di řxedmet n rrusul i di ismeḥ Yahuda ḥima ad iraḥ ɣar wemcan nnes.” 26 Xenni ggin akeccuḍ uca yusa-dd ukeccuḍ x Mattiya uca arnin t ɣar ḥiṭac n rrusul.