1 Maca ssen ddegga, aqa deg wussan ineggura ad din iřin řmijařat n řweqt iwɛaren. [a] 2 Minzi iwdan ad xsen ixef nsen, ad iřin d iceṭṭaren, d ayt n bu-nnfaxet d imɛeffaren d imceqqafen, war ttᵉṭṭiɛin ca i iwdan nsen, ad nḍaren arḍa, ad iřin d iɛeffanen, 3 ad ceqqfen, ad meẓřen řebda di ɛřam kuř nnecwat, ad iřin qesḥen, carrhen min iṣebḥen, 4 ad iřin d iɣeddaren d ifentrusen, daysen nnfaxet, ad xsen nnecwat ktar zi AREBBI. 5 Nitni ɣarsen udem n tiggʷudi zi AREBBI, maca bedden aggʷejen x jjehd nnes. Inni iǧan amenni, ittxeṣṣa ad ten tessiggʷejed xak. [b]

6 Zzaysen inni ittḥaman tudrin uca nitni ssusumen timɣarin tinni yarebbun ddnub, ttwaɛarrent s ubarru n nnecwat, [c] 7 tinni xsent ad řemdent řebda. Ɛemmarṣ ad awḍen ddab n yeryazen nni ɣar tussna n tidett, [d] 8 maca am mammec tuɣa Yannis d Yambris ttemɛařan ak-d Musa, ammu ɛawed ina ttemɛařan ak-d tidett: aqa-ten d iwdan, inni ittwaɣecc řeɛqeř nsen, nitni ttwammenḍaren zi l’iman. [e] 9 Maca war ttriḥen ca ktar ɣar zzat, minzi afɣuř nsen iban-dd i marra, am mammec tuɣa ittwassen uřa d afɣuř n yinni s tnayen.

10 Maca cek tsiɣid akidi deg useřmed inu, am mammec ggureɣ, tsiɣid akidi di lɣaraḍ inu, l’iman inu, ttasiɛ n řxaḍar inu, tayri inu d ṣṣbar inu, 11 di řeḥṣarat d uweddeb inu. Tessned timesřayin i xafi ikkin di Antiyuxiya d Ikuniya d Listra, man markat n udarrec i ksiɣ, uca aqa Sidi issenjem ayi zzaysent marra. [f] 12 Marra inni ixsen ad ddaren s tiggʷudi zi AREBBI di Yasuɛ Lmasiḥ, ad ttwadarrcen. [g] 13 Maca iwdan iɛeffanen d icemmaten ad arnin di tuɛeffna nsen, ad ɣwan uca ad ttwaɣwan.

14 Maca cek, qqim di min tuɣa třemded u di min tᵉttwassqenɛed, maɣar tessned man wen i zi t třemded, 15 u aqa zi temẓi nnec tᵉttwassřemded di Tira Iqeddsen, tinni zemmarent ad cek arrent d amiɣis ař ɣa tᵉṭṭfed Tudart s l’iman n Yasuɛ Lmasiḥ. 16 Kuř tira i yuran s Arruḥ Iqeddsen, aqa ineffeɛ ɛawed i useřmed, i uṣeḥḥi, i weɛdař uca i ttarbiyyet di tsegda, [h] 17 ḥima bnadem n AREBBI ad yiři iɛess, iḥezzem i marra řxedmet iṣebḥen.