1 Maca tuɣa din ɛawed jar řgens inabiyyen issxarriqen, am mammec i ɣa iřin uřa d imesɣaren issxarriqen jar awem, ad ssidfen tibridin ittareddǧen, ad nkaren Sidi i ten isɣin, ad ssiwḍen ammu areyyeb deɣya x yixef nsen. [a] 2 Aṭṭas i ɣa iḍfaren taxmuji nsen ař ɣa ittwaceqqef webrid n tidett zi ssibbet nsen. 3 S ṭṭmeɛ u s wawařen ittwaggen ad zzaywem ggen am zi sseřɛet, maca řḥukm xasen zeg wecḥař uya war ibḍiř ca uca ahellek nsen war ittnudum ca. [b]

4 Minzi mařa AREBBI war issar x lmalakat i yeggin ddnub, maca inḍar i-ten di ssnaseř n taǧest di řaǧaɣ yuǧɣen uca isellem i-ten ḥima ad ttwaxemmřen ař řḥukm n uɛeddeb, [c] 5 u ɛawed war issar x ddunect n zic, maca tuɣa iḥḍa Nuḥ, wenni d wiss tmenya, ambarreḥ n tsegda, řami dd-iḍřeq řḥemřet x ddunect n lkuffar, [d] 6 u ɛawed řami issecmeḍ Netta tineddam n Sadum d Ɛamurra u iḥkem xasent s uneqřeb, aqa yarra i-tent d lmital i lkuffar i ɣa yiřin ɛad. [e]

7 Ɛawed issenjem Netta Lut, amseggad, wenni tuɣa iweddben aṭṭas zi ticři ixemjen n yinni war ɣar teǧi ccariɛa. [f] 8 Maɣar umi amsegged wanita iẓra d isřa timegga nsen i war dd-yusin ak-d ccariɛa, ittwaɛeddab řeɛmar nnes iseggden zeg wass ař wass, am tuɣa izeddeɣ jar asen. [g] 9 Ammu i issen SIDI mammec i ɣa issuffeɣ inni t itteggʷeden, zi řmeḥnet, maca Netta iḥeṭṭa inni war iseggden ḥima ad ttwaɛeddben deg wass n lḥisab, [h] 10 mahu qaɛ inni iḍfaren ddat nsen am ttmeẓẓren di min ixemjen, u seḥqarran ṣṣulṭa n ijenwan. Aqa aten d imɛeffaren d imneffxen, war ttarjijin zzat min iɛuǧen am ttceqqafen. 11 Waxxa lmalakat ujarent ten di ṣṣulṭa d jjehd, war xasen ssiwiḍent řḥukm n SIDI di ssibbet n uceqqaf. 12 Maca nitni s řɛeks ǧan am imuddaren ignawen ɛlaḥsab ṭṭbiɛet, inni yuran i tɣarṣt s řmus d tajeyyaft am ttceqqafen di min di war fehhmen. Ad ttwajeyyfen di tjeyyaft n yixef nsen. [i]  [j] 13 Ina d inni x teǧa řmuɛṣiyyet d řmunet i řmuɛṣiyyet. Nitni ḥesben tawarrit n meẓri deg nnecwat s uziř d abarreɛ am ccuren nitni s ibeqqiḍen n řewsex. Xmi ttarran nnitni meẓri deg uraren nsen n uɣebbi, sellmen ixef nsen ɣar twarrit n meẓri tameqqrant. 14 Tiṭṭawin nsen ccurent s zzina u s ddenb war iqeṭṭin, xmi ɣekkwan nitni řeɛmur n yinni war ibedden nican. Aqa ɣarsen uř ittwarebban x ṭṭmeɛ, aqa nitni d tarwa n nneɛřet, 15 ffɣen zeg webrid iseggmen, weddaren, uca ḍfaren abrid nni ikka Balɛam, mmis n Faɣur, wenni tuɣa ittexsen řmunet n řɣecc. [k] 16 Maca netta iksi awebbex i řmuɛṣiyyet nnes, minzi zzayřet tagnawt tessiweř ɣares s ict n tmijja n iwdan, temneɛ tubbuheřya n unabi. [l]

17 Nitni d řɛunṣarat war dayes bu waman, d iseynuten ttwaɛarrnen s tḥaryaḍt, aqa tubbarcent n taǧest tᵉttwassewjed asen. [m] 18 Maɣar mařa ssiwřen s nnɛi n řhard nsen ixwan, aqa nitni ssɣekkʷan s nnecwat ixemjen n arrimet inni igguren ad arewřen zeg inni isellmen ixef nsen i uɣekkwi. 19 Waɛden ten s tiřelli, waxxa nitni simant nsen d isemɣan n řɣecc. Minzi wi zi ittwaɣelleb bnadem, aqa i netta ad yiři d amsexxar. [n] 20 Maɣar awarni řami dd-arewřen nitni zi řexmej n ddunect s tussna n Siditneɣ d Amsenjem nneɣ, Yasuɛ Lmasiḥ, aqa dewřen-dd ɣar řexmej nni ɛawed uca ttwaɣellben zzayes twařa nneɣni, aqa xenni aneggar nsen ad asen yura mahu x umezwar. [o] 21 Aqa ḥsen asen meɛlik qqimen war ssinen abrid n tsegda zi min ssnen, uca řexdenni ad ffɣen ɛawed x tewṣeyyet iqeddsen i d asen dd-ittwasellmen. 22 Aqa temsar asen am tt iqqar wawař-a n tidett: “Aqzin aqa idweř-dd x min tuɣa dd-iɛuqq!” niɣ mammec d as qqaren nneɣni: “Tiřeft tenni ittwassirden qaɛ, tedweř-dd tᵉttmarraɣ deg ubaryuḍ nnes!” [p]