1 Aqa neccin, am imɛacaren n AREBBI, nzaweg kenniw ammu, ḥima arḍa n AREBBI i tᵉṭṭfem, war daywem ittwassbeṭṭeř ca, [a] 2 minzi inna:

“Di řweqt n arḍa sřiɣ ac,

uca deg wass n usenjem ɛawneɣ cek!”

Xzar, aqa da řexxu d řweqt n arḍa, xzar, aqa da řexxu d ass n usenjem. [b]

3 Mayemmi ɣa tewced ssibbet i ca n yijjen ařami i ɣa inderf? Ittxeṣṣa war din ittiři ca n řɛib di tsexxart nneɣ, [c] 4 maca di marra nettweṣṣa ixef nneɣ am imsexxaren n AREBBI: deg waṭṭas n ṣṣbar, di řemḥayem, di řeɣben, di řeḥbusat, [d] 5 sadu tiyyita, di ssnaseř, deg uɣuwweɣ, di tamara, di ǧyaři břa iḍeṣ, deg wussan n uẓummi, 6 di řeṣfayet, di tussna, di ttasiɛ n řxaḍar, di řeḍrafet, di Arruḥ Iqeddsen, di tayri břa nnifaq, 7 s wawař n tidett, di jjehd n AREBBI, s řesnaḥ n tsegda ɣar ufusi d uzeřmaḍ, 8 s uɛuǧi d ddeǧ, s ccenɛet taɛeffant u s ccenɛet taṣebḥant, am iɣeccacen, waxxa amenni d imtiqqan, 9 axmi war nettwissen, waxxa nettwassen, axmi nettmetta, u xzar, aqa neddar, axmi nettwaɛaqeb maca war nettmetti ca, [e] 10 axmi neccin neffugem, maca nfarreḥ řebda, axmi nezřeḍ, waxxa nᵉttejjar aṭṭas, axmi war ɣarneɣ ca, waxxa ɣarneɣ kuřci.

11 Aqemmum nneɣ innurzem i kenniw, a Ikurintiyyen, uř nneɣ imɣar aṭṭas. 12 Kenniw war tᵉttwaḥṣarem zzayneɣ, maca tᵉttwaḥṣarem s twacit i iǧan di daxeř nwem. 13 Maca ad kiwem ssiwřeɣ axmi ssawařeɣ ak-d iḥenjiren: Arrem ayi-dd s min dayi tᵉttursem u swessɛem tayri nwem i necc! [f]

14 War ttmunem ca deg uzayřu ak-d lkuffar, maɣar man acrac i ɣar teǧa ɣar tsegda ak-d tuɛeffna, u man tamunt i ɣar teǧa i tfawt ak-d taǧest? [g] 15 Niɣ man arwas i din iǧa jar Lmasiḥ d cciṭan? Niɣ man tasɣart n řmumen ak-d ukafriw? 16 Niɣ man tasɣunt i din jar Zzawect Tameqqrant n AREBBI d tenni n ccwaṭen? Aqa kenniw d zzawect n AREBBI iddaren, am mammec inna AREBBI:

“Necc ad zedɣeɣ akidsen

uca ad uyureɣ jar asen.

Necc ad iřiɣ d AREBBI nsen,

nitni ad iřin d řgens inu. [h]

17 S uyenni, ffɣem-dd zi řwesṭ nsen,

bḍam xasen, iqqar SIDI.

War ttḥadam min inegsen,

u Necc ad kenniw qebřeɣ. [i]

18 Necc ad awem iřiɣ d Babatwem,

kenniw ad ayi tiřim d iḥenjiren d tḥenjirin,

iqqar SIDI, wenni d Amzemmar x kuřci.” [j]