2 Ikurintiyyen

1 Bulus, rrasul n Yasuɛ Lmasiḥ ɛlaḥsab řxaḍar n AREBBI, d tawmat Timutiyu, i tmesmunt n AREBBI i iǧan di Kurintus u i marra imqeddasen inni iǧan di marra Axaya: [a]  [b] 2 Ad kidwem yiři arḍa d řehna n AREBBI, Babatneɣ, u n Siditneɣ Yasuɛ Lmasiḥ. [c]

3 Lbaraka aqa-tt i AREBBI, Babas n Siditneɣ Yasuɛ Lmasiḥ, Babas n arreḥmet d AREBBI n marra afewwej. [d] 4 Netta issfewwaj aneɣ di marra řmeḥnet nneɣ, ḥima uřa d neccin nqedd ad nessfewwej x yinni iǧan di mammec ma teǧa řmeḥnet am neccin, s ufewwej i zi nettwassfewwej zi AREBBI. [e] 5 Minzi amen ifeyyeḍ dayneɣ aweddeb n Lmasiḥ, ammu ifeyyeḍ ɛawed ufewwej nneɣ s Lmasiḥ. [f] 6 Maca ɛawed mařa ḥṣaren aneɣ, aqa nettwaḥsar i ufewwej nwem u i Tudart nwem. U mařa nettwafewwej, aqa d man aya ḥima ad tᵉttwassfewwjem uřa d kenniw, maḥend ad ɣarwem yiři ṣṣabr ařami tzemmarem ɛawed ad teksim aweddeb am neksi uřa d neccin aweddeb. [g] 7 Asitem nneɣ i kenniw imten, minzi nessen mařa tcarrcem deg uweddeb, ad tcarcem uřa deg ufewwej.

8 A kenniw, aytmatneɣ, neccin nexs ad tessnem x řmeḥnet i xaneɣ dd-ikkin di Asiya, aqa tekka-dd xaneɣ řmeḥnet sennej x tzemmar nneɣ, ařami ɛřaḥař neqḍeɛ řayas zi tudart nneɣ. [h] 9 Aqa neḥkem x yixef nneɣ s řmewt, ḥima war nettiqqi ca deg ixef nneɣ, maca di AREBBI wenni dd-issnekkaran imettinen. [i] 10 Netta aqa ifekk aneɣ zi řmewt ineqqen uca nettraja ad aneɣ ifekk twařa nneɣni [j] 11 s uɛawen n tẓaǧitin nwem xaneɣ, maḥend ad tiři tawhibt nnes i neccin d lbaraka i waṭṭas, ḥima aṭṭas ad as qadan zi ssibbet nneɣ. [k]

12 Minzi wa d asemɣar nneɣ, cchadet n tnefsect nneɣ, belli aqa aneɣ neggur di ddunect s ṣfa d tazdugi, war iǧi s tiɣit n bnadem, maca di arḍa n AREBBI, d amezwaru i kenniw. 13 Minzi war d awem nuri uřa d ict n tmesřact mɣir min tessnem u ad as tfehmem, iwa ssitimeɣ ad tfehmem ař aneggaru, 14 am mammec ɛawed tfehmem zzayneɣ drus belli aqa aneɣ d asemɣar nwem, am mammec uřa d kenniw d asemɣar nneɣ deg wass n Siditneɣ Yasuɛ Lmasiḥ.

15 Di řaman-a tuɣa xseɣ ad ɣarwem dd-aseɣ qbeř, ḥima ad ɣarwem yiři arḍa tnayen n tseqqar. [l] 16 Tuɣa xseɣ ad ɣarwem dd-usiɣ deg webrid ɣar Makiduniya. Awarni man aya tuɣa xseɣ ad ɣarwem dd-ɛeqbeɣ ɛawed zi Makiduniya, ḥima kenniw ad ayi tessqebbḍem ɣar Yahudiyya. 17 Řami tuɣa ɛewwřeɣ ad ggeɣ man aya, ma qeǧqeɣ? Niɣ min xarṣeɣ ad t ggeɣ, ma xarṣeɣ t ɛlaḥsab aysum inu, ařami dayes ittwaf ‘Wah, wah!’ uřa d ‘Lla, lla’? 18 Maca AREBBI d amtiqqi i yeǧa, ařami awař nneɣ i kenniw war iǧi ‘Wah!’ uřa d ‘Lla!’ [m] 19 Minzi Mmis n AREBBI, Yasuɛ Lmasiḥ, wenni i zi ittwabarreḥ jar awem zzayneɣ, zzayi u zi Silwanus u zi Timutiyu, aqa Netta war iǧi d ‘Wah!’ uřa d ‘Lla!’, maca ‘Wah’ dayes i yeǧa. 20 Minzi marra lwuɛud n AREBBI, aqa aten d ‘Wah!’ dayes, di Lmasiḥ. S uyenni neqqar zzayes ɛawed ‘Amin!’ i uɛuǧi n AREBBI. 21 Maca AREBBI d wenni d aneɣ iḍmen akidwem di Lmasiḥ, aqa-t d Amedhun, nni i d aneɣ idhen. 22 Igga xaneɣ acemmiɛ nnes uca iwca aneɣ Arruḥ d řɛarbun deg wuřawen nneɣ. [n]

23 Maca necc cehhdeɣ zzat i AREBBI x yixef inu, aqa tuɣa ayi d aḥnin xawem, řami war dd-usiɣ ɣar Kurintus. [o] 24 War iǧi minzi nettṣelleṭ x l’iman nwem, maca neccin d imsexxaren i řefraḥet nwem, minzi zi l’iman tbeddem tmetnem. [p]