1 War tiřid tewɛared i uwessar, maca nesḥ i-t am babac, uca ibřiɣen am wawmaten nnec, [a] 2 tiwessura am tiyemmatin, uca tiɛezriyyin am suyᵉtmac nnec, s marra řeṣfayet.

3 Weqqar tijjař, tinni d tidett ǧant d tijjař. 4 Mařa ca n tajjač ɣares iḥenjiren niɣ ayyawen, ejj i-ten ad řemden d amezwar maḥend ad ggen min ittřiqen di ṭṭweɛ n řaǧ nsen, ad dd-arren i lwalidin min ttursen, minzi ddegga yusa-dd x řxaḍar n AREBBI. [b] 5 Maca tajjač nican d tenni iǧan weḥḥdes, tessitim di AREBBI uca tṣebbar di tutra d tẓaǧitin, ǧiřet d wass. [c] 6 Maca tenni iwḍan di tudart n nnecwet, aqa temmut waxxa teddar. 7 Weṣṣa i-tent timesřayin-a, ḥima ad iřint břa řɛib. 8 Minzi mařa ca n yijj war itthilli ca di wi iǧan nnes, d amewaru deg yinni iǧan d aytbab n taddart n familya n yinni yumnen, aqa wanita immenḍar l’iman uca netta mahu x yinni war yuminen ca. [d]

9 Ixḍar xenni ict n tajjač illa mařa ɣares zi settin n iseggʷusa ař tsawent, ict n tajjač nni tuɣa d tamɣart n ijj n weryaz, 10 tenni ɣar teǧa cchadet aqa tegga řexdayem tiṣebḥanin: niɣ tesseymi iḥenjiren nnes, niɣ tareḥḥeb s ibarraniyyen, niɣ tessired iḍaren n imqeddasen, niɣ tewca fus i yinni ittwaḥṣaren, wah, aqa tegga marra řxedmet taṣebḥant. [e]

11 Maca war qebbeř tijjař timeẓyanin, minzi nitenti ttexsent ad ssarxunt i Lmasiḥ s nnecwat nsent, arezzunt x ijj n weryaz. 12 Aqa ccreɛ nsent imten, minzi ssarsent l’iman nsent amezwar ɣar uɣezdis. 13 Maɣar nitenti ssřemdent inneɣni řeɛqez am ggurent x tudrin, war iǧi ssřemdent waha řeɛgez, maca nitenti ttɛawadent řexburat, ttadfent di cɣuřat n midden, qqarent min war icuwwaren. [f] 14 S uyenni xseɣ ad meřcent tijjař timeẓyanin, ad dd-jjent iḥenjiren, ad ssuyurent taddart nsen, war ttejjint ca i řeɛdu ssibbet ḥima ad iceqqef. [g] 15 Minzi aqa ca zzaysent bdant ad ffɣent abrid, ḍeffarent cciṭan.

16 Mařa din iryazen niɣ timɣarin yumnen ɣarsen tijjař, ejj i-ten ad daysent thillan, maḥend war ittiři ddqeř ɛad x tmesmunt, ḥima tamesmunt ad ɣares yiři maḥend ad tɛawen tinni iǧan d tijjař s tidett.

17 Imɣaren nni ittḍebbaran mliḥ, sdahǧen aweqqar tnayen n imuren, abeɛda inni ixeddmen deg Wawař u deg useřmed. [h] 18 Minzi Tira Iqeddsen qqarent: “War ttegg tacmant i uyenduz issarwaten!”, u: “Axeddam isdaheǧ řmunet nnes!” [i] 19 War qebbeř ca tanfuč ḍidd i umɣar, mɣir x uqemmum n tnayen niɣ n třata n řechud. [j] 20 Inni ixḍan, ɛeyyeb i-ten zzat i marra, ḥima inneɣni ad ggʷeden ɛawed. 21 Ziyyareɣ xak zzat i AREBBI d Siditneɣ Yasuɛ Lmasiḥ d lmalakat nnes ittwafarzen, ad teḥḍid man aya břa řfarz, war ttegg uřa d ict n tmesřact ɛlaḥsab udmawen. [k] 22 War ssrusa ifassen nnec x ḥed s uqeǧeq, war carrec di ddnub n inneɣni, ḥḍa ixef nnec di řeṣfayet. [l]

23 War sess aman waha, maca su drus n binu i stumaɣu nnec u i řeḥřac nnec azirar. [m]

24 Aqa din iwdan i ɣar iǧa ddnub nsen banen mliḥ deɣya, aqa ddnub nsen ttizzaren asen ɣar ccreɛ, uca aqa din ca nneɣni ḍeffaren ten ddnub nsen. [n] 25 Ammu dd-banent uřa d řexdayem tiṣebḥanin, maca uřa d tinni i war iǧin ammu, war zemmarent ad qqiment nnuffarent.