1 A aytma, řami dd-usiɣ ɣarwem, war dd-usiɣ ca ḥima ad awem barrḥeɣ Řexbar Aṣebḥan n ssirr n AREBBI s tbezzaḥt n wawař niɣ s tiɣit, [a] 2 minzi aqa tuɣa ɛewwřeɣ ḥima war ttessneɣ ca jar awem mɣir Yasuɛ Lmasiḥ, d Wenni ittwaṣellben ɛawed. 3 Tuɣa ayi akidwem s waṭṭas n tiggʷudi d uqdides. [b] 4 Tabrat inu d tbarreḥt inu war dd-usint-i-dd s wawařen izewwqen n tiɣit n bnadem, maca s wescan n Arruḥ d jjehd, [c] 5 ḥima l’iman nwem war ittbeddi ca x tiɣit n iwdan, maca x jjehd n AREBBI. [d]

6 Maca nessawař s tiɣit i yinni t iwḍen, aqa s ict n tiɣit tenni war iǧin n ddunect-a niɣ n řḥukkam n ddunect-a, inni i ɣa ittwassbeṭṭřen, [e] 7 maca nessawař tiɣit n AREBBI s ijj n ssirr i tuɣa inuffaren, wenni tuɣa izzar ifarz i-t AREBBI i uɛuǧi nneɣ qbeř i tuɣa din zzmanat. [f] 8 Wa d ssirr nni war t issin uřa d ijj zi řḥukkam n ddunect-a, minzi mařa tuɣa ssnen t, iři war ṣellben ɛemmarṣ Sidi n uɛuǧi. [g] 9 Maca am mammec tura:

“Min war teẓri tiṭṭ d min war isři umezzuɣ

d min war yudifen ca ɣar wuř n bnadem,

aqa man aya issewjed i-t AREBBI i yinni t ittexsen.” [h]

10 Maca AREBBI immeř aneɣ t s Arruḥ nnes, minzi Arruḥ tarezzu kuřci uřa d řaǧaɣ n AREBBI. [i] 11 Minzi man wen d bnadem i issnen min iǧan di bnadem mɣir arruḥ n bnadem wenni dayes iǧan. Ammu ɛawed uřa d ijj war issin ca min iǧan di AREBBI mɣir Arruḥ n AREBBI. [j]

12 Aqa neccin war neksi ca arruḥ n ddunect, maca Arruḥ i dd-yusin zi AREBBI, ḥima ad nessen min d aneɣ iwca AREBBI. [k] 13 S uyenni awařen i zi nessawař, war ǧin d tɣuri s wawařen n tiɣit n bnadem, maca d tɣuri zi Arruḥ, ḥima ad nessemqudda min iǧan n arruḥ ak-d min iǧan n arruḥ. [l] 14 Maɣar bnadem s yixef nnes war iqebbeř ca min iǧan n Arruḥ, minzi iḥesb i-t d tubbuheřya, war izemmar ad t ifhem, minzi man aya izemmar ad ittwafarz s Arruḥ waha. 15 Maca bnadem arruḥani aqa izemmar ad ifarz kuřci, maca netta simant nnes war xas iḥekkem uřa d ijj. [m] 16 Minzi wi issnen axemmem n SIDI ařami izemmar ad t isseřmed? Maca neccin ɣarneɣ axemmem n Lmasiḥ. [n]