1 إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ. إِزْڒِي.

2 أَربِّي أَذْ إِكَّارْ،

ڒْْعذْيَانْ نّسْ أَذْ تّْوَاريّْشنْ،

إِنِّي ث إِشَارّْهنْ أَذْ أَروْڒنْ

زَّاثْ إِ وُوذمْ نّسْ. [a]

3 شكْ أَذْ ثنْ ثسِّيڭّْوجذْ

أَمْ دّخَّانْ إِطَّاوْ،

أَمْ شّْمعْ إِفسِّي ذِي ثْمسِّي،

أَمُّو إِ غَا فْنَانْ إِعفَّاننْ

زَّاثْ إِ وُوذمْ ن أَربِّي.

4 إِمْسڭَّاذنْ أَذْ فَارْحنْ،

أَذْ سْڒِيوْڒِيونْ س ڒفْرَاحثْ

زَّاثْ إِ وُوذمْ ن أَربِّي

ؤُ أَذْغبَّانْ ڒفْرَاحثْ. [b]

5 غنّْجمْ إِ أَربِّي، زهّْذمْ

إِ يِيسمْ نّسْ،

ڭّمْ إِجّْ ن وبْرِيذْ يُوعْڒَانْ

إِ ونِّي إِندّْهنْ ذِي ڒوْضَا.

سِيذِي ذ إِسمْ نّسْ.

نڭْزمْ سْ ڒفْرَاحثْ

زَّاثْ إِ وُوذمْ نّسْ. [c]

6 بَابَاثْسنْ ن إِيُوجِيڒنْ ذ ڒْقَاضِي ن ثِيجَّاڒْ،

أَمُّو إِ يدْجَا أَربِّي

ذِي ثْزذِّيغْثْ نّسْ إِقدّْسنْ، ◼68:‏6 ’ڒْقَاضِي‘ - نِيغْ ’أَمزْرُوفْ‘.

7 أَمُّو إِ يدْجَا أَربِّي

ونِّي إِسّْزدَّاغنْ إِنِّي وحّذْسنْ

ذڭْ إِشْثْ ن ثْوَاشُونْثْ،

ونِّي إِسُّوفُّوغنْ إِمحْبَاسْ س ؤُفْڒَاحْ،

مَاشَا إِمْغوَّاغنْ أَذْ زذْغنْ

ذڭْ إِشْثْ ن ثمُّورْثْ

إِتّْوَاسّْشمْضنْ زِي ثْفُوشْثْ.

8 أَ أَربِّي، أَڒَامِي ثِيزَّارذْ

زَّاثْ إِ وُوذمْ ن ڒْڭنْسْ نّشْ،

أَڒَامِي ثُوغَا ثڭُّورذْ ذِي ثْنزْرُوفْثْ - سِيلَاهْ -

9 ثنْهزّْ ثمُّورْثْ ؤُشَا ؤُشْرُورنْ إِجنْوَانْ،

زَّاثْ إِ وُوذمْ ن أَربِّي،

ؤُڒَا ذ أَذْرَارْ ن سِينَا إِنْهزّْ

زَّاثْ إِ وُوذمْ ن أَربِّي، أَربِّي ن إِسْرَائِيل. ◼68:‏9 ’سِينَا‘ - ذَانِيثَا إِذْوڒْ أَربِّي ذ أَجدْجِيذْ ن إِسْرَائِيل (يَاشُورُونْ). خْزَارْ أَعَوذ. 33‏:5. ذڭْ ومْشَانْ-أَ ثبْذَا عَاوذْ ثسْغُونْثْ ن ڒْعَاهْذْ ن ڒْڭنْسْ أَكْ-ذ شَّارِيعَا ن مُوسَا: تَّاوْرَاثْ.  [f]

10 أَكْ-ذ ونْژَارْ إِفْسُوسنْ

ثْرُوشّذْ ثَامُّورْثْ، أَ، أَربِّي،

خْمِي إِ غَا إِسْڒَاوْ ڒْوَارْثْ نّشْ،

ثوْشِيذْ أَسْ شكْ عَاوذْ جّهْذْ.

11 ثَاحِيمَارْثْ نّشْ ثُوغَا ثْزدّغْ ذَايسْ.

س ثْشُونِي نّشْ ثسّْوجْذذْ ت إِ ڒْمسْكِينْ،

أَ أَربِّي! ◼68:‏11 ’ثَاهِيمَارْثْ نّكْ‘ - نِيغْ ’ثُوذَارْثْ نّكْ‘، أَقَا مَارَّا مِينْ إِدْجَانْ ذ أَڭْرَا إِدَّارنْ غَارْ إِجّْ ن بْنَاذمْ. أَوَاڒْ-أَ ذ إِجّْ ن ؤُشيَّارْ غَارْ ڒْڭنْسْ ن أَربِّي، غَارْ إِسْرَائِيل.

12 سِيذِي إِنُو إِوْشَا أَوَاڒْ،

ثِيمْغَارِينْ نِّي د-إِتَّاوْينْ

ڒخْبَارْ أَصبْحَانْ

تّْكوّْننْثْ إِجّْ ن ؤُبَارُّو

أَمقّْرَانْ ن ثْرقَّاسِينْ.

13 إِجدْجِيذنْ ن ڒْعسْكَارَاثْ تّْرَاكّْوَاڒنْ،

أَقَا تّْرَاكّْوَاڒنْ،

ؤُ ثنِّي إِقِّيمنْ ذِي ثَادَّارْثْ،

ثْبطَّا ثَاكشَّاضْثْ. ◼68:‏13 ’ثنِّي إِقِّيمنْ ذِي ثَادَّارْثْ‘ - أَذْ ثَاغْ أَوَاڒْ-أَ ذ إِجّْ ن ؤُشيَّارْ غَارْ يَاعِيلْ (خْزَارْ ڒقض. 5‏:24). خْزَارْ عَاوذْ 2 صم. 1:‏24.

14 مَا كنِّيوْ وَارْ ثبُّوزّْڒمْ

جَارْ ثْنَاينْ ن ثَارْيِيوِينْ،

أَمْ وذْبِيرْ جَارْ وَافْرِيونْ نّسْ

إِ إِتّْوَاڒحّْفنْ س نُّوقَارْثْ،

جَارْ أَرِّيشْ نّسْ س وُورغْ أَزِيزَا إِتِّيسِّيقنْ،

15 ڒَامِي أَمْزمَّارْ خْ كُوڒْشِي

إِسَّاريّشْ إِجدْجِيذنْ ذِي ثمُّورْثْ،

إِشَّاثْ وذْفڒْ خْ صَالْمُونْ. ◼68:‏15 ’ذِي ثمُّورْثْ‘ - س ثِيعِيبْرَانِيثْ ’ذَايسْ‘. ’صَالْمُونْ‘ - نشِّينْ وَارْ نسِّينْ شَا نِيشَانْ مَانِي إِدْجْ وذْرَارْ نْ صَالْمُونْ. أَقَا ذِينْ إِنِّي إِقَّارنْ أَقَا-ث ذ إِجّْ وذْرَارْ ذِي ڒْوسْثْ ن ثمُّورْثْ ن إِسْرَائِيل ؤُ إِنّغْنِي قَّارنْ أَقَا-ث ذ إِجّْ ن وذْرَارْ جَارْ إِذُورَارْ ن بَاشَانْ (إِخْسْ أَذْ يِينِي ڒڭْعُوذِي ن جُولَانْ ذڭْ وُوسَّانْ نّغْ). أَقَا بَالَاكْ أَقَا-ث ذِي بَاشَانْ.

16 أَذْرَارْ ن أَربِّي! أَذْرَارْ ن بَاشَانْ!

أَذْرَارْ ن بَاشَانْ ذ إِجّْ ن وذْرَارْ

س ثْقِيشِّيثِينْ أَطَّاسْ. ◼68:‏16 ’أَذْرَارْ ن أَربِّي‘ - أَقَا-ث ذ أَذْرَارْ ن مُورِييَا مَانِي إِقدّمْ إِبْرَاهِيمْ مِّيسْ إِسْحَاقْ ذ ثَاغَارْصْثْ إِ أَربِّي. ذڭْ وُوسَّانْ ن سُولِيمَانْ بْنَانْ ذِينْ زَّاوشْثْ ثَامْقدَّاسْثْ ذِي ؤُرْشَالِيمْ ؤُشَا أَذْرَارْ إِذْوڒْ إِثْوَاسّْننْ أَمْ وذْرَارْ ن صِيهْيُونْ. ’بَاشَانْ‘ - إِذُورَارْ ن بَاشَانْ ن زِيشْ أَقَا-ثنْ ذ ڒڭْعُوضِي ن جُولَانْ ذڭْ وُوسَّانْ نّغْ، غَارْ شَّامَالْ ن ثمُّورْثْ ن إِسْرَائِيل، ؤُ جَارْ أَسنْ أَذْرَارْ ن هِيرْمُونْ ونِّي غَارْ إِدْجْ إِجّْ ن ڒُوعْرَا ن 2800 مِيثْرُو. أَذْرَارْ ن صِيحْيُونْ غَارْسْ مْغِيرْ 800 مِيثْرُو ن ڒُوعْڒَا.

17 مَايمِّي ثْخزَّارمْ

أَمُّو س وَاسَامْ،

كنِّيوْ أَ إِذُورَارْ

س مَارَّا ثِيقِيشِّيثِينْ نْومْ،

غَارْ وذْرَارْ إِ إِمژْرِي إِ-ث أَربِّي

ذ ثَازذِّيغْثْ إِ يِيخفْ نّسْ؟

وَاهْ، نِيشَانْ سِيذِي أَذْ ذِينْ إِزْذغْ إِ ڒبْذَا. [k]

18 إِكَارُّوثنْ ن أَربِّي

أَقَا أَثنْ ذعشْرَايَاثْ ن ڒُوڒُوفْ

ذعشْرَايَاثْ ن ڒُوڒُوفْ،

ؤُڒَا ذ أَڒفْ ؤُ عَاوذْ أَڒفْ.

سِيذِي إِنُو أَقَا-ث جَارْ أَسنْ،

أَذْرَارْ ن سِينَا أَقَا إِتّْوَاڒحّفْ

س ثْقدَّاسْثْ. [l]

19 شكْ ثُوڒْيذْ غَارْ سنّجْ،

ثْنذْهذْ إِمحْبَاسْ ذِي ثْمحْبَاسْثْ،

شكْ ثْمنْعذْ ثَارْزِيفِينْ زڭْ إِوْذَانْ،

إِوَا عَاذْ زڭْ إِمْغوّْغنْ،

حِيمَا سِيذِي، أَربِّي، أَذْ إِزْذغْ ذِينِّي. [m]

20 أَذْ إِتّْوَابَاركْ سِيذِي إِنُو.

أَسّْ خْ وَاسّْ يَاربُّو إِ نشِّينْ دّْقُوڒَاثْ.

أَربِّي نِّي ذ أَسنْجمْ نّغْ - سِيلَاهْ - ◼68:‏20 ’أَمْسنْجمْ‘ - نِيغْ ’أَمْسلّكْ‘.

21 أَربِّي نِّي

ذ إِجّْ ن أَربِّي ن إِسنْجَامنْ إِ نشِّينْ.

أَقَا ذِينْ إِفكِّيثنْ زِي ڒْموْثْ

غَارْ سِيذِي، سِيذِي إِنُو.

22 س ثِيذتّْ، أَربِّي، أَذْ إِڒْبزْ

أَزدْجِيفْ ن ڒْعذْيَانْ نّسْ،

أَشقُّوفْ س ؤُشُوَّافْ

ن ونِّي إِقِّيمنْ إِتّنّضْ

س إِمرْوُوسَا ن دّْنُوبْ نّسْ. [o]

23 سِيذِي إِنُو إِنَّا:

”نشّْ أَذْ كنِّيوْ د-أَرّغْ زِي بَاشَانْ،

أَذْ كنِّيوْ د-أَرّغْ

زِي ڒَادْجَاغْ ن ڒبْحَارْ، [p]

24 حِيمَا أَذْ ثْحَارّْشذْ س ؤُضَارْ نّشْ

ذڭْ إِذَامّنْ،

ؤُشَا ؤُڒَا ذ إِڒسْ ن يِيطَانْ نّشْ

أَذْ إِطّفْ ثَاسْغَارْثْ نّسْ زِي ڒْعذْيَانْ.“

25 نِيثْنِي ژْرِينْ إِبْرِيذنْ نّشْ

مَامّشْ ثنْ ثُويُورذْ، أَ أَربِّي،

إِبْرِيذنْ ن أَربِّي إِنُو، أَجدْجِيذْ إِنُو،

ڒحّْفنْ ذِي ثْقدَّاسْثْ.

26 إِمغْنَاجنْ ثُوغَا ڭُّورنْ غَارْ زَّاثْ،

إِنِّي إِشَّاثنْ خْ إِفِيڒَانْ أَوَارْنِي أَسنْ،

ثِيعْزَارِييِّينْ، ثِينِّي إِتِّيرَارنْ

خْ إِبنْذِيڒنْ نْسنْثْ ذِي ڒْوسْطْ.

27 بَارْكمْ أَربِّي ذِي ثْمسْمُونِينْ، أَ سِيذِي،

زِي ڒْعُونْصَارْ ن إِسْرَائِيل.

28 أَقَا ذِينْ بِينْيَامِينْ أَمژْيَانْ،

ونِّي خَاسنْ إِتّْصدْجَاضنْ،

خنِّي ڒْحُوكَّامْ ن يَاهُوذَا

أَكْ-ذ ؤُبَارُّو ن إِعْشِيرنْ نْسنْ،

ؤُڒَا ذ ڒْحُوكَّامْ ن زابُولُونْ

ذ ڒْحُوكَّامْ ن نَافْثَالِي.

29 أَربِّي نّشْ إِوصَّا

مَاحنْذْ أَذْ أَسْ إِمّوْشْ جّهْذْ نّشْ.

أَ، أَربِّي، سجْهذْ

مِينْ ثڭِّيذْ ذِي طّْوعْ نّغْ،

30 زِي زَّاوشْثْ نّشْ ثَامقّْرَانْثْ،

سنّجْ إِ ؤُرْشَالِيمْ.

إِجدْجِيذنْ أَذْ أَشْ إِوْينْ ثَارْزِيفِينْ. [q]

31 سِيڭّْوذْ ڒْوحْشْ نِّي ذڭْ ؤُغَانِيمْ،

أَبَارُّو ن إِفُونَاسنْ إِجهْذنْ

أَكْ-ذ إِعجْمِييّنْ ن ڒڭْنُوسْ،

أَڒَامِي إِڭَّا إِخفْ نّسْ أَمْ إِتّْوَاڒْبزْ،

أَمْ نُّوقَارْثْ إِدّزْ.

نتَّا إِزدْجعْ ڒڭْنُوسْ

نِّي ثُوغَا تّْمژْرنْ ذڭْ ؤُمنْغِي. ◼68:‏31 ’أَمْوَا‘ - نِيغْ ’أَينْذُوزْ‘ نِيغْ ’يُوڭُّو‘.

32 أَذْ د-أَسنْ إِمْشنّْعنْ زِي مِيصْرَا،

كُوشْ أَذْ إِسّْوِيژّضْ إِفَاسّنْ نّسْ

غَارْ أَربِّي س ثزْڒَا.

33 أَ ثِيڭلْذِيوِينْ ن ثمُّورْثْ،

غنّْجنْثْ إِ أَربِّي،

زهّْذنْثْ إِ سِيذِي إِنُو. سِيلَاهْ.

34 نتَّا ذ ونِّي إِندّْهنْ

ذڭْ ؤُجنَّا خْ مَارَّا إِجنْوَانْ

زڭْ وشْحَاڒْ ؤُيَا.

خْزَارْ، أَقَا نتَّا إِڭَّا

إِجّْ ن ڒْحسّْ إِجهْذنْ س ثْمِيجَّا نّسْ.

35 وْشمْ جّهْذْ إِ أَربِّي!

لْعَاضَامَا نّسْ أَقَا-ت ثِيوَا إِ إِسْرَائِيل

ؤُ جّهْذْ نّسْ أَقَا-ث ذڭْ إِسيْنُوثنْ.

36 أَ، أَربِّي، مَامّشْ ثسِّيڭّْوذذْ

زِي ثِيزَاوِييِّينْ نّشْ إِقدّْسنْ،

أَ أَربِّي ن إِسْرَائِيل، شكْ ذ ونِّي إِتِّيشنْ

جّهْذْ ذ ثْزمَّارْ إِ ڒْڭنْسْ.

أَذْ إِتّْوَابَاركْ أَربِّي. *