1 هَالِّيلُو-يَاهْ!

غنّْجمْ إِجّْ ن يزْڒِي ن جْذِيذْ إِ سِيذِي،

سْعُودْجمْ ث ذڭْ وڭْرَاوْ ن إِمْثِيقَّانْ نّسْ.

2 أَذْ إِفَارْحْ إِسْرَائِيل زڭْ ونِّي ث إِڭِّينْ،

أَذْ أَرْشْقنْ إِحنْجِيرنْ ن صِيهْيُونْ

س ؤُجدْجِيذْ نْسنْ. [a]

3 أَذْ صبّْحنْ نِيثْنِي إِسمْ نّسْ

س شّْضِيحْ س نُّوبْثَاثْ،

أَذْ أَسْ زهّْذنْ س ؤُبنْذِيرْ ذ ڒْڭَامْبْرِي، [b]

4 مَاغَارْ سِيذِي يَارْضَا خْ ڒْڭنْسْ نّسْ،

أَذْ يَاوِي شَّانْ إِ إِمْوَاضْعنْ س ونْجَامْ.

5 أَذْ سْڒِيوڒْونْ إِمْثِيقَّانْ

س ؤُوقَّارْ يُودْجْغنْ،

أجّْ إِ-ثنْ أَذْ سْغُوينْ س ڒفْرَاحثْ

زڭْ إِمُوشَانْ نْسنْ ن أَرَّاحثْ.

6 إِزْڒَانْ ن ؤُعُودْجِي إِ أَربِّي

ذڭْ ؤُقمُّومْ نْسنْ

إِجّْ ن سِّيفْ إِقْضعْ س ثْنَاينْ ن وُوذْمَاونْ

ذڭْ ؤُفُوسْ نْسنْ، [c]

7 حِيمَا أَذْ نْثَاقْمنْ زِي ڒڭْنُوسْ،

حِيمَا أَذْ عَاقْبنْ شُّوعُوبْ،

8 حِيمَا أَذْ شَارْفنْ إِجدْجِيذنْ نْسنْ س سّْنَاسڒْ،

أَيْثْ ن ثَاصِيڒثْ نْسنْ س سّْنَاسڒْ ن وُوزَّاڒْ، [d]

9 حِيمَا أَذْ خَاسنْ ڭّنْ ڒْحُوكْمْ يُورَانْ.

ذ مَانْ أَيَا أَذْ ثِيڒِي ذ لْعَاضَامَا

ن مَارَّا إِمْثِيقَّانْ نّسْ.

هَالِّيلُو-يَاه. [e]