1 إِ ؤُمقّْرَانْ ن إِمغْنَاجنْ. ن ذَاوُوذْ.

أَبُوهَاڒِي إِنَّا ذڭْ وُوڒْ نّسْ:

”وَارْ ذِينْ بُو أَربِّي!“

نِيثْنِي تَّاردّْدْجنْ،

تّڭّنْ ثِيمسْڒَايِينْ إِضخْسنْ،

وَارْ ذِينْ ؤُڒَا ذ إِجّْ إِتّڭّْ مِينْ إِشْنَانْ. [a]

2 سِيذِي إِخزَّارْ-د زڭْ ؤُجنَّا

غَارْ ثَارْوَا ن بْنَاذمْ،

حِيمَا أَذْ إِژَارْ، مَا ذِينْ حذْ ذَايسْ ڒفْهَامثْ،

إِجّْ ونِّي يَارزُّونْ أَربِّي.

3 مَارَّا فّْغنْ زڭْ وبْرِيذْ،

أَقَا أَثنْ جْمِيعْ ذوْڒنْ ذ إِعفَّاننْ،

وَارْ ذِينْ ؤُڒَا ذ إِجّْ إِتّڭّْ ڒْخَارْ،

ؤُڒَا ذ إِجّْ.

4 مَارَّا إِنِّي إِتّڭّنْ ڒْمُوعْصِييّثْ

مَا وَارْ غَارْسنْ بُو ثُوسّْنَا،

إِنِّي إِتّتّنْ ڒْڭنْسْ إِنُو

أَخْمِي تّتّنْ أَغْرُومْ؟

نِيثْنِي وَارْ تّْڒَاغَانْ خْ سِيذِي.

5 أَقَا ثوْضَا-د خَاسنْ ذِينْ

إِڭّْوُوذِي ثمْغَارْ،

مَاغَارْ أَربِّي

أَقَا-ث أَكْ-ذ جِّيڒْ نْ إِمْسڭَّاذنْ.

6 كنِّيوْ ثْنفْضمْ أَرَّايْ ن ڒْمُوسَاكِينْ،

مَاشَا سِيذِي ذ أَمْشَانْ نّسْ ن ثَاروْڒَا.

7 مَانْ ونْ زِي صِيهْيُونْ

إِ غَا يِيوْينْ أَسنْجمْ ن إِسْرَائِيل!

خْمِي د غَا يَارّْ سِيذِي

إِمحْبَاسْ ن ڒْڭنْسْ نّسْ،

أَذْ يَارْشقْ يَاعْقُوبْ،

أَذْ إِفَارْحْ إِسْرَائِيل.