1 ن ذَاوُوذْ.

أَذْ شكْ قَاذِيغْ س مَارَّا ؤُڒْ إِنُو،

أَذْ شكْ زهّْذغْ زَّاثْ إِ إِربِّيثنْ.

2 أَذْ بنْذْقغْ غَارْ زَّاوشْثْ نّشْ

ثَامقّْرَانْثْ إِقدّْسنْ،

أَذْ قَاذِيغْ إِسمْ نّشْ

خْ ثْمخْسِيوْثْ نّشْ إِشوَّارنْ

ؤُ خْ ڒَامَانْ نّشْ،

مَاغَارْ شكْ ثسّمْغَارذْ

أَوَاڒْ نّشْ خْ مَارَّا

مِينْ إِتّْوَافنْ عَاذْ

ذڭْ يِيسمْ نّشْ.

3 ذڭْ وَاسّْ ڒَامِي خَاكْ د-ڒَاغِيغْ،

ثَارِّيذْ-د خَافِي،

شكْ ثوْشِيذْ جّهْذْ إِ ڒعْمَارْ إِنُو.

4 مَارَّا إِجدْجِيذنْ ن ثمُّورْثْ

أَذْ شكْ قَاذَانْ، أَ سِيذِي،

خْمِي تّسْڒَانْ أَوَاڒنْ

زڭْ ؤُقمُّومْ نّشْ.

5 أَذْغنّْجنْ خْ إِبْرِيذنْ ن سِيذِي،

مَاغَارْ أَعُودْجِي ن سِيذِي ذ أَمقّْرَانْ.

6 مَاغَارْ وَاخَّا إِتّْوَاسُّوعْڒَا سِيذِي أَطَّاسْ،

عَاذْ إِخزَّارْ-د غَارْ ؤُمْوَاضعْ،

مَاشَا بُو-نّْفَاخثْ إِسّنْ إِ-ث زِي ڒَاڭّْوَاجْ. [a]

7 مَاڒَا ؤُيُورغْ ذِي ڒْوسْطْ ن ڒحْصَارثْ،

أَذْ أَيِي د-ثتَّارّذْ غَارْ ثُوذَارْثْ.

شكْ ثسّْوِيژّْضذْ أَفُوسْ نّشْ

ضِيدّْ إِ وغْضَابْ ن ڒْعذْيَانْ إِنُو،

أَفُوسْ نّشْ أَفُوسِي إِسّنْجمْ أَيِي.

8 سِيذِي أَذْ ث إِكمّڒْ إِ نشّْ.

أَ سِيذِي، ثَامخْسِيوْثْ نّشْ إِشوَّارنْ

ثتّْغِيمَا إِ ڒبْذَا،

ڒفْعَايڒْ ن إِفَاسّنْ نّشْ

وَارْ ثنْ ثَارخُّوذْ.