1 ن ذَاوُوذْ.

بَاركْ سِيذِي، أَ ڒعْمَارْ إِنُو،

ذ مَارَّا مِينْ ذَايِي إِسمْ نّسْ إِقدّْسنْ.

2 بَاركْ سِيذِي، أَ ڒعْمَارْ إِنُو،

وَارْ تّتُّوعمَّارْصْ

مَارَّا ثِيمڭَّا نّسْ إِصبْحنْ.

3 نتَّا ذ ونِّي ذ أَشْ إِغفَّارنْ

مَارَّا دّْنُوبْ نّشْ،

ونِّي إِسّْڭنْفَانْ مَارَّا ڒهْڒَاشَاثْ نّشْ، [a]

4 ونِّي إِفْذِينْ ثُوذَارْثْ نّشْ زِي ثُورْصُوضِي،

ونِّي خَاكْ إِڭِّينْ تَّاجْ

ن ثْمخْسِيوْثْ إِشوَّارنْ ذ أَرّحْمثْ،

5 ونِّي إِسّْجَّاوَاننْ أَقمُّومْ نّشْ

س مِينْ إِصبْحنْ،

ونِّي إِتَّارَّانْ ثمْژِي نّشْ أَمْ ؤُڭِيذرْ.

6 سِيذِي إِتّڭّْ ثَاسڭْذَا ذ ڒْحقّْ

إِ مَارَّا إِنِّي إِتّْوَاحصَّارنْ.

7 نتَّا إِسّْشنْ إِ مُوسَا إِبْرِيذنْ نّسْ،

إِ أَيْثْ ن إِسْرَائِيل ثِيمڭَّا نّسْ.

8 سِيذِي ذ أَرْحِيمْ ذ أَحْنِينْ،

غَارسْ تَّاسِيعْ ن ڒْخَاضَارْ،

إِشُّورْ س ثْمخْسِيوْثْ إِشوَّارنْ. [b]

9 نتَّا وَارْ إِتّمْشُوبُّوشْ إِ ڒبْذَا،

وَارْ إِتّْغِيمِي إِتّْخيِّيقْ إِ ڒبْذَا. [c]

10 نتَّا وَارْ ذ أَنغْ إِتّڭّْ

عْلَاحْسَابْ دّْنُوبْ نّغْ

ؤُ وَارْ زَّايْنغْ إِخدْجفْ

عْلَاحْسَابْ ڒْمُوعْصِييّثْ نّغْ،

11 مَاغَارْ أَمْ ؤُجنَّا يُوعْڒَانْ خْ ثمُّورْثْ،

أَمُّو إِ ثمْغَارْ

ثْمخْسِيوْثْ نّسْ إِشوَّارنْ

ثِيوَا مَارَّا إِنِّي ث إِتّڭّْوذنْ.

12 أَمْ إِڭّْوجْ شَّارْقْ خْ ڒْغَارْبْ،

أَمُّو إِ إِسِّيڭّْوجْ نتَّا

إِخطَّانْ نّغْ خَانغْ.

13 أَمْ مَامّشْ إِحِينّْ بَابَاثْسنْ

خْ إِحنْجِيرنْ نّسْ،

أَمُّو إِ إِتّْحِينّْ سِيذِي خْ يِينِّي ث إِتّڭّْوذنْ.

14 مَاغَارْ نتَّا إِسّنْ مَامّشْ نتّْوَاڭّْ،

إِعْقڒْ أَقَا نشِّينْ ذ أَشَاڒْ.

15 ؤُسَّانْ ن بْنَاذمْ أَمشْنَاوْ ثُوڭَا،

نتَّا إِتّْنُووَارْ أَمْ ثْنُووَّاشْثْ ن ييَّارْ. [d]

16 مَاڒَا إِكَّا-د خَاسْ ؤُسمِّيضْ، وَارْ ثقِّيمْ

ؤُ أَمْشَانْ مَانِي ثُوغَا ثْبدّْ،

وَارْ خَاسْ إِسِّينْ عَاذْ.

17 مَاشَا ثَامخْسِيوْثْ إِشوَّارنْ ن سِيذِي

ثتّْغِيمَا زِي ڒبْذَا أَڒْ ڒبْذَا

ثِيوَا يِينِّي ث إِتّڭّْوذنْ،

ؤُ ثَاسڭْذَا نّسْ ثتّْغِيمَا

إِ وَارَّاوْ ن وَارَّاوْ،

18 إِ مَارَّا إِنِّي إِحطَّانْ ڒْعَاهْذْ نّسْ

ؤُ إِعقّْڒنْ خْ ڒُومُورَاثْ نّسْ،

مَاحنْذْ أَذْ زَّايْسنْ تّڭّنْ. [e]

19 سِيذِي إِسّْبدّْ ڒْعَارْشْ نّسْ ذڭْ ؤُجنَّا،

ثَاڭلْذَا نّسْ ثْحكّمْ خْ مَارَّا مِينْ إِدْجَانْ.

20 بَارْكنْثْ سِيذِي، كنِّينْثْ، لْمَالَاكَاثْ نّسْ،

أَيْثْ ن بُو-ثغْرُوضْثْ إِمحْضنْ

إِنِّي إِتّڭّنْ أَوَاڒْ نّسْ،

إِنِّي إِتّسْڒَانْ إِ ثْمِيجَّا ن وَاوَاڒْ نّسْ.

21 بَارْكنْثْ سِيذِي، مَارَّا ڒْعسْكَارَاثْ نّسْ،

كنِّيوْ، إِمْسخَّارنْ نّسْ،

إِنِّي إِتّڭّنْ مِينْ ذ أَسْ يَارشْقنْ! [f]

22 بَارْكمْ سِيذِي،

أَ مَارَّا مِينْ إِتّْوَاڭّنْ س ؤُفُوسْ نّسْ،

ذِي مَانِي مَا إِ ثدْجَا ڒحْكَامثْ نّسْ.

بَاركْ سِيذِي، أَ ڒعْمَارْ إِنُو.