1 مِّي إِنُو، وَارْ تّتُّو

ثَاغُورِي إِنُو ن شَّارِيعَا،

أجّْ ؤُڒْ نّشْ أَذْ إِحْضَا ثِيوصَّا إِنُو،

2 مَاغَارْ نِيثنْثِي أَذْ أَشْ د-إِوْينْثْ

أَطَّاسْ ن وُوسَّانْ،

ؤُڒَا ذ إِسڭّْوُوسَا ن ثُوذَارْثْ ذ ڒهْنَا. [a]

3 ثَامخْسِيوْثْ إِشوَّارنْ ذ ڒَامَانْ

وَارْ ثنْ ثجِّيذْ أَذْ زَّايكْ فّْغنْ،

قّنْ إِ-ثنْ غَارْ يِيرِي نّشْ،

أَرِي ثنْ خْ ثڒْوِيحْثْ ن وُوڒْ نّشْ، [b]

4 خنِّي أَذْ ثَافذْ أَرْضَا

ذ ڒفْهَامثْ إِصبْحنْ

ذِي ثِيطَّاوِينْ ن أَربِّي ؤُ ن بْنَاذمْ.

5 ثِيقّْ ذِي سِيذِي س وُوڒْ نّشْ كُوڒْشِي،

وَارْ تّْشَاڒَا خْ ڒفْهَامثْ ن يِيخفْ نّشْ.

6 سّنْ إِ-ث ذِي مَارَّا إِبْرِيذنْ نّشْ،

خنِّي نتَّا أَذْ إِسڭّمْ إِمسْرَاقْ نّشْ. [c]

7 وَارْ تّڭّْ إِخفْ نّشْ ذ أَمِيغِيسْ.

ڭّْوذْ سِيذِي ؤُ بعّذْ

خْ مِينْ إِدْجَانْ ذ أَعفَّانْ. [d]

8 أَيَا أَذْ يِيڒِي ذ أَڭنْفُو

إِ إِژوْرَانْ ن ثُوذَارْثْ نّشْ،

ذ ونْعَاشْ إِ إِغْسَانْ نّشْ.

9 وقَّارْ سِيذِي س وَاڭْڒَا نّشْ،

س ثْمزْوَارُوثْ ن مَارَّا صَّابثْ نّشْ. [e]

10 خنِّي أَذْ تّْوَاشُّورنْ

ڒهْرِيثْ نّشْ س ؤُفيّضْ،

ؤُ ثِيسِيرِينْ نّشْ ن ؤُضِيڒْ

أَذْ دُّوقّْزنْ س بِينُو ن جْذِيذْ. [f]

11 مِّي إِنُو، وَارْ نطَّارْ تَّارْبِييّثْ ن سِيذِي،

وَارْ تَّارَّا أَعْرُورْ خْ ؤُوبّخْ نّسْ، [g]

12 مَاغَارْ ونِّي إِسّْعِيزَّا سِيذِي،

أَذْ ث إِعَاقبْ عَاوذْ،

أَمْ إِتّڭّْ بَابَاسْ أَكْ-ذ مِّيسْ

ونِّي خْ يَارْضَا. [h]

13 سّعْذْ ن بْنَاذمْ نِّي إِتَّافنْ ثِيغِيثْ،

ؤُڒَا ذ بْنَاذمْ نِّي إِتّْكسَّابنْ ڒفْهَامثْ،

14 مَاغَارْ مِينْ ثتَّاوِي نتَّاثْ،

ثحْڒَا خْ ثْسبَّابْثْ ذِي نُّوقَارْثْ،

ؤُ ڒْغِيدْجثْ نّسْ ثحْڒَا خْ وُورغْ إِتِّيسِّيقنْ. [i]

15 نتَّاثْ ثِيغْڒَا خْ ڒْمَارْجَانْ،

ؤُ مَارَّا مِينْ ذِي ثْزمَّارذْ

أَذْ ثمّژْرذْ،

وَارْ إِزمَّارْ أَكِيذسْ إِتّمْقُودَّا. [j]

16 ثُوزّڭَّارْثْ ن وُوسَّانْ غَارسْ

ذڭْ ؤُفُوسْ نّسْ،

أَڭْڒَا ذ شَّانْ أَقَا أَثنْ خْ ؤُزڒْمَاضْ نّسْ.

17 إِبْرِيذنْ نّسْ ذ إِبْرِيذنْ ن ڒضْرَافثْ،

ؤُ مَارَّا إِمسْرَاقْ نّسْ أَقَا أَثنْ ذ ڒهْنَا.

18 نتَّاثْ ذ ثَاشجَّارْثْ ن ثُوذَارْثْ

إِ يِينِّي غَارسْ إِڒسْقنْ،

كُوڒْ إِجّنْ ونِّي ذَايسْ إِتّطّْفنْ،

أَذْ يِيڒِي ذ أَمسْعُوذْ. ◼3:‏18 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

19 سِيذِي إِڭَّا ذْسَاسْ ن ثمُّورْثْ س ثِيغِيثْ نّسْ،

س ڒفْهَامثْ نّسْ إِڭَّا إِجنْوَانْ.

20 زِي ثُوسّْنَا نّسْ دُّوقّْزنْ-د

وَامَانْ إِهوْڒنْ،

تّْنشْنِيشنْ-د إِسيْنُوثنْ نّْذَا. [l]

21 مِّي إِنُو، وَارْ ثنْثْ ثجِّيذْ

أَذْ فّْغنْثْ زِي ثِيطَّاوِينْ نّشْ،

حْضَا أَفْثَانْ ذ ؤُحَاضُورْ، [m]

22 مَاغَارْ أَذْ إِڒِينْ ذ ثُوذَارْثْ إِ ڒعْمَارْ نّشْ

ؤُڒَا ذ أَرْضَا إِ يِيرِي نّشْ.

23 خنِّي أَذْ ثُويُورذْ أَبْرِيذْ نّشْ ذِي ڒَامَانْ،

وَارْ ثتّْنقْرِيضذْ ذڭْ ؤُضَارْ نّشْ. [n]

24 مَاڒَا ثْرُوحذْ أَذْ ثزّْڒذْ،

وَارْ ثنّْخڒْعِيذْ،

ؤُ خْمِي إِ غَا ثزّْڒذْ، أَذْ يِيژِيذْ يِيضصْ نّشْ. [o]

25 وَارْ تّڭّْوذْ زڭْ ؤُنخْڒِيعْ ن ذغْيَا

ؤُڒَا زڭْ وَاريّبْ س ؤُفُوسْ ن إِعفَّاننْ

خْمِي د غَا يَاسْ. [p]

26 مَاغَارْ سِيذِي أَذْ أَشْ يِيڒِي ذ أَسنّذْ نّشْ،

نتَّا أَذْ إِحْضَا أَفُوسْ نّشْ زِي ثْسَارِّيفْثْ.

27 وَارْ قطّعْ ڒْخَارْ خْ بَابْ نّسْ،

مَاڒَا أَقَا-ث ذڭْ ؤُفُوسْ نّشْ

مَاحنْذْ أَذْ ثڭّذْ ڒْخَارْ.

28 وَارْ قَّارْ إِ جَّارْ نّشْ:

’رُوحْ ؤُشَا عْقبْ-د،

ثِيوشَّا أَذْ أَشْ ت وْشغْ!‘،

مَاڒَا ثَامسْڒَاشْثْ أَقَا-ت أَكِيذكْ.

29 وَارْ نكّْوِي ڒْغَارْ أَكْ-ذ جَّارْ نّشْ،

ؤُمِي أَكِيذكْ إِزدّغْ ذِي ڒَامَانْ.

30 وَارْ ثمْشُوبُّوشْ

أَكْ-ذ إِجّْ ن بْنَاذمْ بْڒَا سِّيبّثْ،

مَاڒَا نتَّا وَارْ ذ أَشْ إِڭِّي ڒْغَارْ.

31 وَارْ تَّاسمْ زڭْ إِجّْ ن بُو-ڒخْشُونثْ،

حْضَا مَاحنْذْ وَارْ ثتِّيخْضَارذْ

ؤُڒَا ذ إِجّْ زِي مَارَّا إِبْرِيذنْ نّسْ. [q]

32 مَاغَارْ ونِّي إِتّفّْغنْ زڭْ وبْرِيذْ،

أَقَا-ث ذ نّْعِي إِ سِيذِي،

مَاشَا نتَّا إِتّڭّْ ڒَامَانْ نّسْ

ذڭْ إِنِّي إِڭُّورنْ نِيشَانْ. [r]

33 نّعْڒثْ ن سِيذِي

أَقَا-ت خْ ثَادَّارْثْ ن ؤُعفَّانْ،

مَاشَا ثَازذِّيغْثْ ن إِمْسڭَّاذنْ

أَذْ ت إِبَاركْ. [s]

34 مَاڒَا ذ إِمسْثهْزَاينْ،

أَذْ زَّايْسنْ إِسّْثهْزَا نتَّا،

مَاشَا مَاڒَا ذ إِنِّي إِتّْوَاحْصَارنْ،

أَذْ أَسنْ إِسْشنْ أَرْضَا نّسْ. [t]

35 إِمِيغِيسنْ أَذْ وَارْثنْ شَّانْ،

مَاشَا إِبُوهَاڒِييّنْ

أَذْ سَّارْبُونْ ڒفْضِيحثْ خْ يِيخفْ نْسنْ.