1 ؤُڒَا ذ إِنَا ذ أَوَاڒنْ إِوزْننْ ن سُولِيمَانْ

نِّي إِتّْعَاوَاذنْ ؤُرِينْ ثنْ إِرْيَازنْ ن حِيزْقِييَا،

أَجدْجِيذْ ن يَاهُوذَا.

2 أَقَا ذ شَّانْ ن أَربِّي

مَاحنْذْ أَذْ إِسَّارْ إِشْثْ ن ثْمسْڒَاشْثْ،

مَاشَا شَّانْ ن إِجدْجِيذنْ

ذ أَبقّشْ ذڭْ إِشْثْ ن ثْمسْڒَاشْثْ. [a]

3 ڒُْوعْڒَا ن ؤُجنَّا ذ ڒَادْجَاغْ ن ثمُّورْثْ،

ذ وُوڒْ ن إِجدْجِيذنْ وَارْ دْجِينْ إِ ؤُبقّشْ.

4 كّسْ كُوفُّو زِي نُّوقَارْثْ،

أَذْ د-ثفّغْ إِشْثْ نْ ڒْقشْعثْ إِ ومْزِيڒْ.

5 سْبعّذْ إِعفَّاننْ

زِي زَّاثْ ن وُوذمْ ن ؤُجدْجِيذْ،

خنِّي أَذْ إِتّْوَاسّمْثنْ

ڒْْعَارْشْ نّسْ س ثْسڭْذَا. [b]

6 وَارْ ثْفيّشْ زَّاثْ إِ وُوذمْ ن ؤُجدْجِيذْ،

وَارْ تّْبذِّي مَانِي تّْبدَّانْ إِمقّْرَاننْ.

7 مَاغَارْ إِحْڒَا أَذْ أَشْ إِنِينْ: ”ڭعّذْ-د ذَا!“،

ؤُڒَا مَا أَذْ شكْ سّهْوَانْ

زَّاثْ إِ وُوذمْ ن إِجّْ ن ؤُمْشنّعْ

نِّي ژْرِينْثْ ثِيطَّاوِينْ نّشْ. [c]

8 وَارْ تّْقدْجِيقْ أَذْ ثذْعِيذْ،

مَاغَارْ مِينْ ثخْسذْ أَذْ ثڭّذْ

غَارْ ؤُنڭَّارْ نّسْ،

مَاڒَا جَّارْ نّشْ أَذْ شكْ إِسّفْضحْ؟ [d]

9 شَارّعْ أَكْ-ذ جَّارْ نّشْ،

مَاشَا وَارْ سُّوفُّوغْ سِّيرّْ ن ونّغْنِي،

10 حِيمَا ونِّي ذ أَسْ إِتّسْڒَانْ

وَارْ شكْ إِسّْحشّمْ شَا،

مَاغَارْ ڒخْذنِّي وَارْ إِزمَّارْ

أَذْ ثتّْوَاسّْبعّذْ ڒفْضِيحثْ نّشْ عَاذْ.

11 أَمْ تّفَّاحِينْ ن وُورغْ

خْ طّْبَاسَا ن نُّوقَارْثْ،

أَمُّو دْجَانْ وَاوَاڒنْ سِّيوْڒنْ ثنْ

س ڒقْيَاسْ نّسْ.

12 أَمْ إِشْثْ ن ثْخَاذنْثْ ن وُورغْ

ؤُ أَمْ إِشْثْ ن ثْسدّشْثْ ن وُورغْ إِغْڒَانْ قَاعْ،

أَمُّو إِ إِدْجَا ؤُوبّخْ أَمِيغِيسْ

غَارْ ؤُمزُّوغْ إِتّسْڒَانْ.

13 أَمْ وذْفڒْ أَسمَّاضْ

ذڭْ إِجّْ ن وَاسّْ ن ثْميْرَا،

أَمُّو إِ إِدْجَا ؤُمْسخَّارْ ذَايسْ ڒَامَانْ

إِ ونِّي ث إِسّكَّانْ،

مَاغَارْ إِسّْفَاقَا ڒعْمَارْ ن بَابْ نّسْ. [e]

14 أَمْ إِسيْنُوثنْ ذ ؤُسمِّيضْ بْڒَا أَنْژَارْ،

أَمُّو أَرْيَازْ نِّي إِتّْعفَّارْ

ذڭْ إِشْثْ ن ثرْزفْثْ وَارْ إِسكّْوِينْ.

15 س تَّاسِيعْ ن ڒْخَاضَارْ إِتّْوَاسّقْنعْ ڒْحَاكمْ،

إِجّْ ن يِيڒسْ أَمِيژِيذْ إِتَّارژَّا إِغْسَانْ. [f]

16 مَاڒَا ثُوفِيذْ ثَامّنْثْ،

أشّْ مِينْ ثحْوَاجذْ وَاهَا،

نِيغْ أَذْ ثَافّْ ثشِّيذْ كْثَارْ زِي مِينْ ثحْوَاجذْ،

ؤُ بَالَاكْ أَذْ ت-إِ-د ثْعُوقّذْ.

17 وَارْ سّْرُوسَا أَضَارْ نّشْ

أَطَّاسْ ذِي ثَادَّارْثْ ن جَّارْ نّشْ،

نِيغْ أَذْ شكْ إِجِّيونْ ؤُ أَذْ شكْ إِعِيفّْ.

18 أَمْ وفْضِيسْ ذ سِّيفْ ذ فْڒِيثْشَا إِقضْعنْ،

أَمُّو إِ إِدْجَا ورْيَازْ نِّي إِشهّْذنْ

س ژُورْ خْ جَّارْ نّسْ. [g]

19 أَمْ ثِيغْمسْثْ يَارْژنْ

ؤُ أَمْ ؤُضَارْ إِنْقْرَاضنْ،

أَمُّو إِ إِدْجَا ؤُثشْڒِي

خْ ونِّي وَارْ ذِي إِدْجِي تِّيقثْ

ذڭْ وَاسّْ ن ڒحْصَارثْ.

20 أَمْ ونِّي إِتّكّْسنْ أَپَارْثسُّو نّسْ

ذڭْ إِجّْ ن وَاسّْ إِسْمضْ

ؤُ أَمْ ڒْخدْجْ إِ تّڭّنْ خْ نِيطْرُونْ،

أَمُّو إِ إِدْجَا ونِّي إِتّْغنَّاجنْ إِزْڒَانْ

زَّاثْ إِ يِيجّنْ س وُوڒْ إِشْضنْ. [h]

21 مَاڒَا إِدْجُوژْ ونِّي شكْ إِشَارّْهنْ،

خنِّي أوْشْ أَسْ أَغْرُومْ،

مَاڒَا إِفُّوذْ، أوْشْ أَسْ أَذْ إِسُو، [i]

22 مَاغَارْ أَمُّو إِ ثْيَارّْوذْ

ڒفْحمْ إِتّحْذُوذُوقنْ خْ ؤُزدْجِيفْ نّسْ،

ؤُ سِيذِي أَذْ شكْ إِخدْجصْ.

23 أَسمِّيضْ زِي شَّامَالْ إِتَّاوِي-د أَنْژَارْ،

إِڒسْ أَغدَّارْ إِتَّاوِي-د ؤُذْمَاونْ إِخيّْقنْ.

24 إِحْڒَا أَذْ ثْزذْغذْ

ذڭْ إِشْثْ ثغْمَارْثْ ن ثْزقَّا،

ؤُڒَا خْ ثَازذِّيغْثْ

أَكْ-ذ إِشْثْ ن ثمْغَارْثْ إِتّمْشُوبُّوشنْ

ذڭْ إِشْثْ ن ثَادَّارْثْ ثْشَارْشْ. [j]

25 أَمْ وَامَانْ إِصمَّاضنْ

إِ يِيجّْ ن ڒعْمَارْ يُوحڒْ،

أَمُّو إِ إِدْجَا ڒخْبَارْ أَصبْحَانْ

زڭْ إِشْثْ ن ثمُّورْثْ ثِيڭّْوجْ.

26 أَمْ إِجّْ ن ڒْعُونْصَارْ إِتّْوَافسْذنْ

ؤُ أَمْ إِجّْ ن وَانُوغشّنْ ث،

أَمُّو إِ إِدْجَا ؤُمْسڭّذْ إِتّْزعْزِيعنْ

زَّاثْ إِ وُوذمْ ن إِعفَّاننْ.

27 مَاشَّا ن وَاطَّاسْ ن ثَامّنْثْ

وَارْ إِدْجِي شَا مْلِيحْ،

مَاشَا ثَارزُّوثْ

ذِي ثْمسْڒَايِينْ يوْعَارنْ ذ شَّانْ.

28 أَمْ إِشْثْ ن ثنْذِينْثْ إِهذْمنْ بْڒَا ڒْحِيضْ،

أَمُّو إِ إِدْجَا إِجّْ ن ورْيَازْ

وَارْ إِتّطّفْ بُوحْبڒْ نّسْ. [k]