1 ذڭْ وَاسّْ وِيسّْ أَربْعَا ؤُ-عِيشْرِينْ ن ؤُيُورْ-أَ مُوننْ أَيْثْ ن إِسْرَائِيل س ؤُژُومِّي ؤُ ڒحّْفنْ ذڭْ وَارُّوضْ ن ثْخُونْشَايْ ن وشْضَانْ ؤُ س ثْعجَّاجْثْ خْ ؤُزدْجِيفْ. ◼9:‏1 ’ذڭْ وَارُّوضْ ن وشْضَانْ‘ - س ثْعِيبْرَانِيثْ ’س ثْخَانْشثْ‘. ’ثَاعجَّاشْثْ‘ - س ثْعِيبْرَانِيثْ ’ؤُشَاڒْ‘. 2 بْضَانْ زَّارِيعثْ ن إِسْرَائِيل إِخفْ نْسنْ زِي مَارَّا إِبَارَّانِييّنْ، ؤُشَا أَمْ قِّيمنْ كَّارنْ، نعْمنْ زِي دّْنُوبْ نْسنْ ذ ڒْمُوعْصِييّثْ ن ڒجْذُوذْ نْسنْ. 3 خَاسْ ؤُشَا ذوْڒنْ بدّنْ ذڭْ ومْشَانْ نْسنْ عَاوذْ ؤُشَا غْرِينْ أَسنْ إِشْثْ ن ثرْبَاعْثْ ن وَاسّْ زڭْ وذْلِيسْ إِتّْوَانّْضنْ ن شَّارِيعَا ن سِيذِي، أَربِّي نْسنْ، ؤُشَا إِشْثْ ن ثرْبَاعْثْ نّغْنِي نعْمنْ نِيثْنِي س دّْنُوبْ نْسنْ ؤُشَا سجْذنْ إِ سِيذِي، أَربِّي نْسنْ. 4 خْ دّْرُوجْ ن إِلَاوِييّنْ إِبدّْ يشُوعَا ذ بَانِي، قَاذْمِييِيلْ، شَابَانْيَا، بُونِّي، شَارَابْيَا، بَانِي ذ كَانَانِي، ڒَاغَانْ س ثْمِيجَّا إِجهْذنْ غَارْ سِيذِي، أَربِّي نْسنْ. 5 ؤُشَا إِلَاوِييّنْ، يشُوعَا، قَاذْمِييِيلْ، بَانِي، حَاشَابْنِييَا، شَارَابْيَا، هُوذِييَا، شَابَانْيَا ذ فَاثَاحْيَا، نَّانْ: ”كَّارمْ، ثْبَارْكمْ سِيذِي، أَربِّي نْومْ، زِي ڒبْذَا أَڒْ ڒبْذَا! إِڒِي أَذْ إِتّْوَابَاركْ إِسمْ ن ؤُعُودْجِي نّشْ، ونِّي يُوعْڒَانْ خْ مَارَّا لْبَارَاكَا ذ ؤُسمْغَارْ!“

6 ”شكْ ذ سِيذِي، مْغِيرْ شكْ. شكْ ثڭِّيذْ أَجنَّا ؤُڒَا ذ أَجنَّا ن إِجنْوَانْ ذ مَارَّا ثِيزمَّارْ نْسنْ، ثَامُّورْثْ ذ مَارَّا مِينْ خَاسْ إِدْجَانْ، ڒبْحُورْ ذ مَارَّا مِينْ ذَايسْ إِدْجَانْ ؤُ شكْ ثوْشِيذْ أَسنْ ثُوذَارْثْ ؤُشَا ڒْعسْكَارَاثْ ن ؤُجنَّا تّْبنْذَاقنْثْ إِ شكْ. [b]

7 شكْ ذ سِيذِي، أَربِّي، ونِّي إِفَارْزنْ أَبْرَامْ. شكْ ثسُّوفّْغذْ ث-إِ-د زِي ؤُرْ ن إِكَالْذَانِييّنْ ؤُشَا ثڭِّيذْ أَسْ إِبْرَاهِيمْ. [c]

8 شكْ ثُوفِيذْ ؤُڒْ نّسْ ذَايسْ ڒَامَانْ زَّاثْ إِ وُوذمْ نّشْ ؤُ ثڭِّيذْ أَكِيذسْ ڒْعَاهْذْ بلِّي شكْ أَذْ ثوْشذْ إِ زَّارِيعثْ نّسْ ثَامُّورْثْ ن أَيْثْ ن كنْعَانْ، ن إِحِيتِّييّنْ، ن إِمُورِييّنْ، ن إِفَارِيزِييّنْ، ن إِيابُوسِييّنْ ؤُ ن إِجِيرْجَاسِييّنْ، ؤُشَا ثڭِّيذْ عْلَاحْسَابْ أَوَاڒنْ نّشْ، مِينْزِي شكْ ذ أَمْسڭّذْ إِ ثدْجِيذْ. [d]

9 شكْ ثژْرِيضْ ثَامَارَا ن ڒجْذُوذْ نّغْ ذِي مِيصْرَا ؤُ ثسْڒِيذْ إِغُويَّانْ نْسنْ زِي غَارْ ڒبْحَارْ ن ثلْڭَا. [e]

10 شكْ ثڭِّيذْ ڒعْڒَامَاثْ ذ لْمُوعْجِيزَاثْ غَارْ فِيرْعُونْ ؤُ غَارْ مَارَّا إِمْسخَّارنْ نّسْ ؤُ جَارْ ڒْڭنْسْ ن ثمُّورْثْ، مِينْزِي شكْ ثسّْنذْ، أَقَا نِيثْنِي ڭِّينْ ضِيدّْ نْسنْ س ثُوفّثْ ؤُشَا شكْ ثڭِّيذْ إِ يِيخفْ نّشْ إِجّْ ن إِسمْ، أَمْ ثدْجَا أَسّْ-أَ. [f]

11 شكْ ثبْضِيذْ ڒبْحَارْ زَّاثْ إِ وُوذمْ نْسنْ أَڒَامِي نِيثْنِي عْذُونْ خْ ثمُّورْثْ يُوژْغنْ ذِي ڒْوسْطْ ن ڒبْحَارْ، ؤُشَا إِنِّي خَاسنْ إِتَّاژّْڒنْ ثنْضَارذْ ثنْ ذِي ڒَادْجَاغْ أَمْ يِيجّْ ن وژْرُو ذڭْ وَامَانْ إِجهْذنْ. [g]

12 زڭْ إِجّْ ن ؤُقلِّيجْ ن ؤُسيْنُو ثْڭوّْذذْ ثنْ س وَاسّْ ؤُ س يِيجّْ ن ؤُقلِّيجْ ن ثْمسِّي س دْجِيڒثْ، حِيمَا أَذْ أَسنْ ثوْشذْ ثَافَاوْثْ خْ وبْرِيذْ إِ خْ إِ غَا ؤُيُورنْ. [h]

13 شكْ ثهْوِيذْ-د خْ وذْرَارْ ن سِينَا ؤُ ثسِّيوْڒذْ أَكِيذْسنْ زڭْ ؤُجنَّا ؤُشَا ثوْشِيذْ أَسنْ لْفَارَايِيضْ إِسڭّْذنْ ذ إِزرْفَانْ إِ ذِي إِدْجَا ڒَامَانْ ذ ثْوصَّا ذ ڒُومُورَاثْ إِصبْحنْ. [i]

14 ثسّشْنذْ أَسنْ سّبْثْ نّشْ إِقدّْسنْ ؤُشَا ثڭِّيذْ خَاسنْ ڒُومُورَاثْ ذ ثْوصَّا ذ شَّارِيعَا س ثْسخَّارْثْ ن مُوسَا، أَمْسخَّارْ نّشْ.

15 شكْ ثوْشِيذْ أَسنْ أَغْرُومْ زڭْ ؤُجنَّا إِ ڒَاژْ نْسنْ ؤُشَا ثسُّوفّْغذْ أَسنْ-د أَمَانْ زِي ثصْضَارْثْ إِ ؤُفَاذِي نْسنْ ؤُشَا ثنِّيذْ أَسنْ أَذْ أَذْفنْ غَارْ ثمُّورْثْ، ثنِّي إِ ثسّْڭعّْذذْ أَفُوسْ نّشْ حِيمَا أَذْ ثجَّادْجذْ أَذْ ثنْ ت-إِ-د-ثوْشذْ، حِيمَا أَذْ ت طّْفنْ ذ ڒْوَارْثْ.“ [j]

16 ”أَقَا نِيثْنِي أَكْ-ذ ڒجْذُوذْ نّغْ ڭِّينْ س ثُوفّثْ ذ ثْغنَّانْثْ ؤُ وَارْ سْڒِينْ شَا غَارْ ڒُومُورَاثْ نّشْ.

17 نِيثْنِي ؤُڭِينْ أَذْ غَارسْ سْڒنْ، وَارْ فكَّارنْ ذِي لْمُوعْجِيزَاثْ نّشْ إِ غَارْسنْ ثڭِّيذْ ؤُ نِيثْنِيغنَّانْ ؤُ ذڭْ ؤُغوّغْ نْسنْ ڭِّينْ إِجّْ ذ ؤُزدْجِيفْ خْ يِيخفْ نْسنْ حِيمَا أَذْعقْبنْ غَارْ ثسْمُوغِي نْسنْ. مَاشَا شكْ ذ إِجّْ ن أَربِّي إِغفَّارنْ، ذَايكْ ڒْخَاضَارْ ذ أَرّحْمثْ، غَاركْ تَّاسِيعْ ن ڒْخَاضَارْ ذ ثَامخْسِيوْثْ إِشوَّارنْ س وَاطَّاسْ، ؤُ شكْ وَارْ ذَايْسنْ ثسْمِيحذْ شَا. [k]

18 عَاذْ، ؤُمِي ڭِّينْ نِيثْنِي إِجّْ ن ؤُعجْمِي إِفسْينْ إِ يِيخفْ نْسنْ، نَّانْ: ’وَا ذ أَربِّي نّشْ إِ شكْ إِ د-إِسُّوفّْغنْ زِي مِيصْرَا‘، ؤُشَا شقّْفنْ أَطَّاسْ، ◼9:‏18 ’أَمْوَا‘ - نِيغْ ’أَينْذُوزْ‘ نِيغْ ’يُوڭُّو‘.  [m] 19 أَقَا شكْ ذِي أَرّحْمثْ نّشْ ثَامقّْرَانْثْ وَارْ ثنْ ثجِّيذْ شَا ذِي ڒخْڒَا. أَقلِّيجْ ن ؤُسيْنُو إِ إِدْجَانْ حِيمَا أَذْ ثنْ إِڭوّذْ س وَاسّْ، وَارْ خَاسنْ إِڭّْوِيجْ شَا، ؤُڒَا ذ أَقلِّيجْ ن ثْمسِّي إِ إِدْجَانْ حِيمَا أَذْ أَسنْ إِوْشْ ثَافَاوْثْ ذڭْ وبْرِيذْ إِ خْ إِ غَا ؤُيُورنْ، وَارْ خَاسنْ إِڭّْوِيجْ شَا س دْجِيڒثْ. [n]

20 شكْ ثوْشِيذْ أَرُّوحْ نّشْ أَصبْحَانْ، حِيمَا أَذْ ثنْ إِسّڒْمذْ، ؤُ شكْ وَارْ ذ أَسنْ ثكِّيسذْ شَا ’مَانَّا‘ نّكْ زڭْ ؤُقمُّومْ نْسنْ ؤُشَا ثوْشِيذْ أَسنْ أَمَانْ إِ ؤُفَاذِي نْسنْ. [o]

21 أَربْعِينْ ن إِسڭّْوُوسَا شكْ ثتّْهلِّيذْ ذَايْسنْ ذِي ڒخْڒَا. وَارْ غَارْسنْ إِتّْخِيصَّا ؤُڒَا ذ شَا ن ڒْحَاجّثْ، أَرُّوضْ نْسنْ وَارْ يَارْشِي شَا ؤُشَا إِضَارنْ نْسنْ وَارْ ؤُفّنْ. [p]

22 شكْ ثوْشِيذْ أَسنْ مَارَّا ثِيڭلْذِيوِينْ ذ ڒڭْنُوسْ ؤُشَا ثبْضِيذْ أَسنْ ثنْ ذ ثَاسْغَارْثْ س إِجّْ ن ويْمِيرْ. نِيثْنِي طّْفنْ ثَامُّورْثْ ن سِيحُونْ ذ ڒْوَارْثْ، أَقَا-ت ذ ثَامُّورْثْ ن ؤُجدْجِيذْ ن حَاشْبُونْ، ذ ثمُّورْثْ ن عُوجْ، أَجدْجِيذْ ن بَاشَانْ. [q]

23 شكْ ثَارِّيذْ إِحنْجِيرنْ نْسنْ أَطَّاسْ أَمْ يِيثْرَانْ ذڭْ ؤُجنَّا ؤُ ثسِّيذْفذْ ثنْ غَارْ ثمُّورْثْ إِ خْ ثُوغَا ثنِّيذْ إِ ڒجْذُوذْ نْسنْ، أَذْ غَارسْ د-أَذْفنْ حِيمَا أَذْ ت طّْفنْ ذ ڒْوَارْثْ. [r]

24 يُوذفْ غَارسْ وَارَّاوْ ؤُشَا طّْفنْ ت ذ ڒْوَارْثْ ؤُ زَّاثْ إِ وُوذمْ نْسنْ أَقَا ثڭِّيذْ إِمزْذَاغْ ن ثمُّورْثْ سَاذُو أَفُوسْ نْسنْ، ؤُڒَا ذ إِجدْجِيذنْ نْسنْ ذ ڒڭْنُوسْ ن ثمُّورْثْ، حِيمَا أَذْ زَّايْسنْ ڭّنْ مِينْ إِ ذ أَسنْ إِتّْغِيڒْ مْلِيحْ.

25 نِيثْنِي حوّْسنْ ثِيندَّامْ إِفَارْينْ ذ إِشْثْ ن ثمُّورْثْ إِسّغْمَاينْ ؤُ نِيثْنِي طّْفنْ عَاوذْ ثُوذْرِينْ ذ ڒْوَارْثْ شُّورنْثْ س مَارَّا ڒْخَارْ، أَنُوثنْ إِتّْوَاغْزنْ، إِمَارْجَاعنْ ن ؤُضِيڒْ ذ ڒعْرَاصِيثْ ن زِّيثُونْ ذ ثْشجُّورَا ن فْرُوثَا س ؤُفيّضْ، ؤُشَا نِيثْنِي شِّينْ، جِّيوْننْ، ذوْڒنْ صحّنْ ؤُشَا أَرِّينْ-د مژْرِي س ثْشُونِي نّشْ ثَامقّْرَانْثْ.

26 مَاشَا نِيثْنِي ذوْڒنْ وَارْ طِّيعنْ ؤُشَاغوّْغنْ خَاكْ ؤُشَا نْضَارنْ شَّارِيعَا نّشْ ؤُ نْغِينْ إِنَابِييّنْ نّشْ إِنِّي ثُوغَا إِشهّْذنْ جَارْ أَسنْ مَاحنْذْ أَذْ ثنْ د-أَرّنْ غَاركْ. أَقَا شقّْفنْ ذَايكْ س يِيجّْ ن ؤُشقّفْ إِمْغَارْ. [s]

27 س ؤُيَا ثَارِّيذْ ثنْ ذڭْ ؤُفُوسْ ن إِغْرِيمنْ نْسنْ إِنِّي إِ ثنْ إِحْصَارنْ، مَاشَا مَاڒَا ڒَاغَانْ-د خَاكْ ذِي ڒْوقْثْ ن ڒحْصَارثْ نْسنْ، خنِّي ثسْڒِيذْ غَارْسنْ زڭْ ؤُجنَّا ؤُشَا ذِي أَرّحْمثْ نّشْ ثَامقّْرَانْثْ ثوْشِيذْ أَسنْ إِمْسنْجَامنْ نِّي إِ ثنْ إِفكّنْ زڭْ ؤُفُوسْ ن إِغْرِيمنْ نْسنْ. [t]

28 مَاڒَا ؤُفِينْ ڒْهُوذْنثْ، ڭِّينْ عَاوذْ ڒْغَارْ زَّاثْ إِ وُوذمْ نّشْ ؤُشَا ثڭِّيذْ ثنْ ذڭْ ؤُفُوسْ ن ڒْعذْيَانْ نْسنْ ؤُشَا نِيثْنِي سدْجْضنْ خَاسنْ. ؤُمِي ثُوبنْ، ڒَاغَانْ-د خَاكْ، أَقَا ثسْڒِيذْ أَسنْ زڭْ ؤُجنَّا ؤُ أَمُّو إِ ثْفكّذْ إِ-ثنْ س أَرّحْمثْ نّشْ أَطَّاسْ ن ثْوَاڒَاوِينْ.

29 شكْ ثْشهْذذْ ضِيدّْ نْسنْ حِيمَا أَذْ د -عقْبنْ غَارْ شَّارِيعَا نّشْ، مَاشَا نِيثْنِي ڭِّينْ س ثُوفّثْ ؤُ وَارْ سْڒِينْ شَا غَارْ ثْوصَّا نّشْ. أَقَا خْضَانْ زِي جِّيهثْ ن لْفَارَايِيضْ نّشْ، ؤُمِي بْنَاذمْ ونِّي إِ زَّايْسنْ إِ غَا يڭّْ أَذْ زَّايْسنْثْ إِدَّارْ، ؤُشَا نِيثْنِي أَرِّينْ-د غَارْسنْ أَعْرُورْ، ثُوغَا سّْقسْحنْ إِرِي نْسنْ، وَارْ غَاركْ د-سْڒِينْ. [u]

30 أَطَّاسْ ن إِسڭّْوُوسَا ثْحمّْڒذْ أَكِيذْسنْ، ثْشهْذذْ ضِيدّْ إِ نْسنْ س أَرُّوحْ نّشْ، س ثْسخَّارْثْ ن إِنَابِييّنْ، مَاشَا نِيثْنِي وَارْ سْڒِينْ. س ؤُينِّي ثوْشِيذْ ثنْ ذڭْ ؤُفُوسْ ن ڒڭْنُوسْ ن ثمُّورَا. [v]

31 مَاشَا ذِي أَرّحْمثْ نّشْ ثَامقّْرَانْثْ وَارْ ثنْ ثَارذْدْجذْ شَا ؤُ وَارْ ذَايْسنْ ثسْمِيحذْ شَا، مَاغَارْ شكْ ذ إِجّْ ن أَربِّي ذ أَحْنِينْ ذ أَرْحِيمْ.

32 ”خنِّي ڒخُّو، أَربِّي نّغْ، أَقَا شكْ، أَربِّي ذ أَمقّْرَانْ، إِزمَّارنْ، إِسَّاڭّْوَاذنْ، ونِّي إِتّطّْفنْ ذِي ڒْعَاهْذْ ؤُ ذِي ثْمخْسِيوْثْ إِشوَّارنْ، وَارْ حسّبْ شَا ذْرُوسْ مَارَّا ڒغْبنْ إِ خَانغْ د-إِكِّينْ، خْ إِجدْجِيذنْ نّغْ، خْ ڒْحُوكَّامْ نّغْ ؤُ خْ إِكهَّاننْ نّغْ ؤُ خْ إِنَابِييّنْ نّغْ ؤُ خْ ڒجْذُوذْ نّغْ ؤُ خْ مَارَّا ڒْڭنْسْ نّغْ زڭْ وُوسَّانْ ن إِجدْجِيذنْ ن أَشُّورْ أَڒْ أَسّْ-أَ.

33 ثُوغَا شكْ ذ أَمْسڭّذْ ذِي مَارَّا مِينْ خَانغْ إِكِّينْ، مَاغَارْ شكْ ثڭِّيذْ أَنغْ س ڒَامَانْ، مَاشَا نشِّينْ نڭَّا س ڒقْجَاحثْ. [w]

34 إِجدْجِيذنْ نّغْ، ڒْحُوكَّامْ نّغْ، إِكهَّاننْ نّغْ ذ ڒجْذُوذْ نّغْ وَارْ ضفَّارنْ شَّارِيعَا نّشْ ؤُشَا وَارْ سْڒِينْ غَارْ ڒُومُورَاثْ نّشْ ؤُڒَا غَارْ شّْهَاذَاثْ نّشْ نِّي ثْشهْذذْ ضِيدّْ إِ نْسنْ.

35 س ثْڭلْذِيثْ نْسنْ ؤُ س ڒْخَارْ نْسنْ أَطَّاسْ إِ ذ أَسنْ ثوْشِيذْ ؤُ س ثمُّورْثْ ثَامقّْرَانْثْ إِسّغْمَاينْ إِ ذ أَسنْ ثوْشِيذْ، وَارْ شكْ سخَّارنْ شَا ؤُشَا وَارْ ثُوبنْ زِي ثْمڭَّا نْسنْ ثِيعفَّانِينْ.

36 خْزَارْ أَسّْ-أَ أَقَا نشِّينْ ذ إِمْسمْغَانْ ؤُ ثَامُّورْثْ إِ ثوْشِيذْ إِ ڒجْذُوذْ نّغْ مَاحنْذْ أَذْ زَّايسْ نشّْ ڒْغِيدْجثْ ذ ڒْخَارْ، خْزَارْ أَقَا نشِّينْ ذ إِمْسمْغَانْ إِ ذَايسْ ندْجْ.

37 ڒْغِيدْجثْ ثَامقّْرَانْثْ نّسْ أَذْ ثْرَاحْ غَارْ إِجدْجِيذنْ، إِنِّي إِ خَانغْ ثڭِّيذْ ذِي سِّيبّثْ ن دّْنُوبْ نّغْ، ؤُشَا نِيثْنِي تّْصدْجَاضنْ خْ أَرَّايمْ نّغْ ؤُ خْ ڒْمَاڒْ نّغْ أَمْ مَامّشْ ذ أَسنْ إِتّْغِيڒْ مْلِيحْ، ؤُ نشِّينْ أَقَا أَنغْ ذِي ڒحْصَارثْ ذ ثَامقّْرَانْثْ.“