1 ڒَامِي إِژْرَا يَاسُوع ڒْغَاشِي، يُوڒِي غَارْ وذْرَارْ، ؤُشَا أَوَارْنِي ڒَامِي ذِينْ إِقِّيمْ، ؤُسِينْ-د غَارسْ إِمحْضَارنْ نّسْ. [a] 2 ؤُشَا يَارْزمْ أَقمُّومْ نّسْ، إِسّڒْمذْ إِ-ثنْ، إِنَّا:

3 سّعْذْ ن يِينِّي أَرُّوحْ نْسنْ إِزْڒضْ،

مِينْزِي ثَاڭلْذِيثْ ن إِجنْوَانْ أَقَا-ت إِ نِيثْنِي. [b]

4 سّعْذْ ن يِينِّي إِتّشْضِيننْ،

مِينْزِي نِيثْنِي أَذْ تّْوَاعزَّانْ. [c]

5 سّعْذْ ن إِمْوَاضْعنْ،

مِينْزِي نِيثْنِي أَذْ وَارْثنْ ثَامُّورْثْ. [d]

6 سّعْذْ ن يِينِّي إِتّْڒَاژَانْ

ذ يِينِّي إِتّْفَاذنْ غَارْ ثْسڭْذَا،

مِينْزِي نِيثْنِي أَذْ جِّيوْننْ. [e]

7 سّعْذْ ن يِينِّي يَارحّْمنْ،

مِينْزِي أَذْ غَارْسنْ ثِيڒِي أَرّحْمثْ.

8 سّعْذْ ن يِينِّي إِ غَارْ إِدْجَا ؤُڒْ إِزْذِيڭْ،

مِينْزِي نِيثْنِي أَذْ ژَترنْ أَربِّي. [f]

9 سّعْذْ ن يِينِّي إِتّڭّنْ ڒهْنَا،

مِينْزِي نِيثْنِي أَذْ تّْوَاسمَّانْ أَرَّاونْ ن أَربِّي.

10 سّعْذْ ن يِينِّي إِنّحْصَارنْ

خْ سِّيبّثْ ن ثْسڭْذَا،

مِينْزِي ثَاڭلْذِيثْ ن إِجنْوَانْ أَذْ غَارْسنْ ثِيڒِي. [g]

11 سّعْذْ إِ كنِّيوْ مَاڒَا تّْعَايَارنْ

ؤُ تّْذَارَّاشنْ خَاومْ

ؤُشَا أَذْ خَاومْ إِنِينْ

عْڒَامْ كُوڒْ أَوَاڒنْ إِعفَّاننْ خْ سِّيبّثْ إِنُو،

وَاخَّا سّْخَارِّيقنْ. [h]

12 فَارْحمْ، سْڒِيوڒْومْ،

مِينْزِي ڒْمُونثْ نْومْ ذ ثَامقّْرَانْثْ ذڭْ إِجنْوَانْ،

مِينْزِي أَمُّو إِ ثُوغَا تّْذَارَّاشنْ إِنَابِييّنْ،

إِنِّي قْبڒْ نْومْ.“ [i]

13 ”كنِّيوْ ذ ثَامدْجَاحْثْ ن ثمُّورْثْ. مَاشَا مَاڒَا ثَامدْجَاحْثْ إِخْسَارْ ؤُڒذِّي نّسْ، مَامّشْ غَا نڭّْ أَذْ ت نَارّْ ذ ثَامدْجَاحْثْ؟ وَارْ ثْنفّعْ عَاذْ إِ وَالُو، حَاشَا أَذْ ثمّنْضَارْ غَارْ بَارَّا، أَذْ خَاسْعفْسنْ إِوْذَانْ.“

14 ”كنِّيوْ ذ ثَافَاوْثْ ن دُّونشْثْ. ثَانْذِينْثْ إِ إِتّْوَابْنَانْ خْ وذْرَارْ، وَارْ ثْزمَّارْ أَذْ ثنُّوفَّارْ. 15 وَارْ سّْرقِّينْ ڒفْنَارْ ؤُشَا أَذْ ث سَّارْسنْ سَاذُو ڒْمُوذْ، مَاشَا أَذْ ث سَّارْسنْ خْ ڒْمرْفعْ، مَاحنْذْ أَذْ يَارْغْ إِ مَارَّا إِنِّي إِدْجَانْ ذِي ثَادَّارْثْ. [j] 16 جّمْ ثَافَاوْثْ نْومْ أَذْ ثَارْغْ إِ إِوْذَانْ، حِيمَا أَذْ ژَترنْ ڒخْذَايمْ نْومْ إِشْنَانْ، أَذْ سُّوعْڒَانْ بَابَاثْومْ إِ إِدْجَانْ ذڭْ إِجنْوَانْ.“ [k]

17 ”أَقَا أَذْ أَومْ إِتّْغِيڒْ أَقَا ؤُسِيغْ-د حِيمَا أَذْ سّْبطّْڒغْ شَّارِيعَا نِيغْ إِنَابِييّنْ. نشّْ وَارْ د-ؤُسِيغْ شَا حِيمَا أَذْ سّْبطّْڒغْ، مَاشَا حِيمَا أَذْ كمّْڒغْ. ◼5:‏17 ’شَّارِيعَا ن مُوسَا‘ - إِخْسْ أَذْ يِينِي تَّاوْرَاثْ أَمْ مَامّشْ ذ أَسْ قَّارنْ وُوذَاينْ. 18 س ثِيذتّْ، نشّْ أَذْ أَومْ إِنِيغْ: أَڒْ إِ غَا إِعْذُو ؤُجنَّا ذ ثمُّورْثْ، وَارْ إِبطّڒْ ؤُڒَا ذ إِجّنْ ڒْحَارْفْ نِيغْ ذ إِشْثنْ ثَانقِّيطْ زِي شَّارِيعَا أَڒْ غَا يِيڒِي كُوڒْشِي. [m] 19 س ؤُيَا ونِّي إِ غَا إِسّْبطّْڒنْ زِي ثْوصَّا-يَا إِشْثنْ، وَاخَّا ذ ثَامژْيَانْثْ، ؤُشَا إِسّڒْمَاذْ إِوْذَانْ أَمُّو، أَذْ إِتّْوَاسمَّا ذ أَمژْيَانْ ذِي ثْڭلْذِيثْ ن إِجنْوَانْ، مَاشَا ونِّي زَّايْسنْثْ إِڭِّينْ ؤُ إِسّڒْمَاذْ إِ-ثنْثْ، نتَّا أَذْ إِتّْوَاسمَّا ذ أَمقّْرَانْ ذِي ثْڭلْذِيثْ ن إِجنْوَانْ. [n] 20 مِينْزِي نشّْ أَذْ أَومْ إِنِيغْ: مَاڒَا ثَاسڭْذَا نْومْ وَارْ ثْمقَّارْ شَا خْ ثنِّي ن إِمْسڒْمَاذنْ ن إِذْلِيسنْ ذ ثنِّي ن إِفَارِيسِييّنْ، س ثِيذتّْ وَارْ ثتِّيذْفمْ شَا غَارْ ثْڭلْذِيثْ ن إِجنْوَانْ!“

21 ”أَقَا ثسْڒِيمْ بلِّي إِتّْوَانَّا إِ ڒجْذُوذْ: ’وَارْ نقّْ!‘، ؤُ: ’ونِّي إِنقّنْ، أَذْ إِتّْوَاحَاسبْ!‘ [o] 22 مَاشَا نشّْ أَذْ أَومْ إِنِيغْ: مَارَّا ونِّي إِتّْخيَّاقنْ خْ ؤُمَاسْ بْڒَا سِّيبّثْ، نْهْڒَا مَا أَذْ خَاسْ إِتّْوَاحَاكمْ، ؤُ مَارَّا ونِّي إِقَّارنْ إِ ؤُمَاسْ: ’أَذْ خَاكْ سُّوسْفغْ!‘، أَذْ إِتّْوَاحْكمْ خَاسْ زَّاثْ إِ جْمَاعثْ ثَامقّْرَانْثْ، ؤُ ونِّي إِقَّارنْ: ’أَ أَبُوهَاڒِي!‘ أَذْ إِتّْوَاحَاكمْ، أَذْ يَاذفْ غَارْ ثْمسِّي ن جهنَّامَا. ◼5:‏22 جْمَاعثْ ثَامقّْرَانْثْ‘ - نِيغْ: ’جْمَاعثْ ن ڒْحُوكَّامْ إِمقّْرَاننْ ن وُوذَاينْ‘. 23 مَاڒَا ثْقدّْمذْ ثَاوْهِيبْثْ نّشْ خْ ؤُعَالْطَارْ مِينْ خفْ سَّارْسنْ ثِيغَارْصَا ذ ثوْهِيبِينْ، ؤُشَا ذِينِّي ثْعقْڒذْ بلِّي ؤُمَاشْ أَقَا-ث شَا خَاكْ، 24 أجّْ ثَاوْهِيبْثْ نّشْ ذِينْ زَّاثْ إِ ؤُعَالْطَارْ، رُوحْ أَمزْوَارُو، ثْصڒْحذْ أَكْ-ذ ؤُمَاشْ، خنِّي ذْوڒْ-د، ؤُشَا أوْشْ ثَاوْهِيبْثْ نّشْ. 25 إِڒِي ثْوجْذذْ إِ وصْڒَاحْ أَكْ-ذ وغْرِيمْ نّشْ ؤُمِي شكْ عَاذْ أَكِيذسْ ذڭْ وبْرِيذْ، حِيمَا أَغْرِيمْ نّشْ وَارْ شكْ إِتِّيوِي غَارْ ڒْقَاضِي، خنِّي ڒْقَاضِي أَذْ شكْ يَاوِي غَارْ ؤُمْخَازْنِي ؤُشَا أَذْ ثمّنْضَارذْ ذِي ڒحْبسْ. [q] 26 س ثِيذتّْ، نشّْ أَذْ أَشْ إِنِيغْ: وَارْ د-ثفّْغذْ سّنِّي، أَڒْ غَا ثْخدْجْصذْ أَصُولْذِي أَنڭَّارُو.“

27 أَقَا ثسْڒِيمْ بلِّي إِتّْوَانَّا: ’وَارْ زنِّي شَا!‘، [r] 28 مَاشَا نشّْ أَذْ أَومْ إِنِيغْ، مَارَّا ونِّي إِ غَا إِخْزَارنْ غَارْ ثمْغَارْثْ س نّشْوثْ، أَقَا إِزْنَا ذغْيَا أَكِيذسْ ذڭْ وُوڒْ نّسْ. [s] 29 مَاڒَا ثسّنْقَارْضْ شكْ ثِيطّْ نّشْ ثَافُوسشْثْ، قسّْ إِ-ت، نْضَارْ إِ-ت خَاكْ. إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّشْ خْ ؤُوطُّو ن أَرِّيمثْ نّشْ مَارَّا ذِي جهنَّامَا. [t] 30 مَاڒَا ثسّنْقَارْضْ شكْ أَفُوسْ نّشْ أَفُوسِي، قسّْ إِ-ث، نْضَارْ إِ-ث خَاكْ، مِينْزِي إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّشْ وَاهَا خْ ؤُوطُّو ن أَرِّيمثْ نّشْ مَارَّا ذِي جهنَّامَا.“

31 ”أَقَا إِتّْوَانَّا عَاوذْ: ’ونِّي إِ غَا إِدْجْفنْ إِ ثمْغَارْثْ نّسْ، أَذْ أَسْ إِوْشْ ثَابْرَاثْ ن وَادْجَافْ!‘ [u] 32 مَاشَا نشّْ أَذْ أَومْ إِنِيغْ: مَارَّا ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي زِي سِّيبّثْ ن فَارْقْ-شّْغڒْ، إِتَّارَّا إِ-ت أَذْ ثزْنَا، ؤُشَا ونِّي إِ غَا إِمڒْشنْ ثنِّي ؤُمِي إِدْجْفنْ، أَقَا نتَّا إِزْنَا.“ [v]

33 ”أَقَا ثسْڒِيمْ عَاوذْ بلِّي إِتّْوَانَّا إِ ڒجْذُوذْ: ’وَارْ ثجَّادْجِيذْ ژُورْ، مَاشَا أڭّْ مِينْ ثجُّودْجذْ إِ سِيذِي!‘ [w] 34 مَاشَا نشّْ أَذْ أَومْ إِنِيغْ: وَارْ ثجَّادْجَامْعمَّارْصْ، ؤُڒَا غَارْ ؤُجنَّا مِينْزِي نتَّا ذ ڒْعَارْشْ ن أَربِّي، [x] 35 ؤُڒَا غَارْ ثمُّورْثْ، مِينْزِي نتَّاثْ ذ ثَانبْذَاثْ سَاذُو إِضَارنْ نّسْ، ؤُڒَا غَارْ ثنْذِينْثْ ن ؤُرْشَالِيمْ، مِينْزِي نتَّاثْ ذ ثَانْذِينْثْ ن ؤُجدْجِيذْ ذ أَمقّْرَانْ، [y] 36 ؤُشَا وَارْ ثجَّادْجَامْ ؤُڒَا غَارْ ؤُزدْجِيفْ نّشْ، مِينْزِي وَارْ ثْزمَّارذْ أَذْ ثَارّذْ ؤُڒَا ذ إِجّْ ن ؤُژطُّو ن ؤُشُووَّافْ ذ أَشمْڒَاڒْ نِيغْ ذ أَبَارْشَانْ. 37 أَذْ إِقِّيمْ وَاوَاڒْ نْومْ ’وَاهْ!‘ ذ ’وَاهْ!‘، ’لَّ!‘ ذ ’لَّ!‘. مَانَا كْثَارْ زِي مَانْ أَيَا، أَقَا نتَّا زڭْ ؤُمْعفَّانْ.“

38 ”أَقَا ثسْڒِيمْ بلِّي إِتّْوَانَّا: ’ثِيطّْ س ثِيطّْ ذ ثِيغْمسْثْ س ثغْمسْثْ!‘، [z] 39 مَاشَا نشّْ أَذْ أَومْ إِنِيغْ، وَارْ ثتّمْعَاڒَامْ شَا أَكْ-ذ إِجّْ ن ؤُعفَّانْ، مَاشَا ونِّي إِ غَا إِسّقّْڒنْ أَمڭِّيزْ نّشْ أَفُوسِي، سڒْقَا يَاسْ ؤُڒَا ذ أَمڭِّيزْ نّغْنِي. [aa] 40 مَاڒَا ذِينْ حذْ إِخْسْ أَذْ كِيكْ إِڭّْ شّْرعْ ؤُشَا نتَّا أَذْ خَاكْ إِكّسْ ثْشَامِيرْ نّشْ، أجّْ إِ-ث أَذْ إِكْسِي ؤُڒَا ذ أَجدْجَابْ. [bb] 41 ونِّي خَاكْ إِڭِّينْ بزّزْ حِيمَا أَذْ كِيذسْ ثُويُورذْ إِجّْ ن كِيلُومِيثْرْ، ؤُيُورْ أَكِيذسْ ثْنَاينْ. ◼5:‏41 ’إِجّْ ن كِيلُومِيثْرْ‘ - س ثْرَامِيثْ ’إِجّْ ن مَايْلْ‘. 42 مَانْ ونْ ذ أَشْ إِ غَا إِتَّارنْ شَا ن ڒْحَاجّثْ، أوْشْ أَسْ ت، ؤُ ونِّي يَارزُّونْ أَذْ خَاكْ يَارْضڒْ، وَارْ ذ ث تَّارَّا أَمنِّي.“ [dd]

43 ”أَقَا ثسْڒِيمْ بلِّي إِتّْوَانَّا: ’أَذْ ثخْسذْ جَّارْ نّشْ، أَذْ ثْشَارْهذْ ڒعْذُو نّشْ!‘ [ee] 44 مَاشَا نشّْ أَذْ أَومْ إِنِيغْ: خْسمْ ڒْعذْيَانْ نْومْ ؤُ بَارْكمْ إِنِّي كنِّيوْ إِنعّْڒنْ، ڭّمْ ثْشُونِي إِ يِينِّي كنِّيوْ إِشَارّْهنْ، ژَتدْجمْ إِ يِينِّي كنِّيوْ إِتَّاوْينْ ذ إِمحْبَاسْ ذ يِينِّي خَاومْ إِتّْذَارَّاشنْ، [ff] 45 حِيمَا أَذْ ثِيڒِيمْ ذ ثَارْوَا ن بَابَاثْومْ إِ إِدْجَانْ ذڭْ إِجنْوَانْ، مِينْزِي نتَّا إِسّْنقَّارْ ثَافُوشْثْ نّسْ خْ إِصبْحَاننْ ذ إِعفَّاننْ، ؤُشَا نتَّا يَارخُّو-د إِ ونْژَارْ، حِيمَا أَذْ إِوّثْ خْ إِمْسڭَّاذنْ ؤُ خْ يِينِّي وَارْ إِسڭّْذنْ. 46 مِينْزِي مَاڒَا ثخْسمْ إِنِّي كنِّيوْ إِتّخْسنْ، مَانْ أَرْبحْ إِ غَارْومْ؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ ◼5:‏46 ’أَيْثْ ن ضَّارِيبَا‘ - نِيغْ ’إِعشَّارنْ‘. أَيْثْ ن ضَّارِيبَا نِيثْنِي ذ ؤُذَاينْ إِ إِخدّْمنْ أَكْ-ذ ڒْمخْزنْ ن إِرُومَانِييّنْ، جمّْعنْ ضَّارِيبَا. شَا زَّايْسنْ كْسِينْ زِي ضَّارِيبَا إِ يِيخفْ نْسنْ.  [hh] 47 مَاڒَا ثْسدْجْممْ خْ وَاوْمَاثنْ نْومْ وَاهَا، مِينْ إِ ثتّڭّمْ كْثَارْ خْ ونّغْنِي؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ 48 س ؤُيَا إِڒِيمْ نِيشَانْ قَاعْ أَمْ مَامّشْ ؤُڒَا ذ بَابَاثْومْ إِ إِدْجَانْ ذڭْ إِجنْوَانْ إِدْجَا نِيشَانْ قَاعْ.“ [ii]