يَاهُوذَا

1 يَاهُوذَا، أَمْسخَّارْ ن يَاسُوع لْمَاسِيحْ، ذ ؤُمَاسْ ن يَاعْقُوبْ.

إِ ڒڭْنُوسْ إِتّْوَاڒَاغَانْ، إِنِّي إِتّْوَاعِيزّنْ زِي أَربِّي، بَابَاثْنغْ، ذ إِنِّي إِتّْوَاحْضَانْ زِي يَاسُوع لْمَاسِيحْ. 2 إِڒِي أَذْ غَارْومْ ثمَّارْنِي أَرّحْمثْ ذ ڒهْنَا ذ ثَايْرِي.

3 أَ إِمْعِيزّنْ إِنُو، ؤُمِي شطَّارغْ مَاحنْذْ أَذْ أَومْ د-أَرِيغْ خْ ثُوذَارْثْ نّغْ إِمُوننْ، أَقَا ؤُفِيغْ بلِّي إِتّْخصَّا أَيِي أَذْ أَومْ د-أَرِيغْ س ؤُزِييَّارْ، حِيمَا أَذْ ثمّنْغمْ س جّهْذْ خْ لْ-إِيمَانْ إِ إِمّوْشنْ إِشْثْ ن ثْوَاڒَا إِ ڒبْذَا إِ إِمْقدَّاسنْ. 4 مِينْزِي شَا ن إِوْذَانْ خْثُوتّْڒنْ غَارْ ذَاخڒْ، إِنِّي ثُوغَا إِتّْوَازمّمنْ إِ ڒْحُوكْمْ-أَ قْبڒْ: أَقَا نِيثْنِي ذ إِعفَّاننْ، إِنِّي إِبدّْڒنْ أَرْضَا ن أَربِّي نّغْ ذڭْ إِجّْ ن نّْعِي ن ؤُفُوشّحْ، ؤُشَا نكَّارنْ أَينِّي ن سِيذِي أَربِّي ذ سِيذِيثْنغْ يَاسُوع لْمَاسِيحْ. [a]

5 مَاشَا خْسغْ أَذْ كنِّيوْ سّْعقْڒغْ، أَقَا مَارَّا كنِّيوْ ثسّْنمْ مَانْ أَيَا مْلِيحْ، بلِّي أَربِّي، ؤُمِي إِفكّْ ڒْڭنْسْ زِي ثمُّورْثْ ن مِيصْرَا، ثُوغَا إِسّْهلّكْ أَوَارْنِي مَانْ أَيَا إِنِّي وَارْ يُومِيننْ شَا. [b] 6 ؤُشَا لْمَالَاكَاثْ نِّي وَارْ حْضِينْثْ أَوقَّارْ نْسنْ أَمزْوَارُو، مَاشَا جِّينْثْ ثَازذِّيغْثْ نْسنْ، أَقَا نتَّا إِحْضَا خَاسنْ س سّْنَاسڒْ وَارْ إِتّْوِيڒِينْ سَاذُو ثَادْجسْثْ إِ ڒْحُوكْمْ ن وَاسّْ أَمقّْرَانْ، [c] 7 أَمْ مَامّشْ سَاذُومْ ذ عَامُورَّا ذ ثْندَّامْ إِ ذ أَسْ د-إِنّْضنْ، مَانِي ڭِّينْ نِيثْنِي فَارْقْ-شّْغڒْ س وبْرِيذْ ذ إِجّنْ أَمْ ڭِّينْثْ ثِينَا س ثْنَاينْ ؤُ ضْفَارنْثْ دَّاثْ نّغْنِي، أَقَا تّْوَامَّارْسنْثْ ذ إِمذْيَا ن ثْمسِّي إِتّْذُومَانْ، تّْوَاحكْمنْثْ غَارْ شّْرعْ. [d]

8 أَمنِّي عَاوذْ إِ غَا هلّْكنْ إِنَا، إِنِّي إِسّخْمَاجنْ دَّاثْ أَمْ د-تَّاذْفنْ ذِي ثِيرْجَا، إِنِّي إِمّنْضَارنْ صُّولْطَا ن إِجنْوَانْ ؤُشَا تّْشقَّافنْ ذڭْ ؤُعُودْجِي نّسْ.

9 مَاشَا ڒَامِي ثُوغَا إِسَّاوَاڒْ مِيخَايِيلْ، أَزدْجِيفْ ن لْمَالَاكَاثْ، أَكْ-ذ إِبْڒِيسْ خْ أَرِّيمثْ ن مُوسَا، وَارْ خَاسْ إِحْكِيمْ س إِجّْ ن ڒْحُوكْمْ إِتّْشقَّافنْ، مَاشَا إِنَّا: ”سِيذِي أَذْ شكْ إِخدْجصْ!“ [e] 10 مَاشَا إِنَا تّْشقَّافنْ ذِي مَارَّا مِينْ وَارْ سِّيننْ، ؤُشَا س ثْمسْڒَايِينْ إِ غَارْ تّْوَاجبّْذنْ نِيثْنِي أَمْ إِمُودَّارنْ إِڭْنَاونْ عْلَاحْسَابْ طّْبِيعثْ نْسنْ، أَقَا أَردّْدْجنْ نِيثْنِي إِخفْ نْسنْ. ◼1:‏10 ’إِمُودَّارنْ‘ - نِيغْ ’لْحَايَاوَانَاثْ‘.  [g] 11 ؤُشْثْ خَاسنْ، مِينْزِي نِيثْنِي ؤُيُورنْ أَبْرِيذْ ن قَايِينْ ؤُشَا ؤُمِي تّْمژْرنْ ذِي ڒْمُونثْ ضْفَارنْ نِيثْنِي أَغكّْوِي ن بَالْعَامْ ؤُ تّْوَاهلْكنْ ذڭْ ؤُغوّغْ ن كُورَاخْ. [h]

12 إِنَا ذ إِنِّي إِسّْفطَّاحنْ إِخفْ نْسنْ س ؤُنشْوثْ نْسنْ، وَارْ تّْسضْحِينْ شَا أَذْغبَّانْ. أَقَا أَثنْ ذ إِسيْنُوثنْ بْڒَا أَنْژَارْ، تّْوَاعَارّْننْ زِي سَّا غَارْ ذِيهَا س ؤُسمِّيضْ، أَقَا أَثنْ ذ ثِيشجُّورَا نِّي ذِي ثدْجَا ڒْغِيدْجثْ نْسنْثْ ثْودَّارْ، أَقَا وَارْ ذَايْسنْثْ ثدْجِي بُو ڒْغِيدْجثْ، مُّوثنْثْ وِيسّْ مَارْثَاينْ ؤُشَا تّْوَاقڒْعنْثْ زڭْ إِژوْرَانْ نْسنْثْ. [i] 13 نِيثْنِي ذ ڒمْوَاجْ ن ڒبْحَارْ إِهَاجنْ، إِنِّي إِسُّوسُوفنْ إِكُوفَّانْ ن ڒفْضِيحثْ نْسنْ، أَقَا أَثنْ ذ إِثْرَانْ ودَّارنْ، إِنِّي ؤُمِي ثتّْوَاسّوْجذْ ثُوبَّارْشنْثْ ن ثَادْجسْثْ إِ ڒبْذَا. [j]

14 مَاشَا حَانُوخْ، ونِّي ذ وِيسّْ سبْعَا زِي أَذَامْ، إِنبَّا خَاسنْ، إِنَّا: ”خْزَارْ، سِيذِي أَذْ د-يَاسْ أَكْ-ذ ڒُوڒُوفْ ن ڒُوڒُوفْ ن إِمْقدَّاسنْ نّسْ، [k] 15 حِيمَا أَذْ إِڭّْ ڒْحُوكْمْ نّسْ خْ مَارَّا إِوْذَانْ زِي سِّيبّثْ ن مَارَّا ثِيمڭَّا ن يِينِّي إِڭِّينْ ثُوعفّْنَا، ؤُ زِي سِّيبّثْ ن وَاوَاڒنْ إِقسْحنْ إِ زِي سِّيوْڒنْ إِمذْنَابْ إِغشَّاشنْ.“ [l]

16 إِنَا تّْعكَّاسنْ، تّْشثْشَانْ خْ كُوڒْ دَّابْ ن سِّيبّثْ، أَمْ ڭُّورنْ غَارْ نّشْوَاثْ نْسنْ، أَقمُّومْ نْسنْ إِسَّاوَاڒْ س ثْمسْڒَايِينْ ثِيعفَّانِينْ أَڒْ طَّارْفْ، تّڭّنْ ثِيقدُّوحِينْ إِ إِوْذَانْ إِ ثِيزِي ن يِيخفْ نْسنْ. [m]

17 مَاشَا كنِّيوْ، أَ إِمْعِيزّنْ إِنُو،عقْڒمْ أَوَاڒنْ إِ إِزَّارْ سِّيوْڒنْ زَّايْسنْ رُّوسُولْ ن سِيذِيثْنغْ يَاسُوع لْمَاسِيحْ، ◼1:‏17 ’رُّوسُولْ‘ - نِيغْ ’إِمَازَاننْ‘. 18 إِنِّي ذ أَومْ إِنَّانْ، أَقَا ذڭْ ؤُنڭَّارْ ن زّْمَانَاثْ أَذْ ذِينْ إِڒِينْ إِمسْثهْزَاينْ، إِنِّي إِ غَا إِضْفَارنْ ڒقْجَاهثْ عْلَاحْسَابْ نّشْوَاثْ نْسنْ. [o] 19 أَقَا ذ يِينَا ذ إِنِّي إِفَارّْزنْ إِخفْ نْسنْ أَمْ إِوْذَانْ إِضفَّارنْ طّْبِيعثْ ن يِيخفْ نْسنْ، مِينْزِي وَارْ غَارْسنْ بُو أَرُّوحْ.

20 مَاشَا كنِّيوْ، أَ إِمْعِيزّنْ إِنُو، تّْوَابْنَامْ زڭْ ؤُزدْجِيفْ ذِي لْ-إِيمَانْ نْومْ إِقدّْسنْ س أَرُّوحْ إِقدّْسنْ، أَمْ ثژَّادْجَامْ. 21 أجّْ أَنغْ أَذْ نحْضَا إِخفْ نّغْ ذِي ثَايْرِي ن أَربِّي أَمْ نتّْرَاجَا أَرّحْمثْ ن سِيذِيثْنغْ يَاسُوع لْمَاسِيحْ إِ ثُوذَارْثْ نّغْ إِتّْذُومَانْ. 22 قڒْعمْ شَا زَّايْسنْ زِي ثْمسِّي. 23 مَاڒَا ثُوبنْ نِيثْنِي، سشْنمْ أَسنْ أَرّحْمثْ، مَاشَا أَكْ-ذ ثِيڭّْوُوذِي، وَاهْ، عِيفّمْ عَاذْ زِي ثْشَامِيرْ إِ إِتّْوَاسّْخمْجنْ زڭْ ويْسُومْ.

24 مَاشَا إِ نتَّا، ونِّي إِزمَّارنْ أَذْ أَنغْ إِحْضَا بْڒَا أَنقْڒَاضْ ؤُ بْڒَا ڒخْمجْ ؤُ ونِّي أَذْ أَنغْ يڭّْ أَذْ نْبدّْ نِيشَانْ بْڒَا ڒْعِيبْ زَّاثْ إِ ؤُعُودْجِي نّسْ س ڒفْرَاحثْ 25 - أَقَا نتَّا ذ أَربِّي وحّْذسْ، أَمْسنْجمْ نّغْ - أَقَا إِ نتَّا د-إِتَّاسْ ؤُسمْغَارْ ذ ڒْعزّْ ذ شَّانْ ذ لْعَاضَامَا، أَمْ ڒخُّو أَمْ إِ ڒبْذَا قَاعْ. أَمِينْ. [p]