1 إِسّوْجذْ سِيذِي إِجّْ ن وسْڒمْ أَمقّْرَانْ حِيمَا أَذْ إِسّغْرِي يُونُوسْ ؤُشَا يُونُوسْ إِكَّا ثْڒَاثَا ن وُوسَّانْ ذ ثْڒَاثَا نْ دْجِييَاڒِي ذڭْ ؤُعذِّيسْ ن وسْڒمْ. [a] 2 ؤُشَا إِژُّودْجْ يُونُوسْ إِ سِيذِي، أَربِّي نّسْ، زڭْ ؤُعذِّيسْ ن وسْڒمْ. 3 إِنَّا:

“زِي ڒحْصَارثْ إِنُو ڒَاغِيغْ إِ سِيذِي

ؤُ نتَّا يَارَّا-د خَافِي.

زڭْ وحْوِيشْ ن ڒَاخَارْثْ ڒَاغِيغْ

ؤُشَا شكْ ثسْڒِيذْ إِ ثْمِيجَّا إِنُو. [b]

4 ثُوغَا ثنْضَارذْ أَيِي ذِي ڒَادْجَاغْ،

ذڭْ وُوڒْ ن ڒبْحُورْ،

ثنّْضنْ أَيِي-د ڒمْوَاجْ.

مَارَّا زّْهِيرْ نّشْ ذ ڒمْوَاجْ نّشْ

كِّينْ-د خَافِي سنّجْ. [c]

5 نِّيغْ: ’نشّْ تّْوَاسُّوفّْغغْ

زِي زَّاثْ إِ وُوذمْ نّشْ.

عَاذْ أَذْ ثْوَاڒِيغْ عَاوذْ

زَّاوشْثْ نّشْ ثَامقّْرَانْثْ إِقدّْسنْ.‘ [d]

6 طّْفنْ أَيِي وَامَانْ

أَڒْ مَانِي إِوْضنْ غَارْ ڒعْمَارْ إِنُو،

أَمَانْ إِهوْڒنْ نّْضنْ أَيِي-د،

إِڒْصقْ-د أَرْبِيعْ ن ڒبْحَارْ ذڭْ ؤُزدْجِيفْ إِنُو.

7 هْوِيغْ غَارْ طّْرُوفَا يُودْجْغنْ قَاعْ ن إِذُورَارْ،

تّْوَابلّْعنْ زّكْرُونَاثْ ن ثمُّورْثْ خَافِي

سنّجْ إِ ڒبْذَا،

مَاشَا شكْ ثسّْڭعّْذذْ ثُوذَارْثْ إِنُو

زِي ثُورْصُوضِي ذڭْ وَامَانْ،

أَ سِيذِي، أَربِّي إِنُو!

8 ؤُمِي إِذوّخْ ڒعْمَارْ إِنُو ذَايِي،

فكَّارغْ ذِي سِيذِي،

ؤُ ثَاژَادْجِيثْ إِنُو ثْڭعّذْ غَاركْ،

ذِي زَّاوشْثْ نّشْ ثَامقّْرَانْثْ إِقدّْسنْ. ◼2:‏8 ’ذَايِي‘ - س ثْعِيبْرَانِيثْ ’خَافِي‘.

9 نِيثْنِي طّْفنْ ذِي لْ-أَصْنَامْ إِبطّْڒنْ ذ إِغشّنْ،

سمْحنْ ذِي ثْمخْسِيوْثْ نْسنْ إِشوَّارنْ.

10 مَاشَا نشّْ أَذْ شكْ حمْذغْ

س يِيشْثْ ن ثْمِيجَّا ثشُّورْ س ؤُقَاذِي.

مِينْ وَاعْذغْ، أَذْ ث قفْڒغْ.

أَسنْجمْ زِي سِيذِي.“ [f]

11 إِسِّيوڒْ سِيذِي أَكْ-ذ وسْڒمْ ؤُشَا إِعُوقّْ-د يُونُوسْ ذِي ڒْبَارْ.