1 سِيذِي إِنَّا أَيِي: ”رُوحْ إِشْثْ ن ثْوَاڒَا نّغْنِي، أخْسْ ثَامْغَارْثْ نِّي إِتّْوَاسّْعِيزّنْ زڭْ ؤُمدُّوكّڒْ نّسْ، مَاشَا ثزْنَا، أَمْ مَامّشْ سِيذِي إِتّخْسْ أَيْثْ ن إِسْرَائِيل، مَاشَا نِيثْنِي خزَّارنْ غَارْ إِربِّيثنْ نّغْنِي ؤُ تّخْسنْ صّذْقثْ ن وغْرُومْ س زّْبِيبْ.“ ◼3:‏1 ’ثنِّي إِتّْوَاسّْعِيزّنْ زڭْ ؤُمدُّوكّڒْ‘ - إِنِّي إِتّْفسَّارنْ أَذْلِيسْ إِقدّْسنْ غَارْسنْ أَرَّايْ إِفَارْزنْ، مَاشَا نشِّينْ نْضفَّارْ أَرَّايْ إِ إِنَّا أَربِّي إِ حُوشِيعَا بلِّي أَذْ يَاوِي جُومِيرْ عَاوذْ ذ ثَامْغَارْثْ نّسْ. ذِي أَيَا د-إِتَّاسنْ أَوَارْنِي ثَانِيثَا إِبَانْ-د أَقَا إِتّْخصَّا إِ حُوشِيعَا أَذْ إِخدْجصْ صَّاذَاقْ عَاوذْ، مَاشَا قلّْ خْ مِينْ ثُوغَا نُّومنْ يرْيَازنْ أَذْ خدْجْصنْ (ڒْقِيمثْ ن صَّاذَاقْ ثُوغَا ت 50 ن ڒْوزْنَاثْ ن نُّوقَارْثْ - خْزَارْ أَعَوذ. 22‏:29)، مَاشَا أَمُورَا إِخدْجصْ حُوشِيعَا ڒْقِيمثْ ن 30 ن ڒْوزْنَاثْ ن نُّوقَارْثْ وَاهَا. أَقَا بَالَاكْ ثُوغَا مَانْ أَيَا مِينْزِي جُومِيرْ ثُوغَا ثْفسّذْ أَرِّيمثْ نّسْ. 2 س ؤُينِّي سْغِيغْ ت إِ نشّْ س خمّسْطَاشْ ن ؤُقِييَّاثْ ن نُّوقَارْثْ ؤُ س إِجّْ ن ؤُحُومِيرْ إِفيّْضنْ ن إِمنْذِي. 3 نشّْ نِّيغْ أَسْ: ”شمْ أَذْ غَارِي ثقِّيمذْ أَطَّاسْ ن وُوسَّانْ. وَارْ تّڭّْ شَا فَارْقْ-شّْغڒْ ؤُ وَارْ تِّيڒِي ن إِجّْ ن ورْيَازْ نّغْنِي، ؤُشَا ؤُڒَا ذ نشّْ أَذْ ڭّغْ أَمنِّي أَكِيذْسمْ.“ [b] 4 مَاغَارْ أَيْثْ ن إِسْرَائِيل أَذْ قِّيمنْ أَطَّاسْ ن وُوسَّانْ بْڒَا أَجدْجِيذْ، بْڒَا ڒْحَاكمْ، بْڒَا ثَاغَارْصْثْ، بْڒَا أَمَايْضُو إِقدّْسنْ، بْڒَا أَپَالْطُو ن ؤُكهَّانْ ذ ڒخْيَاڒَاثْ ن لْ-أَصْنَامْ. [c] 5 أَوَارْنِي أَسْ أَذْ د-ذوْڒنْ أَيْثْ ن إِسْرَائِيل¸ أَذْ أَرْزُونْ خْ سِيذِي، أَربِّي نْسنْ ؤُ خْ ذَاوُوذْ، أَجدْجِيذْ نْسنْ. ذڭْ ؤُنڭَّارْ ن وُوسَّانْ أَذْ د-أَسنْ تَّارْجِيجِينْ غَارْ سِيذِي ذ ثْشُونِي نّسْ. [d]