1 س ؤُينِّي إِتّْخصَّا أَنغْ أَذْ نوْشْ ثَايْنِيثْ كْثَارْ إِ مِينْ نسْڒَا، حِيمَا وَارْ نتّفّغْ زڭْ وبْرِيذْ. 2 مِينْزِي، مَاڒَا أَوَاڒْ إِ إِنَّانْ لْمَالَاكَاثْ ثُوغَا ثْبدّْ ؤُ مَارَّا وِي ث إِسْڒِينْ، مَاشَا إِعْذُو خَاسْ، أَقَا إِتّْوَاخدْجصْ س ڒْحقّْ، [a] 3 مَامّشْ إِ غَا نڭّْ أَذْ نَارْوڒْ نشِّينْ، مَاڒَا نسّحْقَارَا ثِيمسْڒَايِينْ إِ إِدْجَانْ ذ ثُوذَارْثْ إِ نشِّينْ، ثِيمسْڒَايِينْ إِ خفْ ثُوغَا إِسَّاوَاڒْ سِيذِيثْنغْ غَارْ ؤُمزْوَارُو، ؤُشَا خنِّي تّْوَاضمْننْثْ أَنغْ زڭْ يِينِّي جَارَانغْ إِ ثُوغَا ثنْثْ زَّايسْ إِسْڒِينْ، [b] 4 ؤُمِي أَربِّي إِشْهذْ أَكِيذْسنْ س ڒعْڒَامَاثْ ذ لْمُوعْجِيزَاثْ ذ ڒعْجَايبْ إِفَارْزنْ ؤُ س ثْموْشِي ن أَرُّوحْ إِقدّْسنْ، ثِينِّي إِمّوْشنْ أَمْ مَامّشْ إِخْسْ نتَّا. [c] 5 مِينْزِي وَارْ إِسَّارْسْ شَا زّْمَانْ إِ د غَا يَاسنْ خْ ثنِّي نسِّيوڒْ، سَاذُو ڒُْومُورْ ن لْمَالَاكَاثْ، 6 مَاشَا أَمْ مَامّشْ شهّْذنْثْ ؤُ قَّارنْثْ ثِيرَا إِقدّْسنْ:

”مِينْ إِعْنَا بْنَاذمْ،

أَقَا شكْ إِ ذَايسْ إِتّْخَارَّاصنْ،

ؤُ مِينْ إِعْنَا مِّيسْ ن بْنَاذمْ،

أَقَا شكْ إِ ذَايسْ إِتّْهِيلَّانْ؟ [d]

7 شكْ ثڭِّيذْ ث شْوَايْثْ سَاذُو لْمَالَاكَاثْ،

ثڭِّيذْ أَسْ أَعُودْجِي ذ شَّانْ خْ ؤُخدْجِيفْ نّسْ،

ثوْشِيذْ أَسْ صُّولْطَا خْ ڒخْذَايمْ ن إِفَاسّنْ نّشْ. [e]

8 أَقَا مَارَّا ثِيمسْڒَايِينْ ثڭِّيذْ ثنْثْ

سَاذُو إِضَارنْ نّسْ.“

ؤُمِي إِڭَّا مَارَّا ثِيمسْڒَايِينْ سَاذُو نتَّا، أَقَا وَارْ إِجِّي وَالُو وَارْ ث إِڭِّي سَاذُو نتَّا. مَاشَا ڒخُّو وَارْ نْژَارْ عَاذْ مَارَّا إِتّْوَاڭّْ سَاذُو نتَّا، [f] 9 مَاشَا نتّْوَاڒَا بلِّي نتَّا، أَقَا-ث ذ يَاسُوع، ثُوغَا إِتّْوَاڭّْ شْوَايْثْ سَاذُو لْمَالَاكَاثْ ذِي سِّيبّثْ ن ؤُودّبْ ن ڒْموْثْ نّسْ، نتّْوَاڒَا إِ-ث س تَّاجْ ن ؤُعُودْجِي ذ شَّانْ خْ ؤُزدْجِيفْ نّسْ، مَاغَارْ أَربِّي إِقَّاسْ ڒْموْثْ إِ مَارَّا إِوْذَانْ عْلَاحْسَابْ أَرْضَا نّسْ. [g]

10 مِينْزِي ثُوغَا إِتّْڒِيقْ أَسْ إِ نتَّا س ونِّي ؤُ إِ ونِّي دْجَانْثْ مَارَّا ثْمسْڒَايِينْ - نتَّا ذ ونِّي إِ د-إِتَّاوْينْ أَطَّاسْ ن إِحنْجِيرنْ غَارْ ؤُعُودْجِي - مَاحنْذْ أَذْ إِكمّڒْ ؤُزدْجِيفْ ن ثُوذَارْثْ نْسنْ س ؤُودّبْ نّسْ. 11 مِينْزِي ذ ونِّي إِسّْقدّْسنْ ذ يِينِّي إِتّْوَاقدّْسنْ، نِيثْنِي مَارَّا ذ إِجّنْ. س ؤُينِّي نتَّا وَارْ إِسضْحِي شَا أَذْ أَسنْ إِڒَاغَا أَوْمَاثنْ نّسْ، [h] 12 ؤُمِي إِنَّا:

”أَذْ بَارّْحغْ إِ وَاوْمَاثنْ إِنُو س يِيسمْ نّشْ،

ذِي ڒْوسْطْ ن ثْمسْمُونْثْ أَذْ شكْ صبّْحغْ.“ [i]

13 ؤُشَا عَاوذْ:

”نشّْ أَذْ ذَايسْ تِّيقّغْ!“

ؤُشَا عَاوذْ:

”أَقَا ذَا، نشّْ ذ ثَارْوَا إِ ذ أَيِي إِوْشَا أَربِّي.“ [j]

14 مِينْزِي ثَارْوَا شَارْشنْ ذڭْ ويْسُومْ ذ إِذَامّنْ، ؤُڒَا ذ نتَّا إِشَارْشْ أَمُّو كِيفْكِيفْ ذِي مَانْ أَيَا، حِيمَا أَذْ إِبطّڒْ س ڒْموْثْ نّسْ ونِّي غَارْ ثدْجَا صُّولْطَا خْ ڒْموْثْ، أَقَا نتَّا ذ شِّيطَانْ، [k] 15 ؤُشَا خنِّي أَذْ إِفكّْ إِنِّي إِسّعْدُّونْ قَاعْ ثُوذَارْثْ نْسنْ أَمْ إِسمْغَانْ زِي ثِيڭّْوُوذِي ن ڒْموْثْ. [l] 16 مِينْزِي ڒْموْثْ وَارْ غَارسْ ثدْجِي صُّولْطَا خْ لْمَالَاكَاثْ، مَاشَا ڒْموْثْ غَارسْ صُّولْطَا خْ زَّارِيعثْ ن إِبْرَاهِيمْ. 17 س ؤُينِّي ثُوغَا إِتّْخصَّا أَسْ أَذْ إِذْوڒْ أَمْ وَاوْمَاثنْ نّسْ زِي مَارَّا إِغزْذِيسنْ، حِيمَا أَذْ إِذْوڒْ ذ أَرَّايْسْ ن إِكهَّاننْ أَرْحِيمْ ذ أَمْثِيقِّي ذِي مِينْ إِدْجَانْ إِ أَربِّي، ؤُشَا أَذْ يِيڒِي بْڒَا ڒْعِيبْ زِي جِّيهثْ ن دّْنُوبْ ن ڒْڭنْسْ. [m] 18 مِينْزِي مِينْ ذِي ثُوغَا نتَّا سِيمَانْثْ نّسْ إِودّبْ ؤُ إِتّْوَاجَارّبْ، أَقَا إِزمَّارْ أَذْ إِعَاونْ إِنِّي إِتّْوَاجَارّْبنْ. [n]