1 س ؤُيَا نشِّينْ عَاوذْ، ؤُمِي ذ أَنغْ د-نّْضنْ مَارَّا ڒشْهُوذْ-أَ أَمْ إِسيْنُوثنْ، أَذْ ننْضَارْ مَارَّا دّْقڒْ ن دّنْبْ إِ ذ أَنغْ د-إِسّْوجْذنْ إِ ڒبْذَا. أجّْ أَنغْ أَذْ نُويُورْ س صّْبَارْ أَمْحِيزْوَارْ نِّي خَانغْ د-إِمَّارْسنْ. [a] 2 أجّْ أَنغْ أَذْ ننْضَارْ ثِيطَّاوِينْ ذِي يَاسُوع، أَمْڭوَّاذْ ذ ؤُمْكمّڒْ ن لْ-إِيمَانْ نّغْ، ونِّي، زِي سِّيبّثْ ن ڒفْرَاحثْ إِ غَارسْ، يَارْبُو صَّالِيبْ، وَارْ ث إِشْقِي ؤُبهْذڒْ، ؤُشَا إِقِّيمْ خْ يفُوسْ ن ڒْعَارْشْ ن أَربِّي. ◼12:‏2 ’أَمْڭوَّاذْ‘ - نِيغْ: ’زَّاعِيمْ‘.  [c] 3 خْزَارمْ مْلِيحْ، مشْحَاڒْ إِ إِكْسِي نتَّا زڭْ إِمذْنَابْ، إِنِّي ذ إِغْرِيمنْ ن ڒعْمَارْ ن يِيخفْ نْسنْ، حِيمَا وَارْ ثتِّيحْڒمْ ؤُ وَارْ ثَارخُّومْ شَا ذِي ڒعْمَارْ نْومْ. 4 أَقَا كنِّيوْ، وَارْ ثْرُوحمْ شَا ثِيڭّْوجمْ أَكْ-ذ دّنْبْ، وَارْ ثمّْعَاڒِيمْ شَا أَڒْ ؤُسِيزّڒْ ن إِذَامّنْ نْومْ. [d] 5 ثتُّومْ ثَاغُورِي إِ خَاومْ إِسَّاوَاڒنْ أَمْ إِحنْجِيرنْ:

”مِّي إِنُو، وَارْ تّڭّْ شَا س وعْرُورْ

خْ تَّارْبِييّثْ ن سِيذِي،

وَارْ تِّيڒِي شَا ذ أَمَارْخُو ذِي ڒعْمَارْ نّشْ،

خْمِي غَا ثتّْوَاوبّْخذْ زَّايسْ. [e]

6 مِينْزِي ونِّي إِتّخْسْ سِيذِي،

يَاربَّا إِ-ث س ؤُقسَّاحْ،

ؤُشَا إِحنْجِيرنْ نّسْ إِ خَاسْ إِعِيزّنْ،

إِكْسِي ثنْ كُوڒْ إِجّْ زَّايْسنْ غَارْ ؤُغزْذِيسْ.“ [f]

7 خْ ؤُيَا، كْسِيمْ تَّارْبِييّثْ، مِينْزِي أَربِّي إِتّڭّْ أَومْ أَمْ إِحنْجِيرنْ نّسْ. مِينْزِي مَانْ مِّيسْ ونِّي بَابَاسْ وَارْ ث يَاربِّي شَا س ؤُقسَّاحْ؟ 8 مَاڒَا أَقَا كنِّيوْ بْڒَا تَّارْبِييّثْ إِ ذِي شَارْشنْ مَارَّا، ڒخْذنِّي كنِّيوْ أَمْ إِبَارَّانِييّنْ إِ ثدْجَامْ، وَارْ إِدْجِي ذ أَرَّاونْ. 9 مَاڒَا نكْسِي تَّارْبِييّثْ زِي بَابَاثْنغْ عْلَاحْسَابْ أَرِّيمثْ ؤُشَا نْوقَّارْ إِ-ثنْ، مشْحَاڒْ ذ أَنغْ إِتّْخصَّا أَذْ نْطَاعْ إِ بَابَاثْنغْ ن أَرُّوحَاثْ، حِيمَا أَذْ ندَّارْ! 10 مِينْزِي نِيثْنِي وبّْخنْ أَنغْ شَا ن وُوسَّانْ أَمْ مَامّشْ ذ أَسنْ إِتّْغِيڒْ مْلِيحْ، مَاشَا أَربِّي إِڭَّا إِ-ت إِ ثِيزِي نّغْ، حِيمَا أَذْ نْشَارْشْ ذِي ثْقدَّاسْثْ نّسْ. 11 أَقَا وَارْ ذِينْ ؤُڒَا ذ إِشْثْ ن تَّارْبِييّثْ س ؤُقسَّاحْ إِ إِتّْبَاننْ ذ ڒفْرَاحثْ ذغْيَا، مَاشَا ذ ڒحْرِيقْ، مَاشَا أَوَارْنِي أَسْ ثِيوِي-د ڒْغِيدْجثْ ن ڒهْنَا ذ ثْسڭْذَا إِ يِينِّي زَّايسْ إِتّْوَاذَارّْبنْ.

12 س ؤُينِّي، سْجهْذمْ إِفَاسّنْ نْومْ يَارْخُونْ ذ إِفَادّنْ نْومْ يَارهْفنْ، [g] 13 ؤُشَا ڭّمْ نِيشَانْ إِصُورَافْ ن إِضَارنْ نْومْ، حِيمَا مِينْ إِدْجَانْ ذ أَقجْذَاحْ وَارْ إِتّفْرِيغْ شَا، مَاشَا أَذْ إِڭّنْفَا.

14 ضْفَارمْ-د ڒهْنَا ذ ثُوقدّْسِي أَكْ-ذ مَارَّا، ثنِّي بْڒَا زَّايسْ وَارْ إِژَارْ حذْ سِيذِيثْنغْ. [h] 15 غَارْومْ أَقَا ؤُڒَا ذ إِجّْ جَارْ أَومْ أَذْ إِتّْوَافْ إِنْقصْ أَسْ أَرْضَا ن أَربِّي، نِيغْ أَقَا أَذْ إِغْمِي وژْوَارْ ن ثَارْزُوڭِي، أَذْ كنِّيوْ إِضَارّْ ؤُشَا خنِّي أَذْ زَّايسْ تّْوَاخمْجنْ أَطَّاسْ، [i] 16 ؤُشَا حْضَامْ، أَقَا وَارْ إِتّْوِيفِّي حذْ جَارْ أَومْ ونِّي ذ بُو-فَارْقْ-شّْغڒْ نِيغْ ذ أَمقْجُوحْ أَمْ عِيسُو نِّي إِزّنْزنْ ڒْحقّْ ن ؤُمنْزُو نّسْ خْ إِجّْ ن مَاشَّا. [j] 17 مِينْزِي أَقَا ثسّْنمْ، بلِّي أَوَارْنِي مَانْ أَيَا ثُوغَا يَارزُّو عَاذْ أَذْ إِوَارْثْ لْبَارَاكَا، مَاشَا يُوڭِي أَسْ، مَاغَارْ وَارْ يُوفِي شَا تَّاسِيعْ إِ وعْذَاڒْ، وَاخَّا يَارزُّو ث س إِمطَّاونْ. [k]

18 مِينْزِي كنِّيوْ وَارْ ثِيوِيضمْ شَا غَارْ ثْمسِّي يَارْغِينْ نِيغْ غَارْ وذْرَارْ إِ نْزمَّارْ أَذْ نْحَاذَا، ؤُڒَا غَارْ ثَايُّوثْ ثْبَارْشَانْثْ ذ ثْحَارْيَاضْثْ، [l] 19 نِيغْ غَارْ زّْهِيرْ ن ؤُصُوذِي ذڭْ ؤُيِيشّْ ن إِشَارِّي ؤُڒَا غَارْ ڒْحسّْ ن وَاوَاڒنْ ذِي سِّيبّثْ نْسنْ زَاوْڭنْ إِنِّي ذ أَسْ إِسْڒِينْ، مَاحنْذْ وَارْ ثنْ كِيسنْ إِسِّيوِيڒْ عَاذْ. [m] 20 س مِينْزِي وَارْ زمَّارنْ خْ دّْقڒْ ن ثْوصَّا، مِينْزِي مَاڒَا إِقَارّبْ-د مْغِيرْ إِجّْ ن ؤُمُودَّارْ أَذْرَارْ، أَذْ إِتّْوَارْجمْ نتَّا. ◼12:‏20 ’أَمُودَّارْ‘ - نِيغْ ’لْحَايَاوَانْ‘.  [o] 21 مِينْ ژْرِينْ ثُوغَا إِسَّاڭّْوَاذْ أَطَّاسْ، أَڒَامِي إِنَّا مُوسَا: ”أَقَا ڭّْوذغْ ؤُ تَّارْجِيجِيغْ!“ [p]

22 مَاشَا كنِّيوْ ثِيوْضمْ غَارْ وذْرَارْ ن صِيهْيُونْ، غَارْ ثنْذِينْثْ ن أَربِّي إِدَّارنْ، غَارْ ؤُرْشَالِيمْ نِّي إِدْجَانْ ذڭْ إِجنْوَانْ ؤُ غَارْ ثْمسْمُونْثْ نعشْرَا ن ڒُوڒُوفَاثْ ن لْمَالَاكَاثْ، [q] 23 غَارْ ثْمسْمُونْثْ ن إِمنْزَا، إِنِّي إِتّْوَازمّمنْ ذڭْ إِجنْوَانْ، ؤُ غَارْ أَربِّي، ڒْقَاضِي خْ مَارَّا ؤُ غَارْ أَرُّوحَاثْ ن إِمْسڭَّاذنْ نِّي إِوْضنْ غَارْ ڒكْمَارثْ، [r] 24 ؤُ غَارْ يَاسُوع، لْوَاسِيثْ ن ڒْعَاهْذْ ن جْذِيذْ، ؤُ غَارْ ؤُرُوشِّي س إِذَامّنْ نّسْ، إِنِّي إِسَّاوَاڒنْ حْسنْ زڭْ إِنِّي ن هَابِيلْ. [s]

25 غَارْومْ وَارْ ثَاڭِيمْ شَا خْ ونِّي أَكِيذْومْ إِسَّاوَاڒنْ، مِينْزِي مَاڒَا إِنِّي وَارْ إِتّْوَاسّْنجْمنْ ؤُڭِينْ ونِّي كِيذْسنْ إِسَّاوَاڒنْ ذِي ثمُّورْثْ، مَاهُو عَاذْ نشِّينْ، مَاڒَا نْحيّذْ خْ ونِّي أَكِيذْنغْ إِسَّاوَاڒنْ زڭْ إِجنْوَانْ، [t] 26 ونِّي ثُوغَا ثْمِيجَّا نّسْ ثسّنْهزَّا ثَامُّورْثْ، مَاشَا ونِّي ڒخُّو إِوَاعْذْ، إِنَّا:

”أَذْ سّنْهزّغْ عَاوذْ إِشْثْ ن ثْوَاڒَا،

وَارْ إِدْجِي ثَامُّورْثْ وَاهَا، أَقَا ؤُڒَا ذ أَجنَّا.“ [u]

27 أَوَاڒْ-أَ: ’إِشْثْ ن ثْوَاڒَا!‘، أَقَا إِمْڒَا بلِّي أَذْ إِتّْوَاكّسْ مِينْ إِتّنْهزَّانْ، مِينْزِي مَانْ أَيَا إِتّْوَاڭّْ، حِيمَا أَذْ قِّيمنْثْ ثْمسْڒَايِينْ وَارْ تّنْهزِّينْثْ. 28 س ؤُيَا، مِينْزِي أَذْ نطّفْ ثَاڭلْذِيثْ يَاركّْننْ، أجّْ أَنغْ أَذْ نقِّيمْ نتّطّفْ ذِي أَرْضَا إِ زِي نتّْسخَّارْ إِ أَربِّي ؤُ نسَّارْضَا إِ-ث س ؤُوقَّارْ ذ ثِيڭّْوُوذِي، [v] 29 مِينْزِي أَربِّي نّغْ ذ إِشْثْ ن ثِيمسِّي إِتّتّنْ. [w]