1 ثُوغَا مَارَّا ثَامُّورْثْ س يِيڒسْ ذ إِجّنْ ؤُ س ڒْهَارْذْ ذ إِجّنْ. 2 إِمْسَارْ ڒَامِي فسْينْ إِقِيضَانْ نْسنْ ؤُشَا فّْغنْ-د زِي شَّارْقْ، ؤُفِينْ إِجّْ ن ڒوْضَا ذِي ثمُّورْثْ ن شِينْعَارْ، ؤُشَا قِّيمنْ زدّْغنْ ذِينِّي. [a] 3 نِيثْنِي نَّانْ، كُوڒْ إِجّْ إِ ونّغْنِي: ”أَرَاحمْ-د، أَذْ نڭّْ إِژْرَا زِي ثْڒَاخْثْ، أَذْ ثنْ نسّحْمَا!“ أَمُّو إِ ذ أَسنْ ثذْوڒْ ثْڒَاخْثْ ذ أَژْرُو ؤُ أَشَارْمُوضْ إِذْوڒْ غَارْسنْ ذ ثَارِّيسْثْ. 4 خَاسْ ؤُشَا نَّانْ: ”زِيذْ، أَذْ نبْنَا إِشْثْ ن ثنْذِينْثْ ذ إِشْثْ ن صُّومْعثْ، ثَاقِيشَّاثْ نّسْ أَذْ د-ثَاوضْ غَارْ ؤُجنَّا، ؤُ جّمْ أَنغْ أَذْ نڭّْ إِجّْ ن يِيسمْ إِ نشِّينْ، حِيمَا وَارْ نتّمْسبْضِي شَا خْ وُوذمْ ن مَارَّا ثَامُّورْثْ.“ [b]

5 خنِّي إِهْوَا-د سِيذِي، حِيمَا أَذْ إِژَارْ ثَانْذِينْثْ ذ صُّومْعثْ نِّي بْنَانْ ثَارْوَا ن بْنَاذمْ. 6 إِنَّا سِيذِي: ”خْزَارْ، أَقَا أَثنْ ذ ڒْڭنْسْ ذ إِجّنْ ؤُ مَارَّا إِنَا غَارْسنْ إِجّْ ن يِيڒسْ. وَا ذ بدُّو ن مِينْ غَا ڭّنْ. ڒخُّو وَارْ ذِينْ مِينْ ثنْ إِ غَا إِسّْبدّنْ خْ وبْرِيذْ نْسنْ نِّي نْوَانْ أَذْ ڭّنْ. 7 أَرَاحمْ-د، أَذْ نهْوَا ؤُشَا أَذْ نسّْخَارْوضْ إِڒسْ نْسنْ، حِيمَا كُوڒْ إِجّنْ وَارْ إِفهّمْ عَاذْ إِڒسْ ن ونِّي ث يُوذْسنْ.“ 8 أَمُّو إِ ثنْ إِزُّوزَارْ سِيذِي سّنِّي خْ وُوذمْ ن مَارَّا ثَامُّورْثْ ؤُشَا سّْبدّنْ ڒبْنِي ن ثنْذِينْثْ. [c] 9 خْ ؤُيَا إِ ذ أَسْ ڒَاغَانْ إِ ثنْذِينْثْ نِّي س يِيسمْ ن ’بَابِيلْ‘، مِينْزِي ذِينْ إِسّْخَارْوضْ سِيذِي إِڒسْ ن مَارَّا ثَامُّورْثْ ؤُ سّنِّي إِ ثنْ إِزُّوزَارْ سِيذِي خْ وُوذمْ ن مَارَّا ثَامُّورْثْ.

إِنَا ذ إِمزْرُوينْ ن يِينِّي د-إِتّْوَاخڒْقنْ زِي شَامْ. ◼11:‏9 ’بَابِيلْ‘ - إِسمْ-أَ وَانِيثَا إِخْسْ أَذْ يِينِي ’أَخَارْوضْ‘ نِيغْ ’أَربِّي إِسّْخَارْوَاضْ‘.

10 ؤُمِي ثُوغَا غَارْ شَامْ مْيَا ن إِسڭّْوُوسَا، إِجَّا-د أَرْفَاكْشَاذْ، ثْنَاينْ ن إِسڭّْوُوسَا أَوَارْنِي إِ سّحْڒثْ. ◼11:‏10 أَفسَّارْ - ذڭْ وذْلِيسْ أَمزْوَارُو 5:32 نقَّارْ أَقَا شَامْ إِتّْوَاخڒْقذْ-د أَوَارْنِي ڒَامِي ثُوغَا نُوحْ غَارسْ 500 ن إِسڭّْوُوسَا. ذڭْ ؤُسڭّْوَاسْ وِيسّْ ستَّا مْيَا ن ثُوذَارْثْ ن نُوحْ ثبْذَا سّحْرثْ (أَمز. 7:11). ثُوغَا ثُوسَا-د سّحْڒثْ إِجّْ ن ؤُسڭّْوَاسْ خْ ثمُّورْثْ. أَكْ-ذ إِنغْمِيسنْ إِ نُوفَا ذڭْ وَاوَاڒنْ ن أَيَا-يَا نسّنْ أَقَا نُوحْ ثُوغَا غَارسْ 502 ن إِسڭّْوُوسَا ڒَامِي د-إِتّْوَاخڒْقْ شَامْ. ’شَامْ‘ - إِسمْ-أَ وَانِيثَا إِخْسْ أَذْ يِينِي ’إِسمْ‘.  [f] 11 أَوَارْنِي ڒَامِي د-إِجَّا أَرْفَاكْشَاذْ، إِدَّارْ شَامْ عَاذْ خمْسَا-مْيَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ. ◼11:‏11 أَفسَّارْ - أَقَا شَامْ إِذْوڒْ غَارسْ 600 ن إِسڭّْوُوسَا. س ؤُينِّي ثُوغَا عَاذْ إِدَّارْ ڒَامِي ثُوغَا إِبْرَاهِيمْ غَارسْ 50 ن إِسڭّْوُوسَا.

12 إِدَّارْ أَرْفَاكْشَاذْ خمْسَا ؤُ-ثْڒَاثِينْ ن إِسڭّْوُوسَا، خنِّي إِجَّا-د شَالَاحْ. ◼11:‏12 ’شَالَاحْ‘ - إِسمْ وَانِيثَا إِخْسْ أَذْ يِينِي ’ڒسْنَاحْ‘ نِيغْ ’أَرَّاوْ‘. 13 أَوَارْنِي ڒَامِي د-إِجَّا أَرْفَاكْشَاذْ شَالَاحْ، إِدَّارْ عَاذْ أَربْعَا-مْيَا ؤُ-ثْڒَاثَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

14 إِدَّارْ شَالَاحْ ثْڒَاثِينْ ن إِسڭّْوُوسَا، خنِّي إِجَّا-د عَابِيرْ. ◼11:‏14 ’عَابِيرْ‘ - إِسمْ وَانِيثَا إِخْسْ أَذْ يِينِي ’ثَامُّورْثْ ن ؤُجمَّاضْ‘. 15 أَوَارْنِي ڒَامِي د-إِجَّا شَالَاحْ عَابِيرْ، إِدَّارْ عَاذْ أَربْعَا-مْيَا ؤُ-ثْڒَاثَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

16 إِدَّارْ عَابِيرْ أَربْعَا ؤُ-ثْڒَاثِينْ ن إِسڭّْوُوسَا، خنِّي إِجَّا-د فَالَاجْ. ◼11:‏16 ’فَالَاجْ‘ - إِسمْ وَانِيثَا إِخْسْ أَذْ يِينِي ’أَبطُّو‘ نِيغْ ’أَفدْجقْ‘. 17 أَوَارْنِي ڒَامِي د-إِجَّا فَالَاجْ، إِدَّارْ عَابِيرْ عَاذْ أَربْعَا-مْيَا ؤُ-ثْڒَاثِينْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

18 إِدَّارْ فَالَاجْ ثْڒَاثِينْ ن إِسڭّْوُوسَا، خنِّي إِجَّا-د رَاعُووْ. ◼11:‏18 ’رَاعُووْ‘ - إِسمْ وَانِيثَا إِخْسْ أَذْ يِينِي ’أَمدُّوكّڒْ‘.  [l] 19 أَوَارْنِي ڒَامِي د-إِجَّا رَاعُووْ، إِدَّارْ فَالَاجْ عَاذْ مِيثَاينْ ؤُ-ثسْعَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

20 إِدَّارْ رَاعُووْ ثْنَاينْ ؤُ-ثْڒَاثِينْ ن إِسڭّْوُوسَا، خنِّي إِجَّا-د سَارُوجْ.◼11:‏20 ’سَارُوجْ‘ - إِسمْ وَانِيثَا إِخْسْ أَذْ يِينِي ’ثَاسطَّا‘ نِيغْ ’ڒْْفَارْعْ‘. 21 أَوَارْنِي ڒَامِي د-إِجَّا سَارُوجْ، إِدَّارْ رَاعُووْ عَاذْ مِيثَاينْ ؤُ-سبْعَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

22 إِدَّارْ سَارُوجْ ثْڒَاثِينْ ن إِسڭّْوُوسَا، خنِّي إِجَّا-د نَاحُورْ.◼11:‏22 ’نَاحُورْ‘ - إِسمْ وَانِيثَا إِخْسْ أَذْ يِينِي ’أَنفّحْ يُودْجْغنْ‘. 23 أَوَارْنِي ڒَامِي د-إِجَّا نَاحُورْ، إِدَّارْ سَارُوجْ عَاذْ مِيثَاينْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

24 إِدَّارْ نَاحُورْ ثسْعَا ؤُ-عِيشْرِينْ ن إِسڭّْوُوسَا، خنِّي إِجَّا-د ثَارَاحْ.◼11:‏24 ’ثَارَاحْ‘ - إِسمْ وَانِيثَا إِخْسْ أَذْ يِينِي ’أَمْشَانْ ن وَاريّحْ‘. 25 أَوَارْنِي ڒَامِي د-إِجَّا نَاحُورْ ثَارَاحْ، إِدَّارْ عَاذْ مْيَا ؤُ-ثسْعَاطَاشْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

26 إِدَّارْ ثَارَاحْ سبْعِينْ ن إِسڭّْوُوسَا، خنِّي إِجَّا-د أَبْرَامْ، نَاحُورْ ذ هَارَانْ.

إِنَا ذ إِمزْرُوينْ ن يِينِّي د-إِتّْوَاخڒْقنْ زِي ثَارَاحْ. ◼11:‏26 ’أَبْرَامْ‘ - إِسمْ-أَ وَانِيثَا إِخْسْ أَذْ يِينِي ’ثَابَابَاثْ إِعُودْجنْ‘ نِيغْ ’بَابَاسْ ن أَرَامْ‘.

27 ثَارَاحْ إِجَّا-د أَبْرَامْ، نَاحُورْ ذ هَارَانْ، ؤُ هَارَانْ إِجَّا-د لُوطْ. [q] 28 إِمُّوثْ هَارَانْ زَّاثْ إِ بَابَاسْ ثَارَاحْ ذِي ثمُّورْثْ مَانِي د-إِخْڒقْ نتَّا، ذِي ؤُرْ ن إِكَالْذَانِييّنْ. 29 ؤُشَا كْسِينْ أَبْرَامْ ذ نَاحُورْ إِ يِيخفْ نْسنْ ثِيمْغَارِينْ. إِسمْ ن ثمْغَارْثْ ن أَبْرَامْ ثُوغَا-ث ذ سَارَايْ ؤُ إِسمْ ن ثمْغَارْثْ ن نَاحُورْ ذ مِيلْكَا، يدْجِيسْ ن هَارَانْ، بَابَاسْ ن مِيلْكَا ذ يِيسْكَا. [r] 30 سَارَايْ ثُوغَا-ت وَارْ د-ثتِّيرُووْ، ثُوغَا وَارْ غَارسْ بُو ؤُحنْجِيرْ. [s] 31 ؤُشَا إِكْسِي ثَارَاحْ أَبْرَامْ، مِّيسْ، ذ لُوطْ مِّيسْ ن هَارَانْ، مِّيسْ ن مِّيسْ، ذ سَارَايْ، ثَاسْڒِيثْ نّسْ، ثَامْغَارْثْ ن مِّيسْ أَبْرَامْ، ؤُشَا نِيثْنِي فّْغنْ جْمِيعْ زِي ؤُرْ ن إِكَالْذَانِييّنْ، حِيمَا أَذْ رَاحنْ غَارْ ثمُّورْثْ ن كنْعَانْ. إِوْضنْ غَارْ حَارَانْ ؤُشَا زدّْغنْ ذِينِّي. ◼11:‏31 ’إِكَالْذَانِييّنْ‘ - إِكَالْذَانِييّنْ ثُوغَا زدّْغنْ ذِي جّْوَايهْ ن ؤُرْ، إِشْثْ ن ثنْذِينْثْ ذِي ثْڭلْذِيثْ ن مِيسُوپُوثَامِييَا. ذڭْ وُوسَّانْ-أَ نسّنْ بلِّي جّْوَايهْ ن مِيسُوپُوثَامِييَا أَقَا-ثنْثْ ذ شَّامَالْ ن لْعِيرَاقْ. أَڒْ إِ ڒخُّو أَطَّاسْ ن إِوْذَانْ ذِي شَّامَالْ ن لْعِيرَاقْ سَّاوَاڒنْ س ثُوثْلَايْثْ ن ثْكَالْذَانِيثْ.  [u] 32 ؤُمِي ثڭَّا ثَارَاحْ مِيثَاينْ ؤُ-خمْسَا ن إِسڭّْوُوسَا، إِمُّوثْ ثَارَاحْ ذِي حَارَانْ.