1 أَ إِڭَالَاطِييّنْ إِفْغُوڒنْ، وِي كنِّيوْ إِسُّوفّْغنْ زڭْ وبْرِيذْ؟ أَقَا لْمَاسِيحْ ثُوغَا إِتّْوَارْشمْ قِيبَاتْشْ إِ ثِيطَّاوِينْ نْومْ أَمْ ونِّي إِمُّوثنْ خْ صَّالِيبْ. [a] 2 ذڭَّا وَاهَا خْسغْ أَذْ ث سّْنغْ زَّايْومْ: مَا ثطّْفمْ أَرُّوحْ س ڒخْذَايمْ ن شَّارِيعَا نِيغْ ؤُمِي ثتّڭّمْ أَرَّايْ إِ لْ-إِيمَانْ؟ 3 مَا أَمنِّي ثدْجَامْ ذ إِفْغُوڒنْ، أَقَا ثبْذَامْ س أَرُّوحْ، مَا ڒخُّو أَذْ ثْكمّْڒمْ س دَّاثْ؟ 4 مَا ثكْسِيمْ ثَامَارَا أَطَّاسْ خْ وَالُو؟ مَا ثُوغَا س ثِيذتّْ خْ وَالُو؟ 5 ونِّي ذ أَومْ إِوْشِينْ أَرُّوحْ ؤُشَا إِتّڭّْ لْمُوعْجِيزَاثْ جَارْ أَومْ، مَا إِتّڭّْ إِ-ثنْثْ زِي ڒخْذَايمْ ن شَّارِيعَا نِيغْ ؤُمِي ثتّسْڒَامْ ثَابَارّحْثْ ن لْ-إِيمَانْ، 6 أَمْ مَامّشْ ثُوغَا إِبْرَاهِيمْ يُومنْ ذِي أَربِّي ؤُشَا خنِّي إِتّْوَاحْسبْ أَسْ-د مَانْ أَيَا ذ ثَاسڭْذَا. [b] 7 س ؤُينِّي سّْنمْ، بلِّي إِنِّي إِدْجَانْ ن لْ-إِيمَانْ، نِيثْنِي ذ أَيْثْ ن إِبْرَاهِيمْ. 8 مِينْزِي إِسّنْ أَربِّي قْبڒْ، أَقَا ڒڭْنُوسْ أَذْ تّْوَاسڭّْذنْ س لْ-إِيمَانْ، إِزَّارْ إِبشَّارْ نتَّا إِ إِبْرَاهِيمْ س ڒخْبَارْ أَصبْحَانْ، أَمْ مَامّشْ قَّارنْثْ ثِيرَا إِقدّْسنْ: ”ذَايكْ إِ غَا تّْوَابَارْكنْ ڒڭْنُوسْ مَارَّا.“ [c] 9 س ؤُينِّي إِنِّي يُومْننْ أَذْ تّْوَابَارْكنْ أَكْ-ذ ڒْمُومنْ إِبْرَاهِيمْ.

10 مَارَّا إِنِّي إِدَّارنْ س ڒخْذَايمْ ن شَّارِيعَا، أَقَا نِيثْنِي سَاذُو نّعْڒثْ، مِينْزِي ثُورَا: ”ذ أَمنْعُوڒْ كُوڒْ إِجّنْ ونِّي وَارْ إِقِّيمنْ إِتّطّفْ ذِي مَارَّا ثِيمسْڒَايِينْ يُورَانْ ذڭْ وذْلِيسْ ن شَّارِيعَا حِيمَا أَذْ ثنْثْ إِڭّْ!“ [d] 11 أَقَا إِتّْبَانْ مْلِيحْ بلِّي وَارْ ذِينْ حذْ إِ غَا إِتّْوَاسڭّْذنْ غَارْ أَربِّي س شَّارِيعَا، مِينْزِي ثُورَا: ”أَمْسڭَّاذْ س لْ-إِيمَانْ أَذْ إِدَّارْ!“ [e] 12 خنِّي شَّارِيعَا وَارْ ثْكمّڒْ شَا س لْ-إِيمَانْ، مَاشَا بْنَاذمْ ونِّي إِتّڭّنْ مِينْ ذَايسْ يُورِينْ، أَذْ زَّايسْ إِدَّارْ. [f] 13 مَاشَا لْمَاسِيحْ أَقَا إِخدْجصْ خَانغْ، حِيمَا أَذْ أَنغْ إِفكّْ زِي نّعْڒثْ نِّي إِدْجَانْ خْ يِينِّي سَاذُو شَّارِيعَا أَمْ ذ إِذْوڒْ خَانغْ ذ أَمنْعُوڒْ، مِينْزِي ثُورَا: ”ذ أَمنْعُوڒْ كُوڒْ إِجّنْ إِ ث غَا يُويْڒنْ خْ ثحْنَاشْثْ!“، [g] 14 حِيمَا أَذْ ثِيوضْ لْبَارَاكَا ن إِبْرَاهِيمْ غَارْ ڒڭْنُوسْ س يَاسُوع لْمَاسِيحْ، مَاحنْذْ س لْ-إِيمَانْ أَذْ نطّفْ لْوَاعْذْ ن أَرُّوحْ.

15 أَ أَيْثْمَا، أَذْ سِّيوْڒغْ خْ ڒحْسَابْ ڒعْقڒْ ن بْنَاذمْ: أَقَا إِجّْ ن ڒْعَاهْذْ إِتّْوَاڭّنْ جَارْ إِوْذَانْ، وَارْ إِزمَّارْ ؤُڒَا ذ إِجّْ أَذْ ث إِبْضڒْ نِيغْ أَذْ ذَايسْ إِبدّڒْ شَا. [h] 16 أَقَا لْوُوعُوذْ تّْوَاڭّنْ إِ إِبْرَاهِيمْ ذ زَّارِيعثْ نّسْ. نتَّا وَارْ ذ أَسْ يِينِي شَا: ”إِ إِعقَّاينْ ن زَّارِيعثْ نْومْ!“، أَمْ إِ وَاطَّاسْ، مَاشَا: ”إِ ؤُعقَّا ن زَّارِيعثْ نّشْ!“، أَمْ إِ يِيجّنْ، أَقَا-ث ذ لْمَاسِيحْ. [i] 17 خنِّي قَّارغْ أَمُّو: ڒْعَاهْذْ نِّي إِڭِّينْ أَربِّي زِيشْ ذِي لْمَاسِيحْ، وَارْ ث ثْبطِّيڒْ شَا شَّارِيعَا، ثنِّي ثُوسَا-د أَربْعَا-مْيَا ؤُ-ثْڒَاثِينْ ن إِسڭّْوُوسَا أَوَارْنِي مَانْ أَيَا، حِيمَا أَذْ ثڭّْ لْوَاعْذْ إِخْوَانْ. [j] 18 مِينْزِي مَاڒَا ڒْوَارْثْ إِدْجَا س شَّارِيعَا، أَقَا وَارْ إِدْجِي عَاذْ س لْوَاعْذْ إِ إِبْرَاهِيمْ. مَاشَا أَربِّي أَقَا إِوْشَا أَسْ ث س لْوَاعْذْ. [k]

19 خنِّي إِ ؤُمِي ثْنفّعْ شَّارِيعَا؟ أَقَا ثتّْوَامَّارْنِي غَارْ لْوَاعْذْ خْ سِّيبّثْ ن دّْنُوبْ أَڒَامِي د-ثُوسَا زَّارِيعثْ ثنِّي ؤُمِي إِتّْوَاڭّْ لْوَاعْذْ. ؤُ س لْمَالَاكَاثْ ثمّوْشْ شَّارِيعَا ذڭْ ؤُفُوسْ ن إِجّْ ن لْوَاسِيثْ. [l] 20 لْوَاسِيثْ وَارْ إِدْجِي ذ لْوَاسِيثْ ن إِجّنْ، مَاشَا أَربِّي ذ إِجّنْ.

21 مَا خنِّي شَّارِيعَا ضِيدّْ إِ لْوَاعْذْ ن أَربِّي؟عمَّارْصْ! مِينْزِي مَاڒَا ثُوغَا ثمّوْشْ إِشْثْ ن شَّارِيعَا ثْزمَّارْ أَذْ ثسّدَّارْ، ذ ثِيذتّْ ثُوغَا ثَاسڭْذَا س شَّارِيعَا. 22 مَاشَا ثِيرَا إِقدّْسنْ بلّْعنْثْ خْ مَارَّا ذِي دّْنُوبْ، حِيمَا لْوَاعْذْ أَذْ إِمّوْشْ س لْ-إِيمَانْ ذِي يَاسُوع لْمَاسِيحْ إِ يِينِّي يُومْننْ. [m]

23 مَاشَا قْبڒْ مَا إِ د غَا يَاسْ لْ-إِيمَانْ، ثُوغَا أَنغْ نمّحْضَا ذِي شَّارِيعَا ؤُشَا إِتّْوَابلّعْ خَانغْ زِي لْ-إِيمَانْ، ونِّي ثُوغَا إِ غَا إِضْهَارنْ عَاذْ. 24 س ؤُينِّي ثُوغَا شَّارِيعَا أَمْ ونِّي ذ أَنغْ إِتَّاربَّانْ أَڒْ لْمَاسِيحْ، حِيمَا أَذْ نتّْوَاسڭّذْ س لْ-إِيمَانْ. [n] 25 مَاشَا ڒخُّو، ؤُمِي د-يُوسَا لْ-إِيمَانْ، أَقَا وَارْ نقِّيمْ عَاذْ سَاذُو ونِّي إِتَّاربَّانْ.

26 مِينْزِي مَارَّا كنِّيوْ ذ أَرَّاونْ ن أَربِّي س لْ-إِيمَانْ ن يَاسُوع لْمَاسِيحْ. [o] 27 مِينْزِي مَارَّا إِنِّي إِتّْوَاسّْغضْصنْ ذِي لْمَاسِيحْ، أَقَا أَرْضنْ لْمَاسِيحْ. [p] 28 خنِّي وَارْ ذِينْ ؤُذَايْ نِيغْ أَرَامِييْ، وَارْ ذِينْ عَاذْ إِسْمغْ نِيغْ أَحُورِّي، وَارْ ذِينْ عَاذْ أَرْيَازْ نِيغْ ثَامْغَارْثْ، مِينْزِي مَارَّا كنِّيوْ ذ إِجّنْ إِ ثدْجَامْ ذِي يَاسُوع لْمَاسِيحْ. [q] 29 مَاڒَا كنِّيوْ ثدْجَامْ ن لْمَاسِيحْ، أَقَا كنِّيوْ ذ زَّارِيعثْ ن إِبْرَاهِيمْ ؤُشَا عْلَاحْسَابْ لْوَاعْذْ ذ إِوْرِيثنْ. [r]