1 سِيذِي إِنَّا إِ مُوسَا: ”قسّْ إِ يِيخفْ نّشْ ثْنَاينْ ن ثڒْوِيحِينْ ن وژْرُو أَمْ ثْمزْوُورَا، ؤُشَا نشّْ أَذْ أَرِيغْ خْ ثڒْوِيحِينْ نِّي أَوَاڒنْ ذ إِجّنْ إِ ثُوغَا ذِي ثڒْوِيحِينْ ثِيمزْوُورَا إِ ثَارْژِيذْ. [a] 2 سوْجذْ إِ صّْبحْ ؤُشَا ڭعّذْ ذِي صّْبحْ غَارْ وذْرَارْ ن سِينَا ؤُشَا بدّْ ذِينْ زَّاثِي خْ ثْقِيشّثْ ن وذْرَارْ. 3 وَارْ إِعدّڒْ أَذْ إِڭعّذْ ؤُڒَا ذ إِجّْ ن بْنَاذمْ أَكِيذكْ، نِيغْ أَذْ إِبَانْ حذْ ذڭْ وذْرَارْ أَمْ إِكْمڒْ. ؤُڒَا ذ ؤُدْجِي ذ إِفُونَاسنْ ذ ثْفُونَاسِينْ وَارْ زمَّارنْ أَذْ أَروْسنْ طَّارْفْ إِ وذْرَارْ.“ ◼34:‏3 ’بْنَاذمْ‘ - س ثْعِيبْرَانِيثْ ’أَرْيَازْ‘.  [c]

4 خنِّي إِقسّْ ثْنَاينْ ن ثڒْوِيحِينْ ن وژْرُو أَمْ ثْمزْوُورَا، ؤُشَا إِكَّارْ مُوسَا ذِي صّْبحْ زِيشْ ؤُشَا إِڭعّذْ غَارْ وذْرَارْ ن سِينَا أَمْ مَامّشْ ث إِوصَّا سِيذِي ؤُشَا يِيوِي أَكِيسْ ذڭْ ؤُفُوسْ نّسْ ثْنَاينْ ن ثڒْوِيحِينْ ن وژْرُو.

5 إِهْوَا-د سِيذِي ذڭْ ؤُسيْنُو، إِبدّْ أَكِيذسْ ذِينْ ؤُشَا إِڒَاغَا س يِيسمْ ن ’سِيذِي‘. 6 إِژْوَا سِيذِي زَّاثْ إِ ؤُغمْبُوبْ نّسْ ؤُشَا إِعيّذْ: ”سِيذِي، سِيذِي، أَربِّي، ذ ونِّي إِشُّورنْ س أَرّحْمثْ ذ ثحْنُونشْثْ، غَارسْ تَّاسِيعْ ن ڒْخَاضَارْ، ذَايسْ أَطَّاسْ ن ثْمخْسِيوْثْ إِشوَّارنْ ذ ڒَامَانْ، [d] 7 ذ ونِّي إِحطَّانْ ثَامخْسِيوْثْ نّسْ إِشوَّارنْ إِ ڒُوڒُوفْ، ذ ونِّي إِغفَّارنْ ڒْمُوعْصِييّثْ ذ خطُّو ذ دّْنُوبْ، ذ ونِّي وَارْ إِتّْبَارِّينْ ونِّي إِتّڭّنْ دّنْبْ، ذ ونِّي د-يَارزْفنْ ڒْمُوعْصِييّثْ ن إِبَابَاثنْ ذڭْ إِحنْجِيرنْ ؤُ ذڭْ إِحنْجِيرنْ ن إِحنْجِيرنْ نْسنْ أَڒْ جِّيڒْ وِيسّْ ثْڒَاثَا ذ وِيسّْ أَربْعَا.“ [e]

8 مُوسَا يُوضَارْ س وُوذمْ نّسْ غَارْ ثمُّورْثْ ؤُشَا إِبنْذقْ. 9 إِنَّا: ”أَ سِيذِي إِنُو، مَاڒَا ؤُفِيغْ خنِّي أَرْضَا ذِي ثِيطَّاوِينْ نّشْ، أَذْ يُويُورْ خنِّي سِيذِي إِنُو ذِي ڒْوسْطْ نّغْ، مِينْزِي ڒْڭنْسْ إِقْسحْ. غْفَارْ أَنغْ ڒْمُوعْصِييّثْ نّغْ ؤُ قْبڒْ أَنغْ ذ ڒْوَارْثْ نّشْ!“ [f] 10 نتَّا إِنَّا: ”خْزَارْ، نشّْ أَذْ ڭّغْ ڒْعَاهْذْ. زَّاثْ إِ مَارَّا ڒْڭنْسْ نّكْ، أَذْ ڭّغْ ڒعْجَايبْ وَارْ إِتّْوَاڭّنْ شَا ذِي مَارَّا ثَامُّورْثْ ؤُ جَارْ مَارَّا ڒڭْنُوسْ، أَڒَامِي مَارَّا ڒْڭنْسْ ذِي ڒْوسْطْ نّسْ إِ زِي ثدْجِيذْ، أَذْ إِژَارْ مِينْ إِڭَّا سِيذِي، مِينْزِي مِينْ غَا ڭّغْ أَكِيذكْ أَذْ إِسّڭّْوذْ أَطَّاسْ. [g] 11 حْضَا مِينْ خْ شكْ وصِّيغْ أَسّْ-أَ! خْزَارْ، أَذْ أَژّْڒغْ زَّاثْ إِ ؤُغمْبُوبْ نّشْ خْ إِمُورِييّنْ ذ أَيْثْ ن كنْعَانْ ذ إِحِيتِّييّنْ ذ إِفِيرِيزِييّنْ ذ إِحِيوِييّنْ ذ إِيِيبُوسِييّنْ. 12 غَاركْ أَذْ ثڭّذْ ڒْعَاهْذْ أَكْ-ذ ؤُمزْذُوغْ ن ثمُّورْثْ مَانِي غَا ثَاذْفذْ، حِيمَا نتَّا وَارْ ذ أَشْ إِتِّيڒِي ذ ڒْفخْ ذِي ڒْوسْطْ نّشْ. [h] 13 إِتّْخصَّا أَومْ أَذْ ثْغضْڒمْ إِعَالْطَارنْ نْسنْ ؤُ أَذْ ثَارْژَامْ إِمَايْضُوثنْ نْسنْ إِقدّْسنْ ؤُ أَذْ ثْهذْممْ ثِيربِّينْ نْسنْ ن شْوَارْثِي. 14 وَارْ تّْبنْذِيقْ إِ أَربِّي نّغْنِي، مِينْزِي سِيذِي، ونِّي ؤُمِي قَّارنْ ’أَنسَّامْ‘، أَقَا-ث ذ إِجّْ ن أَربِّي إِتَّاسْمنْ. ◼34:‏14 ’أَنسَّامْ‘ - أَربِّي إِخْسْ أَقَا إِوْذَانْ أَذْعبْذنْ نتَّا وَاهَا، مِينْزِي وَارْ ذِينِّي أَربِّي يُوعْڒَانْ خْ مَارَّا مِينْ إِدْجَانْ أَمْ نتَّا. س ؤُينِّي نْزمَّارْ أَذْ نِينِي أَقَا نتَّا إِتَّاسمْ، نتَّا وَارْ إِتّخْسْ أَذْ ث نغْذَارْ، أَذْ نُويُورْ أَوَارْنِي إِ إِربِّيثنْ نّغْنِي. أَوَاڒْ ’أَنسَّامْ‘ إِخْسْ أَذْ يِينِي ’ونِّي إِتَّاسْمنْ‘.  [j] 15 غَاركْ أَذْ ثڭّذْ ڒْعَاهْذْ أَكْ-ذ إِمزْذَاغْ ن ثمُّورْثْ، ؤُشَا خنِّي أَذْ سّْفسْذنْ نِيثْنِي إِخفْ نْسنْ ؤُمِي غَا ذوْڒنْ أَوَارْنِي إِ إِربِّيثنْ نْسنْ، أَذْ قدّْمنْ ثِيغَارْصَا إِ إِربِّيثنْ نْسنْ، ؤُشَا أَذْ شكْ عَارْضنْ إِ مَاشَّا ن ثْغَارْصَا نْسنْ. 16 أَذْ ثكْسِيذْ ثِيحنْجِيرِينْ نْسنْ ذ ثِيمْغَارِينْ إِ إِحنْجِيرنْ نّشْ، مَاشَا أَذْ سّْفسْذنْثْ ثْحنْجِيرِينْ نْسنْ إِخفْ نْسنْثْ ؤُمِي غَا ذوْڒنْ أَوَارْنِي إِ إِربِّيثنْ نْسنْثْ ؤُشَا أَذْ أَرّنْثْ إِحنْجِيرنْ نّشْ أَذْ ذوْڒنْ أَوَارْنِي إِ إِربِّيثنْ نْسنْثْ. [k]

17 وَارْ تّڭّْ إِ يِيخفْ نّشْ إِربِّيتّنْ ن ؤُفسَّايْ. ◼34:‏17 ’إِربِّيثنْ ن ؤُفسَّايْ‘ - إِخْسْ أَذْ يِينِي ’ڒخْيَارَاثْ إِفسْينْ ن إِربِّيثنْ نْسنْ‘.

18 أَذْ ثحْضِيضْ ڒْعِيذْ ن وغْرُومْ بْڒَا أَنْثُونْ: سبْعَا ن وُوسَّانْ أَذْ ثشّذْ أَغْرُومْ بْڒَا أَنْثُونْ، ذِي ڒْوقْثْ إِتّْوَاڭّنْ ذڭْ ؤُيُورْ أَبِيبْ، أَمْ مَامّشْ شكْ وصِّيغْ، مِينْزِي ذڭْ ؤُيُورْ أَبِيبْ إِ د-ثفّْغذْ زِي مِيصْرَا. [m]

19 مَارَّا مِينْ يَارزّْمنْ ڒمْڒَاوثْ ذ أَمزْوَارُو إِنُو، مَارَّا إِوثْمَانْ ن ڒبْهَايمْ نّشْ إِ غَا يَارْزّْمنْ ڒمْڒَاوثْ ذ أَمزْوَارُو، أَمْ ونِّي ن ؤُفُونَاسْ، أَمْ ونِّي ن وُودْجِي. [n] 20 مَاڒَا أَمنْزُو ن وغْيُوڒْ يَارْزمْ ڒمْڒَاوْرَاثْ ذ أَمزْوَارُو، أَذْ ث ثفْذِيذْ س يِيجّْ زڭْ وُودْجِي. مَاڒَا وَارْ ث ثفْذِيذْ، أَذْ أَسْ ثَارْژذْ إِرِي. أَذْ ثفْذِيذْ مَارَّا إِمنْزَا ن إِحنْجِيرنْ نّشْ.

وَارْ إِعدّڒْ أَذْ ضْهَارنْ س إِفَاسّنْ خْوَانْ زَّاثْ إِ وُوذمْ إِنُو. [o]

21 ستَّا ن وُوسَّانْ أَذْ ثْخذْمذْ، مَاشَا ذڭْ وَاسّْ وِيسّْ سبْعَا أَذْ ثَاريّْحذْ. ؤُڒَا ذِي ڒْْوقْثْ ن ثْيَارْزَا ذ ثْميْرَا أَذْ ثَاريّْحذْ. [p]

22 أَذْ ثڭّذْ ڒْعِيذْ ن سِيمَانَاثْ، أَقَا-ث ذ ڒْعِيذْ ن ثْمنْزُوثْ ن ثْميْرَا ن يِيرْذنْ، ؤُڒَا ذ ڒْعِيذْ ن ؤُسْمُونِي غَارْ ؤُنڭَّارْ ن ؤُسڭّْوَاسْ. [q]

23 كُوڒْ أَرْيَازْ أَذْ د-إِبَانْ ثْڒَاثَا ن ثْوَاڒَاوِينْ ذڭْ ؤُسڭّْوَاسْ زَّاثْ إِ وُوذمْ ن سِيذِي، سِيذِي، أَربِّي ن إِسْرَائِيل، [r] 24 مِينْزِي زَّاثْ إِ ؤُغمْبُوبْ نّشْ أَذْ كّْسغْ ثَاسْغَارْثْ ن ڒْوَارْثْ خْ ڒڭْنُوسْ ؤُشَا أَذْ سّْوسْعغْ إِيْمِيرنْ نّشْ ؤُشَا ؤُڒَا ذ إِجّنْ أَذْ إِمّژْرِي أَذْ يَاشَارْ ثَامُّورْثْ نّشْ، خْمِي غَا ثْڭعّْذذْ ثْڒَاثَا ن ثْوَاڒَاوِينْ ذڭْ ؤُسڭّْوَاسْ، حِيمَا أَذْ ثْبَانذْ زَّاثْ إِ وُوذمْ ن سِيذِي، أَربِّي نّشْ.

25 وَارْ تّْقدّمْ إِذَامّنْ ن ثْغَارْصْثْ إِنُو أَكْ-ذ مِينْ إِخمَّارنْ. ثَاغَارْصْثْ ن ڒْعِيذْ ن ثْغَارْصْثْ ن ؤُسعْذُو وَارْ تّْنُوسِي دْجِيڒثْ أَڒْ صّْبحْ. [s]

26 ثَامزْوَارُوثْ ن ثْمنْزُوثْ ن وُوذمْ ن ثمُّورْثْ نّشْ أَذْ ت-إِ-د-ثَاوْيذْ غَارْ ثَادَّارْثْ ن سِيذِي، أَربِّي نّشْ.

وَارْ سْننِّي إِغَايْضْ ذ أَمژْيَانْ س ؤُغِي ن يمَّاسْ.“ [t]

27 إِنَّا سِيذِي إِ مُوسَا: ”أَرِي أَوَاڒنْ-أَ إِ يِيخفْ نّشْ، مِينْزِي أَمْ مَامّشْ قَّارنْ وَاوَاڒنْ-أَ، أَقَا ڭِّيغْ ڒْعَاهْذْ أَكِيذكْ ؤُ أَكْ-ذ إِسْرَائِيل.“ 28 ؤُشَا مُوسَا ثُوغَا ذِينْ أَكْ-ذ سِيذِي أَربْعِينْ ن وُوسَّانْ ذ أَربْعِينْ ن دْجْيَاڒِي. وَارْ إِشِّي أَغْرُومْ نِيغْ إِسْوَا أَمَانْ. ؤُشَا يُورَا ذِي ثڒْوِيحِينْ أَوَاڒنْ ن ڒْعَاهْذْ،عشْرَا ن وَاوَاڒنْ. [u]

29 ڒَْامِي د-إِهْوَا مُوسَا زڭْ وذْرَارْ ن سِينَا، أَمْ ثُوغَا ثْنَاينْ ن ثڒْوِيحِينْ ن شّْهَاذثْ ذڭْ إِفَاسّنْ ن مُوسَا أَمْ د-إِهْوَا زڭْ وذْرَارْ، إِمْسَارْ أَقَا وَارْ إِسِّينْ مُوسَا بلِّي ثِيڒْمشْثْ ن ؤُغمْبُوبْ نّسْ ثَارقّْ مِينْزِي ثُوغَا أَكِيذسْ إِسَّاوَاڒْ. [v] 30 هَارُونْ ذ مَارَّا أَيْثْ ن إِسْرَائِيل صوْضنْ غَارْ مُوسَا، ؤُ خْزَارْ، ثِيڒْمشْثْ ن وُوذمْ نّسْ ثُوغَا ثَارقّْ، ڭّْوذنْ أَذْ غَارسْ د-قَارّْبنْ. 31 إِڒَاغَا-د خَاسنْ مُوسَا ؤُشَا إِذْوڒْ-د هَارُونْ ذ مَارَّا ڒْحُوكَّامْ ن ثْمسْمُونْثْ غَارسْ ؤُشَا إِسِّيوڒْ مُوسَا أَكِيذْسنْ. 32 أَوَارْنِي أَسْ قَارّْبنْ-د مَارَّا أَيْثْ ن إِسْرَائِيل ؤُشَا نتَّا يُومُورْ إِ-ثنْ مَارَّا مِينْ خفْ إِسِّيوڒْ سِيذِي أَكِيذسْ ذڭْ وذْرَارْ ن سِينَا. 33 ڒَْامِي إِكمّڒْ مُوسَا أَوَاڒْ نّسْ أَكِيذْسنْ، إِڭَّا أَڒحَّافْ خْ وُوذمْ نّسْ. [w] 34 خْمِي إِ غَا يِيڒِي مُوسَا زَّاثْ إِ وُوذمْ ن سِيذِي حِيمَا أَذْ كِيذسْ إِسِّيوڒْ، إِكّسْ أَڒحَّافْ، أَڒْ د-إِفّغْ عَاوذْ. ؤُ ڒَامِي د-إِفّغْ غَارْ بَارَّا، إِسِّيوڒْ أَكْ-ذ أَيْثْ ن إِسْرَائِيل مِينْ ذ أَسْ يُومُورْ سِيذِي. 35 ؤُشَا ژْرِينْ أَيْثْ ن إِسْرَائِيل أَغمْبُوبْ ن مُوسَا، أَقَا ثِيڒْمشْثْ ن وُوذمْ نّسْ ثَارقّْ، خنِّي يَارَّا مُوسَا أَڒحَّافْ خْ وُوذمْ نّسْ، أَڒْ د-يُوذفْ عَاوذْ، حِيمَا أَكِيذسْ إِسِّيوڒْ.