1 أَمْ ؤُمحْبُوسْ ذِي سِيذِيثْنغْ، زِييَّارغْ خَاومْ، حِيمَا أَذْ ثُويُورمْ أَمْ مَامّشْ د-ثُوسَا أَكْ-ذ ثْڒَاغِيثْ إِ زِي ثتّْوَاڒَاغَامْ، [a] 2 س مَارَّا أَوَاضعْ ن بُوحْبڒْ، س ثمْهِينْثْ ؤُ س تَّاسِيعْ ن ڒْخَاضَارْ، أَقَا أَذْ ثْقبّْڒمْ إِجّْ ونّغْنِي ذِي ثَايْرِي، [b] 3 أَذْ ثشْضَارمْ مَاحنْذْ أَذْ ثقِّيممْ ثْمُونمْ ذ إِجّْ ذِي أَرُّوحْ س ثْسغْوِينْ ن ڒهْنَا، 4 مَاحنْذْ أَذْ ثِيڒِيمْ ذڭْ إِشْثْ ن أَرِّيمثْ ؤُ ذڭْ إِجّْ ن أَرُّوحْ أَمْ مَامّشْ ؤُمِي ثتّْوَاڒَاغَامْ ذڭْ ؤُسِيثمْ ن ثْڒَاغِيثْ نْومْ ذ إِجّنْ. 5 مَاغَارْ سِيذِي ذ إِجّنْ، ذ لْ-إِيمَانْ ذ إِجّنْ ؤُڒَا ذ أَسغْضصْ ذ إِجّنْ، [c] 6 ؤُ أَربِّي ذ إِجّنْ، بَابَاثْنغْ مَارَّا ؤُ خْ مَارَّا ؤُ س مَارَّا ؤُ ذَايْنغْ مَارَّا. 7 مَاشَا أَرْضَا إِمّوْشْ أَنغْ مَارَّا إِذْنغْ عْلَاحْسَابْ ڒْمِيجَاڒْ ن مِينْ ذ أَنغْ إِوْشَا لْمَاسِيحْ. [d] 8 س ؤُينِّي قَّارنْ:

”إِڭعّذْ غَارْ ڒُوعْڒَا،

يِيوْيِي أَكِيذسْ إِمحْبَاسْ ذِي ثْمحْبَاسْثْ،

إِوْشَا ثِيرْزِيفِينْ إِ إِوْذَانْ.“ [e]

9 مَاشَا مِينْ إِعْنَا عَاوذْ وَاوَاڒْ-أَ، أَقَا نتَّا إِڭعّذْ سنّجْ، مْغِيرْ أَقَا نتَّا غَارْ ؤُمزْوَارْ عَاوذْ ثُوغَا إِهْوَا-د غَارْ طّْرُوفَا ن ثمُّورْثْ ن وَادَّايْ قَاعْ؟! [f] 10 ونِّي ثُوغَا د-إِهْوَانْ، نتَّا عَاوذْ ذ ونِّي ثُوغَا إِڭعّْذنْ سنّجْ إِ مَارَّا إِجنْوَانْ، حِيمَا أَذْ إِسِّيوضْ مَارَّا غَارْ ڒكْمَاڒثْ. [g]

11 نتَّا يَارَّا شَا ذ رُّوسُولْ، شَا ذ إِنَابِييّنْ، شَا ذ إِمْبشَّارنْ، شَا ذ إِمكْسَاونْ ؤُ شَا ذ إِمْسڒْمَاذنْ، [h] 12 حِيمَا أَذْ زَّايْسنْ تّْوَاكمّْڒنْ إِمْقدَّاسنْ إِ ڒْخذْمثْ ن ثْسخَّارْثْ، إِ ڒبْنِي ن أَرِّيمثْ ن لْمَاسِيحْ، [i] 13 أَڒْ إِ غَا نَاوضْ مَارَّا غَارْ ؤُمُونِي ذ إِجّنْ ذِي لْ-إِيمَانْ ؤُ ذِي ثُوسّْنَا ن مِّيسْ ن أَربِّي، أَذْ نِيڒِي ذ إِجّْ ن بْنَاذمْ إِكْمڒْ س ڒعْبَارْ ن صِّيفثْ ثْمُونْ ن لْمَاسِيحْ. 14 إِتّْخصَّا وَارْ نتِّيڒِي أَمْ إِحنْجِيرنْ إِنِّي إِتّْوَاعَارَّانْ زِي طَّارْفْ غَارْ ونّغْنِي ؤُشَا ذوْڒنْ إِڭّْوْجنْ زِي كُوڒْ أَسمِّيضْ ن ؤُسڒْمذْ ذ أَحْرَايْمِي زڭْ إِوْذَانْ نِّي يَارزُّونْ أَذْ أَنغْ غَارّنْ س ثحْرَايْمشْثْ نْسنْ، [j] 15 مَاشَا إِتّْخصَّا أَذْ نْبدّْ نِيشَانْ ذِي ثَايْرِي نّغْ، مَاحنْذْ مَارَّا مِينْ غَارْنغْ إِدْجَانْ أَذْ إِڭْمَا ذِي لْمَاسِيحْ ونِّي ذ أَزدْجِيفْ. [k] 16 زَّايسْ ثنّجْرُو ؤُ ثتّْوَاسّْمُونْ أَرِّيمثْ مَارَّا س مَارَّا ڒمْفَاصڒْ، عْلَاحْسَابْ مِينْ إِمّوْشنْ س ڒعْبَارْ إِ مْكُوڒْ أَغزْذِيسْ إِ ثْيُومِي ن أَرِّيمثْ، أَڒْ غَا إِتّْوَاكمّڒْ ڒبْنِي نّسْ ذِي ثَايْرِي. [l]

17 مَاشَا نشّْ قَّارغْ ؤُ شهّْذغْ مَانْ أَيَا ذِي سِيذِي، حِيمَا وَارْ ثڭُّورمْ عَاذْ أَمْ مَامّشْ ؤُيُورنْ ڒڭْنُوسْ إِنّغْنِي، إِنِّي إِدَّارنْ ذِي ڒْبَاطڒْ ن إِخَارِّيصنْ نْسنْ، [m] 18 بَارْشْننْ ذِي ڒعْقڒْ نْسنْ ؤُ أَڭّْوجنْ خْ ثُوذَارْثْ ن أَربِّي، مِينْزِي وَارْ ذَايْسنْ بُو ثُوسّْنَا، ؤُ خْ سِّيبّثْ ن ثْقُوبَّانشْثْ إِ ذَايْسنْ إِدْجَانْ، ؤُ خْ سِّيبّثْ ن ڒقْسَاحثْ ن وُوڒْ نْسنْ. [n] 19 نِيثْنِي قضْعنْ إِخفْ نْسنْ زڭْ ؤُسِيثمْ، سلّْمنْ إِخفْ نْسنْ إِ ؤُفُوشّحْ ؤُ إِ وضْفَارْ ن مَارَّا مَارْكَاثْ ن ڒخْمجْ عْلَاحْصَابْ مژْرِي نْسنْ. 20 مَاشَا وَارْ إِدْجِي أَمُّو إِ ثسّْنمْ لْمَاسِيحْ، 21 ڒَامِي زعْمَا كنِّيوْ ثُوغَا ثسْڒَامْ غَارسْ نِيشَانْ ؤُشَا ثْڒمْذمْ زَّايسْ عْلَاحْسَابْ ثِيذتّْ إِ إِدْجَانْ ذِي يَاسُوع. 22 مَاشَا س ڒْعكْسْ إِتّْخصَّا كنِّيوْ أَذْ ثنْضَارمْ ثِيشْڒِي نْومْ ن زِيشْ، أَذْ ثجّمْ بْنَاذمْ أَقْذِيمْ إِ إِتّْوَاسّخْسَارنْ س نّشْوَاثْ إِغشّنْ. [o] 23 تّْوَاعذْڒمْ زِي جْذِيذْ س نّيّثْ ن ڒعْقڒْ نْومْ. 24 أَرْضمْ بْنَاذمْ ن جْذِيذْ إِ د-إِتّْوَاخڒْقنْ ذِي أَربِّي ذِي ثْسڭْذَا ؤُ ذِي ثَاقدَّاسْثْ ذ ثِيذتّْ. [p]

25 س ؤُينِّي جّمْ إِخَارِّيقنْ، سِيوْڒمْ ثِيذتّْ كُوڒْ إِجّْ أَكْ-ذ جَّارْ نّسْ، مِينْزِي نشِّينْ ذ إِخْفَاونْ إِجّنْ إِ ونّغْنِي. [q] 26 خيّْقمْ، مَاشَا وَارْ تّڭّمْ شَا دّْنُوبْ، وَارْ تّجِّي أَذْ ثغْرِي ثْفُوشْثْ خْ إِجّْ ن ؤُذُوقّزْ ن ؤُخيّقْ نْومْ. [r] 27 وَارْ تِّيشمْ شَا أَمْشَانْ إِ إِبْڒِيسْ. [s] 28 وَارْ ثجِّي ونِّي إِتَّاشَارنْ أَذْ يَاشَارْ عَاذْ، مَاشَا حْسنْ أَذْ يَارْبرْ س إِفَاسّنْ نّسْ مَاحنْذْ أَذْ إِسُّوفّغْ إِشْثْ ذ ڒْحَاجّثْ ذ ثَاصبْحَانْثْ، مَاحنْذْ أَذْ ت إِوْشْ إِ يِينِّي إِحْذَاجنْ. [t] 29 وَارْ د-إِتّكّْ شَا وَاوَاڒْ ن وشْرَاهْ زڭْ ؤُقمُّومْ نْومْ، مَاشَا مِينْ إِصبْحنْ ؤُ مِينْ إِنفّْعنْ إِ ڒبْنِي، حِيمَا أَذْ ثسِّيوْضمْ أَرْضَا إِ يِينِّي إِ غَا إِسْڒَانْ. [u] 30 وَارْ تّسّْفُّوڭْممْ شَا أَرُّوحْ إِقدّْسنْ ن أَربِّي إِ زِي ثتّْوَاشمّْعمْ أَڒْ أَسّْ ن ؤُسنْجمْ. [v] 31 جّمْ أَذْ زَّايْومْ ثتّْوَاكّسْ مَارَّا ثَارْزُوڭِي ذ ثفْقحْثْ ذ وغْضَابْ ذ ؤُصدّعْ ذ ؤُشقّفْ أَكْ-ذ مَارَّا ثُوعفّْنَا إِ د-إِتَّاسنْ أَكْ-ذ مَانْ أَيَا. [w] 32 إِڒِيمْ ثْضَارْفمْ ؤُ ڭّمْ ڒحْنُونشْثْ ذڭْ وَايَاوَا. سَامْحمْ إِ وَايَاوْيَا أَمْ أَربِّي عَاوذْ أَقَا إِغْفَارْ أَنغْ ذِي لْمَاسِيحْ. [x]