1 مَاڒَا ثتّْوَاسّْنكَّارمْ-د أَكْ-ذ لْمَاسِيحْ، خنِّي أَرْزُومْ مِينْ إِدْجَانْ سنّجْ، مَانِي إِقِّيمْ لْمَاسِيحْ خْ ؤُفُوسِي ن أَربِّي. [a] 2 عقْڒمْ مِينْ إِدْجَانْ سنّجْ، وَارْ إِدْجِي مِينْ إِدْجَانْ ذِي ثمُّورْثْ، 3 مِينْزِي كنِّيوْ أَقَا ثمُّوثمْ ؤُشَا ثُوذَارْثْ نْومْ ثنُّوفَّارْ أَكْ-ذ لْمَاسِيحْ ذِي أَربِّي. [b] 4 خْمِي د غَا إِضْهَارْ لْمَاسِيحْ، ونِّي إِدْجَانْ ذ ثُوذَارْثْ نّغْ، ڒخْذنِّي ؤُڒَا ذ كنِّيوْ أَذْ كِيذسْ د-ثضْهَارمْ ذڭْ ؤُعُودْجِي. [c]

5 س ؤُينِّي نْغمْ إِغزْذِيسنْ ن أَرِّيمثْ نْومْ إِنِّي خْ ثمُّورْثْ: فَارْقْ-شّْغڒْ، ڒخْمجْ، أَشَاهِي، نّشْوَاثْ ثِيعفَّانِينْ ذ طّْمعْ، ونِّي ذ أَعْبَاذْ إِ لْ-أَصْنَامْ، [d] 6 س مِينْزِي أَذْ د-يَاسْ وغْضَابْ ن أَربِّي خْ أَيْثْ ن ڒْمُوعْصِييّثْ. [e] 7 ؤُڒَا ذ كنِّيوْ ثُوغَا ثڭُّورمْ أَمُّو زِيشْ، ؤُمِي كنِّيوْ ثُوغَا ثدَّارمْ عَاذْ ذِي ثْمسْڒَايِينْ نِّي. [f] 8 مَاشَا ڒخُّو، سَارْسمْ مَانْ أَيَا مَارَّا خْ ؤُغزْذِيسْ: أَغْضَابْ ذ ثفْقحْثْ ذ ثُوعفّْنَا ذ ؤُشقّفْ ذ ڒْهَارْذْ إِخْمجْ. [g] 9 وَارْ سْخَارِّيقمْ شَا خْ وَايَاوْيَا، مَاشَا سَارْسمْ غَارْ ؤُغزْذِيسْ بْنَاذمْ أَقْذِيمْ أَكْ-ذ مَارَّا إِبْرِيذنْ نّسْ، [h] 10 ؤُ ثْيَارّْضمْ بْنَاذمْ ن جْذِيذْ، ونِّي إِدّكّْوَاڒنْ جْذِيذْ س ثُوسّْنَا زَّايسْ نتَّا، غَارْ صِّيفثْ ن ونِّي إِ-ث-إِ-د-إِخڒْقنْ. [i] 11 ذَايسْ وَارْ إِدْجِي وُوذَايْ ڒَا ذ أَرَامِي، ڒَا ذ أَخْثَانْ، ڒَا بْڒَا أَخْثَانْ، ڒَا ذ أَيُونَانِييْ، ڒَا ڒْبَارَّانِي، ڒَا ذ إِسْمغْ ؤُڒَا ذ حُورّْ، مَاشَا لْمَاسِيحْ ذ كُوڒْشِي ؤُ ذِي كُوڒْ إِجّنْ. [j]

12 خْ ؤُينِّي، كنِّيوْ، أَ إِمْقدَّاسنْ ذ إِمْعِيزّنْ إِنِّي إِتّْوَافَارْزنْ زِي أَربِّي، أَرْضمْ س أَرّحْمثْ ذ ڒحْنُونشْثْ ذ ڒضْرَافثْ ذ ؤُوَاضعْ ن أَرُّوحْ ذ ثمْهِينْثْ ذ تَّاسِيعْ ن ڒْخَاضَارْ. [k] 13 قبْڒمْ ؤُ سَامْحمْ إِ وَايَاوْيَا. مَاڒَا شَا ن يِيجّنْ غَارسْ أَشثْشِي خْ ونِّي ذ أَسْ يُوذْسنْ، غْفَارمْ كنِّيوْ إِجّْ إِ ونّغْنِي، أَمْ مَامّشْ إِ ذ أَومْ إِغْفَارْ لْمَاسِيحْ. [l] 14 ؤُشَا أَكْ-ذ مَارَّا أَيَا، أَرْنِيمْ ثَايْرِي ثنِّي ذ ثَاخَاذنْثْ ن ڒكْمَاڒثْ. [m]

15 خنِّي أَذْ إِحْكمْ ڒهْنَا ن لْمَاسِيحْ ذڭْ وُوڒَاونْ نْومْ، ڒهْنَا نِّي غَارْ ثتّْوَاڒَاغَامْ ذڭْ إِشْثْ ن أَرِّيمثْ، ؤُشَا قَاذَامْ إِ لْمَاسِيحْ. 16 جّمْ أَوَاڒْ نّسْ أَذْ ذَايْومْ إِزْذغْ س مَارَّا ثِيغِيثْ. سْڒمْذمْ، سجّْعمْ إِجّْ ونّغْنِي س ؤُغنّجْ نْ إِزهِّيذنْ ذ ثسْبِيحْ ذ إِزْڒَانْ ن أَرُّوحْ، ؤُغنّْجمْ إِ أَربِّي س وُوڒَاونْ نْومْ شُّورنْ س أَرْضَا. 17 مَارَّا مِينْ ثتّڭّمْ س وَاوَاڒْ نِيغْ س ثْمڭَّا، ڭّمْ ث س يِيسمْ ن سِيذِيثْنغْ يَاسُوع لْمَاسِيحْ ؤُ شكَّارمْ زَّايسْ أَربِّي، بَابَاثْنغْ. [n]

18 أَ ثِيمْغَارِينْ، ذوْڒنْثْ سَاذُو إِرْيَازنْ نْكنْثْ أَمْ مَامّشْ د-إِتَّاسْ أَكْ-ذ لْمَاسِيحْ. [o]

19 أَ إِرْيَازنْ، خْسمْ ثِيمْغَارِينْ نْومْ، وَارْ تّْقسْحمْ ذَايْسنْثْ س ثَارْزُوڭِي. [p]

20 أَ إِحنْجِيرنْ، طَاعمْ إِ لْوَالِيذِينْ نْومْ ذِي مَارَّا، مِينْزِي مَانْ أَيَا يَارطَّا إِ سِيذِيثْنغْ. [q]

21 أَ لْوَالِيذِينْ، وَارْ ذَارَّاشمْ شَا إِحنْجِيرنْ نْومْ، حِيمَا وَارْ ذ أَسنْ ثتّْرَاحْ ثرْيَاسْثْ.

22 أَ إِمْسخَّارنْ، طَاعمْ إِ يِينِّي إِدْجَانْ ذ أَيْثْبَابْ نْومْ ذِي ثمُّورْثْ ذِي مَارَّا، وَارْ تّْسخَّارمْ شَا إِ ثِيطَّاوِينْ ن إِوْذَانْ أَمْ يِينِّي إِخْسنْ أَذْ أَرْضَانْ إِوْذَانْ وَاهَا، مَاشَا سخَّارمْ س ڒصْفَايثْ ن وُوڒْ ؤُ زِي ثِيڭّْوُوذِي ن سِيذِي. [r] 23 قَاعْ مِينْ غَا ثڭّمْ، ڭّمْ ث س مَارَّا ڒعْمَارْ نْومْ، ڭّمْ ث أَخْمِي إِ سِيذِيثْنغْ، وَارْ إِدْجِي إِ إِوْذَانْ. 24 سْنمْ أَقَا أَذْ ثكْسِيمْ ڒخْڒَاصْ زِي سِيذِيثْنغْ ذِي ڒْوَارْثْ، مَاغَارْ ثتّْسخَّارمْ إِ سِيذِي، لْمَاسِيحْ. 25 مِينْزِي ونِّي إِتّڭّنْ ڒْغشّْ، أَذْ إِتّْوَاخْڒفْ عْلَاحْسَابْ ڒْغشّْ إِ يڭَّا، مِينْزِي وَارْ ذِينْ إِدْجِي ڒْفَارْزْ ن بْنَاذمْ.