إِكُولُوسِييّنْ

أَسدْجمْ غَارْ ؤُمزْوَارُو ذ ثْژَادْجِيثْ أَكْ-ذ ؤُقَاذِي

1 بُولُوسْ، رَّاسُولْ ن يَاسُوع لْمَاسِيحْ س ڒْخَاضَارْ ن أَربِّي، ذ ثَاوْمَاثْ ثِيمُوثِييُو. ◼ 2 إِ إِنِّي إِدْجَانْ ذِي كُولُوسِّي، أَوْمَاثنْ إِمْقدَّاسنْ ذ يِينِّي يُومْننْ ذِي يَاسُوع لْمَاسِيحْ: ڒهْنَا ذ أَرْضَا أَذْ كِيومْ إِڒِينْ زِي أَربِّي، بَابَاثْنغْ. [b]

3 ڒبْذَا نتّْقَاذَا أَربِّي، بَابَاسْ ن سِيذِيثْنغْ يَاسُوع لْمَاسِيحْ، ؤُشَا نتّْژَادْجْ خَاومْ. [c] 4 خْزَارْ، نسْڒَا خْ لْ-إِيمَانْ نْومْ ذِي يَاسُوع لْمَاسِيحْ ؤُ خْ ثَايْرِي نْومْ إِ مَارَّا إِمْقدَّاسنْ، 5 خْ سِّيبّثْ ن ؤُسِيثمْ إِ ذ أَومْ إِسّْوجْذنْ ذڭْ إِجنْوَانْ، إِ خْ ثِيزَّارمْ ثسْڒَامْ زڭْ ؤُمزْوَارُو س وَاوَاڒْ ن ثِيذتّْ ن ڒخْبَارْ أَصبْحَانْ. [d] 6 أَوَاڒْ-أَ إِتّْوَابَارّحْ أَومْ ؤُ إِ دُّونشْثْ مَارَّا، ؤُشَا إِڭمَّا ؤُشَا إِتَّاوِي-د ڒْغِيدْجثْ، أَمْ مَامّشْ إِ يڭَّا وَاوَاڒْ-أَ عَاوذْ جَارْ أَومْ زڭْ وَاسّْ ؤُمِي ث ثسْڒِيمْ ؤُ ثسّْنمْ أَرْضَا ن أَربِّي ذِي ثِيذتّْ، [e] 7 أَمْ مَامّشْ ث ثْڒمْذمْ زِي إِبَافْرَاسْ، أَمْسخَّارْ أَمْعَاشَارْ نّغْ إِعِيزّنْ، ونِّي ذ أَمْسخَّارْ ذ أَمْثِيقِّي ن لْمَاسِيحْ إِ كنِّيوْ. [f] 8 نتَّا إِسَّارْڭبْ أَنغْ-د خْ ثَايْرِي نْومْ ذِي أَرُّوحْ.

9 س ؤُينِّي، ؤُڒَا ذ نشِّينْ، زڭْ وَاسّْ ؤُمِي نسْڒَا خْ مَانْ أَيَا، وَارْ نسّْبذِّي شَا ثَاژَادْجِيثْ خَاومْ، نتّتَّارْ أَذْ ثْذوْڒمْ ثشُّورمْ س ثُوسّْنَا ن ڒْخَاضَارْ ن أَربِّي، ذِي مَارَّا ثِيغِيثْ ذ ڒفْهَامثْ ن أَرُّوحْ، [g] 10 حِيمَا أَذْ ثُويُورمْ أَمْ مَامّشْ إِسْذَاهدْجْ، أَذْ ثَارْضَامْ أَربِّي ذِي مَارَّا ڒخْذَايمْ ثِيصبْحَانِينْ، ؤُ حِيمَا أَذْ د-ثَاوْيمْ ڒْغِيدْجثْ ؤُشَا أَذْ ثيْمَامْ ذِي ثُوسّْنَا ن أَربِّي، ◼ [i] 11 أَذْ ثتّْوَاسّْجهْذمْ س مَارَّا جّهْذْ عْلَاحْسَابْ ڒمْغَارثْ ن ؤُعُودْجِي نّسْ، س مَارَّا صّْبَارْ ذ تَّاسِيعْ ن ڒْخَاضَارْ ذ ڒفْرَاحثْ. 12 قَاذَامْ أَربِّي، بَابَاثْنغْ، ونِّي ذ أَنغْ إِسّْوجْذنْ حِيمَا أَذْ نسّْذَاهدْجْ أَذْ نْشَارْشْ ذِي ڒْوَارْثْ ن إِمْقدَّاسنْ ذِي ثْفَاوْثْ. 13 نتَّا إِسّنْجمْ أَنغْ زِي صُّولْطَا ن ثَادْجسْثْ ؤُ إِسّْمُوطِّييْ أَنغْ غَارْ ثْڭلْذِيثْ ن مِّيسْ نّسْ إِعِيزّنْ، [j] 14 ونِّي ذَايسْ غَارْنغْ أَسنْجمْ ذ وغْفَارْ ن دّْنُوبْ. [k]

لْمَاسِيحْ ذ صِّيفثْ ن أَربِّي إِ وَارْ نژْرِي

15 وَانِيثَا ذ صِّيفثْ ن أَربِّي إِ وَارْ نتّْوِيڒِي شَا، أَمنْزُو خْ مَارَّا مِينْ د-إِتّْوَاخڒْقنْ، ◼ [m] 16 زَّايسْ د-إِتّْوَاخْڒقْ مَارَّا مِينْ إِدْجَانْ ذڭْ إِجنْوَانْ ذ مِينْ إِدْجَانْ ذِي ثمُّورْثْ، مِينْ نتّْوَاڒَا ذ مِينْ وَارْ نتّْوِيڒِي شَا: ڒكْرَاسِي ن إِجدْجِيذنْ نِيغْ ثِيصدْجَاضِينْ نِيغْ ڒحْكَامَاثْ ؤُڒَا ذ صُّولَاطَاثْ، مَارَّا مِينْ إِدْجَانْ أَقَا إِتّْوَاخْڒقْ-د س ؤُفُوسْ نّسْ ؤُ زَّايسْ نتَّا. [n] 17 نتَّا ثُوغَا-ث قْبڒْ مَارَّا مِينْ إِدْجَانْ، ؤُشَا مَارَّا مِينْ إِدْجَانْ أَقَا-ث زَّايسْ. 18 نتَّا ذ أَزدْجِيفْ ن أَرِّيمثْ، ثنِّي إِدْجَانْ ذ ثَامسْمُونْثْ. نتَّا ذ أَزدْجِيفْ ذ مِّيسْ أَمنْزُو إِ د-إِتّْوَاخڒْقنْ زِي ثَادَّارْثْ ن إِمتِّيننْ، حِيمَا أَذْ يِيڒِي ذ أَمزْوَارْ ذِي كُوڒْشِي. [o] 19 مِينْزِي ثُوسَا أَسْ-د إِ ڒْخَاضَارْ إِ مَارَّا أَعمَّارْ مَاحنْذْ أَذْ إِزْذغْ ذَايسْ، ◼ [q] 20 مَاحنْذْ أَذْ زَّايسْ إِسّصْڒحْ مَارَّا مِينْ إِدْجَانْ أَكْ-ذ يِيخفْ نّسْ، ؤُ مَاحنْذْ أَذْ إِڭّْ ڒهْنَا س إِذَامّنْ ن صَّالِيبْ نّسْ، أَمْ إِ يِينِّي إِدْجَانْ ذِي ثمُّورْثْ أَمْ إِ يِينِّي إِدْجَانْ ذڭْ إِجنْوَانْ. [r]

21 ؤُڒَا إِ كنِّيوْ - إِنِّي ثُوغَا قْبڒْ ذ إِبَارَّانِييّنْ ذ ڒْعذْيَانْ ذڭْ إِخَارِّيصنْ نْومْ زِي سِّيبّثْ ن ڒخْذَايمْ نْومْ ثِيعفَّانِينْ - إِوْشَا ڒخُّو ڒهْنَا 22 س أَرِّيمثْ ن ويْسُومْ نّسْ ؤُ ن ڒْموْثْ نّسْ، حِيمَا أَذْ كنِّيوْ إِسّْبدّْ ذ إِمْقدَّاسنْ قِيبَاتْشْ نّسْ، بْڒَا مَا أَذْ ذَايْومْ إِتّْوَافْ ڒَا ذ إِجّْ نْ ڒخْمجْ ؤُڒَا ذ إِجّْ ن ڒْعِيبْ، [s] 23 مَاڒَا ثقِّيممْ ثُويُورمْ ذِي لْ-إِيمَانْ نْومْ، أَمْ ذْسَاسْ نْومْ إِقِّيمْ إِمْثنْ، وَارْ ثْسمّْحمْ شَا ذڭْ ؤُسِيثمْ ن لْ-إِنْجِيلْ إِ ثسْڒِيمْ، ونِّي زِي إِتّْوَابَارَّاحْ غَارْ مَارَّا مِينْ د-إِتّْوَاخڒْقنْ نِّي إِدْجَانْ سَاذُو ؤُجنَّا، ونِّي زِي ذوْڒغْ نشّْ، بُولُوسْ، ذ أَمْسخَّارْ. [t]

ڒْخذْمثْ ن ثْسخَّارْثْ ن بُولُوسْ إِ ثْمسْمُونْثْ ن يَاسُوع لْمَاسِيحْ

24 أَقَا أَيِي فَارْحغْ أَمْ كسِّيغْ ثَامَارَا خَاومْ ؤُ تّْكمّْڒغْ ذِي أَرِّيمثْ إِنُو مِينْ إِقِّيمنْ زِي ڒمْحَايمْ ن لْمَاسِيحْ ذِي طّْوعْ ن أَرِّيمثْ نّسْ ثنِّي ذ ثَامسْمُونْثْ، [u] 25 إِ زِي ذوْڒغْ ذ أَمْسخَّارْ عْلَاحْسَابْ أَوكّڒْ إِ ذ أَيِي إِمّوْشنْ خَاومْ زِي أَربِّي، حِيمَا أَذْ سِّيوْضغْ ثَابَارّحْثْ ن وَاوَاڒْ ن أَربِّي غَارْ ڒكْمَارثْ، [v] 26 سِّيرّْ إِ ثُوغَا إِنُّوفَارنْ ذِي زّْمَانَاثْ ذ ڒْجِيڒَاثْ ن زِيشْ، مَاشَا إِتّْوَاسَّارْڭبْ ڒخُّو إِ إِمْقدَّاسنْ نّسْ، [w] 27 إِنِّي ؤُمِي إِخْسْ أَربِّي أَذْ أَسنْ إِسّْشنْ إِڭڒْوَانْ ن ؤُعُودْجِي ن سِّيرّْ-أَ جَارْ ڒڭْنُوسْ، ونِّي إِدْجَانْ ذ لْمَاسِيحْ ذَايْومْ، أَسِيثمْ ن ؤُعُودْجِي نّغْ. [x] 28 أَقَا نتّْبَارّحْ زَّايسْ، ؤُ زَّايسْ نتَّا نسّڒْمَاذْ ؤُ نْعدْجمْ إِ كُوڒْ بْنَاذمْ س مَارَّا ثِيغِيثْ، حِيمَا أَذْ نسّْبدّْ كُوڒْ بْنَاذمْ نِيشَانْ قِيبَاتْشْ إِ يَاسُوع لْمَاسِيحْ. 29 إِ مَانْ أَيَا ؤُمِي جهّْذغْ ؤُ تّْمنْغِيغْ س ؤُفُوسْ ن جّهْذْ إِ ذ أَيِي إِمّوْشنْ.

a 1:‏1 ’رَّاسُولْ‘ - نِيغْ ’أَمَازَانْ‘.
b 1:‏2 رُوم. 1‏:‏7؛ ڭال. 1‏:‏3؛ أَفا. 1‏:‏2؛ 1 بُط. 1‏:‏2.
c 1:‏3 أَفا. 1‏:‏15؛ فِيل. 1‏:‏3؛ 1 تس. 1‏:‏2؛ 2 تس. 1‏:‏3.
d 1:‏5 1 بُط. 1‏:‏4.
e 1:‏6 مك. 4‏:‏8؛ يُوح. 15‏:‏16.
f 1:‏7 كُول. 4‏:‏12؛ فلمن. 23.
g 1:‏9 ؤُف. 31‏:‏3؛ 35؛13؛ إِشا. 11‏:‏2؛ 1 كُور. 1‏:‏5؛ 12‏:‏8؛ أَفا. 1‏:‏15.
h 1:‏10 ’ثيْمَانْ‘ - نِيغْ ’ثڭْمَامْ‘.
i 1:‏10 أَمز. 17‏:‏1؛ يُوح. 15‏:‏16؛ 1 كُور. 7‏:‏20؛ أَفا. 4‏:‏1؛ فِيل. 1‏:‏27؛ 1 تس. 2‏:‏12.
j 1:‏13 مت. 3‏:‏17؛ 17‏:‏5؛ أَفا. 2‏:‏4؛ 1 تس. 2‏:‏12؛ 2 بُط. 1‏:‏17.
k 1:‏14 ڒخ. 20‏:‏28؛ أَفا. 1‏:‏7؛ عبر. 9‏:‏14؛ 1 بُط. 1‏:‏19.
l 1:‏15 ’وَانِيثَا‘ - إِخْسْ أَذْ يِينِي ’مِّيسْ‘، خْزَارْ أَيثْ 13.
m 1:‏15 2 كُور. 4‏:‏4؛ فِيل. 2‏:‏6؛ عبر. 1‏:‏3؛ أَسَا. 3‏:‏14.
n 1:‏16 أَمز. 1‏:‏3؛ إِزهد. 33‏:‏6؛ يُوح. 1‏:‏3؛ أَفا. 3‏:‏9؛ عبر. 1‏:‏2.
o 1:‏18 1 كُور. 15‏:‏20؛ أَفا. 1‏:‏22؛ 4‏:‏15؛ 5‏:‏23؛ أَسَا. 1‏:‏5.
p 1:‏19 ’مَارَّا أَعمَّارْ‘ - مَانْ أَيَا إِخْسْ أَذْ يِينِي، أَقَا ثَابَابَاثْ ذ ثَامّمِيثْ ذ أَرُّوحْ إِقدّْسنْ زدّْغنْ ذِي أَرِّيمثْ ن لْمَاسِيحْ.
q 1:‏19 يُوح. 1‏:‏14، 16؛ كُول. 2‏:‏9.
r 1:‏20 إِزهد. 85‏:‏11؛ إِشا. 9‏:‏6؛ يُوح. 16‏:‏33؛ ڒخ. 10‏:‏36؛ رُوم. 5‏:‏1؛ 2 كُور. 5‏:‏18؛ أَفا. 2‏:‏14؛ عبر. 9‏:‏27؛ 1 يُوح. 4‏:‏10.
s 1:‏22 لك. 1‏:‏75؛ أَفا. 1‏:‏4؛ 5‏:‏27؛ 2 تِيم. 1‏:‏9؛ ثِيث. 2‏:‏12.
t 1:‏23 يُوح. 15‏:‏6.
u 1:‏24 رُوم. 12‏:‏5؛ 1 كُور. 12‏:‏27؛ 2 كُور. 7‏:‏4؛ أَفا. 3‏:‏13؛ 4‏:‏12؛ 5‏:‏23؛ فِيل. 2‏:‏17؛ 2 تِيم. 2‏:‏10.
v 1:‏25 رُوم. 16‏:‏25؛ أَفا. 1‏:‏9؛ 3‏:‏9؛ 2 تِيم. 1‏:‏10؛ ثِيث. 1‏:‏3؛ 1 بُط. 1‏:‏20.
w 1:‏26 مت. 13‏:‏11.
x 1:‏27 2 كُور. 2‏:‏14؛ 1 تِيم. 1‏:‏1.