1 شكْ خنِّي، أَ مِّي، إِڒِي ثْمحّْضذْ ذِي أَرْضَا نِّي إِدْجَانْ ذِي يَاسُوع لْمَاسِيحْ، 2 ؤُ مِينْ زَّايِي ثسْڒِيذْ زَّاثْ إِ وَاطَّاسْ ن ڒشْهُوذْ، وكّڒْ إِ-ث إِ إِوْذَانْ إِمْثِيقَّانْ، إِنِّي إِزمَّارنْ أَذْ سّْڒمْذنْ عَاوذْ إِنّغْنِي. [a]

3 أَرْبُو ڒْغَارْ أَكْ-ذ إِنّغْنِي أَمْ يِيجّْ ن ؤُعسْكَارِي إِشْنَانْ ن يَاسُوع لْمَاسِيحْ. 4 وَارْ ذِينْ ؤُڒَا ذ إِجّْ ن ؤُعسْكَارِي إِڒهَّا أَكْ-ذ ڒسْوَاقْ ن ثُوذَارْثْ. إِتّْخصَّا أَسْ أَذْ يَارْضَا ونِّي ث إِڭِّينْ ذ أَعسْكَارِي وَاهَا. [b] 5 ؤُشَا عَاوذْ ونِّي إِتّمْحِيزْوَارنْ أَمْ بُو-ؤُمْحِيزْوَارْ، وَارْ ذ أَسْ تِّيشنْ تَّاجْ مَاڒَا وَارْ إِمّْنِيغْ عْلَاحْسَابْ ڒْقَانُونْ. 6 أَفدْجَاحْ إِ إِتّڭّنْ ڒْخذْمثْ إِقسْحنْ، إِتّْخصَّا أَسْ أَذْ إِكْسِي ذ أَمزْوَارْ زِي ڒْغِيدْجثْ. [c]

7 خَارّصْ ذِي مِينْ ذ أَشْ قَّارغْ. أَذْ أَشْ إِوْشْ سِيذِيثْنغْ ڒفْهَامثْ ذِي كُوڒْشِي. 8 عْقڒْ ڒبْذَا بلِّي يَاسُوع لْمَاسِيحْ، ونِّي د-إِتّْوَاسّْنكَّارنْ زِي ثَادَّارْثْ ن إِمتِّيننْ، أَقَا-ث زِي زَّارِيعثْ ن ذَاوُوذْ عْلَاحْسَابْ لْ-إِنْجِيلْ إِنُو، 9 ڒخْبَارْ أَصبْحَانْ نِّي خفْ كْسِيغْ ثُوعفّْنَا، عَاذْ سّْنَاسڒْ أَخْمِي دْجِيغْ نشّْ ذ إِجّْ ن ؤُعفَّانْ! مَاشَا أَوَاڒْ ن أَربِّي وَارْ إِزمَّارْ أَذْ إِتّْوَاقّنْ س سّْنَاسڒْ. [d] 10 س ؤُينِّي تّْحمْڒغْ مَارَّا ذِي طّْوعْ ن يِينِّي إِتّْوَافَارْزنْ، حِيمَا أَذْ أَفنْ ؤُڒَا ذ نِيثْنِي ثُوذَارْثْ ذِي يَاسُوع لْمَاسِيحْ أَكْ-ذ ؤُعُودْجِي إِتّْذُومَانْ. 11 وَا ذ أَوَاڒْ ذَايسْ ڒَامَانْ، مِينْزِي مَاڒَا نمُّوثْ أَكِيذسْ، أَذْ كِيسْ ندَّارْ عَاوذْ، [e] 12 ؤُ مَاڒَا نْصبَّارْ، أَذْ كِيسْ نحْكمْ عَاوذْ أَمْ إِجدْجِيذنْ، مَاشَا مَاڒَا ننْكَارْ إِ-ث، نتَّا أَذْ أَنغْ إِنْكَارْ عَاوذْ. [f] 13 مَاڒَا وَارْ ذَايسْ نتِّيقّْ، أَقَا نتَّا إِتّْغِيمَا ذ أَمْثِيقِّي، مِينْزِي وَارْ إِزمَّارْ أَذْ إِنْكَارْ إِخفْ نّسْ. [g]

14 سعْقڒْ أَسنْ مَانْ أَيَا، عْڒمْ أَسنْ زَّاثْ إِ سِيذِيثْنغْ مَاحنْذْ وَارْ تّْمنْغِينْ شَا س وَاوَاڒنْ وَارْ إِنفّْعنْ، إِنِّي د غَا يَاوْينْ أَردّدْجْ خْ يِينِّي إِتّْصنَّاثنْ. 15 حْضَا إِخفْ نّشْ، مَاحنْذْ أَذْ ثَارّذْ إِخفْ نّشْ أَمْ ثْكمْڒذْ زَّاثْ إِ أَربِّي، أَمْ ؤُخدَّامْ نِّي وَارْ غَارسْ مِينْ زِي غَا إِسضْحَا، ونِّي إِتّْبَارّْحنْ نِيشَانْ أَوَاڒْ ن ثِيذتّْ.

16 أَڭّْوجْ خْ وَاوَاڒنْ إِخْوَانْ إِ وَارْ إِنفّْعنْ، مِينْزِي نِيثْنِي أَذْ أَرْنِينْ أَطَّاسْ ذِي ڒقْجَاحثْ ن يِينِّي إِشغْڒنْ إِخفْ نْسنْ أَكْ-ذ مَانْ أَيَا. [h] 17 أَوَاڒْ نْسنْ أَذْ إِتّْوَاغِييّزْ أَمْ ؤُخْسَاسْ. أَقَا هِيمِينِييُوسْ ذ إِجّنْ زَّايْسنْ ؤُ فِيلِيثُوسْ ذ إِجّنْ نّغْنِي. 18 نِيثْنِي فّْغنْ زڭْ وبْرِيذْ ن ثِيذتّْ، قَّارنْ بلِّي ثَانُوكْرَا أَقَا ثمْسَارْ، ؤُشَا قڒْبنْ لْ-إِيمَانْ ن شَا.

19 مَاشَا ذْسَاسْ ن أَربِّي إِبدّْ نِيشَانْ ؤُشَا وَا ذ أَشمِّيعْ نّسْ: ”سِيذِي إِسّنْ إِنِّي إِدْجَانْ نّسْ!“، ؤُشَا“ ’أجّْ مَارَّا إِنِّي إِتّْڒَاغَانْ خْ سِيذِي أَذْ أَڭّْوجنْ خْ ڒْمُوعْصِييّثْ.“ [i]

20 مَاشَا ذِي ثَادَّارْثْ ثَامقّْرَانْثْ وَارْ ذَايسْ ڒقْشُوعْ ن وُورغْ ذ نُّوقَارْثْ وَاهَا، مَاشَا عَاوذْ ن ؤُكشُّوضْ ذ ثْڒَاخْثْ، شَا زَّايْسنْ ن شَّانْ ؤُ شَا ن ؤُبهْذڒْ. [j] 21 خنِّي مَاڒَا إِسِّيزْذڭْ حذْ إِخفْ نّسْ زِي دّڭَّا، أَذْ يِيڒِي ذ إِشْثْ ن ڒْقشْعثْ ن شَّانْ، ثتّْوَاقدّسْ إِ ثدْجَا ؤُشَا ثذْوڒْ ثْنفّعْ إِ سِيذسْ، أَقَا ثتّْوَاسّوْجذْ إِ مَارَّا ڒخْذَايمْ إِصبْحنْ.

22 أَرْوڒْ زِي مَارَّا نّشْوَاثْ ن ثمْژِي ؤُشَا أَرْذفْ ثَاسڭْذَا ذ لْ-إِيمَانْ ذ ثَايْرِي ذ ڒهْنَا أَكْ-ذ يِينِّي إِتّْڒَاغَانْ خْ سِيذِيثْنغْ زڭْ وُوڒْ إِزْذِيڭْ. [k] 23 بعّذْ خْ إِمْحَارْوَاضنْ إِبُوهَاڒِييّنْ إِ وَارْ إِدْجِينْ إِ ڒبْنِي، مَاغَارْ ثسّْنذْ أَقَا ندّْهنْ غَارْ إِمْشُوبَّاشْ. [l] 24 وَارْ إِشُووَّارْ إِ ؤُمْسخَّارْ ن سِيذِيثْنغْ أَذْ إِمْشُوبّشْ، مَاشَا إِشُووَّارْ أَسْ أَذْ يُويُورْ س ثمْهِينْثْ أَكْ-ذ مَارَّا، إِسّنْ أَذْ إِسّڒْمذْ، أَقَا غَارسْ تَّاسِيعْ ن ڒْخَاضَارْ، [m] 25 مَاحنْذْ أَذْ إِسّڒْمذْ س ثمْهِينْثْ إِنِّي ث إِتّْعكَّاسنْ. أَذْ ثَاغْ أَربِّي أَذْ أَسنْ إِوْشْ أَذْ ثُوبنْ أَذْ سّْننْ ثِيذتّْ، [n] 26 ؤُشَا أَذْ د أَسنْ-يَارّْ ڒْبَاڒْ، أَذْ نْفكّنْ زِي ڒْفخْ ن شِّيطَانْ، ونِّي إِ-ثنْ إِحبّْسنْ إِ ثِيزِي نّسْ.