1 أَ كنِّيوْ، أَوْمَاثنْ نّغْ، زِي سَّا ذ ثْسَاونْثْ كْسِيمْ أَنغْ ڒْمعْرُوفْ حِيمَا أَوَاڒْ ن سِيذِيثْنغْ أَذْ د-إِفّغْ ذغْيَا ؤُ أَذْ إِتّْوَاسّْعُودْجْ، أَمْ مَامّشْ ثُوغَا إِمْسَارْ جَارْ أَومْ عَاوذْ، [a] 2 حِيمَا أَذْ نتّْوَافكّْ زڭْ إِوْذَانْ وَارْ إِحْڒِينْ، إِعفَّاننْ، مِينْزِي لْ-إِيمَانْ وَارْ إِدْجِي غَارْ مَارَّا. [b]

3 مَاشَا سِيذِي ذ أَمْثِيقِّي. نتَّا أَذْ خَاومْ إِحْضَا ؤُشَا أَذْ كنِّيوْ إِفكّْ زڭْ ؤُمْعفَّانْ. [c] 4 مَاشَا نشِّينْ نتِّيقّْ ذَايْومْ ذِي سِيذِيثْنغْ، بلِّي مِينْ خفْ نْوصَّا كنِّيوْ، أَقَا ثتّڭّمْ ث ؤُشَا أَذْ ثقِّيممْ ثتّڭّمْ ث. 5 أَذْ إِنْذهْ سِيذِيثْنغْ ؤُڒَاونْ نْومْ غَارْ ثَايْرِي ن أَربِّي ؤُ غَارْ ؤُبَارّحْ س ڒخْبَارْ أَصبْحَانْ ن لْمَاسِيحْ.

6 نْوصَّا كنِّيوْ، أَ أَيْثْمَا، ذڭْ يِيسمْ ن سِيذِيثْنغْ يَاسُوع لْمَاسِيحْ، أَذْ ثْحيّْذمْ إِ كُوڒْ ؤُمَا إِ إِڭُّورنْ ذِي مِينْ وَارْ إِحْڒِينْ، وَارْ إِدْجِي عْلَاحْسَابْ ثِيوصَّا إِ زَّايْنغْ إِكْسِي. [d] 7 أَقَا كنِّيوْ ثسّْنمْ مَامّشْ إِشُووَّارْ أَذْ أَنغْ ثضْفَارمْ، مِينْزِي نشِّينْ وَارْ نُويُورْ جَارْ أَومْ ذِي مِينْ وَارْ إِحْڒِينْ. [e] 8 وَارْ نشِّي أَغْرُومْ أَكْ-ذ حذْ بَاطڒْ، مَاشَا س ڒْخذْمثْ ذ ثَامَارَا ثُوغَا أَنغْ نْخدّمْ دْجِيڒثْ ذ وَاسّْ، حِيمَا وَارْ د-نتِّيسْ نذْقڒْ خْ شَا ن إِجّنْ زَّايْومْ. [f] 9 وَارْ إِدْجِي مِينْزِي وَارْ غَارْنغْ تّسْرِيحْ إِ مَانْ أَيَا، مَاشَا حِيمَا أَذْ نڭّْ إِخفْ نّغْ ذ لْمِيثَالْ إِ غَا ثضْفَارمْ. [g] 10 مِينْزِي ڒَامِي ثُوغَا أَنغْ ندْجْ أَكِيذْومْ، أَقَا نْوصَّا أَمُّو: مَاڒَا حذْ وَارْ إِخْسْ أَذْ إِخْذمْ، وَارْ إِتّتّْ عَاوذْ. 11 مِينْزِي نسْڒَا أَقَا ذِينْ شَا جَارْ أَومْ إِنِّي إِڭُّورنْ ذِي مِينْ إِعفّْننْ، وَارْ خدّْمنْ قَاعْ، مَاشَا تّڭّنْ مْغِيرْ مِينْ وَارْ إِسكّْوِينْ. 12 أَقَا نُومُورْ ؤُ نْزِييَّارْ إِ-ثنْ ذِي سِيذِيثْنغْ يَاسُوع لْمَاسِيحْ حِيمَا أَذْ خذْمنْ ذِي ڒْهُوذْنثْ، أَذْ شّنْ أَغْرُومْ نْسنْ. [h]

13 مَاشَا كنِّيوْ، أَ أَيْثْمَا، وَارْ تُّوحِيڒمْ شَا مَاحنْذْ أَذْ ثڭّمْ مِينْ إِشْنَانْ. [i] 14 مَاشَا مَاڒَا شَا ن إِجّنْ وَارْ إِطَاعْ إِ وَاوَاڒنْ إِ يُورَانْ ذِي ثبْرَاثْ-أَ، بْضَامْ خَاسْ، وَارْ تّْخدْجَاضمْ شَا أَكِيذسْ، حِيمَا أَذْ إِذْوڒْ إِتّْسضْحَا، [j] 15 مَاشَا وَارْ ث ثتّْحسّْبمْ ذ ڒعْذُو مَاشَا نذْهمْ ث غَارْ وبْرِيذْ أَمْ يِيجّْ ن ثَاوْمَاثْ.

16 مَاشَا سِيذِي ن ڒهْنَا أَذْ أَومْ إِوْشْ ڒهْنَا إِ ڒبْذَا خْ مَارَّا إِغزْذِيسنْ. سِيذِيثْنغْ أَذْ يِيڒِي أَكِيذْومْ مَارَّا. [k]

17 إِجّْ ن ؤُسدْجمْ س ؤُفُوسْ إِنُو. نشّْ، بُولُوسْ، ؤُرِيغْ أَيَا. ثَا ذ ڒعْڒَامثْ ذِي مَارَّا ثِيبْرَاثِينْ إِنُو. أَمُّو إِ ذ ؤُرِيغْ. [l]

18 أَرْضَا ن سِيذِيثْنغْ يَاسُوع لْمَاسِيحْ أَذْ أَكِيذْومْ يِيڒِي مَارَّا، أَ أَوْمَاثنْ إِنُو. أَمِينْ.

<- 2 إِثِيسَّالُونِيكِييّنْ 2