1 مِينْزِي نسّنْ، بلِّي، خْمِي غَا ثفْنَا ثَادَّارْثْ نّغْ ن ثمُّورْثْ إِ يدْجَانْ ذ أَرِّيمثْ، أَذْ غَارْنغْ يِيڒِي إِجّْ ن ڒبْنِي ن أَربِّي إِ ڒبْذَا ذڭْ إِجنْوَانْ، إِشْثْ ن ثَادَّارْثْ وَارْ ثتّْوَاڭّْ شَا س إِفَاسّنْ. [a] 2 خْ مَانْ أَيَا إِ نْزهَّارْ ؤُ ذَايْنغْ مژْرِي، حِيمَا أَذْ نَارْضْ ثَادَّارْثْ نّغْ ثنِّي إِدْجَانْ زڭْ ؤُجنَّا، [b] 3 معْلِيكْ قَاعْ إِ غَا نِيڒِي نْيَارْضْ، وَارْ ذ أَنغْ تِّيفنْ ذ إِعرْيَاننْ. [c] 4 مَاشَا مِينْ مَا غَا نكّْ عَاذْ ذِي ثَادَّارْثْ-أَ، أَذْ نقِّيمْ نْزهَّارْ س دّْقڒْ نّسْ، مِينْزِي وَارْ نخْسْ أَذْ ت نجّْ، مَاشَا نخْسْ أَذْ ت نْيَارْضْ، حِيمَا مِينْ إِفنَّانْ أَذْ إِتّْوَاصَارْذْ زِي ثُوذَارْثْ. [d] 5 ونِّي ذ أَنغْ د-إِسّْوجْذنْ إِ مَانْ أَيَا ذ نتَّا ذ أَربِّي ونِّي ذ أَنغْ إِوْشِينْ أَرُّوحْ نّسْ ذ ڒْعَارْبُونْ. [e]

6 س ؤُينِّي نسّنْ ؤُ غَارْنغْ تِّيقّثْ، أَقَا خنِّي مِينْ غَا نكّْ نْزدّغْ ذِي أَرِّيمثْ، أَذْ نِيڒِي نڭّْوجْ خْ سِيذِيثْنغْ، 7 مِينْزِي س لْ-إِيمَانْ إِ نڭُّورْ، وَارْ إِدْجِي س مِينْ إِتّْبَاننْ.[f] 8 س ؤُينِّي نتِّيقَّا ؤُشَا ذَايْنغْ مژْرِي، مَاحنْذْ أَذْ نسْمحْ ذِي أَرِّيمثْ حِيمَا أَذْ نِيڒِي أَكْ-ذ سِيذِيثْنغْ. 9 نتّْشطَّارْ حِيمَا أَذْ أَسْ أَرْضَانْ، مَا ندْجْ نڭّْوجْ خْ ثَادَّارْثْ نِيغْ ذِي ثَادَّارْثْ. 10 مِينْزِي مَارَّا إِذْنغْ أَذْ نضْهَارْ زَّاثْ إِ ڒْكُورْسِي ن شّْرعْ ن لْمَاسِيحْ، حِيمَا كُوڒْ إِجّنْ أَذْ إِطّفْ ذِي أَرِّيمثْ نّسْ عْلَاحْسَابْ مِينْ إِڭَّا س أَرِّيمثْ، ثْشُونِي نِيغْ ثُوعفّْنَا. [g]

11 س ؤُينِّي، أَمْ نسّنْ أَقَا إِتّْخصَّا أَذْ نڭّْوذْ زِي سِيذِيثْنغْ، أَقَا نَارزُّو أَذْ نسّقْنعْ إِوْذَانْ، مَاشَا غَارْ أَربِّي أَقَا نشِّينْ نتّْوَاسّنْ غَارسْ، ؤُشَا سِّيثِيمغْ أَقَا نتّْوَاسّنْ غَارْومْ عَاوذْ ذِي ثْنفْسشْثْ نْومْ. [h] 12 وَارْ نتّْوصِّي شَا إِخفْ نّغْ ثْوَاڒَا نّغْنِيثْ، مَاشَا أَذْ أَومْ نوْشْ لْفُورْصَا إِ ؤُسمْغَارْ ذَايْنغْ زَّاثْ إِ يِينِّي إِسّمْغَارَانْ ذِي مِينْ إِتّْبَاننْ، وَارْ إِدْجِي ذِي مِينْ إِدْجَانْ ذڭْ وُوڒْ. [i] 13 مِينْزِي مَاڒَا ثُوغَا نتّخْڒفْ، أَقَا مَانْ أَيَا إِ أَربِّي، مَاڒَا ثُوغَا أَنغْ س ڒعْقڒْ، أَقَا مَانْ أَيَا إِ كنِّيوْ. 14 مَاغَارْ ثَايْرِي ن لْمَاسِيحْ ثْعَارّنْ أَنغْ مَاحنْذْ أَذْ نْخَارّصْ أَمُّو: مَاڒَا إِجّنْ إِمُّوثْ ذڭْ ومْشَانْ ن مَارَّا، أَقَا مَارَّا مُّوثنْ أَكِيذسْ. 15 أَقَا نتَّا إِمُّوثْ ذڭْ ومْشَانْ ن مَارَّا، حِيمَا إِنِّي إِدَّارنْ، وَارْ دَّارنْ شَا عَاذْ إِ إِخفْ نْسنْ، مَاشَا إِ ونِّي إِمُّوثنْ ذ ونِّي د-إِتّْوَاسّْنكَّارنْ إِ نِيثْنِي. [j]

16 س ؤُيَا وَارْ نسِّينْ شَا ؤُڒَا ذ إِجّْ عْلَاحْسَابْ أَرِّيمثْ. مَاڒَا ثُوغَا نسّنْ لْمَاسِيحْ ذِي أَرِّيمثْ، ڒخْذنِّي وَارْ إِتِّيڒِي عَاذْ نسّنْ ث أَمُّو ڒخُّو. [k] 17 س ؤُينِّي مَاڒَا حذْ ذِي لْمَاسِيحْ إِ إِدْجَا، أَقَا نتَّا إِتّْوَاخْڒقْ-د جْذِيذْ. خنِّي مِينْ إِدْجَانْ ذ أَقْذِيمْ إِعْذُو [l] 18 ؤُ مَارَّا إِذْوڒْ ذ جْذِيذْ س أَربِّي، ونِّي ذ أَنغْ إِسّصْڒحْ أَكْ-ذ يِيخفْ نّسْ س لْمَاسِيحْ ؤُشَا إِوْشَا أَنغْ ثَاسخَّارْثْ ن وصْڒَاحْ. [m] 19 مِينْزِي أَربِّي ثُوغَا إِسّصْڒحْ دُّونشْثْ أَكْ-ذ ڒمْغَارثْ نّسْ ذِي لْمَاسِيحْ ذِي مَانِي وَارْ ذ أَسنْ إِحْسِيبْ شَا إِخطَّانْ نْسنْ ؤُشَا إِسَّارْسْ ذَايْنغْ أَوَاڒْ ن وصْڒَاحْ. [n]

20 س ؤُيَا إِ ندْجْ ذ إِمْسكَّانْ ن لْمَاسِيحْ، أَخْمِي خَاومْ د-إِڒَاغَا أَربِّي زَّايْنغْ. س ؤُيَا نتّْڒَاغَا نشِّينْ ذڭْ ومْشَانْ ن لْمَاسِيحْ: ”رُوحمْ أَذْ ثتّْوَاصڒْحمْ أَكْ-ذ أَربِّي!“ [o] 21 مَاغَارْ ونِّي وَارْ إِسِّيننْ شَا دّنْبْ، إِڭَّا إِ-ث ذ دّنْبْ إِ كنِّيوْ، حِيمَا أَذْ نذْوڒْ ذ ثَاسڭْذَا ن أَربِّي ذَايسْ. [p]