1 تّْزَاوْڭغْ إِنِّي ذ إِمْغَارنْ جَارْ أَونْ، نشّْ ذ ونِّي ذ أَمْغَارْ أَكِيذْومْ ذ أَشهَّاذْ ن ؤُودّبْ إِ إِكِّينْ خْ لْمَاسِيحْ ؤُڒَا ذ أَمْعَاشَارْ ذڭْ ؤُعُودْجِي نّسْ إِ د غَا إِتّْوَاسّضْهَارْ: 2 أَروْسمْ ثَاحِيمَارْثْ ن أَربِّي ثنِّي ثْحطَّامْ، وَارْ إِدْجِي س ؤُغِيڒْ مَاشَا س ڒْخَاضَارْ، وَارْ إِدْجِي ذِي طّْمعْ ن أَرْبحْ وَارْ إِحْڒِينْ، مَاشَا س مَارَّا وُوڒْ نْومْ، [a] 3 وَارْ إِدْجِي أَمْ يِينِّي إِدْجَانْ خْ ثْحِيمَارْثْ، مَاشَا ؤُمِي ثدْجَامْ ذ إِجّْ ن ؤُمذْيَا إِشْنَا إِ نِيثْنِي. [b] 4 ؤُشَا خْمِي د غَا إِضْهَارْ ؤُمكْسَا أَمقّْرَانْ أَذْ زَّايسْ ثطّْفمْ تَّاجْ ن ؤُعُودْجِي إِ وَارْ إِفنِّينْ. [c]

5 ؤُ كنِّيوْ، إِبْڒِيغنْ، سَارْسمْ إِخفْ نْومْ سَاذُو إِمْغَارنْ نْومْ، بيْسمْ إِخفْ نْومْ س ؤُوَاضعْ ن أَرُّوحْ إِجّْ إِ ونّغْنِي، مِينْزِي أَربِّي إِتّْعكَّاسْ إِمْعفَّارنْ، مَاشَا إِمْوَاضْعنْ إِوْشَا أَسنْ أَرْضَا. [d] 6 سمْژَايمْ إِخفْ نْومْ سَاذُو أَفُوسْ إِجهْذنْ ن أَربِّي، حِيمَا أَذْ كنِّيوْ إِسُّوعْڒَا ذِي ڒْوقْثْ نّسْ نِيشَانْ. [e] 7 مَارَّا إِمْنُوسنْ نْومْ أَرّمْ ثنْ غَارْ أَربِّي، أَقَا نتَّا إِتّْهِيلَّا ذَايْومْ. [f]

8 أَرّمْ-د ڒْبَاڒْ، حْضَامْ، مِينْزِي ڒعْذُو نْومْ، شِّيطَانْ أَمقّْرَانْ، إِتّْزهَّارْ أَمْ وَايْرَاذْ ؤُ إِتّْحَامَا، يَارزُّو مِينْ إِزمَّارْ أَذْ إِسَارْضْ. [g] 9 مْعَاڒَامْ ث، ثْبدّمْ نِيشَانْ ذِي لْ-إِيمَانْ، أَقَا ثسّْنمْ بلِّي أَيْثْمَاثْومْ ذِي دُّونشْثْ ؤُڒَا ذ نِيثْنِي كسِّينْ أَودّبْ-أَ. [h]

10 مَاشَا أَربِّي ن أَرْضَا ونِّي ذ أَنغْ د-إِڒَاغَانْ غَارْ ؤُعُودْجِي نّسْ إِتّْذُومَانْ إِ ڒبْذَا س يَاسُوع لْمَاسِيحْ، أَقَا نتَّا، أَوَارْنِي ڒَامِي نْودّبْ ڒحْصَارَاثْ-أَ ثِيمُوقْڒِيڒِينْ، أَذْ أَنغْ إِسّجْهذْ، أَذْ أَنغْ إِضْمنْ ؤُ أَذْ أَنغْ إِسدّْ إِ ڒبْذَا. [i] 11 غَارسْ نتَّا أَعُودْجِي ذ صُّولْطَا ذ ڒْعزّْ إِ ڒبْذَا قَاعْ. أَمِينْ.

12 ؤُرِيغْ أَومْ-د شَا ن ثْمسْڒَايِينْ ذِي ثِيرَا ثَاقُوضَاضْثْ س ؤُفُوسْ ن سِيلْوَانُوسْ، ؤُمَا ذ أَمْثِيقِّي، ؤُ نشّْ قنْعغْ ؤُ شهّْذغْ، أَقَا مَانْ أَيَا ذِي مِينْ ذِي ثْبدّمْ نِيشَانْ، أَقَا-ث ذ أَرْضَا ن أَربِّي ذ ثِيذتّْ.

13 ثَامسْمُونْثْ إِتّْوَافَارْزنْ إِ إِدْجَانْ ذِي بَابِيلْ، ثْسدْجَامْ خَاومْ س ڒهْنَا، ؤُڒَا ذ مِّي مَارْكُوسْ.

14 سدْجْممْ خْ وَايَاوْيَا س ڒهْنَا ؤُ س ؤُسُوذمْ إِقدّْسنْ. ڒهْنَا أَذْ كِيومْ يِيڒِي مَارَّا إِذْومْ إِ إِدْجَانْ ذِي لْمَاسِيحْ. أَمِينْ. [j]

<- 1 بُوطْرُوسْ 4