1 بُوطْرُوسْ

1 بُوطْرُوسْ، رَّاسُولْ ن يَاسُوع لْمَاسِيحْ، إِ يِينِّي إِتّْوَافَارْزنْ ذ إِمعْزَابْ، إِنِّي إِتّْوَاژدْجْعنْ ذِي بُونْطُوسْ، ڭَالَاطِييَا، كَابَّاذُوكِييَا، أَسِييَا ذ بِيثِينِييَا، ◼1:‏1 ’رَّاسُولْ‘ - نِيغْ ’أَمَازَانْ‘.  [b] 2 إِنِّي إِتّْوَافَارْزنْ عْلَاحْسَابْ ثُوسّْنَا إِ إِدْجَانْ غَارْ أَربِّي، بَابَاثْنغْ، قْبڒْ، س ثُوقدّْسِي ن أَرُّوحْ، إِ طَّاعثْ ؤُ إِ ؤُرُوشِّي س إِذَامّنْ ن يَاسُوع لْمَاسِيحْ: أَرْضَا ذ ڒهْنَا أَذْ ذَايْومْ إِمَّارْنِي. [c]

3 لْبَارَاكَا إِ أَربِّي، بَابَاسْ ن سِيذِيثْنغْ يَاسُوع لْمَاسِيحْ، ونِّي ذ أَنغْ د-يجِّينْ زِي جْذِيذْ س أَرّحْمثْ نّسْ ثَامقّْرَانْثْ س ثْنُوكْرَا ن يَاسُوع لْمَاسِيحْ، مَاحنْذْ أَذْ ثِيڒِيمْ ذ أَسِيثمْ إِدَّارنْ، [d] 4 مَاحنْذْ أَذْ غَارْومْ ثِيڒِي إِشْثْ ن ڒْوَارْثْ وَارْ ثْفنِّي، وَارْ ثتّْوَابقّضْ، وَارْ ثتّسْڒِيوْ، ونِّي إِ ذ أَومْ إِتّْوَاسّْوجْذنْ ذڭْ إِجنْوَانْ، [e] 5 أَمْ ثتّْوَاحْضَامْ كنِّيوْ س جّهْذْ ن أَربِّي ؤُ س لْ-إِيمَانْ إِ ثُوذَارْثْ إِ إِوجْذنْ حِيمَا أَذْ ثتّْوَاسّضْهَارْ ذِي ڒْوقْثْ ثَانڭَّارُوثْ. 6 ذَايسْ إِ غَا ثْفَارْحمْ إِ ڒبْذَا، وَاخَّا ثْحزْنمْ ذِي ڒْوقْثْ-أَ ذْرُوسْ زِي سِّيبّثْ ن عْڒَامْ كُوڒْ إِجَارِّيبنْ إِ خَاومْ د-إِتّكّنْ، [f] 7 حِيمَا ثَاقدْجبْثْ ن لْ-إِيمَانْ نْومْ، ثنِّي ثِيغْڒَا خْ وُورغْ إِقُّورنْ ونِّي إِتّْوَاسِّيصْفنْ زِي ثْمسِّي، أَذْ ثِيڒِي إِ ؤُسمْغَارْ ذ شَّانْ ذ ؤُعُودْجِي خْ مِينِّي د-غَا إِضْهَارْ يَاسُوع لْمَاسِيحْ، [g] 8 ونِّي وَارْ ث ثژْرِيمْ، وَاخَّا ثتّخْسمْ ث. س لْ-إِيمَانْ زَّايسْ ثْفَارّْحمْ كنِّيوْ س إِشْثْ ن ڒفْرَاحثْ إِعُودْجنْ وَارْ إِزمَّارْ أَذْ زَّايسْ إِنْطقْ إِڒسْ، [h] 9 مَاغَارْ أَذْ ثطّْفمْ ڒْمُونثْ ن لْ-إِيمَانْ نْومْ، أَقَا-ت ذ ثُوذَارْثْ ن بُوحْبڒْ نْومْ. 10 ثُوذَارْثْ-أَ ثُوغَا أَرزُّونْ خَاسْ إِنَابِييّنْ، إِنِّي ثُوغَا إِتّْنَابّنْ خْ أَرْضَا إِ ذ أَومْ د-إِكَّارنْ، [i] 11 ؤُمِي ثُوغَا أَرزُّونْ مَانْ ڒْوقْثْ إِ ذ أَسنْ إِسّْشنْ أَرُّوحْ ن لْمَاسِيحْ إِ ذَايْسنْ إِزدّْغنْ، ؤُ مَانْ ڒْوقْثْ إِ خفْ ثُوغَا إِشهّذْ، أَقَا أَذْ د-يَاسْ ؤُودّبْ إِ غَا إِكّنْ خْ لْمَاسِيحْ ؤُڒَا ذ أَعُودْجِي نّسْ أَوَارْنِي مَانْ أَيَا. [j] 12 أَقَا إِتّْوَاسَّارْڭبْ أَسنْ، أَقَا مَارَّا مِينْ خفْ ثُوغَا أَرزُّونْ، أَقَا وَارْ ث أَرْزُونْ ذِي ثِيزِي نْسنْ، مَاشَا ثُوغَا تّْنَابّنْ ذِي ثِيزِي نّغْ ؤُ زِي سِّيبّثْ نّغْ خْ ثْمسْڒَايِينْ إِ ذ أَومْ إِتّْوَاسْسَّارْڭْبنْ ڒخُّو زڭْ يِينِّي إِ ذ أَومْ إِبشَّارنْ س ڒخْبَارْ أَصبْحَانْ س أَرُّوحْ إِقدّْسنْ نِّي د-إِتّْوَاسْسّكّنْ زڭْ ؤُجنَّا، ثِيمسْڒَايِينْ إِ ذِي تّْمژّْرنْثْ ؤُڒَا ذ لْمَالَاكَاثْ أَذْ ذَايْسنْثْ خْزَارنْثْ. [k]

13 س ؤُينِّي حزْممْ ڒْخَانْسْرَا ن ڒعْقڒْ نْومْ، إِڒِيمْ ثتّْفَاقمْ نِيشَانْ، ؤُشَا سْمُونمْ مَارَّا أَسِيثمْ نْومْ ذِي ڒفْرَاحثْ إِ ذ أَومْ غَا يَاوْضنْ خْمِي د غَا إِضْهَارْ سِيذِيثْنغْ يَاسُوع لْمَاسِيحْ. [l] 14 إِڒِيمْ أَمْ ثَارْوَا إِتّطَّاعنْ، وَارْ د-ثْذكّْوِيڒمْ ثْشَارّْشمْ ذِي نّشْوَاثْ نْومْ ثِينِّي ثُوغَا ثضْفَارمْ قْبڒْ س نّشْوثْ، ؤُمِي ثُوغَا كنِّيوْ عَاذْ ذ إِقُوبَّانِييّنْ. 15 مَاشَا ڒخُّو إِڒِيمْ ذ إِمْقدَّاسنْ ذِي مَارَّا مِينْ ثتّڭّمْ، أَمْ مَامّشْ نتَّا ونِّي خَاومْ د-إِڒَاغَانْ، أَقَا-ث ذ أَمْقدَّاسْ، [m] 16 مِينْزِي ثُورَا:

”إِڒِيمْ ذ إِمْقدَّاسنْ، مِينْزِي ؤُڒَا ذ نشّْ ذ أَمْقدَّاسْ!“ [n]

17 ؤُ مَاڒَا ثتّْڒَاغَامْ إِ ثَابَابَاثْ، ونِّي وَارْ إِتّڭّنْ س وُوذْمَاونْ، ذ ونِّي إِحكّْمنْ كُوڒْ إِجّنْ عْلَاحْسَابْ ڒخْذَايمْ نّسْ، خنِّي ؤُيُورمْ س ثِيڭّْوُوذِي ذِي ڒْوقْثْ-أَ ؤُمِي كنِّيوْ عَاذْ ذ إِمعْزَابْ ذِي دُّونشْثْ-أَ. [o] 18 مَاغَارْ ثسّْنمْ بلِّي كنِّيوْ وَارْ ثتّْوَافْذِيمْ س نُّوقَارْثْ ذ وُورغْ إِفنَّانْ زِي ڒخْذَايمْ نْومْ إِبضْڒنْ ثِينِّي ثطّْفمْ كنِّيوْ زِي ڒجْذُوذْ نْومْ، [p] 19 مَاشَا س إِذَامّنْ إِغْڒَانْ ن إِزْمَارْ وَارْ ذَايسْ بُو ڒْعِيبْ، وَارْ إِبقّْضنْ، أَقَا-ث ذ لْمَاسِيحْ. [q] 20 نتَّا ثُوغَا إِتّْوَافَارْزْ إِ مَانْ أَيَا قْبڒْ مَا أَذْ إِتّْوَاڭّْ ذْسَاسْ ن دُّونشْثْ، ؤُشَا إِتّْوَاسّضْهَارْ أَومْ-د ڒخُّو ذِي زّْمَانَاثْ إِنڭُّورَا ن ڒْوقْثْ ذِي طّْوعْ نْومْ، [r] 21 إِ كنِّيوْ إِنِّي زَّايسْ إِتَّامْننْ ذِي أَربِّي، ونِّي ث-إِ-د-إِسّْنكَّارنْ زِي ثَادَّارْثْ ن إِمتِّيننْ ؤُشَا إِوْشَا أَسْ أَعُودْجِي، حِيمَا لْ-إِيمَانْ ذ ؤُسِيثمْ نْومْ أَذْ إِڒِينْ خْ أَربِّي. [s] 22 ذ مَانْ أَيَا حِيمَا أَذْ تّْوَاقدّْسنْ ڒعْمُورْ نْومْ س طَّاعثْ إِ ثِيذتّْ، أَذْ تّْوَاعمَّارنْ س ثَايْرِي بْڒَا ڒْفَارْزْ ن بْنَاذمْ، ؤُشَا أَذْ ثخْسمْ أَيَاوْيَا س وُوڒْ إِزْذِيڭْ إِكْمڒْ، [t] 23 أَمْ إِوْذَانْ إِ د-إِتّْوَاخڒْقنْ ذ جْذِيذْ، وَارْ إِدْجِي زِي زَّارِيعثْ إِفنَّانْ، مَاشَا زِي ثنِّي وَارْ إِفنِّينْ، أَقَا زڭْ وَاوَاڒْ إِدَّارنْ ن أَربِّي إِ إِتّْذُومَانْ إِ ڒبْذَا. [u]

24 ”مِينْزِي مَارَّا دَّاثْ أَمْ أَرْبِيعْ

ؤُشَا مَارَّا أَژْرِي نّسْ

أَمْ ثَاوَارْذشْثْ ذڭْ ييَّارْ س أَرْبِيعْ،

أَرْبِيعْ أَذْ إِسْڒَاوْ، ثَاوَارْذشْثْ أَذْ ثوْضَا، [v]

25 مَاشَا أَوَاڒْ ن أَربِّي نّغْ

إِتّْغِيمَا إِ ڒبْذَا قَاعْ.“

أَوَاڒْ-أَ نتَّا ذ ڒخْبَارْ أَصبْحَانْ ونِّي ذ أَومْ د-إِتّْوَابَارّْحنْ.