1 أَ إِمْعِيزّنْ إِنُو، وَارْ تِّيقّمْ شَا ذِي مَارَّا أَرُّوحَاثْ، مَاشَا قدْجْبمْ أَرُّوحَاثْ، مَا زِي أَربِّي إِ إِدْجَانْ، مِينْزِي أَطَّاسْ ن إِنَابِييّنْ إِسّْخَارِّيقنْ أَقَا فّْغنْ-د غَارْ دُّونشْثْ. [a] 2 س مَانْ أَيَا أَذْ ثسّْنمْ أَرُّوحْ ن أَربِّي: مَارَّا أَرُّوحْ ونِّي إِشهّْذنْ بلِّي يَاسُوع لْمَاسِيحْ يُوسَا-د ذِي دَّاثْ أَقَا نتَّا زِي أَربِّي. 3 مَارَّا أَرُّوحْ ونِّي وَارْ إِشهّْذنْ بلِّي يَاسُوع يُوسَا-د ذِي دَّاثْ، وَارْ إِدْجِي شَا زِي أَربِّي، مَاشَا زِي أَرُّوحْ ن لْمَاسِيحْ أَفَالْسُو ونِّي إِ خفْ ثسْڒَامْ أَذْ د-يَاسْ، أَقَا نتَّا ذَا ڒخُّو ذِي دُّونشْثْ. ◼4:‏3 ’لْمَاسِيحْ أَفَالْسُو‘ - خْزَارْ 1 يُوحْ. 2:18، 22؛ 4:3. أَقَا ذِينْ أَطَّاسْ ن إِوْذَانْ إِنِّي إِقَّارنْ: ’لْمَاسِيحْ وَارْ إِدْجِي ذ أَربِّي! نتَّا ذ أَنَابِي!‘ مَانْ أَيَا إِخْسْ أَذْ يِينِي بلِّي نِيثْنِي وَارْ سّْثعْثَارِيفنْ ؤُ وَارْ نعّْمنْ شَا، أَقَا أَربِّي يُوسَا-د ذِي أَرِّيمثْ ن يَاسُوع لْمَاسِيحْ أَمْ مَامّشْ إِ ذ أَنغْ إِسّڒْمذْ وذْلِيسْ إِقدّْسنْ. س ؤُينِّي تّڭّنْ نِيثْنِي أَمْ مَامّشْ إِتّڭّْ لْمَاسِيحْ أَفَالْسُو، وَارْ شهّْذنْ شَا أَقَا يَاسُوع لْمَاسِيحْ يُوسَا-د ذِي أَرِّيمثْ. س ؤُينِّي ضفَّارنْ ث ذڭْ إِخَارِّيقنْ نّسْ، نِيثْنِي ذ إِحنْجِيرنْ ن دّجَّاڒْ.  [c] 4 مَاشَا كنِّيوْ ذ ثَارْوَا ن أَربِّي إِ ثدْجَامْ، أَقَا ثْغلّْبمْ خَاسنْ، مِينْزِي ذ ونِّي إِدْجَانْ ذَايْومْ ذ أَمقّْرَانْ خْ ونِّي إِدْجَانْ ذِي دُّونشْثْ. [d] 5 نِيثْنِي زِي دُّونشْثْ، س ؤُينِّي سَّاوَاڒنْ زِي دُّونشْثْ ؤُشَا دُّونشْثْ ثتّسْڒَا أَسنْ-د. 6 أَقَا أَنغْ زِي أَربِّي. ونِّي إِسّْننْ أَربِّي، إِتّسْڒَا أَنغْ. ونِّي وَارْ إِدْجِينْ زِي أَربِّي وَارْ ذ أَنغْ إِتّسْڒِي شَا. س مَانْ أَيَا إِ غَا نسّنْ أَرُّوحْ ن ثِيذتّْ ذ أَرُّوحْ ن ؤُودَّارْ. [e]

7 أَ إِمْعِيزّنْ إِنُو، أجّْ أَنغْ أَذْ نخْسْ أَيَاوْيَا، مِينْزِي ثَايْرِي زِي أَربِّي، ؤُ مَارَّا ونِّي إِتّخْسنْ، ذ نتَّا إِتّْوَاخْڒقْ-د زِي أَربِّي ؤُشَا إِسّنْ أَربِّي. 8 مِينْزِي أَربِّي ذ ثَايْرِي، ؤُ ونِّي وَارْ إِتّخْسنْ، وَارْ إِسِّينْ شَا أَربِّي. 9 س مَانْ أَيَا ثضْهَارْ أَنغْ-د ثَايْرِي ن أَربِّي، بلِّي أَربِّي أَقَا إِسّكّْ-د أَينِّي ن مِّيسْ إِ غَارسْ غَارْ دُّونشْثْ، حِيمَا أَذْ زَّايسْ ندَّارْ. [f] 10 ذِي مَانْ أَيَا إِ ثدْجَا ثَايْرِي، وَارْ إِدْجِي بلِّي نشِّينْ نتّخْسْ أَربِّي، مَاشَا بلِّي نتَّا إِتّخْسْ أَنغْ ؤُشَا إِسّكّْ-د مِّيسْ ذ أَصْڒَاحْ خْ دّْنُوبْ نّغْ. [g]

11 أَ إِمْعِيزّنْ إِنُو، مَاڒَا ثُوغَا أَربِّي إِتّخْسْ أَنغْ أَمُّو، إِتّْخصَّا أَنغْ عَاوذْ أَذْ نخْسْ إِجّْ ونّغْنِي. 12 ؤُڒَا ذ إِجّنْ مَا إِژْرَا أَربِّي. مَاشَا مَاڒَا نتّخْسْ أَيَاوْيَا، أَربِّي أَذْ ذَايْنغْ إِقِّيمْ، ؤُشَا ثَايْرِي نّسْ أَقَا ثذْوڒْ ثكْمڒْ ذَايْنغْ. [h]

13 زِي مَانْ أَيَا نسّنْ بلِّي نتّْغِيمَا ذَايسْ ؤُ نتَّا ذَايْنغْ، مِينْزِي نتَّا إِوْشَا أَنغْ زِي أَرُّوحْ نّسْ. 14 أَقَا نژْرَا ؤُ نْشهّذْ بلِّي بَابَاسْ إِسّكّْ-د مِّيسْ ذ أَمْسنْجمْ ن دُّونشْثْ. 15 مَارَّا ونِّي إِشهّْذنْ بلِّي يَاسُوع ذ مِّيسْ ن أَربِّي، أَربِّي أَذْ ذَايسْ إِزْذغْ ؤُ نتَّا أَذْ إِزْذغْ ذِي أَربِّي. 16 أَقَا نشِّينْ نُومنْ ؤُ نسّنْ ثَايْرِي ثنِّي إِدْجَانْ غَارْ أَربِّي إِ نشِّينْ. أَربِّي ذ ثَايْرِي ؤُ ونِّي إِ غَا إِقِّيمنْ ذِي ثَايْرِي، أَذْ إِقِّيمْ ذِي أَربِّي.

17 ذِي مَانْ أَيَا ثتّْوَاكمّڒْ ثَايْرِي نّسْ ذَايْنغْ، أَڒَامِي أَذْ غَارْنغْ ثِيڒِي تِّيقّثْ ذڭْ وَاسّْ ن لْحِيسَابْ، مِينْزِي أَمْ مَامّشْ إِدْجَا نتَّا، أَذْ نِيڒِي نشِّينْ عَاوذْ ذِي دُّونشْثْ-أَ. 18 ذِي ثَايْرِي وَارْ ثتِّيڒِي ثِيڭّْوُوذِي، مَاشَا ثَايْرِي نِيشَانْ ثسُّوفُّوغْ ثِيڭّْوُوذِي، مِينْزِي ثِيڭّْوُوذِي ثتَّاسْ-د أَكْ-ذ ؤُنخْڒِيعْ. ونِّي إِتّڭّْوذنْ، وَارْ إِتِّيڒِي إِكْمڒْ ذِي ثَايْرِي. 19 خْ ؤُيَا أَذْ نخْسْ أَربِّي، مِينْزِي نتَّا ثُوغَا إِتّخْسْ أَنغْ ذ أَمزْوَارُو. 20 مَاڒَا شَا ن إِجّنْ إِقَّارْ: ”نشّْ تّخْسغْ أَربِّي!“، أَمْ إِشَارّهْ ؤُمَاسْ، أَقَا نتَّا ذ بُو-إِخَارِّيقنْ. مِينْزِي ونِّي وَارْ إِتّخْسنْ ؤُمَاسْ ونِّي إِتّْوَاڒَا، خنِّي مَامّشْ غَا يڭّْ أَذْ إِخْسْ أَربِّي ونِّي وَارْ إِتّْوِيڒِي. [i] 21 أَقَا ثَاوْصيّثْ-أَ نطّفْ إِ-ت زَّايسْ، بلِّي كُوڒْ إِجّنْ إِ إِتّخْسنْ أَربِّي، أَذْ إِخْسْ ؤُڒَا ذ ؤُمَاسْ. [j]