Lukor leka kušir hóbor

Foriso

1 Ãrar bout kiye ãrar butoror goṭona okkol zin zin ãrar maze goiṭṭe hinore leka šuru goijje. 2 Foila loti hitara zara nizor suke deikke edde bala hóbor tobolig goijje hitara ãrar hãse zendilla zanaiye. 3 Hendilla ãi o šuruttu loti hár goṭonare bala gori zasai basai gori bade, o adoijja Teofilos, ãi tũwar hãse he goṭonagunore kulasa bafe leka bala mone gorilam. 4 Zene ze kissu šikka tũi faiyo, hin soiyi oi ne naki no zani faro.

Yahya zormo oibar agam hóbor

5 Ehudiyar badša Herudor ṭaimot, heṛe Abiyas dolor ekzon imam aššil, zar nam Zakariya. Hitar bou o Harun guštir maya fuwa. Hibar nam aššil Elizabet. 6 Hitara dunizon Allar šaikkat forhesgar aššil. Mabudor har hokum edde niyom mozin hitara niduši bafe solito. 7 Hitarattu hono fuwain no aššil, kiyollahoile Elizabet aššilde bázá. Ar hitarar umor o beši oil.

8 Ek din Zakariyaye hibar dolor fala mozin Allar sarme imamoti ham goijjil. 9 Toi imamoti hamor niyom mozin dusora imam okkole loṭari maijje, henot Zakariyar nam uiṭṭe edde hibattu Mabudor pak zagat goli duf zala foijje. 10 Duf zalaibar ṭaimot mainše battu tai munazat goijje.

11 En šomot dufgar ḍen ḍakottu Mabudor ek firistaye Zakariyare deha diye. 12 Toi Zakariyaye he firistare deki hibar mon hoisali oi uiṭṭe edde beša beši ḍoraiye. 13 Kintu firistaye Zakariyare hodde: "No ḍorais Zakariya, tor duwa kobul gora oiye. Tor bou Elizabete tolla ek futore biyaibo, ar tui hitar nam rakibi Yahya. 14 Hite tolla ek kuši edde ullaš oibo, ar hite zormo owa loi boute kuši oibo, 15 kiyollahoile hite Malikor nozorot mohan oibo, edde šoraf otóba hono ḍoilla mod no fibo; ar enki hite mar feṛottu loti he Pak Ruhuye furaiya oibo. 16 Hite Israilor beša beši manuš okkolore hitarar Allah Malikor hãse firai anibo. 17 Eliyas nobir ḍoil hanggam edde šokti loi, hite Malikor age aibo, bab okkolor mon fuwaindor uzu firaibolla, edde naforman mainšor monor báfore bodoli, Allar formandar mainšor monor báfor ḍoilla goribolla, zene Malikolla ek dol manušore furafuri bafe tiyar gori fare."

18 Zakariyaye firistare hodde, "Iyan ãi kene ekin goijjum? Kyollahoile ãi to bura, edde ãr bouwe fuwa biyaibar boyoš o farai giyegoi."

19 Firistaye hitare hodde, "Ãi Zibrail ze Allar sarme tiyai taki. Tor loi hota hoibolla edde ei kušir hóbor dibolla ãre defeṛa oiye. 20 Ar sa, ehon loti in okkol ze din goṭibo, he din foijjonto tui buk oi takibi edde hota hoi no faribi, kiyollahoile tui ãr hota biššaš no goros. Kintu ãi ze hota hoiyi hin šomoi mozin furon oibo."

21 Ar eṛe bare manuš okkole Zakariyalla entezar gori taikke. Dórmogóror pak zagar butore hibaye deri gorer deki hitara tajjuf oi bafa šuru goijje. 22 Bade Zakariya zehon niyoli aišše, hibaye hitara loi mati no fare. Hitara buijjede dórmogóror pak zagar butore hameka hibaye hono deha faiye, kiyollahoile hibaye hitarar loi šude išara bišara gorat roiye edde buk oi roiye.

23 Tarfore Zakariyar fala zehon šeš oiye, hite hitar górot firi giyegoi. 24 Hotodin bade Zakariyar bou Elizabet hamil oiye edde fãs maš foijjonto hiba mainšor arguwal oi roiye. 25 Elizabete hodde, "Iyan Mabudor ham. Mainšor sarme ãttu šorom no lagefan Allaye ehon ãr mikka suk tuli saiye."

Isa Mosi zormo oibar agam hóbor

26 Bade Elizabet so maišša hamil oiyede šomot, Allaye Zibrail firistare Galil elehar Nasarat farar ek kumarir hãse defeṛaiye. 27 Hibare loi badša Daudor bongšor Yusuf name ekzon loi hibar biyar hotabattara ṭik oil. He kumarir nam Moriyam. 28 Firistaye hibar munttu zaiyore hodde, "Tor šanti ok! Tui ḍõr rahamot faiyos! Mabud tor fũwati ase."

29 Ei hota funi Moriyamor mon beši hoisalit fori gilgoi, ar mone mone bafa šuru goijje ei solamor mani ki hoi. 30 Kintu firistaye hibare hodde, "No ḍorais Moriyam; kiyollahoile tui Allattu rahamot faiyos. 31 Ar fun! Tui hamil oibi edde tottu ek futore biyaibi, ar hibar nam rakibi Isa. 32 Hiba mohan oibo, hibare šorbo šoktiwalar fut ḍaka oibo. Allah Mabude hibar baf Daudor šingašon hibare dibo. 33 Yakubor bongšor uwore hibaye abadul abad razagiri goribo, ar hibar razagiri hono din šeš no oibo."

34 Moriyame firistare hodde, "En ken gori oi faribo? Ãi aizo kumari?"

35 Firistaye zuwabe hibare dedde, "Pak Ruh tor uwore aibo, edde šorbo šoktiwalar šokti tor uwore saiya oibo. Hetolla ze paki zon zormo oibo hibare Allar Fut ḍaka oibo. 36 Ar sa, tor egena Elizabet, hibattu o ei bura boyošot ek fut feṛot oiye. Hiba zare bázá hoito, hibattu iyan so mašor san. 37 Kiyollahoile Allattu ošombob kissu nai."

38 Moriyame hodde, "So, ãi Mabudor bandi, tũwar hota mozin ãr uwore har kissu ok." Tarfore he firista Moriyamor henttu giyegoi.

Elizabetor górot Moriyam

39 Hotodin bade Moriyame toratori gori Ehudiya elehar ek fahari farat giye, 40 zeṛe Zakariya take. Hiba heṛe Zakariyar górot góille edde Elizabet loi mulot oiye. 41 Elizabete zehon Moriyamor abaz fuinne hetunot hibar feṛor fuwaye fal mari uiṭṭe. Ar Elizabet he Pak Ruhuye furon oiye edde 42 zure ḍak mari hodde: "Har nari okkolor butore tore rahamot, ar rahamot ze fuwa tor gorbot ase. 43 Iyan ki bafe oi fare, ãr Malikor mattu ãr hãse aiya foijje? 44 Ãi zẽtte tor abaz funilam hẽtte ãr gorbot ãr fuwaye kušiye fal mari uiṭṭe. 45 Ar rahamot tore, tui biššaš goijjos, ar hetolla tor babute Mabude zen hoiye, hen furon oibo!"

Moriyamor šukurana gozol

46 Hetunot Moriyame hodde:

"Ãr forane Malikor šanor tarif gorer!

47 ar ãr ruh ãr basailoya Allare loi kušiye ullaš,

48 kiyollahoile hibaye ei nihait gorib bandir uwore nozor diye.

Ar so, ehonottu loti hár mainše ãre mubarak hoibo.

49 kiyollahoile hiba, he Šoktiwalaye ãlla beši ḍõr ham okkol goijje,

paki oilde hibar nam.

50 hibar doya bongšor bade bongšolla,

zara Hibare ḍorar.

51 Allaye nizor ḍũwa loi ḍõr šoktir ham goijje.

Zarar nizor dilot ohonkare bora,

hitarare Allaye šiṛa šitta gori felaiye.

52 Allaye šingašonottu raza okkolore lamai diye,

kintu nisorgunore usolot goijje.

53 Zetarattu obaf ase, hitarare bala bala hána fani diye,

kintu tuwangor okkolore hali hate bidai goijje.

54 Allaye ãrar fordada okkolor hãse ze wada dil,

he mozin hibaye hibar gulam Israilore ufohar goijje.

55 Ibrahim edde hibar bongšor manuš okkolor uwore,

abadul abad adorhatir goribar hota Allaye monot raikke."

56 Ar Moriyam maš tin maš Elizabetor górot taki bade nizor górot uwafes firi giyegoi.

Torikotor gusol doya Yahyar zormo

57 Bade zehon Elizabete fuwa biyaibar din furon oiye, hibaye ek futore biyaiye. 58 ar hibar ḍen gór bam gójja edde egena okkole fuinne ze, Mabude hibare hoto ḍõr ador dehaiye, edde hitara hibar fũwati kuši goijje.

59 Ašṭo dinor din hitara fuware azomi goraito aišše, edde hibar bafor nam mozin hitara fuwar nam Zakariya rakito saiye, 60 kintu fuwar maye zuwabe hodde: "No, hitar nam Yahya raka oibo."

61 Hitara hibare hodde, "Tũwar egena okkolor butore hono kiyor nam to Yahya nai."

62 Bade hitara fuwar bafore išara gori hibattu zainto saiye fuwar nam ki rakito so hoi. 63 Zakariyaye ekkan lekibar silet maigge edde heṛe leikke: "Itar nam Yahya." Henot beggune ammuwak oiye. 64 Ar hehon Zakariyar muk kuligiyegoi edde zil eridiya oi giyegoi, toi hibaye Allare tarif gora šuru goijje. 65 Hen deki atehasor manuš okkol beggune beši ammuwak oiye. Henot ze hanḍo okkol goiṭṭe hinor babute Ehudiyar har fahari elehar manuš okkole howa hoi gora šuru goijje. 66 Mabudor hat ei fuwar uwore aššil buli zedune ei hota okkol fuinne hitara hin dilot raikke edde fusar goijje: "Ḍõr oile ei fuwa ki oibo?"

Zakariyar šukurana gozol

67 Hibar baf Zakariyaye he Pak Ruhuye furaiya oi nobi hisabe hota hoiye, hodde:

68 "Israilor Allah Mabudor tarif ok,

kiyollahoile hibaye nizor mainšor uzu suk diye edde deha šunar bar loiye.

69 Allaye ãralla hibar gulam Daudor bongšottu

ekzon šoktiwala basailoiya tuille.

70 (Ei wadare Allaye bout age hibar pak nobi okkolor muke howaiye.)

71 Dušmon okkolor edde zara ãrare hingša gore

hitarar hatottu basaibo.

72 Allaye ãrar bafdadare doya dehaiye

edde hibar paki wadare monot raikke,

73 he wadare hibaye ãrar baf, Ibrahimor hãse dil:

74 Hetolla ãra dušmon okkolor hatottu ḍor sara uddar oiyi,

toi zene ãra zetodin basi, Allar sukor sarme

75 pak saf edde soiyi bafe Allar šeba gori fari.

76 Ar oh ãr fuwa, tore šorbo šoktiwalar nobi hoi ḍaka oibo,

kiyollahoile tũi Malikor age age zaibi edde Malikor fõt ṭik goribi.

77 Edde Malikor manuš okkolore uddar sinaibi,

hẽtte hitarar guna maf gora oibo,

78 kiyollahoile ãrar Allar doyaye boraiya.

Uworwalar fohor beil uṛefan oibo ãrar uwore,

79 zara andarot edde morar sabat boi roiye,

edde ãrare šantir fõtot solai fare."

80 Ar fuwawa bari uiṭṭe edde ruhuye mojbut oiye; Israili okkolor munttu aibar age foijjonto Yahya bošoti sara elehat maze zibon haṛaiye.

Siyara Luk 2 ->