Torah 16

Hazera edde Ismail

1 Ibraimor bou, Saraiye, hiballa hono fuwain no biya. Kintu hibattu Hazera name ek Mišoriyo bandi aššil; 2 toi Saraiye Ibraimore hodde, "So Mabude ãre fuwain feṛot lowattu dure raikke, foriyad gorir, tũi ãr bandir hãse zo; oitfare ãi hibar duwara ek fut faiyum."

Ar Ibraime Sarair hotat razi oiye. 3 Toi Ibraime Kenanot doš bosor taki bade, Saraiye, hibar Mišoriyo bandi Hazerare loi, hibar nizor zamai, Ibraimore diye. 4 Bade hiba Hazerar hãse giye, edde hiba hamil oiye.

Ar hibaye zehon hamil oiyede buzi faijje, hibaye hibar malik sahebare hela gora šuru goijje. 5 Henot Saraiye Ibraimore hodde, "Ãr uwore ei dukkor daiyi tũi. Ãi ãr bandire tũwar bukot dilam, kintu hiba hamilde buzi fariyore hibaye ãre hela gorer. Mabude tũwar edde ãr bisar gorok!"

6 Ibraime Saraire hodde, "Sa, tor bandi tor hatot, tottu ziyan bala lage gor." Henot Saraiye Hazerare en duk diya šuru goijje, hiba hentu dáigiyegoi.

7 Bade Mabudor firistaye bošoti sara elehat, Soar zade fõtor kinare nol kuwa asede he nol kuwar fanir ḍake Hazerare faiye. 8 Hibaye hodde, "Sarair bandi, Hazera, tui hontu aiyor edde hoṛe zor?"

Hibaye zuwabe hodde, "Ãi ãr saheba Sarair hãsottu dáizairgoide."

9 Toi Mabudor firistaye hodde, "Tui tor saheba Sarair hãse uwafes firi zaigoi edde hibar gulami manilogoi." 10 Mabudor Firistaye hodde, "Ãi tor bongšore eto baraidiyum, hitarare goni šeš gora no zaibo."

11 Mabudor firistaye hibare aro hodde:

"Sa, tui hamil,

ar tui ek fut biyaibi.

Ar tui hitar nam rakibi Ismail,

kiyollahoile Mabude tor dukkore fuinne.

12 Ar hite ekzon murailla gadar ḍoilla manuš oibo;

hite beggunor berudde hat tulibo,

ar beggune hitar berudde hat tulibo.

ar hite hitar egena okkol loi,

bezur takibo."

13 Bade hiba loi ze hota hoiye he Mabudore ei namman diye: "Tũi he Allah ze ãr uzu sor," haron hibaye hodde, "Ze ãr uzu sar ãi hibare dekilam neki?" 14 Hetolla he kuwar nam aššil Beer-Lahai-Roi, hiba Kadeš edde Beredor maza mazi zagat ase.

15 Bade Hazeraye Ibraimolla ek futore biyaiye, ar Ibraime Hazeraye biyaiyede he futor nam diye Ismail. 16 Hazeraye Ibraimolla Ismailore biyaiyede hẽtte Ibraimor boyoš aši so bosor.

<- Torah 15 Torah 17 ->