Link to home pageLanguagesLink to all Bible versions on this site
3
Leo mae lahenda Yahudi ra ranuu haak sipo posaka neme Manetualain hehelu na mai, ria boe ta poꞌi-tata naa si
1 Kalu leoꞌ na, sona lahenda Yahudi fo sunat a, onto ubeaꞌ? Bate emi afi mae, lahenda Yahudi ra hapu dodouꞌ ma malole lena, neme lahenda fo ta Yahudi ra fa hete? 2 Tebe! Lahenda Yahudi ra hapu oontoꞌ nai hata dodouꞌ. Masososan, huu no Manetualain fee lahenda Yahudi ra nonoi-lakaꞌ, ela duiꞌ ma ranea ratalolole Ria Hara-dasin. 3 De leoꞌ bea? Bate emi afi mae, Manetualain ta bisa tao tuka hata fo riꞌ Ana nafada, nana huu lahenda Yahudi ruma ta ramahere Ni fa do? 4 Ta bisa fa! Leo mae basa lahenda rai dae-bafoꞌ ia mapuputaꞌ ara, tehuu Manetualain riꞌ dedea naroo matetuꞌ a! Mafarereneꞌ hata fo manaduiꞌ nai Susura Makamoiꞌ daleꞌ laꞌe-neuꞌ Manetualain nae,
“Lahenda fo riꞌ tuꞌu salaꞌ nae,
Ana naetuꞌ dedeaꞌ ta beibeberaꞌ.
Tehuu neuꞌ ko ara bubuluꞌ rae,
hata fo Ana dedea ni a, memaꞌ tebe.
Tantu Ana naseki,
nana huu Ana ta bisa dedea sala fa.”✡Sosoda Iꞌio-oꞌoaꞌ ara 51:4

5 Maneniko ita tao salaꞌ, tehuu Manetualain bei tao malole laꞌo naroo neuꞌ ita. Ria natudu ledo-ledo neuꞌ basa lahenda ra nae, hata fo Manetualain taon memaꞌ tebe natetu no Ria dedean. Kalu leo naꞌ, sona ita bei tae ubeaꞌ bali? Sakaꞌ tae, maneniko Manetualain naetu huhukuꞌ neuꞌ ita, sona ta beibeberaꞌ fa, do? (Huu fo lahenda ruma dedea rae leoꞌ na.) 6 Ta bisa fa! Maneniko Manetualain fee ita huhukuꞌ, sona Ana ta sala fa. Huu fo Ana nanuu haak de huku lahenda fo tao salaꞌ nai dae-bafoꞌ ia.

7 Maneniko au ta atetu a hehelu ka, tehuu Manetualain natetu na hehelu Na laꞌo naroo, sona ria natudu nae, Ria nana, kahereꞌ. Ubeaꞌ taon de Ana parisaꞌ au soda ka, boe ma naetuꞌ au dedea ka nae, hata fo au tao ni a, sala? 8 Bosoꞌ leo naꞌ! Maneniko nau tuka duduꞌa-aafi leo naꞌ, emi tuka lahenda fo riꞌ nae, “Nemeꞌ na ela ita tao salaꞌ dodouinaꞌ, fo ela malole a boe tamba dodouꞌ!” Lahenda fo dedea nae leoꞌ na, naraa hapu huhukuꞌ. Tehuu lahenda tao namumulu au nade ka nae, au anori-afada lahenda leo naꞌ.

Ta hapu lahenda esa dale na roos a matetuꞌ boeꞌ, huu fo basan tao salaꞌ
9 De leoꞌ bea? Emi afi mae ita lahenda Yahudi a malole lena neme lahenda fo ta Yahudi ra fa? Ta bisa fa! Huu fo au atudu neuꞌ emi ae, basa lahenda ra tuda rala salaꞌ daleꞌ so, leo mae ria lahenda Yahudi do, ta Yahudi fa. 10 Sama leoꞌ manaduiꞌ nai Manetualain Susura Makamoi Na nae,
“Ta hapu lahenda nasoda roo-tetuꞌ laꞌo naroo.
Ta hapu esa boeꞌ!
11 Ta hapu lahenda bubuluꞌ matetuꞌ laꞌe-neuꞌ Manetualain.
Ta hapu esa saka Manetualain boeꞌ.
12 Basa si heo reme eno masoda roo-tetuꞌ a mai.
De ara ta dadadiꞌ soꞌ.
Ta hapu lahenda natudu dale malole.
Ta hapu esa boeꞌ!✡Sosoda Iꞌio-oꞌoaꞌ ara 14:1-3; 53:1-3
13 Sira dedea-nafadan, naboo puru,
sama leoꞌ rates fo lahenda ali seluꞌ ana.
Sira bafa nara kalua adaꞌ noi napuputaꞌ a.
Sira dedean fo kalua neme bafa nara mai,
sama leoꞌ meke a raso na.✡Sosoda Iꞌio-oꞌoaꞌ ara 5:10; 140:4
14 Sira bafa nara ralelaꞌ adaꞌ noi doꞌi lahenda,
ma dedea tadaluꞌ fo tao fee lahenda dale hedi,
huu fo ria riꞌ kalua neme sira dale tadalu nara mai.✡Sosoda Iꞌio-oꞌoaꞌ ara 10:7
15 Ara ta biiꞌ raisa lahenda.
16 Ara leo beaꞌ reu sona,
ara rahiiꞌ tao nahoteꞌ nai na,
ma tao susa rupaꞌ ara neuꞌ lahenda.
17 Ara ta rasoda no mole-dame,
ma ta rasoda no tesatei-tamadaleꞌ.✡Yesaya 59:7-8
18 Ara ta bisa ranenete rala ao nara fa,
nana huu ta bii Manetualain baiꞌ boeꞌ.”✡Sosoda Iꞌio-oꞌoaꞌ ara 36:2

19 No ria na, ta hapu lahenda esa bisa nae, ria salan taꞌa. Huu fo Ita bubuluꞌ tae, Manetualain fee Atoran Na neuꞌ lahenda, ela tao tukan. Neuꞌ ko dae-bafoꞌ ia noe, te basa lahenda nai dae-bafoꞌ ia muste rasare Manetualain, ela Ana naetuꞌ sira dedea nara nae, ara sala, do taꞌa. 20 Huu ria na, de ta hapu lahenda esa bisa nafada nae, “Manetualain tao au neuꞌ, lahenda dale roos, nana huu au tao tuka Ria Atoran nara katemaꞌ.” Ta bisa fa! Huu fo Manetualain Atoran Na riꞌ natudu nae, ita basa tao salaꞌ.✡Sosoda Iꞌio-oꞌoaꞌ ara 143:2; Galatia 2:16

Ita muste tamahere Ramatua Yesus, besaꞌ ko Manetualain tao ita neuꞌ lahenda dale roos
21 Bosoꞌ moi patararaaꞌ a laꞌe-neuꞌ Manetualain eno Na ela ita bisa malole seluꞌ to Ni. Matetu na, ita bisa malole to Ni, ta huu ita tao tuka Ria Atoran Na fa. Ria Atoran na riꞌ manaduiꞌ leo naꞌ, ma Ria mana nesi mata fai ulu nara boe rafada leoꞌ na nai Manetualain Susura Makamoi Na daleꞌ. 22 Manetualain tao ita neuꞌ lahenda dale roos, de malole to Ni, tepoꞌ fo ita tamahere Yesus Kristus. Ana ta hehere mata fa, nana huu Ana tao leo naꞌ soa-neuꞌ basa lahenda fo ramahere Yesus.✡Galatia 2:16

23 Manetualain nana lalao-lalafuꞌ. No ria na, ita boe muste lalao-lalafuꞌ, besaꞌ ko Ana bisa sipoꞌ na ita. Tehuu basa lahenda tao salaꞌ. Huu ria na, de lahenda fo soba-soba tao aon malole no Manetualain, ta bisa lalao-lalafuꞌ sama leoꞌ Manetualain. 24 Leo mae leoꞌ na, tehuu Manetualain riꞌ natudu dale malole Na, ma naetuꞌ nae, ita salaꞌ taꞌa so. Ana sipoꞌ ita leoꞌ na, nana huu Yesus Kristus soi-tefa na ita teme sala-sikoꞌ ara mai so.

25-26 Manetualain tudu na Yesus, fo dadi tutunu-hohotu napoti mamaeꞌ, ela sae-safe heni ita sala-siko nara. Tehuu ita muste tamahere Ni tae, Ana sipo na ita huhuku na. De Ana fee daa Na faa, ma mate kati ita. No ria na, Manetualain natudu nae, hata fo Ana naetuꞌ basan a, tebe. Fai a ulu na, Ana nanenete nan seli, de Ana here nau nafarene heni sala-sikoꞌ fo riꞌ maulu na lahenda tao a. Tehuu maneniko Ana ta huku lahenda masalaꞌ a, sona ta beibeberaꞌ fa. De Ana soi enoꞌ fo ela Yesus Kristus bisa lepa-nasaa ita lahenda masalaꞌ a huhuku na. Besaꞌ ia, Ana natudu neuꞌ basa lahenda ra nae, Ana tao malole naroo. Basa lahenda masalaꞌ fo ramahere Yesus, Ana naetuꞌ nan tao si reuꞌ lahenda dale roos.

27 De leo beaꞌ? Bate afi mae emi bisa dedea bau-inaꞌ, nana huu Manetualain sipoꞌ na emi so, do? Ta bisa fa! Nau natudu Atoran esa, fo tao na emi malole mo Manetualain, do? Bate mae Manetualain sipoꞌ emi, nana huu emi tao hata malole, do? Ta bisa fa! Ita bisa tatudu adaꞌ noi Atoran fo nae, Manetualain sipoꞌ ita nana huu tamahere Yesus. Noi ri naꞌ so!

28 Huu ria na, de besaꞌ ia ita bubuluꞌ leo iaꞌ: lahenda bisa malole no Manetualain, nana huu ara ramahere Ni, ta huu ara tao tuka Ria Atoran Na fa.

29 Au nau atane leo iaꞌ: Manetualain sipoꞌ adaꞌ noi lahenda Yahudi ra do, Ana sipoꞌ lahenda fekeꞌ ara boe! Tebe! Ana sipoꞌ basa-basan!

30 Manetualain nana, adaꞌ noi esaꞌ a. Ma Ana sipoꞌ adaꞌ noi enoꞌ esa, fo ita lahenda dae-bafoꞌ a bisa malole too Ni. Nana riꞌ ita tamahere Kristus. Enoꞌ ria riꞌ, soa-neuꞌ lahenda Yahudi ma lahenda ta Yahudi ra boe.✡Tui Seluꞌ Laꞌe Neuꞌ Eno Sodaꞌ a 6:4; Galatia 3:20

31 De au nau atane leo iaꞌ: maneniko ita tamahere Kristus, sona ose heni Manetualain Atoran Na, do? Taꞌa! Matetu na, tamahere Kristus riꞌ tao tatetea Manetualain Atoran Na.

<- Roma 2Roma 4 ->