‘Soaneuꞌ saraniꞌ fo rai kota Epesus:

Susuraꞌ ia, neme Au mai, Yesus. Au riꞌ homu ruuꞌ hituꞌ rai Au lima ona Ka. Au boe laꞌo aleleꞌi fo memete dedede lilopilas kahituꞌ sira esa-esa. Nenene Au dedea Ki ia.

2 Au ita emi leleo-lalaꞌo mara nai kota Efesus so, emi moi-tao sota man seli soaneuꞌ Ramatuaꞌ a. Maneniko hapu lahenda tadaluꞌ nai emi talada, emi ta fee lelaꞌ neuꞌ ana fa. Ma maneniko lahenda mai fo napuputaꞌ nae, ria nana Ramatuaꞌ a lahenda nadedenun, sona emi parisaꞌ matalolole ria leleo-lalaꞌon, ela bubuluꞌ mae, lahenda rupa leo naꞌ a nana lahenda mapuputaꞌ, do taꞌa. Boe ma emi tipa henin, ma ta mamanene ni. 3 Leo mae lahenda tao rasususaꞌ emi, nana huu mamahere Au, tehuu emi manenete mahere, ma ta heoꞌ fa.

4 Tehuu, Au ita emi tuda huu hata esa. Fai a ulu na tepoꞌ fo emi besaꞌ ko mamahere Au a, emi masue-malaiao esa no esa. Tehuu besaꞌ ia, emi ta leo naꞌ soꞌ. 5 De emi muste mafarene fai a ulu na dei! Besaꞌ ia emi dooꞌ a man seli neme nonoi-tatao mauluꞌ ria mai so! Huu ria na de, emi muste ediꞌai mara neme sala-siko mara mai, fo masue-malaiao sama leoꞌ maulu na. Maneniko taꞌa, sona neuꞌ ko Au atafali mai fo hai faliꞌ dededeꞌ lilopilas sira reme emi mai. 6 Tehuu, Au amahoꞌo baianaꞌ, nana huu emi tipa heni Nikolai nanori-nafadan fo ria ana mana tukadea nara tao tuka ni a. Au boe tipa heni sira nonoi-tataon.*Lahenda malelaꞌ Susura Makamoiꞌ ara rae, hata fo Nikolai sara nanori-nafada isi na, ita ta talelaꞌ ana fa.

7 Nenene matalolole, hata fo Ramatuaꞌ a Dula-dale Na nafadan neuꞌ saraniꞌ ara a. Lahenda fo nanenete tuka nahere Au losaꞌ ana mate, neuꞌ ko Au feen lelaꞌ, ela ana bole naa ai-boaꞌ neme ai-huu fo nai Manetualain okan daleꞌ. Huu fo bea riꞌ naa ai-huuꞌ ria boa na, ana hapu masoda matetuꞌ manaetu-manabasa taaꞌ.’ ”✡Tutui Masososaꞌ 2:9; Daebafo Rupa-lole Bebeuꞌ a 22:2; Yeskial 28:13; 31:8

‘Soaneuꞌ saraniꞌ fo rai kota Smirna:

Susuraꞌ ia neme Au mai, Yesus. Basa-basan reme Au mai, mulai neme masososa na losa babasan. Maulu na Au mate, tehuu besaꞌ ia Au asoda seluꞌ so. De nenene Au dedea Ki ia.✡Yesaya 44:6; 48:12; Daebafo Rupa-lole Bebeuꞌ a 1:17; 22:13

9 Au ita emi doidoso ma nai kota Smirna so. Tuka lahenda dae-bafoꞌ a memete na, sona emi ia nana lahenda manatoꞌa-manataaꞌ. Sekona te, tuka Ramatuaꞌ a memete na, sona emi nana kamasuꞌi. Lahenda fo dedea ramumulu-ramamaeꞌ emi a, manaku rae, sira nana Ramatuaꞌ a lahendan. Sekona te, Ramatuaꞌ a lahendan ta sira fa. Sira sama leoꞌ saraniꞌ fo tuka noi nitu ra malaka na. 10 De, nenene matalolole. Neuꞌ ko emi bei hapu susa-lela, tehuu bosoꞌ bii. Sadi emi bubuluꞌ, huu fo nitu ra malaka na sakaꞌ homu ra emi ruma ela tee emi leo bui daleꞌ meu, losa faiꞌ sanahulu. Ria hihii na, emi hiru masadea Au. Leo mae ara nau raisa emi, tehuu bosoꞌ mafarene heni Au. Lahenda fo nanenete tuka nahere Au losaꞌ ana mate, neuꞌ ko Au balas ria sosota na, ela ana nasoda naroo sama-sama no Au.

11 Nenene matalolole hata fo Ramatuaꞌ a Dula-daleꞌ Na nafadan neuꞌ saraniꞌ ara. Lahenda fo nanenete tuka nehere Au losaꞌ ana mate, neuꞌ ko ta nameda doidoso nai tasi aipilaꞌ mana mate taaꞌ a. No ria na, ana ta mate ka laiꞌ dua na soꞌ.’ ”✡Daebafo Rupa-lole Bebeuꞌ a 20:14; 21:8

‘Soaneuꞌ saraniꞌ fo rai kota Pergamus:

Susuraꞌ ia, neme Au mai, Yesus. Au riꞌ homu tafa tandeꞌ, mahina dea-daleꞌ. Nenene Au dedea Ki ia.

13 Au bubuluꞌ emi kota Pergamus ma so. Mana homu pareta fo nai naa, nana riꞌ nitu ra malaka na. Leo mae leoꞌ na boe, emi homu mahere Au nade Ka, ma mamahere maroo Au. Fai a ulu na Au lahenda Ki esa nai naa, nade Antipas. Ana nanori-nafada kokosen roo-tetuꞌ laꞌeneuꞌ Au eno masoda Ka, tehuu ara raisa ni. Leo mae leoꞌ na boe, tehuu emi ta malena Au fa.

14 Tehuu Au ita, emi tuda huu hata esa-dua. Hapu lahenda hida reme emi mai rahiiꞌ tuka Balaam nanori-nafadan. Fai a ulu na Balaam nanori Balak fo dudukuꞌ lahenda Israel ara, losaꞌ ara ralena laka neuꞌ Manetualain hihii-nanaun. Ana fufudi-leleꞌo si fo soko-taku, ma raa nanaaꞌ sosokoꞌ, ma hohoke.✡Susura Dudui Nadeꞌ a 22:5, 7; 25:1-3; 31:16; Tui Seluꞌ Laꞌe Neuꞌ Eno Sodaꞌ a 23:4 15 Lahenda hida reme emi tuka Nikolai nanori-nafadan boe.✡Daebafo Rupa-lole Bebeuꞌ a 2:6 16 De emi muste ediꞌai mara meme sala-sikoꞌ mara mai. Kalu taꞌa sona, ta dooꞌ a te, Au mai fo oi dedeaꞌ emi boe, tande na sama leoꞌ tati pake tafaꞌ.

17 Nenene matalolole hata fo Ramatuaꞌ a Dula-dale Na nafada neuꞌ Ria sarani Nara. Lahenda fo nanenete tuka Au losaꞌ ana mate, neuꞌ ko Au fee ni naa roti manna, fo nanapeda natalololeꞌ nai nusatetu-ikutemaꞌ a. Neuꞌ ko Au boe fee ni batu fulaꞌ esa, manaduiꞌ ria nade bebeu na. Noi ria mesaꞌ ana riꞌ nalelaꞌ nadeꞌ ria. Tehuu lahenda fekeꞌ a ta bubuluꞌ fa.’ ”✡Kalua reme Masir 16:14-15; 16:33-34; Yohanis 6:48-50; Yesaya 62:2; 65:15

‘Soaneuꞌ saraniꞌ fo rai kota Tiatira:

Susuraꞌ ia, neme Au mai, Yesus, fo Manetualain Ana Na! Au mata Ka nahaa sama leoꞌ aipilaꞌ a, ma Au ei Ka boe pilas a sama leoꞌ hotu riti nai aipilaꞌ daleꞌ. Nenene Au dedea Ki ia.

19 Au ita emi masoda mara so. Emi sue-lai matetuꞌ Au, ma mamahere tebe-tebe neuꞌ Au. Emi tuka maroo Au pareta Ka, de malalau-maoono lahenda ra. Leo mae lahenda tao doidoso emi boe, emi manenete maroo. Au boe bubuluꞌ ae, besaꞌ ia, emi boe-boe moi-tao soaneuꞌ Au.

20 Tehuu emi tuda nai hata esa daleꞌ: emi sipoꞌ no malole inaꞌ Isabel fo riꞌ nadedema aon nae, ria nana Ramatuaꞌ a mana nesimatan. Ma emi feen lelaꞌ fo nanori-nafada pepekoꞌ Au lahenda kara. Huu no, ria nanori napuputan ria, losaꞌ Au lahenda kara hohoke, ma raa-rinu nanaa sosokoꞌ. 21 Au asaꞌai inaꞌ ria kokosen, ela ana foa ela salaꞌ ria. Tehuu ana ta nau fa.

22 De, mete matalolole, huu fo besaꞌ ia Au aetuꞌ so, ela huku ni neniꞌ hedis esa, losaꞌ ana ta bisa foa neme mamana susuku na mai. Leoꞌ na boe neuꞌ basa lahenda fo hohoke ni a. Maneniko ara ta foa ela ina tadaluꞌ ria, sona ta dooꞌ a soꞌ te, Au huku si boe. 23 Neuꞌ ko Au aisa ina tadaluꞌ ria ana nara. No ria na, emi basa fo kamahereꞌ ara bubuluꞌ mae, Au alelaꞌ lahenda dae-bafoꞌ a dale ana boboko nara. Ma neuꞌ ko Au balas emi tuka nonoi-tatao mara.✡Sosoda Iꞌio-oꞌoaꞌ ara 7:10; 62:12; Yeremia 17:10

24 Tehuu nai Tiatira, emi ruma ta tuka inaꞌ ria nanori-nafada tadalu na. Emi tipa heni nanori nino fo ara rae, ‘nitu ra nanori maiu na’. Huu ria na de, Au ta parlu asaꞌai emi bali, 25 sadi emi homu mahere namahere mara losaꞌ Au mai. 26-28 Lahenda fo nanenete tuka Au losaꞌ ana mate, neuꞌ ko Au fee ni kuasa. Kuasa ria bauinaꞌ a, sama leoꞌ Au hapu neme Papa Ka mai, fo pareta basa lahenda nusaꞌ ara rai dae-bafoꞌ a neniꞌ meru-ranin. Kalu bea nalena laka neuꞌ ana, neuꞌ ko tao nalulutuꞌ asa, sama leoꞌ lahenda tao ralulutuꞌ ure dae a.✡Sosoda Iꞌio-oꞌoaꞌ ara 2:8-9 Neuꞌ ko Au fee emi ruu dulupilaꞌ a boe.

29 Nenene matalolole hata fo Ramatuaꞌ a Dula-daleꞌ Na nafadan neuꞌ Ria sarani nara.’ ”

<- Dae-bafo Rupa Bebeuꞌ 1Dae-bafo Rupa Bebeuꞌ 3 ->